၁၅။ ပွမစၞောန်ထ္ၜးကဵုဒ္ဂေတ်ဝတ်ထေက်ကဵုဒးပတုဲ ပ္ဍဲအ္စာဥပဇ္ဍာယ်
၆၄။ ပ္ဍဲကာလမွဲအခိၚ် ခမဳဂမၠိုၚ် ဟွံမွဲကဵုအ္စာဥပဇ္ၛာယ် အ္စာနိဿဲဗ္ဒာဲ ဟွံမွဲကဵုညးဒၠောံဗတောန် ဝေတ်စၞောန်ထ္ၜးဒှ်တုဲ သီုမရုၚ်လတက် ဗွဲဟွံဒးရး သီုဟွံဍိုက်ပေၚ်တဴကေုာံအာကာရ အရာခမဳဂမၠိုၚ်ဂှ် ဂေတ်ဂ္ၚေၚ်ပိဏ္ဍပါတ်အိုတ်ရ။ ခမဳဂမၠိုၚ်ဂှ် ဃောမၞိဟ်ဂမၠိုၚ်စသုၚ်ဒၟံၚ် လၟောဝ်ဏာဗဗေၚ်ဒုၚ်ပိဏ္ဍပါတ် ပ္ဍဲလတူဘောဇိုန် စၞစ စၞကၠာန် စၞသုၚ်ဂမၠိုၚ်အိုတ်ရ၊ ပုၚ်သွဂှ်လေဝ် အာတ်ကေတ် အလဵုဇကုတုဲ သ္ပပြဘိုဂ်အိုတ်ရ၊ ပ္ဍဲဇြပ်ကဵုပိုဉ်လေဝ် သီုမၞုံကဵုရမျာၚ်သကာတ်မြဟ်ဇၞော်လှဲဂှ် ပဒတဴဒၟံၚ်အိုတ်ရ။
မၞိဟ်ဂမၠိုၚ်ဂှ်—
“ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ မုဟိုတ် သီုမရုၚ်လတက်ဗွဲဟွံဒးရး သီုဟွံဍိုက်ပေၚ်တဴကေုာံအာကာရအရာခမဳဂမၠိုၚ်ဂှ် ဂေတ်ဂ္ၚေၚ်ပိဏ္ဍပါတ်အိုတ်ရော? ခမဳဂမၠိုၚ်ဂှ် ဃောမၞိဟ်ဂမၠိုၚ်စသုၚ်ဒၟံၚ် လၟောဝ်ဏာဗဗေၚ်ဒုၚ်ပိဏ္ဍပါတ်ပ္ဍဲလတူဘောဇိုန် စၞစ စၞကၠာန် စၞသုၚ်ဂမၠိုၚ်အိုတ်ရော? ပုၚ်သွဂှ်လေဝ် အာတ်ကေတ်အလဵုဇကုတုဲ သ္ပပြဘိုဂ်အိုတ်ရော? ပ္ဍဲဇြပ်ကဵုပိုဉ်လေဝ် ညံၚ်ရဴဗဗၞးဂမၠိုၚ် ပ္ဍဲပေါဲစသုၚ် ဗဗၞးကီု သီုမၞုံကဵုရမျာၚ်သကာတ်မြဟ်ဇၞော်လှဲဂှ် ပဒတဴဒၟံၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ယြဴခမဳဂမၠိုၚ် ပၟိက်အောန်အိုတ်ရ၊ တရိုပ်စိုတ်လောဲသွာအိုတ်ရ၊ (အေၚ်သတှ်ေအိုတ်ရ) လေပ်ဂွပါပ် ပွသရာပါပ်အိုတ်ရ၊ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာအိုတ်ရ၊ မၞုံပၟိက်ကဵုသိက္ခာပိပြကာအိုတ်ရ၊ ခမဳဂမၠိုၚ်ဂှ်—
“ခမဳဂမၠိုၚ် မုဟိုတ် သီုမရုၚ်လတက် ဗွဲဟွံဒးရ: သီုဟွံဍိုက်ပေၚ်တဴကေုာံအာကာရအရာခမဳဂမၠိုၚ်ဂှ် ဂေတ်ဂ္ၚေၚ်ပိဏ္ဍပါတ်အိုတ်ရော? ခမဳဂမၠိုၚ်ဂှ် ဃောမၞိဟ်ဂမၠိုၚ်စသုၚ်ဒၟံၚ် လၟောဝ်ဏာဗဗေၚ်ဒုၚ်ပိဏ္ဍပါတ်ပ္ဍဲလတူဘောဇိုန် စၞစ စၞကၠာန် စၞသုၚ်ဂမၠိုၚ်အိုတ်ရော? ပုၚ်သွဂှ်လေဝ် အာတ်ကေတ်အလဵုဇကုတုဲ သ္ပပြဘိုဂ်အိုတ်ရော? ပ္ဍဲဇြပ်ကဵုပိုဉ်လေဝ် သီုမၞုံကဵုရမျာၚ်သကာတ်မြဟ်ဇၞော်လှဲဂှ် ပဒတဴဒၟံၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲကြဴနူဂှ် ခမဳဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ်ကောံဓရီုတုဲမ္ဂး—
“ယွံခမဳတအ် ခမဳဂမၠိုၚ် သီုမရုၚ်လတက် ဗွဲဟွံဒးရး သီုဟွံဍိုက်တဴကေုာံအာကာရအရာခမဳဂမၠိုၚ်ဂှ် ဂေတ်ဂ္ၚေၚ်ပိဏ္ဍပါတ်အိုတ်ရ။ ခမဳဂမၠိုၚ်ဂှ် ဃောမၞိဟ်ဂမၠိုၚ်စသုၚ်ဒၟံၚ် လၟောဝ်ဏာဗဗေၚ်ဒုၚ်ပိဏ္ဍပါတ်ပ္ဍဲလတူဘောဇိုန် စၞစ စၞကၠာန် စၞသုၚ်ဂမၠိုၚ်အိုတ်ရ။ ပုၚ်သွဂှ်လေဝ် အာတ်ကေတ် အလဵုဇကုတုဲ သ္ပပြဘိုဂ်အိုတ်ရ။ ပ္ဍဲဇြပ်ကဵုပိုဉ်လေဝ် သီုမၞုံကဵုရမျာၚ်သကာတ်မြဟ်ဇၞော်လှဲဂှ် ပဒတဴဒၟံၚ်အိုတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သမုက် ခမဳဂမၠိုၚ်ရ။
ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ ယွံခမဳတအ် (ကမၠောန်ပွ) တြုံမလ္ၚုသၟး (နူမဂ်ဖိုလ်) ဂမၠိုၚ်ဝွံ ဟွံထေက်ကုခမဳဂမၠိုၚ်ရ၊ ဟွံဗဗွဲရ၊ ဟွံသပ္ပါယ်ရ၊ အာကာရအရာခမဳတအ် ဟွံသေၚ်ရ၊ ဟွံဂပ်ဝ်ရ၊ ဟွံထေက်ကဵုသ္ပရ၊ ယွံခမဳတအ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် မုဟိုတ် သီုမရုၚ်လတက် ဗွဲဟွံဒးရး သီုဟွံဍိုက်ပေၚ်တဴ ကေုာံအာကာရအရာခမဳဂမၠိုၚ်ဂှ် ဂေတ်ဂ္ၚေၚ်ပိဏ္ဍပါတ်အိုတ်ရော? ခမဳဂမၠိုၚ်ဂှ် ဃောမၞိဟ်ဂမၠိုၚ်စသုၚ်ဒၟံၚ် လၟောဝ်ဏာဗဗေၚ်ဒုၚ်ပိဏ္ဍပါတ် ပ္ဍဲလတူဘောဇိုန် စၞစ စၞကၠာန် စၞသုၚ်ဂမၠိုၚ်အိုတ်ရော? ပုၚ်သွဂှ်လေဝ် အာတ်ကေတ်အလဵုဇကုတုဲ သ္ပပြဘိုဂ်အိုတ်ရော? ပ္ဍဲဇြပ်ကဵုပိုဉ်လေဝ် သီုမၞုံကဵုရမျာၚ်သကာတ်မြဟ်ဇၞော်လှဂှ် ပဒတဴဒၟံၚ်အိုတ်ရော? (ကမၠောန်ပွခမဳဂမၠိုၚ်သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ကုညးလျုၚ်ဇြုၚ်သ္ဍိုက်တုဲဂမၠိုၚ် တၞဟ်နပွမကဵုလျုၚ်ဇြုၚ်သ္ဍိုက်ဂၠိုၚ်တိုန်ကီု ကဵုကတဵုဒှ်ဟွံမာန်ရ၊ ယွံခမဳတအ် ဍာံဍာံစၟတ်စၟတ် (ကမၠောန်ပွခမဳဂမၠိုၚ်သ္ပဒး) ဝွံ ကုညးဟွံလျုၚ်ဇြၚ်သ္ဍိုက်ဂမၠိုၚ်ဏီ တၞဟ်နပွမဟွံကဵုလျုၚ်ဇြုၚ်သ္ဍိုက်ကီု ကုညးလျုၚ်ဇြုၚ်သ္ဍိုက်တုဲလ္ၚဵုဂမၠိုၚ် တၞဟ်နပွမကဵုလျုၚ်ဇြုၚ်သ္ဍိုက်လီုလာ်ကီု ကဵုကတဵုဒှ်ရ ရဴဝွံ (ဟီုဂရိုဟ်ရ)။
ပ္ဍဲကြဴနူဂှ် တဳလမၞုံပိုဉ်ကျာ်တြဲ ဟီုဂရိုဟ်တၚ်ဒုဟ် ခမဳဂမၠိုၚ်ဂှ် နဟိုတ်မဂၠိုၚ်တုဲမ္ဂး ဟီုဂလာန်ဂရိုဟ်မဟွံမွဲဂုဏ် ဒဒက်တဴဇကုဇကု ပွမဇြိုၚ်ကဵုလွဳမြိမြန်ဇကုဇကု ညးသအာၚ်ဂမၠိုၚ်ပွမဇြိုၚ်ကဵုလွဳမြိမြန် ပွမပၟိက်ဇၞော် ပွမဟွံအေၚ်သတှ်ေ (ဟွံတရိုပ်စိုတ်) ပွမမိပ်လဟိၚ် ပ္ဍဲဂကောံသကအ်ပွံၚ်ဂှ် ပွမလၞုဟ်လၞန်ဂမၠိုၚ်တုဲ နဟိုတ်မဂၠိုၚ်ဂၠၚ် ဟီုသ္ဂးတဴဂုဏ် ဒဒက်တဴဇကုဇကု ပွမလွဳမြိမြန်ဇကုဇကုလောဲသွာ ညးသအာၚ်ဂမၠိုၚ် လွဳမြိမြန်လောဲသွာ ပွမပၟိက်အောန် ပွမအေၚ်သတှ်ေ (တရိုပ်စိုတ်) ပွမတှ်ေကြဳထောံကိလေသ ပွမခါလယှ်ထောံကိလေသ ပွမမၞုံကဵုလျုၚ်ဇြုၚ်သ္ဍိုက် ပွမဟွံဆန်ၜန်ကိလေသ ပွမပတိတ်ဇြဟတ် နဝဳရိယဂမၠိုၚ်တုဲမ္ဂး ဟီုတွံတဴဂလာန်ဓရ် မဗဗွဲညဳသၟဟ်ကဵုဗီုဒဒှ်ဂှ် ကုခမဳဂမၠိုၚ်တုဲပ္ဍဲကြဴ—
၆၅။ “ယွံခမဳတအ် ကဵုအခေါၚ်အ္စာဥပဇ္ၛာယ် (မလေပ်မၠာ်သ္ၚေဝ်ဒၠောံဗတောန်ဒုဟ်ဇၞော်သၟတ်) ရ” ရဴဝွံ သ္ဂးကဵုခမဳဂမၠိုၚ်ရ။
ယွံခမဳတအ် အ္စာဥပဇ္ၛာယ်ဂှ် ပ္ဍဲလတူကွးပဒတဴမွဲစွံ သ္ဒးစွံစိုတ်မတွံဂးကောန်ရ၊ ကွးပဒတဴမွဲစွံဂှ် ပ္ဍဲလတူအ္စာဥပဇ္ၛာယ် သ္ဒးစွံစိုတ်မတွံဂးမအံက်ရ၊ ရဴဝွံ အ္စာ, ကွးဂမၠိုၚ်ဂှ် မၞုံကဵုပွမရှ်ေသှ်ေရဴဂဴ ပွမဇအ်သဝ်အောပ်မာ ပွမဂယိုၚ်လမျီုတုပ်သၟဟ် ရၚ်သကအ်ဂှ်ဒှ်တုဲ ပဒတဴမ္ဂး ကြက်အာစိုပ် ပွမဇၞော်မောဝ်ဖောအ်ဗြေဝ်ဍိုပ်ဍဴလှဲလး ပ္ဍဲသာသနာဝွံအိုတ်ရ။
