၁၄.၁။ ခဏ်သာရိပိုတ် ကေုာံမောဂ္ဂလာန်သ္ပခမဳ
၆၀။ ပ္ဍဲကာလမွဲအခိၚ် ပြဘာဇ်သဉ္စယ မွဲဟာန်ကေုာံပရိသာတ်ပြဘာဇ်ဂမၠိုၚ် မၞုံလၟိုဟ်ၜါကၠံမသုန်စှော် သ္ပဒတဴဒၟံၚ် ပ္ဍဲဍုၚ်ရာဇဂြိုဟ်ရ။ ပ္ဍဲအခိၚ်ဂှ် သာရိပိုတ်ကေုာံမောဂ္ဂလာန်ဂမၠိုၚ် ဒ္ဂေတ်လ္ၚတ်ဒၟံၚ် ဒ္ဂေတ်မပြဲ ပ္ဍဲဇရေၚ်ပြဘာဇ်သဉ္စယအိုတ်ရ၊ သာရိပိုတ်ကေုာံမောဂ္ဂလာန်ဂမၠိုၚ်ဂှ် “ညးကလိဂွံ နိဗ္ဗာန်အမြိုတ် မဟွံဒးချိုတ် ဗွဲကိုပ်ကၠာဂှ် သ္ဒးဟီုလဴဗ္စရ” ရဴဝွံ သ္ပစွံကတိကဝတ်အိုတ်ရ။
ပ္ဍဲအခိၚ်ဂှ် ခမဳအဿဇိ မဍိုက်ပေၚ်တဴကေုာံဣရိယာပိုတ်ဂှ် ပ္ဍဲအခိၚ်နူဂယး ဗိုက်ပဠေဝ်သ္ၚာတုဲ သီုမဂိုၚ်ကေတ်ဗဗေၚ်သ္ၚာ ဖျေံလဝ်မတ်ဗွဲသၟတ်ဂှ် နကဵုပွမတိုန်ဂတ ပွမဆုတ်လက်ကရဴ ပွမသ္ၚေဝ်ရံၚ်ဂတတူရူ ပွမဒစေၚ်သ္ၚေဝ်ရံၚ်သကဲ ပွမခ္ဍပ်ပွမပၠး မထေက်ကဵုလျုၚ်ဇြုၚ်သ္ဍိုက် လုပ်ဂေတ်ဂ္ၚေၚ်ပိဏ္ဍပါတ် ဍုၚ်ရာဇဂြိုဟ်ရ။
ပြဘာဇ်သာရိပိုတ် ညာတ်ကေတ် တဳလပိုဉ်အာဿဇိ မဂေတ်ဂ္ၚေၚ်ဒၟံၚ်ပိဏ္ဍပါတ် ပ္ဍဲဍုၚ်ရာဇဂြိုဟ် မၞုံကဵုမတ်ဖျေံလဝ်ဗွဲသၟဝ် ဗွဲမဍိုက်ပေၚ်တဴကေုာံဣရိယာပိုထ်ဂှ်ဒှ်တုဲ နကဵုပွမတိုန်ဂတ ပွမဆုတ်လက်ကရဴ ပွမသ္ၚေဝ်ရံၚ်ဂတတူရူ ပွမဒစေၚ်သ္ၚေဝ်ရံၚ်သကဲ ပွမခ္ဍပ် ပွမပၠး မထေက်ကဵုလျုၚ်ဇြုၚ်သ္ဍိုက်တုဲ—
“ပ္ဍဲလောက ယြဴတၠအရှန်ဂမၠိုၚ်ကီု ယြဴညးအာစိုပ်အရဟတ္တမဂ်ဂမၠိုၚ် နွံအိုတ်ရ၊ ပၞောဝ်ကဵုညးဂမၠိုၚ်ဂှ် ခမဳဝွံတုန် ဒှ်ညးပါလုပ်လၟိဟ်မွဲဇကုရ၊ အဲပြာပ်အာဇရေၚ် ခမဳဝွံတုဲ ‘ယွံကောန်တၠ တၠအဲ ရန်တၟံကဵုမုရဴအ္စာမွဲတုဲ သ္ပခမဳရော? အ္စာတၠအဲတုန် မုရဴညးမွဲရော? သ္ဍိုက်မၠိုက်တဴ မုရဴဓရ်ညးမွဲရော?’ ရဴဝွံ သ္ဂောံသၟာန်မ္ဂး ခိုဟ်သန်ရ” ရဴဝွံ ကသပ်ဒှ် ကုပြဘာဇ်သာရိပိုတ်ရ။
