၄.၃.၉။ သာသၚ်္ကသိက္ခာပိုဒ်
၆၅၂) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဂမၠိုၚ် မဒၠိုက်ကတဵုနူဝှ်တုဲဂှ် သ္ပဒတဴဒၟံၚ် ပ္ဍဲဘာဂြိုပ်အိုတ်ရ၊ ကမၠတ်ဒမၠဂိတုကထိုန်ဂမၠိုၚ် “ခမဳဂမၠိုၚ် ကလိဂွံလာဘ်အိုတ်ရ” ရဴဝွံ ရာန်သကိုတ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ “ယွံခမဳတအ် ခမဳမပဒတဴပ္ဍဲဘာဂြိုပ်ဂမၠိုၚ် ပၞောဝ်ကဵုသ္ၚာဂမၠိုၚ်ပိဂတှ်ေ တၞဟ်နဒေပ်စွံပတန်ပ္ဍဲကွာန် သ္ၚာမွဲမွဲဂတှေ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် ခမဳဂမၠိုၚ် “ခမဳမပဒတဴ ပ္ဍဲဘာဂြိုပ်ဂမၠိုၚ် ပၞောဝ်ကဵုသ္ၚာဂမၠိုၚ်ပိဂတှေ် တၞဟ်နဒေပ်စွံပတန် ပ္ဍဲကွာန် သ္ၚာမွဲမွဲဂတှေ် တဳလမၞုံပိုဉ်ကျာ်တြဲ ကဵုအခေါၚ်တုဲရ” ရဴဝွံ ပၞောဝ်ကဵုသ္ၚာဂမၠိုၚ်ပိဂတှေ် ဒေပ်စွံပတန် ပ္ဍဲကွာန် သ္ၚာမွဲမွဲဂတှ်ေတုဲ စာ်စ္ဍးလောန်တြဴဗ္တမ်တုဲ ပဒတဴအိုတ်ရ၊ သ္ၚာဂမၠိုၚ်ဂှ် ကၠေံလေဝ် ကၠေံလေၚ်အိုတ်ရ၊ လီုလေဝ် လီုလာ်အိုတ်ရ၊ ပၟတ်လေဝ် တူအိုတ်ရ၊ ကၞိဂမၠိုၚ်လေဝ် ကိတ်အိုတ်ရ၊ ခမဳဂမၠိုၚ် မၞုံကဵုယာတ်ဟွံဒးရးအိုတ်ရ၊ မၞုံကဵုသ္ၚာအောန်ကြဳအိုတ်ရ။
ခမဳဂမၠိုၚ် “ယွံကောန်တၠတအ် မၞးတအ်ညးဂမၠိုၚ် မုဟိုတ် မၞုံကဵုယာတ် ဟွံဒးရးအိုတ် မၞုံကဵုသ္ၚာအောန်ကြဳအိုတ်ဂှ်ရော?” ရဴဝွံ သၟာန်အိုတ်ရ၊ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုခမဳဂမၠိုၚ်အိုတ်ရ။
ခမဳပၟိက်အောန်ဂမၠိုၚ်ဂှ် “ခမဳဂမၠိုၚ် ပၞောဝ်ကဵုသ္ၚာဂမၠိုၚ်ပိဂတှ်ေ ဒေပ်စွံပတန် ပ္ဍဲကွာန် သ္ၚာမွဲမွဲဂတှေ်တုဲ စာ်စ္ဍးလောန်တြဴဗ္တမ်တုဲ မုဟိုတ် သ္ဂောံပဒတဴအိုတ်ဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ်ခမဳဂမၠိုၚ်ဂှ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။
“ခမဳတအ် ခမဳဂမၠိုၚ် ပၞောဝ်ကဵုသ္ၚာဂမၠိုၚ်ပိဂတှေ် ဒေပ်စွံပတန် ပ္ဍဲကွာန် သ္ၚာမွဲမွဲဂတှ်ေတုဲ စာ်စ္ဍးလောန်တြဴဗ္တမ်တုဲ ပဒတဴအိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် ပၞောဝ်ကဵုသ္ၚာဂမၠိုၚ်ပိဂတှ်ေ ဒေပ်စွံပတန် ပ္ဍဲကွာန် သ္ၚာမွဲမွဲဂတှေ်တုဲ မုဟိုတ် စာ်စ္ဍးလောန်တြဴဗ္တမ်တုဲပဒတဴအိုတ်ဂှ်ရော? ယွံခမဳတအ် (ပွမၞးတအ်ညးဂမၠိုၚ်သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
၆၅၃) ပြာပ်လုပ်ဒဂိုန်တုဲပ္ဍဲကြဴ ပ္ဍဲတ္ၚဲဂိတုကထိုၚ်ပေၚ်ဂှ် ယြဴဘာဂြိုပ်ဂမၠိုၚ် မဂပ်ဝ်သၟိတ်ဂး ရဴဝွံမ္ဂး မၞုံကဵုသၠေဟ်ပၟာ မၞုံကဵုပရိုက်ဘဲဂမၠိုၚ် နွံအိုတ်ရ၊ ခမဳ မပဒတဴပ္ဍဲဘာဂမၠိုၚ် မၞုံသဘဴမဖှ်သာ်ဂှ်ဂှ် နွံပၟိက်မ္ဂး ပၞောဝ်ကဵုသ္ၚာဂမၠိုၚ်ပိဂတှေ် သ္ဒးဒေပ်စွံပတန် ပ္ဍဲကွာန် သ္ၚာမွဲမွဲဂတှေ်ရ၊ တၞဟ်နစာ်စ္ဍး ကေုာံသ္ၚာဂှ်တုဲ ပဒတဴဟိုတ်မမိက်ကဵုမွဲမွဲ နွံကုခမဳဂှ်မ္ဂး၊ လုကဴကာလအပိုၚ်အခြာတြဴဗ္တမ် ခမဳဂှ် စာ်စ္ဍးကေုာံသ္ၚာဂှ်တုဲ ပဒတဴမာန်ရ၊ စာ်စ္ဍးလောန်လတူဂှ် ယဝ်ပဒတဴမ္ဂး၊ ဝေၚ်ကၠေံပွမကလိဂွံသမ္မုတိ ခမဳဂမၠိုၚ်တုဲ (ကုခမဳ) ဂှ် ဒးအာပတ်နိဿဂ္ဂိပါဲစိုတ်ရ ရဴဝွံ (ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ ရဴဝွံ သ္ဂးရ)။