ယွံခမဳတအ် ရဴဝွံ သ္ဒးဂိုၚ်ကေတ်ဥပဇ္ၛာယ်ရ၊ လ္ၜက်ကၠေဟ်ပတိုန် သ္ၚာကၞေဟ် ပ္ဍဲလတူပၞးပါဲမွဲလပါ်တုဲမ္ဂး လ္ၚောဝ်ဂၠးဇိုၚ် (ဥပဇ္ၛာယ်) ဂမၠိုၚ်တုဲ သီုမဂဇအ်ဒၟံၚ်ဗွဲလံက်ဂဇုန် ပၚ်ပတိုန်ခၠအ်သၟိပ်တဲတုဲမ္ဂး “ယွံတဳလပိုဉ် (တဳလပိုဉ်ဂှ်) ဩဝ်ဒှ်အ္စာဥပဇ္ၛာယ် အဲဍိက်ညိ၊ ယွံတဳလပိုဉ် (တဳလပိုဉ်ဂှ်) ဩဝ်ဒှ်အ္စာဥပဇ္ၛာယ် အဲဍိက်ညိ၊ ယွံတဳလပိုဉ် (တဳလပိုဉ်ဂှ်) ဩဝ်ဒှ်အ္စာဥပဇ္ၛာယ် အဲဍိက်ညိ” ရဴဝွံ သ္ဒးဟီုရ။
“ခိုဟ်သန်ရ ရဴဝွံကီု” “ဟွံဇြိုၚ်ကုအဲရ” “လျိုၚ်အဲရ ရဴဝွံကီု” “ဗဗွဲရ ရဴဝွံကီု” “ဩဝ်ကဵုဍိုက်ပေၚ်တဴ ကေုာံအကာဲအရာကာပါၚ် မလေပ်ရၚ်တၠုၚ်ကဵုလျုၚ်ဇြုၚ်သ္ဍိုက်ညိ ရဴဝွံကီု” နကဵုဇကုကဵုဒှ် နကဵုပါၚ်ကဵုဒှ် နကဵုဇကုပါၚ်ကဵုဒှ် ကဵုတီကေတ်မ္ဂး၊ ဒှ်ဂိုၚ်ကေတ်ဥပဇ္ၛာယ်ရ။ နကဵုဇကုကဵုဒှ် နကဵုပါၚ်ကဵုဒှ် နကဵုဇကုပါၚ်ကဵုဒှ် ဟွံကဵုတီကေတ်မ္ဂး ဟွံဒှ်ဂိုၚ်ကေတ်ဥပဇ္ၛာယ်ရ။
၆၆။ ယွံခမဳတအ် ကွးပဒတဴမွဲစွံဂှ် သ္ဒးဒ္ဂေတ်ပ္ဍဲအ္စာဥပဇ္ၛာယ် ဗွဲမ္ဒးရးရ။ ကြက်သ္ဂးဂတဝွံတုန် ဗီုဒ္ဂေတ်ဗွဲမ္ဒးရးရ—
(ကွးပဒတဴမွဲစွံဂှ်) ဒၠိုက်ကတဵုနူဂယးပြဟ်တုဲ သၠောတ်ကၠေံဒၞပ်တုဲမ္ဂး လ္ၜက်ကၠေဟ်ပတိုန်သ္ၚာကၞေဟ် ပ္ဍဲလတူပၞးပါဲမွဲလပါ်တုဲ သ္ဒးဗဂိန်ကဵုဆုဒကရ၊ သ္ဒးဗဂိန်ကဵုဍာ်လာၚ်မုက်ရ၊ သ္ဒးလးသၞာဂဇအ်ရ၊ ယာဂုနွံမ္ဂး ကြဴကြာတ်ခရော်တုဲ သ္ဒးဗဂိန်ကဵုယာဂုရ၊ ကအ္စာဥပဇ္ၛာယ် မၚုက်ယာဂုတုဲဂှ် ဒုၚ်ကဵုဍာ်တုဲ ဟောဝ်ဂိုၚ်ကေတ်ခရော်တုဲ သ္ပဗွဲမ္ဒးရ: သီုဟွံကဵုထ္ဍိမြိလုက်စုက်ဒးဂှ် ကြဴကြာတ်တုဲမ္ဂး သ္ဒးသီဂိုၚ်ဒေပ်စွံရ၊ အ္စာဥပဇ္ၛာယ် ဒၠိုက်ကတဵု (နူဒၞါဲ) မ္ဂး သ္ဒးသီဂိုၚ်ဒေပ်ထောံသၞာဂဇအ်ရ၊ ယဝ်သၟိက်ဟန်ဗန်နွံမ္ဂး၊ သ္ဒးကွဟ်ကၟဟ် ဒၞါဲဂှ်ရ။
အ္စာဥပဇ္ၛာယ် သၟိၚ်လုပ်ကွာန်မ္ဂး၊ သ္ဒးဒုၚ်ကဵု သပိုၚ်ဗိုက်လုပ်ကွာန်ရ၊ သ္ဒးဂိုၚ်ကေတ်သပိုၚ်ဗိုက်ပ္ဍဲဘာရ၊ သ္ဒးဒုၚ်ကဵုဇုက်ကာယဗန်ရ၊ ထပ်လဝ်သ္ၚာသကိုပ်ဂမၠိုၚ်တုဲ သ္ဒးဒုၚ်ကဵုရ၊ ကြဴကြာတ်တုဲ သ္ဒးဒုၚ်ကဵုဗဗေၚ်မဒှ်မွဲဟာန်ကေုာံဍာ်ရ။ ယဝ်အ္စာဥပဇ္ၛာယ် နွံပၟိက်ကဵုခမဳဗွက်ကြဴမ္ဂး၊ ဗိုၚ်သပိုၚ် ဗွဲဗၞဳအဝဏ်မညဳသာ နမဂြောပ်ဗ္ဒန် ဗၞဳအဝဏ် ၁ ပိပြကာ, ဒက်ဇုက်ကာယဗန်, သၠောံရုၚ်လတက် သ္ၚာသကိုပ်ဂမၠိုၚ်မထပ်လဝ်, စုတ်ခၟောံသ္ၚာ, ကြာတ်ကြဴဂိုၚ်ကေတ်ဗဗေၚ်တုဲ သ္ဒးဒှ်ခမဳဗွက်ကြဴ အ္စာဥပဇ္ၛာယ်ရ၊ ဟွံထေက်ကဵု ဗက်အာ ဗွဲမသ္ၚောဲလောန်ရ၊ ဟွံထေက်ကဵုဗက်အာ ဗွဲကြပ်လောန်ရ၊ သ္ဒးဒုၚ်ဂိုၚ်ကေတ် ပွမလှာဲဂတးဗဗေၚ်ရ၊ ဃောအ္စာဥပဇ္ၛာယ် ဟီုဒၟံၚ်ဂလာန်ဂှ် ပၠံက်ပၠုပ်ပ္ဍဲအကြာအကြာတုဲ ဟွံထေက်ကဵုဟီုရ၊ အ္စာဥပဇ္ၛာယ် ဟီုသ္ဂးကြပ်ညောန်ကဵုအာပတ်မ္ဂး သ္ဒးဆေဝ်ဒဝ်ရ။