ပ္ဍဲကြဴနူဂှ် “တၞဟ်နပွမသၟာန်သၟုက် ခမဳဝွံ အခိၚ်အခါဟွံသေၚ်ဏီရ၊ လုပ်ဒၟံၚ်အပ္ဍဲကွာန်တုဲဒှ်တဴ အဃောဂေတ်ဂ္ၚေၚ်ဒၟံၚ် တၞဟ်နပိဏ္ဍပါတ်ရ၊ နိဗ္ဗာန်အမြိုတ် မိန်ပိုဲညးဂမၠိုၚ်မၞုံပၟိက် မဂပ်ဝ်ချပ်တွဵုတုဲ တီကေတ်ဂှ် နွံတဴရ၊ အဲမဂၠာဲသ္ၚေဝ် (နိဗ္ဗာန်ဂှ်) သ္ဂောံဗက်အာ နူလက်ကရဴ နူလက်ကရဴ ခမဳဝွံမ္ဂး ခိုဟ်သန်ရ” ရဴဝွံ ကသပ်ဒှ် ကုပြဘာဇ်သာရိပိုတ်ပၠန်ရ။
ပ္ဍဲအခိၚ်ဂှ် တဳလပိုဉ်အာဿဇိ ဂေတ်ဂ္ၚေၚ်တၞဟ်နပိဏ္ဍပါတ် ပ္ဍဲဍုၚ်ရာဇဂြိုဟ်တုဲ ဂိုၚ်ကေတ်ပိဏ္ဍပါတ်တုဲမ္ဂး က္ညစ္ဍးအာရ။ ပ္ဍဲအခိၚ်ဂှ် ပြဘာဇ်သာရိပိုတ်လေဝ် ပြာပ်အာဇရေၚ် တဳလပိုဉ်အဿဇိတုဲမ္ဂး ဟီုဂလာန်မိပ်စိုတ်အိုဟ်တၟိဟ် ဆက်မိတ်ကေုာံတဳလပိုဉ်အဿဇိမွဲစွံရ၊ ဟီုပတုဲကၠေံဂလာန် မိပ်စိုတ်အိုဟ်တၟိုဟ် ထေက်ကဵုဗှ်ဗၞုဟ်တုဲ ပြဘာဇ်သာရိပိုတ် မဒတူဒၟံၚ် ပ္ဍဲဒၞါဲမွဲဂှ်—
“ယွံကောန်တၠ ဣန္ဒြဳတၠအဲဂမၠိုၚ်ဂှ် ကေဝ်ဇြုၚ် ဗွဲတၟေၚ်အိုတ်ရ၊ သာ်စၞာံသအးဇ္ၚးရ၊ ဗုအးဒ္စၚ်ဗ္ၜၚ်ရ၊ ယွံကောန်တၠ တၠအဲရန်တၟံကဵု မုရဴညးမွဲတုဲ သ္ပခမဳဂှ်ရော? အ္စာတၠအဲဂှ်တုန် ညးလဵုဂှ်ရော? တၠအဲသ္ဍိုက်မၠိုက် ဓရ်ညးလဵုဂှ်ရော?” ရဴဝွံ သၟာန်တဳလပိုဉ်အဿဇိရ။
ယွံကောန်တၠ ခမဳမပြဲ မဒှ်ကောန်သၟိၚ်သာကျဝၚ် မသ္ပခမဳနူဂကူသၟိၚ်သာကျဝၚ်ဂှ် နွံဒၟံၚ်ရ၊ အဲရန်တၟံကဵုခမဳမပြဲ မပတၠပိုဉ်တြဴပြကာဂှ်တုဲ သ္ပခမဳရ၊ တဳလမၞုံပိုဉ်ကျာ်တြဲဂှ် ဒှ်အ္စာအဲရ၊ အဲသ္ဍိုက်မၠိုက်ဓရ် တဳလမၞုံပိုဉ်ကျာ်တြဲဂှ်ရ” ရဴဝွံ (သ္ဂးရ)။
အ္စာတဳလပိုဉ်ဂှ် မၞုံကွေတ်သာ်လဵုရော? ဟီုတွံလဴ သာ်လဵုရော? ရဴဝွံ (သၟာန်ပၠန်ဂှ်)— ယွံကောန်တၠ အဲတုန် ဒှ်ဆဂွံလုပ်စိုပ် သာသနာဝွံ လၟုဟ်ဟေၚ်ရ၊ သ္ပခမဳဟွံလအ်ဏီတုဲ ဒှ်ခမဳတၟိရ၊ တၞဟ်နဟီုတွံကဵုဓရ် ကတၠအဲ ဗွဲတြးဂှ် အဲဟွံသၟဟ်ရထရ၊ ၜိုန်ဂှ်လေဝ် ကြက်တွံကဵုသဘဴအရထ ကုတၠအဲ ဗွဲခမ္ဍန်ရ ရဴဝွံ (သ္ဂးရ)။