၁။ ဗၞဳအဝဏ်တၚ်က္ၜံၚ်ၜါလပါ် ကဵုပံၚ်ကဠုတ်—မိက်သ္ဂးရ။
ကလေၚ်ကၠုၚ် (နူဌာန်ဂ္ၚေၚ်ပိဏ္ဍပါတ်) မ္ဂး စဴကၠုၚ်ဗွဲကိုပ်ကၠာတုဲ သ္ဒးလးပညပ်လဝ်သၞာဂဇအ်ရ၊ သ္ဒးစွံပတန်လဝ် ဍာ်ကြဴဇိုၚ် ကဝေတ်ပေါတ်ဇိုၚ် ပ္ဍဲဇရေၚ်ရ၊ ဒစးဒုၚ်တၠုၚ်တရဴတုဲ သ္ဒးဒုၚ်ဂိုၚ်ကေတ်ဗဗေၚ်သ္ၚာရ၊ သ္ဒးဒုၚ်ကဵုသပိုၚ်ဗိုက်ပ္ဍဲဘာရ၊ သ္ဒးဟောဝ်ဂိုၚ်ကေတ်သပိုၚ်ဗိုက် လုပ်ကွာန်ရ၊ ယဝ်သ္ၚာဍေက်ဒၟံၚ်ပဠက်မ္ဂး၊ ဗၞတ်မွဲခဏဍောတ် သ္ဒးစဲလဝ်ပ္ဍဲဂမ္တဴတ္ၚဲရ၊ ၜိုန်ဂှ် စွံလဝ်ဗွဲမလအ်ဟွံဂွံရ၊ သ္ဒးထပ်သ္ၚာရ၊ ထပ်သ္ၚာမ္ဂး “လ္ပကဵုဒှ်ကဝ်ကေက် ‘ပၞေတ်ခ္ဍပ်’ ပ္ဍဲလဒေါဝ်ညိ” ရဴဝွံ သီုမပၠုပ်စိုတ်ဂှ် ယှအ်ကၠေံတၞုၚ်မုဟ်ပန်လပုဟ်တဲတုဲ သ္ဒးထပ်သ္ၚာရ၊ သ္ဒးစွံလဝ် ဇုက်ကာယဗန် ပ္ဍဲအပ္ဍဲသ္ၚာထပ်လဝ်ရ။
ပိဏ္ဍပါတ်နွံတုဲ အ္စာဥပဇ္ၛာယ်လေဝ် မိက်သ္ပပြဘိုဂ်မ္ဂး၊ ဒုၚ်ကဵုဍာ်ရပ်စပ်တုဲ သ္ဒးဗဂိန်ကဵုပိဏ္ဍပါတ်ရ၊ (နွံပၟိက်ဍာ်ဟာ ရဴဝွံ) သ္ဒးဂရၚ်ပတီသၟာန် အ္စာဥပဇ္ၛာယ် နကဵုဍ်သုၚ်ရ၊ ကုအ္စာဥပဇ္ၛာယ် မကဵုပိုဉ်တုဲဂှ် ဒုၚ်ကဵုဍာ််တုဲ ဟောဝ်ဂိုၚ်ကေတ်ဗဗေၚ်တုဲမ္ဂး သ္ပဗွဲမ္ဒးရး သီုဟွံကဵုထ္ဍိမြိလုက်စုက်ဒးဂှ် ကြဴကြာတ်သအးဇ္ၚးတုဲ သ္ပစဵုကဵုဍာ်ကှ်တုဲမ္ဂး ဗၞတ်မွဲခဏဍောတ် သ္ဒးစဲလဝ်ပ္ဍဲဂမ္တဴတ္ၚဲရ၊ ၜိုန်ဂှ် စွံလဝ် ဗွဲမလအ်ဟွံဂွံရ၊ သ္ဒးစွံဗဗေၚ်သ္ၚာရ၊ မိက်စွံဗဗေၚ်မ္ဂး နကဵုတဲမွဲလပါ်ဂှ် ရပ်ကေတ်ဗဗေၚ်တုဲ နကဵုတဲမွဲလပါ်ဂှ် ဇွိတ်စမ်ရံၚ် သၟဝ်ဇံၚ်ခါတ်ကီု သၟဝ်ဂတဵုကီုတုဲ သ္ဒးစွံရ၊ ဟဂွဴစွံဗဗေၚ် ပ္ဍဲတိမဟွံမွဲကဵုသၞာရ။ မိက်စွံသ္ၚာမ္ဂး နကဵုတဲမွဲလပါ်ဂှ် ရပ်ကေတ်သ္ၚာတုဲ နကဵုတဲမွဲလပါ်ဂှ် ဇွိတ်သပေါတ်ထောံဒုန်တေၚ်သ္ၚာ ဇုက်ဗလဲသ္ၚာတုဲ သ္ပလအိတ်မုဟ်ပ္ဍဲလပါ်တေံ သ္ပကဝးပ္ဍဲလပါ်ဏအ်တုဲ သ္ဒးစွံသ္ၚာရ။
အ္စာဥပဇ္ၛာယ် ဒၠိုက်ကတဵု (နူဒၞါဲ) မ္ဂး သ္ဒးသီဂိုၚ်ဒေပ်ထောံ သၞာဂဇအ်ဂှ်ရ၊ သ္ဒးသီဂိုၚ်ဒေပ်ထောံ ဍာ်ကြဴဇိုၚ် ဂတဵုပေါတ်ဇိုၚ် ကဝေက်ပေါတ်ဇိုၚ်ရ၊ ယဝ်သၟိၚ်ဟန်ဗန်နွံမ္ဂး သ္ဒးကွဟ်ကၟဟ် ဒၞါဲဂှ်ရ။
အ္စာဥပဇ္ၛာယ် ဒၠိုက်ကတဵု (နူဒၞါဲ) မ္ဂး သ္ဒးသီဂိုၚ်ဒေပ်ထောံ သၞာဂဇအ်ဂှ်ရ၊ သ္ဒးသီဂိုၚ်ဒေပ်ထောံ ဍာ်ကြဴဇိုၚ် ဂတဵုပေါတ်ဇိုၚ် ကဝေတ်ပေါတ်ဇိုၚ်ရ၊ ယဝ်သၟိက်ဟန်ဗန်နွံမ္ဂး၊ သ္ဒးကွဟ်ကၟဟ် ဒၞါဲဂှ်ရ။
အ္စာဥပဇ္ၛာယ် မိက်ဟုမ်ဍာ်မ္ဂး၊ သ္ဒးစဳရေၚ် ဍာ်ဟုမ်ရ၊ နွံပၟိက်ကဵုဍာ်လၟုဟ်မ္ဂး၊ သ္ဒးစဳရေၚ်ကဵုဍာ်လၟုဟ်ရ၊ နွံပၟိက်ကဵုဍာ်ဂမ္တဴမ္ဂး၊ သ္ဒးစဳရေၚ် ကဵုဍာ်ဂမ္တဴရ။
အ္စာဥပဇ္ၛာယ် မိက်လုပ်သ္ၚိဇရုၚ်ပဠက်မ္ဂး သ္ဒးထ္ၜိုန်ကဠောံ ခၞိက်ကြကောတ် နကဵုဍာ်ရ၊ သ္ဒးဖ္ဍုက်တိကမၠေတ် နကဵုဍာ်ရ၊ ဂိုၚ်ကေတ်ဂတဵုသ္ၚိဇရုၚ်ပဠက်တုဲ သီုမဗက်အာ နူလက်ကရဴ နူလက်ကရဴ အ္စာဥပဇ္ၛာယ်ဂှ် ဒုၚ်ကဵုဂတဵုသ္ၚိဇရုၚ်ပဠၚ်တုဲမ္ဂး ဟောဝ်ဂိုၚ်ကေတ်သ္ၚာတုဲ သ္ဒးစွံလဝ် ပ္ဍဲဌာန်မဗဗွဲရ၊ သ္ဒးဒုၚ်ကဵုခၞိက်ကြကောတ်ရ၊ သ္ဒးဒုၚ်ကဵုတိကမၠောတ်ရ။ ယဝ်သၟဟ်ရထမ္ဂး သ္ဒးလုပ် သ္ၚိဇရုၚ်ပဠက်ရ၊ ခမဳမလုပ်သ္ၚိဇရုၚ်ပဠက်ဂှ် လံက်လေတ်မုက် နကဵုတိကမၠေတ် မဖ္ဍုက်လဝ်ဍာ်တုဲ ဂြောပ်ဓလီုလဝ် (နကဵုသၞုက်ဍာ်) နူဂတကီု နူလက်ကရဴကီုတုဲ သ္ဒးလုပ်သ္ၚိဇရုၚ်ပဠက်ရ၊ ဃရိတ်ခတ် ခမဳဂမၠိုၚ်မဒှ်ထေရ်ဇၞော်တုဲ ဟဂပ်ဝ်ဂဇအ်ရ၊ ခမဳသၟတ်ဂမၠိုၚ်လေဝ် ဟဂပ်ဝ်ဆေဝ်ဒဝ် ပွမဂဇအ်ပ္ဍဲသၞာရ၊ ပ္ဍဲသ္ၚိဇရုၚ်ပဠက် သွက်အ္စာဥပဇ္ၛာယ် သ္ဒးသ္ပကဵုကေၚ်ကာအိုတ်သီု (မပ္တံမစံၚ်ဗဂဵုပၟတ်) ရ၊ ခမဳမတိတ်ကၠုၚ် နသ္ၚိဇရုၚ်ပဠက်ဂှ် ဂိုၚ်ကေတ်ဂတဵုသ္ၚိဇရုၚ်ပဠက်တုဲ ဂြောပ်ဓလီုလဝ် (နကဵုသၞုက်ဍာ်) နူဂတကီု နူလက်ကရဴကီုတုဲ သ္ဒးတိတ်နူသ္ၚိဇရုၚ်ပဠက်ရ။
ပ္ဍဲအရာဟုမ်ဍာ်လေဝ် သွက်အ္စာဥပဇ္ၛာယ် သ္ဒးသ္ပကဵုကေၚ်ကာအိုတ်သီု (မပ္တံပွမတုဟ်ပေါတ်မိဟ်) ရ၊ ခမဳမဟုမ်ဍာ်တုဲဂှ် တိုန်ကၠုၚ်ဗွဲကိုပ်ကၠာ အ္စာဥပဇ္ၛာယ်တုဲ သ္ပဇကုဇကု စဵုကဵုဟွံမွဲကဵုဍာ်တုဲ ဗိုက်သပိုၚ်တုဲ သ္ဒးဇိုတ်ကဵုဍာ် နူဇကုအ္စာဥပဇ္ၛာယ်ရ၊ သ္ဒးဒုၚ်ကဵုသပိုၚ်ရ၊ သ္ဒးဒုၚ်ကဵုသ္ၚာသကိုပ်ရ၊ ဂိုၚ်ကေတ်ဂတဵုသ္ၚိဇရုၚ်ပဠက်တုဲ ကၠုၚ်ဗွဲကိုပ်ကၠာတုဲ သ္ဒးလးပညပ်လဝ်သၞာဂဇအ်ရ၊ သ္ဒးစွံပတန်လဝ် ဍာ်ကြဴဇိုၚ် ဂတဵုပေါတ်ဇိုၚ် ကဝေက်ပေါတ်ဇိုၚ် ပ္ဍဲဇရေၚ်ရ၊ (နွံပၟိက်ဍာ်ဟာရဴဝွံ) သ္ဒးဂရၚ်ပတီသၟာန် အ္စာဥပဇ္ၛာယ် နကဵုဍာ်သုၚ်ရ၊ ယဝ်မိက်ကဵုလ္ၚတ်ကတ်ဗတောန်မ္ဂး၊ သ္ဒးလ္ၚတ်ကတ်ဗတောန်ရ၊ ယဝ်မိက်ကဵုသၟာန်ဂၠိုၚ်ဂၠိုၚ်ကဵုဝါမ္ဂး၊ သ္ဒးသၟာန်ဂၠိုၚ်ဂၠိုၚ်ကဵုဝါရ။
ဘာအ္စာဥပဇ္ၛာယ် ပဒတဴဂှ် သၟိက်ဟန်ဗန်နွံမ္ဂး၊ ယဝ်သၟဟ်ရထမ္ဂး သ္ဒးသော်ၚဖ္ဍောၚ်ၚးတးရ၊ ခမဳ မသောၚ်ဖ္ဍောၚ်ၚးတးဘာဂှ် ဗွဲကိုပ်ကၠာ ရၚ်တၠုၚ်ပတိတ် ဗဗေၚ်သ္ၚာတုဲ သ္ဒးစွံလဝ်ပ္ဍဲဒၞါဲမဗဗွဲရ၊ ရၚ်တၠုၚ်ပတိတ် သၞာနိသဳဒိုန်သၞာလးတိက်တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ရၚ်တၠုၚ်ပတိတ်ဖုန်ဂၞဳတုဲ သ္ဒးစွံလဝ် ပ္ဍဲဒၞါဲမဗဗွဲရ၊ ဇံၚ်ခါတ်ဂှ် သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠးတြၚ်ဇဵုတြၚ်ဂှ် ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ဂတဵုဂှ် သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠးတြၚ်ဇဵုတြၚ်ဂှ် ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ရၚ်တၠုၚ်ပတိတ်ဇိုၚ်ဇံၚ်ဂမၠိုၚ်တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ရၚ်တၠုၚ်ပတိတ် ထၟာဲချဟ် ‘ထၟာဲတဲ’ တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ရၚ်တပဒၚ်ပတိတ် ဂတဵုဒလာဲတုဲ သ္ဒးစွံလဝ် ပ္ဍဲဒၞါဲမဗဗွဲရ၊ သၞာလးတိဂှ် သမ္တီလဝ်ဒၞါဲလးလၟိုန်တုဲ ရၚ်တၠုၚ်ပတိတ်တုဲ သ္ဒးစံလဝ် ပ္ဍဲဒၞါဲမဗဗွဲရ၊ ပ္ဍဲဘာ ယဝ်သ္ၚိစၟဇာဖိုၚ်နွံမ္ဂး၊ သ္ဒးပါဲကၠေံနူသၠဖ္ဍာန် ဗွဲကိုပ်ကၠာရ၊ သ္ဒးဇိုတ်ပေါတ်ဗတၚ်ကျာ ကေုာံသကဲခဒမ်ဂမၠိုၚ်ရ။