ပ္ဍဲအခိၚ်ဂှ် ပြဘာဇ်သာရိပိုတ်ဂှ် “ယွံကောန်တၠ သဍေံရ၊ အောန်ကဵုဒှ် ဂၠိုၚ်ကဵုဒှ် ဩဝ်တွံညိ၊ အရာထဟေၚ် တွံကဵုကုအဲဍိက်ညိ၊ အရထဟေၚ် အဲဍိက်နွံပၟိက်ရ၊ နကဵုသဒ္ဒါမဂၠိုၚ် မုဖဵုမၞုံရော?” ရဴဝွံ သ္ဂးကဵုတဳလပိုဉ်အဿဇိရ။
ပ္ဍဲကြဴနူဂှ် တဳလပိုဉ်အဿဇိဂှ်—
“ယြဴဓရ် (ဒုက္ခ) ဂမၠိုၚ် ကတဵုဒှ်ဟိုတ်နူ ‘သမုဒယ’ ဟိုတ်အိုတ်ရ၊ ဓရ်မဒှ် ‘သမုဒယ’ ဟိုတ် ဒဒက်တဴဓရ် (ဒုက္ခ) ဂမၠိုၚ်ဂှ်ကီု ဓရ် ‘နိရောဓ’ ဒှ်အရာပၠိုတ်လလမ် ‘မဂ္ဂ’ ဒှ်ဟိုတ်ပၠိုတ်လလမ် ဒဒက်တဴ ဓရ် (ဒုက္ခ) ဖဵု ‘သမုဒယ’ ဟိုတ်ဂမၠိုၚ်ဂှ်ကီု ကျာ်တြဲတွံရ၊ ခမဳမပြဲဂှ် မၞုံကဵုကွေတ် ရဴဝွံရ” ရဴဝွံ တွံကဵုမြော်ဓရ် ကုပြဘာဇ်သာရိပိုတ်ရ။
ပ္ဍဲအခိၚ်ဂှ် သ္ဂောံကလၚ်ကေတ် မြော်ဓရ်ဝွံတုဲ “ဓရ်အိုတ်သီု မၞုံသဘဴပွမကတဵုဒှ် မၞုံသဘဴပၠိုတ်ရ” ရဴဝွံ ‘သောတာပတ္တိမဂ်ဉာဏ်’ မတ်ဓရ် မဟွံမွဲကဵုမၠိုက် မစာ်စ္ဍးနူကၠိုက်လ္ၚေၚ်ကိလေသဂှ် ကတဵုဒှ် ကုပြဘာဇ်သာရိပိုတ်ရ။
ၜိုန်ဒှ်ဗၞတ်ဂှ်ဟေၚ်လေဝ် ဓရ်ဝွံ ဓရ် (ပိုဲညးဂမၠိုၚ်ဂၠာဲသ္ၚေဝ်) ဒၟံၚ်ရ၊ (တဳလပိုဉ်ဂမၠိုၚ်) တီကေတ် ဓရ်နိဗ္ဗာန်အမြိုတ် မဟွံမွဲကဵုပွမဂွိၚ်စံၚ်တူဝွံတုဲအိုတ်ရ၊ (ပိုဲညးဂမၠိုၚ်တုန်) သီုဟွံတီဟွံညာတ် ဓရ်နိဗ္ဗာန်အမြိုတ်ဂှ် ကလိလောန်အာ နကဵုနဟုတသၚ်္ချာ ကဝ်ဂမၠိုၚ် မဂၠိၚ်ဂၠၚ်တုဲရ ရဴဝွံ (သ္ဂးရ)။
၆၁။ ပ္ဍဲကြဴနူဂှ် ပြဘာဇ်သာရိပိုတ် ပြာပ်အာဇရေၚ် ပြဘာဇ်မောဂ္ဂလာန်ရ၊ ပြဘာဇ်မောဂ္ဂလာန် ညာတ်ကေတ် ပြဘာဇ်သာရိပိုတ် မကၠုၚ်ဒၟံၚ်နူဇမ္ၚောဲတုဲ—