ဗ္ဒက်မသ္ပလဝ်ကဠိတ်ကဠောတ် နကဵုခၞိက်တိကမၠေတ်ဗကေတ် (နကဵုဆီတၟံ) ဂှ် ပတိုဟ်တိုန်မ္ဂး ဖ္ဍုက်ဍာ်ယာတ်တမြံၚ်တုဲ ဝတ်ကၠေံတုဲမ္ဂး သ္ဒးဇိုတ်ပေါတ်ရ၊ တိမသ္ပလဝ်ကဠိတ်ကဠောတ် နကဵုသာ်လမ္စံက်ဂှ် ပတိုဟ်တိုန်မ္ဂး၊ ဖ္ဍုက်ဍာ်ယာတ်တမြံၚ်တုဲ ဝတ်ကၠေံတုဲမ္ဂး သ္ဒးဇိုတ်ပေါတ်ရ၊ ဒှ်တိမဟဂွံသ္ပလဝ်ကဠိတ်ကဠောတ်မ္ဂး၊ လၟုဟ်ဖရုဲဍာ်တုဲ “လ္ပကဵုမၠိုက်တိုန်ဘာညိ” ရဴဝွံ (စွံစိုတ်တုဲ) သ္ဒးကွဟ်ကၟဟ်ရ၊ ပကောံဖအုံလဝ် အိက်ကၟဟ်တုဲ သ္ဒးထောံထောံ ပ္ဍဲဌာန်မဗဗွဲရ။
စဲတ္ၚဲသအးဇ္ၚး သၞာလးတိတုဲမ္ဂး ဂရိုက်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲဇိုတ်ပေါတ် ဇိုၚ်ဇံၚ်ဂမၠိုၚ်တုဲမ္ဂး သ္ဒးကလေၚ်စွံ ပ္ဍဲဒၞါဲအတိုၚ်စွံလဝ်လၟိုန်ရ၊ စဲတ္ၚဲသအးဇ္ၚး ဖံၚ်ခါတ်တုဲမ္ဂး ဂရိုက်ထောံတုဲ သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠးတြၚ်ဇဵုတြၚ်ဂှ် သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဂတဵုတုဲမ္ဂး ဂရိုက်ထောံတုဲ သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠးတြၚ်ဇဵုတြၚ်ဂှ်တုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဖုန်ဂၞဳတုဲမ္ဂး ဂရိုက်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး သၞာနိသဳဒိုန် သၞာလးတိက်တုဲမ္ဂး ဂရိုက်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲဇိုတ်ပေါတ် ထၟာဲချဟ်တုဲမ္ဂး သ္ဒးကလေၚ်စွံ ပ္ဍဲဒၞါဲအတိုၚ်စွံလဝ်လၟိုန်ရ၊ စဲတ္ၚဲဇိုတ်ပေါတ် ဂတဵုဒလာဲတုဲမ္ဂး သ္ဒးကလေၚ်စွံ ပ္ဍဲဒၞါဲအတိုၚ်စွံလဝ်လၟိုန်ရ၊ သ္ဒးစွံဗဗေၚ်သ္ၚာရ၊ ခမဳမိက်စွံဗဗေၚ်ဂှ် နကဵုတဲမွဲလပါ်ဂှ် ရပ်ကေတ်ဗဗေၚ်တုဲ နကဵုတဲမွဲလပါ်ဂှ် ဇွိတ်စမ်ရံၚ် သၟဝ်ဇံၚ်ခါတ်ကီု သၟဝ်ဂတဵုကီုတုဲ သ္ဒးစွံရ၊ ဟဂွံစွံဗဗေၚ် ပ္ဍဲတိမဟွံမွဲကဵုသၞာရ။ မိက်စွံသ္ၚာမ္ဂး နကဵုတဲမွဲလပါ်ဂှ် ရပ်ကေတ်သ္ၚာတုဲ နကဵုတဲမွဲလပါ်ဂှ် ဇွိတ်ပေါတ်ထောံ ဒုန်တေၚ်သ္ၚာ ဇုက်ဗလဲသ္ၚာတုဲ သ္ပလအိတ်မုဟ်ပ္ဍဲလပါ်တေံ သ္ပကဝးပ္ဍဲလပါ်ဏအ်တုဲ သ္ဒးစွံသ္ၚာရ။
နူဒိုဟ်ဗၟံက် ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံဗ္တၚ်ကျာဒိုဟ်ဗၟံက်ဂမၠိုၚ်ရ၊ နူဒိုဟ်ပလိုတ် ကျာမဒှ်မွဲဟာန်ကေုာံမၠိုၚ်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗ္တၚ်ကျာဒိုဟ်ပလိုတ်ဂမၠိုၚ်ရ၊ နူဒိုဟ်သၟဝ်ကျာ ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗ္တၚ်ကျာဒိုဟ်သၟဝ်ကျာဂမၠိုၚ်ရ၊ နူဒိုဟ်သၠုၚ်ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်မ္ဂး၊ သ္ဒးကၟာတ်ဒဝ်ကၠေံ ဗ္တၚ်ကျာဒိုဟ်သၠုၚ်ကျာဂမၠိုၚ်ရ။ ဒှ်အခိၚ်ၜိုဟ်ဂံၚ်မ္ဂး ပ္ဍဲအခိၚ်တ္ၚဲ သ္ဒးပံက်လဝ် ဗ္တၚ်ကျာဂမၠိုၚ်ရ၊ ပ္ဍဲအခိၚ်ဗ္တံ သ္ဒးကၟာတ်ဒဝ်ကၠေံရ၊ ဒှ်အခိၚ်ဂမ္တဴမ္ဂး ပ္ဍဲမခိၚ်တ္ၚဲ သ္ဒးကၟာတ်ဒဝ်လဝ် ဗ္တၚ်ကျာဂမၠိုၚ်ရ၊ ပ္ဍဲအခိၚ်ဗ္တံ သ္ဒးပံက်လဝ်ရ။
ပြဝိုဏ် သၟိက်ဟန်ဗန်နွံဒှ်ဒၟံၚ်မ္ဂး၊၊ သ္ဒးကွဟ်ကၟဟ် ပြဝိုဏ်ရ။ ခဒမ်ဟုမ်ဍာ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ခဒမ်ဟုမ်ဍာ်ရ။ ဇြပ်ကောံဓရီု သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ်ဇြပ်ကောံဓရီုရ။ ရုပ်ပၟတ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ရုၚ်ပၟတ်ရ။ သ္ၚိဝစ် (သ္ၚိဍာ်) သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် သ္ၚိဝစ်ရ။ ဍာ်သုၚ်ဟွံမွဲမ္ဂး၊ သ္ဒးစွံပတန်ဍာ်သုၚ်ရ။ ဍာ်ရပ်စပ်ဟွံမွဲမ္ဂး၊ သ္ဒးစွံပတန် ဍာ်ရပ်စပ်ရ။ ပ္ဍဲနုၚ်ဍာ်ကြာတ် (နုၚ်စအးသ္ၚိဍာ်) ဍာ်ဟွံမွဲဒှ်မ္ဂး၊ သ္ဒးဗပေၚ်စုတ်ဍာ်ရ။
အ္စာဥပဇ္ၛာယ် ကတဵုဒှ်ပွမဟွံမိပ်လဟိၚ်မ္ဂး၊ ကွးဒတဴမွဲစွံဂှ် (အလဵုဇကု) သ္ဒးကော်ဏာဌာန်သအာၚ်ရ၊ (ညးသအာၚ်လေဝ်) သ္ဒးကဵုကော်ဏာရ၊ ဂလာန်ဓရ်လေဝ် သ္ဒးဟီုတွံကဵုကုအ္စာဥပဇ္ၛာယ်ဂှ်ရ။ အ္စာဥပဇ္ၛာယ် ကတဵုဒှ် ‘သံသယကုက္ကုစ္စ’ ပွမချပ်သၠေဟ်ပၟာမ္ဂး ကွးပဒတဴမွဲစွံဂှ် သ္ဒးပါဲပၠေၚ်ကၠေံရ၊ (ညးသအာၚ်လေဝ်) သ္ဒးကဵုပါဲပၠေၚ်ကၠေံရ၊ ဂလာနဓရ်ဟေၚ် သ္ဒးဟီုတွံကဵုကုအ္စာဥပဇ္ၛာယ်ဂှ်ရ။ အ္စာဥပဇ္ၛာယ် ဂိုၚ်ကေတ်ကွေတ်မှာရာမ္ဂး၊ ကွးပဒတဴမွဲစွံဂှ် သ္ဒးသောၚ်ကၠးကဵုစာ်စ္ဍးအာရ၊ (ညးသအာၚ်လေဝ်) သ္ဒးကဵုသောာၚ်ကၠးစာ်စ္ဋးအာရ၊ ဂလာနဓရ်လေဝ် သ္ဒးဟီုတွံကဵု ကုအ္စာဥပဇ္ၛာယ်ဂှ်ရ။ အ္စာဥပဇ္ၛာယ် အာစိုပ်ဂရုကအာပတ်တုဲ ထေက်ကဵုတၞဟ်နပဒတဴပြဝးမ္ဂး၊ ကွးပဒတဴမွဲစွံဂှ် “မုရဴသာ်လ၆ု သၚ် သ္ဂောံကဵုပြဝး ကုအ္စာဥပဇ္ၛာယ်ရော?” ရဴဝွံ သ္ဒးသ္ပဂဗုဓ်လွဳပရာရ။ အ္စာဥပဇ္ၛာယ် ထေက်ကဵုတံၚ်ဓဇက်တမ် ဒှ်မ္ဂး၊ ကွးပဒတဴမွဲစွံဂှ် “မုရဴသာ်လဵု သၚ် သ္ဂောံတံၚ်ဓဇက် ‘မာနတ်’ ထေက်ကဵုသ္ဍိုက်မၠိုက် ဒှ်မ္ဂး၊ ကွးပဒတဴမွဲစွံဂှ် “မုရဴသာ်လဵု သၚ် သ္ဂောံကဵုမာနတ် ကုအ္စာဥပဇ္ၛာယ်ရော?” ရဴဝွံ သ္ဒးသ္ပဂဗုဓ်လွဳပရာရ။ အ္စာဥပဇ္ၛာယ် ထေက်ကဵုကော်ပၠုပ်အဗ္ဘာန်ဒှ်မ္ဂး၊ ကွးပဒတဴမွဲစွံဂှ် “မုရဴသၚ်လဵု သၚ် သ္ဂောံကဵုကော်ပၠုပ်အဗ္ဘာန် အ္စာဥပဇ္ၛာယ်ရော?” ရဴဝွံ သ္ဒးသ္ပဂဗုဓ် လွဳပရာရ။ သၚ် မိက်သ္ပ ‘တဇ္ဇနဳယကမ်’ ပွမဘပဠကီု ‘နိယဿကမ်’ ပွမကဵုပဒတဴကေုာံအ္စာနိဿယကီု ‘ပဗ္ဗာဇနဳယကမ်’ ပွမဗက်ဗ္ဒဴကီု ‘ပဋိသာရဏဳယကမ်’ ပွမကဵုကလအ်ဒုၚ်ဂုဏ်ကီု ‘ညက္ခေပနဳယကမ်’ ပွမဗက်ပတိတ်ထောံကီု ကုအ္စာဥပဇ္ၛာယ်မ္ဂး၊ ကွးပဒတဴမွဲစွံဂှ် “မုရဴသာ်လဵု