“ယွံကောန်တၠ ဣန္ဒြဳတၠအဲဂမၠိုၚ်ဂှ် ကေဝ်ဇြုၚ် ဗွဲတၟေၚ်အိုတ်ရ၊ သာ်စၞာံသအးဇ္ၚးရ၊ ဗုအးဒ္စၚ်ဗ္ၜၚ်ရ၊ ယွံကောန်တၠ ပသာ်ရော? တၠအဲ ကလိဂွံ (တီကေတ်) ဓရ်နိဗ္ဗာန်အမြိုတ် မဟွံဒးချိုတ်တုဲရဟာ” ရဴဝွံ သၟာန်ပြဘာဇ်သာရိပိုတ်ရ။
ယွံကောန်တၠ ကလိဂွံ (တီကေတ်) ဓရ်နိဗ္ဗာန်အမြိုတ် မဟွံဒးချိုတ်တုဲရ ရဴဝွံ (သ္ဂးရ)။
နဟုတၚ်္ချာမ္ဂးဂှ် စှ်တန်တုဲ ပၟဝ်ကဵုစှ်မ္ဂး ဒှ်ကၠံ၊ ကၠံတန်တုဲ ပၟဝ်ကဵုစှ်မ္ဂး ဒှ်လ္ၚီ၊ လ္ၚီတန်တုဲ ပၟဝ်ကဵုကၠံမ္ဂး ဒှ်မွဲကိုဋ်၊ မွဲကိုဋ်တန်တုဲ ပၟဝ်ကဵုစှ်မ္ဂး ဒှ်ကောဋိ၊ ကောဋိမွဲကိုဋ်တန်တုဲ ပၟဝ်ကဵုကၠံမ္ဂး ဒှ်ပကောဋိ၊ ပကောဋိမွဲကိုဋ်တန်တုဲ ပၟဝ်ကဵုကၠံမ္ဂး ဒှ်ကောဋိပကောဋိ၊ ကောဋိ ပကောဋိမွဲကိုဋ်တန်တုဲ ပၟဝ်ကဵုကၠံမ္ဂး ဒှ်နဟုတသၚ်္ချာရ။ သာရတ္ထဋဳကာ။
ယွံကောန်တၠ မုရဴနနဲဗီုလဵု တၠအဲ ကလိဂွံ (တီကေတ်) ဓရ်နိဗ္ဗာန်အမြိုတ် မဟွံဒးချိုတ်ရော? ရဴဝွဴ (သၟာန်ပၠန်ရ)။
ယွံကောန်တၠ အဲညာတ်ကေတ် ခမဳအဿဇိ မဂေတ်ဂ္ၚေၚ်ဒၟံၚ်ပိဏ္ဍပါတ် ပ္ဍဲဍုၚ်ရာဇဂြိုဟ်ဝွံ မၞုံကဵုမတ်ဖျေံလဝ်ဗွဲသၟဝ် ဗွဲမဍိုက်ပေၚ်တဴကေုာံဣရိယာပိုထ်ဂှ်ဒှ်တုဲ နကဵုပွမတိုန်ဂတပွမဆုက်လက်ကရဴ ပွမသ္ၚေဝ်ရံၚ်ဂတူတူရူ ပွမဒစေၚ်သ္ၚေၚ်ရံၚ်သကဲ ပွမခ္ဍပ် ပွမပၠး မထေက်ကဵုလျုၚ်ဇြုၚ်သ္ဍိုက်တုဲ “ပ္ဍဲလောက ယြဴတၠအရှန်ဂမၠိုၚ်ကီု ယြဴညးအာစိုပ်အရဟတ္တမဂ်ဂမၠိုၚ်နွံအိုတ်ရ၊ ပၞောဝ်က၆ုညးဂမၠိုၚ်ဂှ် ခမဳဝွံတုန် ဒှ်ညးပါလုပ်လၟိဟ်မွဲဇကုရ၊ အဲပြာပ်အာဇရေၚ်ခမဳဝွံတုဲ ‘ယွံကောန်တၠ တၠအဲ ရန်တၟံကဵုမုရဴအ္စာမွဲတုဲ သ္ပခမဳရော? အ္စာတၠအဲတုန် မုရဴညးမွဲရော? သ္ဍိုက်မၠိုက်တဴ မုရဴဓရ် ညးမွဲရော?’ ရဴဝွံ သ္ဂောံသၟာန်မ္ဂး ခိုဟ်သန်ရ” ရဴဝွံ ကသပ်ဒှ်ကုအဲရ။
“ယွံကောန်တၠ တၞဟ်နပွမသၟာန်သၟုက် ခမဳဝွံ အခိၚ်အခါဟွံသေၚ်ဏီရ၊ လုပ်ဒၟံၚ်အပ္ဍဲကွာန်တုဲ ဒှ်တဴအဃောဂေတ်ဂ္ၚေၚ်ပိဏ္ဍပါတ်ရ၊ နိဗ္ဗာန်အမြိုတ် မိန်ပိုဲညးဂမၠိုၚ် မၞုံပၟိက် မဂပ်ဝ်ချပ်တွဵုတုဲ တီကေတ် နွံတဴရ၊ အဲမဂၠာဲသ္ၚေဝ် (နိဗ္ဗာန်) သ္ဂောံဗက်အာ နူလက်ကရဴ နူလက်ကရဴ ခမဳဝွံမ္ဂး ခိုဟ်သန်ရ” ရဴဝွံ ကသပ်ဒှ ကုအဲပၠန်ရ။
ယွံကောန်တၠ ပ္ဍဲအခိၚ်ဂှ် တဳလပိုဉ်အဿဇိ ဂေတ်ဂ္ၚေၚ်တၞဟ်နပိဏ္ဍပါတ် ပ္ဍဲဍုၚ်ရာဇဂြိုဟ်တုဲ ဂိုၚ်ကေတ်ပိဏ္ဍပါတ်တုဲမ္ဂး က္ညစ္ဍးအာရ။ ယွံကောန်တၠ ပ္ဍဲအခိၚ်ဂှ် အဲလေဝ် ပြာပ်အာဇရေၚ်တဳလပိုဉ်အဿဇိတုဲမ္ဂး ဟီုဂလာန်မိပ်စိုတ်အိုဟ်တၟိုဟ် ဆက်မိတ်ကေုာံတဳလပိုဉ်အဿဇိမွဲစွံရ၊ ဟီုပတုဲကၠေံဂလာန် မိပ်စိုတ်အိုဟ်တၟိုဟ် ထေက်ကဵုဗှ်ဗၞုဟ်တုဲ ပြဘာဇ်သာရိပိုတ် မဒတူဒၟံၚ် ပ္ဍဲဒၞါဲမွဲဂှ် “ယွံကောန်တၠ ဣန္ဒြဳတၠအဲဂမၠိုၚ်ဂှ် ကေဝ်ဇြုၚ် ဗွဲတၟေၚ်အိုတ်ရ၊ သာ်စၞာံသအးဇ္ၚးရ၊ ဗုအးဒ္စၚ်ဗ္ၜၚ်ရ၊ ယွံကောန်တၠ တၠအဲ ရန်တၟံကဵု မုရဴညးမွဲတုဲ သ္ပခမဳဂှ်ရော? အ္စာတၠအဲဂှ်တုန် ညးလဵုဂှ်ရော? တၠအဲသ္ဍိုက်မၠိုက် ဓရ်ညးလဵုဂှ်ရော?” ရဴဝွံ ဂရၚ်ပတီသၟာန်ခမဳအဿဇိရ။
ယွံကောန်တၠ ခမဳမပြဲ မဒှ်ကောန်သၟိၚ်သာကျဝၚ် မသ္ပခမဳနူဂကူသၟိၚ်သာကျဝၚ်ဂှ် နွံဒၟံၚ်ရ၊ အဲရန်တၟံကဵုခမဳမပြဲ မပတၠပိုဉ်တြဴပြကာဂှ်တုဲ သ္ပခမဳရ၊ တဳလမၞုံပိုဉ်ကျာ်တြဲဂှ် ဒှ်အ်စာအဲရ၊ အဲသ္ဍိုက်မၠိုက်ဓရ် တဳလမၞုံပိုဉ်ကျာ်တြဲဂှ်ရ” ရဴဝွံ (ဟီုသ္ဂးရ)။