သၚ် ဟဂွံသ္ပကမ် ကုအ္စာဥပဇ္ၛာယ်ရော? မုရဴသာ်လဵု သ္ဂောံကဵုဒုဟ်သာစှ်ေရော?” ရဴဝွံ သ္ဒးသ္ပဂဗုဓ် လွဳပရာရ။ သၚ် သ္ပ ‘တဇ္ဇနဳယကမ်’ ပွမဘပဠကီု ‘နိယကမ်’ ပွမကဵုကလအ်ဒုၚ်ဂုဏ်ကီု ‘ဥက္ခေပနဳယကမ်’ ပွမဗက်ပတိတ်ထောံကီု ကုအ္စာဥပဇ္ၛာယ်ဂှ်တုဲမ္ဂး၊ ကွးပဒတဴမွဲစွံဂှ် “မုရဴသာ်လဵု ဥပဇ္ၛာယ် သ္ဂောံဒ္ဂေတ်ဗွဲမ္ဒးရးရော? သ္ဂောံဖျေံတသော်မတွံဂးမာန်ရော? ဒ္ဂေတ်တဴဒ္ဂေတ်မတိတ်ဗၠးနူဒဏ်ရော? သၚ် သ္ဂောံလလမ်ကၠေံကမ်ဂှ်ရော” ရဴဝွံ သ္ဒးသ္ပဂဗုဓ်လွဳပရာရ။
သ္ၚာအ္စာဥပဇ္ၛာယ်ဂှ် ထေက်ကဵုဒးလပိုက်ကဆံၚ်ဒှ်မ္ဂး၊ ကွးပဒတဴမွဲစွံဂှ် သ္ဒးလပိုက်ကဆံၚ်ရ၊ “မုရဴသာ်လဵု သ္ဂောံလပိုက်ကဆံၚ် သ္ၚာအ္စာဥပဇ္ၛာယ်ရော” ရဴဝွံ ဂဗုဓ်လွဳပရာလေဝ် ဒးသ္ပရ။ သ္ၚာအ္စာဥပဇ္ၛာယ်ဂှ် ထေက်ကဵုဒးဇိၚ်ဒှ်မ္ဂး၊ ကွးပဒတဴမွဲစွံဂှ် သ္ဒးဇိၚ်ရ၊ “မုရဴသာ်လ၆ု သ္ဂောံဇိၚ် သ္ၚာအ္စာဥပဇ္ၛာယ်ရော? ရဴဝွံ ဂဗုဓ်လွဳပရာလေဝ် ဒးသ္ပရ။ သွက်အ္စာဥပဇ္ၛာယ် ထေက်ကဵုဖျိန်ဍာ်လွံက်ဒှ်မ္ဂး၊ ကွးပဒတဴမွဲစွံဂှ် သ္ဒးဖျိန်ဍာ်လွံက်ရ၊ “မုရဴသာ်လဵု သ္ဂောံဖျိန်ဍာ်လွံက် သွက်အ္စာဥပဇ္ၛာယ်ရော?” ရဴဝွံ ဂဗုဓ်လွဳပရာလေဝ် ဒးသ္ပရ။ သ္ၚာအ္စာဥပဇ္ၛာယ်ဂှ် ထေက်ကဵုဒးဖျောန်ဒှ်မ္ဂး၊ ကွးပဒတဴမွဲစွံဂှ် သ္ဒးဖျောန်ရ၊ “မုရဴသာ်လဵု သ္ဂောံဖျောန် သ္ၚာအ္စာဥပဇ္ၛာယ်ရော?” ရဴဝွံ ဂဗုဓ်လွဳပရာလေဝ် ဒးသ္ပရ။ ခမဳမဖျောန်သ္ၚာဂှ် သ္ဒးဖျောန်ဂတးဂန် ဗွဲမ္ဒးရးရ၊ ကိုပ်ကၠာထၞဟ်ဍာ်လွံက် ဓဇူဟွံပိုတ်ဏီ စ္ဍးအာဟွံဂွံရ။
သီုဟွံဂွံဂရၚ်ပတီပါၚ်အခေါၚ် အ္စာဥပဇ္ၛာယ် ဟဂပ်ဝ်ကဵုဗဗေၚ် ကုညးလ္ၚဵုရ၊ ဗဗေၚ်ညးလ္ၚဵုဂှ်လေဝ် ဟွံထေက်ကဵုဂိုၚ်ကေတ်ရ၊ ဟဂပ်ဝ်ကဵုသ္ၚာ ကုညးလ္ၚဵုရ၊ သ္ၚာညးလ္ၚဵုဂှ်လေဝ် ဟွံထေက်ကဵု ဂိုၚ်ကေတ်ရ၊ ဟဂပ်ဝ်ကဵုပရိက္ခရာ ‘အရပ်စပ်’ ကုညးလ္ၚဵုရ၊ ပရိက္ခရာညးလ္ၚဵုဂှ်လေဝ် ဟွံထေက်ကဵုဂိုၚ်ကေတ်ရ၊ ဟဂပ်ဝ်ကးသော်က္ဍိုပ် ညးလ္ၚဵုဂမၠိုၚ်ရ၊ ဟွံထေက်ကဵုကးသော်က္ဍိုပ်ဇကုဂမၠိုၚ် ကုညးလ္ၚဵုရ၊ ဟဂပ်ဝ်သ္ပကမၠောန်ကေၚ်ကာ ညးလ္ၚဵုရ၊ ဟဂပ်ဝ်ကဵုသ္ပကမၠောန်ကေၚ်ကာ (မပ္တံပွမတုဟ်ပေါတ်မိဟ်) ကုညးလ္ၚဵုရ၊ ဟဂပ်ဝ်သ္ပကေၚ်ကာဇၞော်သၟတ်ညးလ္ၚဵုရ၊ ဟဂပ်ဝ်ကဵုသ္ပ ကေၚ်ကာဇၞော်သၟတ်ဇကု ကုညးလ္ၚဵုရ၊ ဟဂပ်ဝ်သ္ပခမဳဗွက်ကြဴ ညးလ္ၚဵုရ၊ ဟဂပ်ဝ်ကဵုညးလ္ၚဵု သ္ပခမဳဗွက်ကြဴဇကုရ၊ ဟဂပ်ဝ်ရၚ်တၠုၚ်ပိဏ္ဍပါတ် ညးလ္ၚဵုရ၊ ဟဂပ်ဝ်ကဵုညးလ္ၚဵုရၚ်တၠုၚ်ပိဏ္ဍပါတ်ဇကုရ၊ သီုဟွံဂရၚ်ပတီပါန်အခေါၚ် အ္စာဥပဇ္ၛာယ် ဟွံထေက်ကဵုလုပ်ကွာန်ရ၊ ဟွံထေက်ကဵုအာသုသာန်ရ၊ ဟွံထေက်ကဵုစ္ဍးအာဌာန်သအာၚ်ရ၊ အ္စာဥပဇ္ၛာယ် ဂိယဒှ်မ္ဂး၊ လုကဴကာလမဂျိုၚ်ဒၟံၚ်လမျီု သ္ဒးကၠောန်ၜိုတ်လွဳပရာရ၊ စဵုကဵုယဲအ္စာဥပဇ္ၛာယ်ဂှ်ဗၠး သ္ဒးလၟတ်မၚ်ဒၟံၚ်ရ။
ဒ္ဂေတ်ဝတ်ထေက်ကဵုဒးသ္ပ ပ္ဍဲအ္စာဥပဇ္ၛာယ်တုဲရ။