အ္စာတဳလပိုဉ်ဂှ် မၞုံကွေတ်သာ်လ၆ုရော? ဟီုတွံတဴ သာ်လဵုရော? ရဴဝွံ (သၟာန်ကၠုၚ်ရ)။ ယွံကောန်တၠ အဲတုန် ဒှ်ဆဂွံလုပ်စိုပ်သာသနာဝွံ လၟုဟ်ဟေၚ်ရ၊သ္ပခမဳဟွံလဏ်ဏီတုဲ ဒှ်ခမဳတၟိရ၊ တၞဟ်နဟီုတွံကဵုဓရ် ကုတၠအဲ ဗွဲတြးဂှ် အဲဟွံသၟဟ်ရထရ၊ ၜိုန်ဂှ်လေဝ် ကြက်တွံကဵုသဘဴအရထ ကုတၠအဲ ဗွဲခမ္ဍန်ရ ရဴဝွံ (ဟီုသ္ဂးရ)။
ယွံကောန်တၠ ပ္ဍဲအခိၚ်ဂှ် “ယွံကောန်တၠ သဍေံရ၊ အောန်က၆ုဒှ် ဂၠိုၚ်ကဵုဒှ် ဩဝ်တွံညိ၊ အရထဟေၚ် တွံကဵုကုအဲဍိက်ညိ၊ အရထဟေၚ် အဲဍိက်နွံပၟိက်ရ၊ နကဵုသဒ္ဒါမၠိုၚ် မုဖဵုမၞုံရော?” ရဴဝွံ အဲသ္ဂးကဵုခမဳအဿဇိရ။
ယွံကောန်တၠ ပ္ဍဲအခိၚ်ဂှ် တဳလပိုဉ်အဿဇိဂှ်—
“ယြဴဓရ် (ဒုက္ခသစ္စ) ဂမၠိုၚ် ကတဵုဒှ်ဟိုတ်နူ ‘သမုဒယသစ္စ’ ဟိုတ်အိုတ်ရ၊ ဓရ်မဒှ် ‘မသုဒယသစ္စ’ ဟိုတ် ဒဒက်တဴဓရ် (ဒုက္ခသစ္စ) ဂမၠိုၚ်ဂှ်ကီု ဓရ် ‘နိရောဓသစ္စ’ ဒှ်အရာပၠိုတ်လလမ် ‘မဂ္ဂသစ္စ’ ဒှ်ဟိုတ်ပၠိုတ်လလမ် ဒဒက်တဴဓရ် (ဒုက္ခသစ္စ) ဖဵု ‘သမုဒယသစ္စ’ ဟိုတ်ဂမၠိုၚ်ဂှ်ကီု ကျာ်တြဲတွံရ၊ ကျာ်တြဲမဒှ်ခမဳမပြဲဂှ် မၞုံကဵုကွေတ် ရဴဝွံရ” ရဴဝွံ တွံကဵုမြော်ဓရ်ရဂှ် (ဟီုသ္ဂးရ)။
ပ္ဍဲအခိၚ်ဂှ် သ္ဂောံကလၚ်ကေတ် မြော်ဓရ်ဝွံတုဲ “ဓရ်အိုတ်သီု မၞုံသဘဴပွမကတဵုဒှ်ဂှ် မၞုံသဘဴပၠိုတ်ရ” ရဴဝွံ ‘သောတာပတ္တိမဂ်ဉာဏ်’ မတ်ဓရ် မဟွံမွဲကဵုမၠိုက် မစာ်စ္ဍးနူကၠိုက်လ္ၚေၚ်ကိလေသဂှ် ကတဵုဒှ် ကုပြဘာဇ်မောဂ္ဂလာန်ရ။
ၜိုန်ဒှ်ဗၞတ်ဂှ်ဟေၚ်လေဝ် ဓရ်ဝွံ ဓရ် (ပိုဲညးဂမၠိုၚ်ဂၠာဲသ္ၚေဝ်) ဒၟံၚ်ရ၊ (တဳလပိုဉ်ဂမၠိုၚ်) တီကေတ် ဓရ်နိဗ္ဗာန်အမြိုတ် မဟွံမွဲကဵုပွမဂွိၚ်စံၚ်တူဝွံတုဲအိုတ်ရ၊ (ပိုဲညးဂမၠိုၚ်တုန်) သီုဟွံတီဟွံညာတ် ဓရ်နိဗ္ဗာန်အမြိုတ်ဂှ် ကလိလောန်အာ နကဵုဟုတသၚ်္ချာကဝ်ဂမၠိုၚ် မဂၠိုၚ်ဂၠၚ်တုဲရ ရဴဝွံ (သ္ဂးရ)။
၆၂။ ပ္ဍဲအခိၚ်ဂှ် ပြဘာဇ်မောဂ္ဂလာန်ဂှ် “ယွံကောန်တၠ ပိုဲညးဂမၠိုၚ် အာတဴဇရေၚ်တဳလမၞုံပိုဉ်ကျာ်တြဲအိုတ်စိုအ်၊ တဳလမၞုံပိုဉ်ကျာ်တြဲဂှ် ဒှ်အ္စာပိုဲညးဂမၠိုၚ်ရ” ရဴဝွံ သ္ဂးကဵုပြဘာဇ်သာရိပိုတ်ရ။
ယွံကောန်တၠ ပြဘာဇ်ဂမၠိုၚ်ၜါကၠံမသုန်စှော်ဝွံ သ္ပနိဿဲဗ္ဒာဲဒလာဲကဵု ပိုဲညးဂမၠိုၚ်တုဲ သီုမသ္ၚေဝ်မဲကဵုပိုဲညးဂမၠိုၚ်ဂှ် ပဒတဴဒၟံၚ် ပ္ဍဲဇရေၚ်သဉ္စယဝွံအိုတ်ရ၊ ညးဂမၠိုၚ်ဂှ်လေဝ် ဒးဟီုလဴဗ္စ ဗွဲကိုပ်ကၠာအိုတ်၊ အတိုၚ်ညးဂမၠိုၚ်ဂှ်ထေၚ်ဂှ် ကြက်သ္ပအိုတ်ရ ရဴဝွဴ (သ္ဂးရ)။
ပ္ဍဲကြဴနူဂှ် သာရိပိုတ်မောဂ္ဂလာန်ဂမၠိုၚ် ပြာပ်အာဇရေၚ် ပြဘာဇ်ဂမၠိုၚ်ဂှ်တုဲ “ယွံကောန်တၠတအ် ပိုဲညးဂမၠိုၚ် အာတဴဇရေၚ် တဳလမၞုံပိုဉ်ကျာ်တြဲအိုတ်ရ၊ တဳလမၞုံပိုဉ်ကျာ်တြဲဂှ် ဒှ်အ္စာပိုဲညးဂမၠိုၚ်ရ” ရဴဝွံ သ္ဂးကဵုပြဘာဇ်ဂမၠိုၚ်အိုတ်ရ။
ပိုဲဍိက်တအ်ညးဂမၠိုၚ် သ္ပနိဿဲဗ္ဒာဲဒလာဲကဵု တၠနာဲတအ်ညးဂမၠိုၚ်တုဲ သီုမသ္ၚေဝ်မဲကဵု တၠနာဲတအ်ညးဂမၠိုၚ်ဂှ် ပဒတဴဒၟံၚ် ပ္ဍဲဇရေၚ်သဉ္စယဝွံအိုတ်ရ၊ တၠနာဲတအ်ညးဂမၠိုၚ် ဒ္ဂေတ်လ္ၚတ်ဒ္ဂေတ်မပြဲ ပ္ဍဲဇရေၚ်ကျာ်တြဲ မဒှ်ခမဳပြဲဏောဝ်မ္ဂး ပိုဲဍိက်တအ်ညးဂမၠိုၚ်သီုဖအိုတ်လေဝ် ဒ္ဂေတ်လ္ၚတ်ဒ္ဂေတ်မပြဲ ပ္ဍဲဇရေၚ်ကျာ်တြဲအိုတ်ရ ရဴဝွံ (သ္ဂးအိုတ်ရ)။
ပ္ဍဲကြဴနူဂှ် သာရိပိုတ်မောဂ္ဂလာန်ဂမၠိုၚ် ပြာပ်အာဇရေၚ် ပြာဘာဇ်သဉ္စယတုဲ “ယွံကောန်တၠ ပိုဲညးဂမၠိုၚ် အာတဴဇရေၚ် တဳလမၞုံပိုဉ်ကျာ်တြဲအိုတ်ရ၊ တဳလမၞုံပိုဉ်ကျာ်တြဲဂှ် ဒှ်အ္စာပိုဲညးဂမၠိုၚ်ရ” ရဴဝွံ သ္ဂးကဵုပြဘာဇ်သဉ္စယအိုတ်ရ။
ယွံကောန်တၠတအ် ဟွံဗဗွဲရ၊ လ္ပအာအိုတ်ညိ၊ ပိုဲညးဂမၠိုၚ်သီုညးပိတၠဟေၚ် ကြက်မၚ်မွဲထိၚ်ဒက်အာ ဂိုဏ်ဝွံ (ဂကောံပြဘာဇ်ဝွံ) အိုတ်ရ ရဴဝွံ (သ္ဂးရ)။
မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် သာရိပိုတ်မောဂ္ဂလာန်ဂမၠိုၚ်ဂှ် “ယွံကောန်တၠ ပိုဲညးဂမၠိုၚ် အာတဴဇရေၚ် တဳလမၞုံပိုဉ်ကျာ်တြဲအိုတ်ရ၊ တဳလမၞုံပိုဉ်ကျာ်တြဲဂှ် ဒှ်အ္စာပိုဲညးဂမၠိုၚ်ရ” ရဴဝွံ သ္ဂးကဵုပြဘာဇ်သဉ္စယအိုတ်ရ။
ယွံကောန်တၠတအ် ဟွံဗဗွဲရ၊ လ္ပအာအိုတ်ညိ၊ ပိုဲညးဂမၠိုၚ်သီုညးပိတၠဟေၚ် ကြက်မၚ်မွဲထိၚ်ဒက်အာ ဂိုဏ်ဝွံ (ဂကောံပြဘာဇ်ဝွံ) အိုတ်ရ ရဴဝွံ (သ္ဂးရ)။
ပ္ဍဲအခိၚ်ဂှ် သာရိပိုတ်မောဂ္ဂလာန်ဂမၠိုၚ် ကော်ကေတ် ပြဘာဇ်ဂမၠိုၚ်ၜါကၠံမသုန်စှော်ဂှ်တုဲ ပြာပ်အာဘာဝေဠုဝန်အိုတ်ရ။
ကုပြဘာဇ်သဉ္စယဂှ် ပ္ဍဲဒၞါဲဂှ်ဟေၚ် ဆီဂမ္တဴ ဇအအ်တတိတ်ကၠုၚ် နူအပ္ဍဲပါၚ်ရ။
တဳလမၞုံပိုဉ်ကျာ်တြဲ သ္ဂောံညာတ်ကေတ် သာရိပိုတ်မောဂ္ဂလာန်ဂမၠိုၚ်ဂှ် မကၠုၚ်ဒၟံၚ်နူဇမ္ၚောဲတုဲ “ယွံခမဳတအ် ကောိတဥပတိဿ သကအ်ရဲဂမၠိုၚ်ၜါတၠဂှ် ကၠုၚ်ဒၟံၚ်အိုတ်ရ၊ ညးၜါတၠဂှ် ကြက်ဒှ်ကွးလ္ၚဝ် မဇၞော်ကၠးသၠုၚ်ပြဲ အဲကျာ်ရ” ရဴဝွံ သ္ဂးကဵုခမဳဂမၠိုၚ်ရ။
သာရိပိုတ်မောဂ္ဂလာန်ဂမၠိုၚ် မတိတ်ဗၠး ဗွဲမသ္ပအာရီု ပ္ဍဲနိဗ္ဗာန်မပြဲ ဟၟဲပတောံၜတ်ဒှ်အရာဉာဏ် မဇြိုဟ်နက်တုဲ ဒှ်အရာဥပဓိဂမၠိုၚ်အိုတ်ဂှ် ကိုပ်ကၠာဟွံစိုပ်ဘာဝေဠုဝန်ဏီ တဳလမၞုံပိုဉ်ကျာ်တြဲဂှ် “ကောလိတဥပတိဿ သကအ်ရဲဂမၠိုၚ်ၜါတၠဂှ် ကၠုၚ်ဒၟံၚ်အိုတ်ရ၊ ညးၜါတၠဂှ် ကြက်ဒှ်ကွးလ္ၚဝ် မဇၞော်ကၠးသၠုၚ်ပြဲ အဲကျာ်ရ” ရဴဝွံ ဂရၚ်ပတီအိုတ်ရ။
“ယွံခမဳတအ် ဩဝ်ကၠုၚ်အိုတ်ညိ၊ ဂပ်ဝ်တွံလဝ်ဓရ် ဗွဲမ္ဒးရးတုဲရ၊ တၞဟ်နသ္ပကၠေံလအိတ်ဒဒိုခ်ဝဋ် ဩဝ်ဒ္ဂေတ်လ္ၚတ် ဒ္ဂေတ်မပြဲ ဗွဲမ္ဒးရးအိုတ်ညိ” ရဴဝွံ တဳလမၞုံပိုဉ်ကျာ်တြဲ သ္ဂးရ။ ဂလာန်ဂှ်ဟေၚ် တဳလပိုဉ်ဂမၠိုၚ် (ၜါကၠံမသုန်စှော်ၜါတၠ) ဂှ် ဒှ်အာခမဳပယျၚ်တုဲရောၚ်။
