၄.၃.၈.၁။ ပွံက်အစ္စေကစဳဝရသိက္ခာပိုဒ်
649) ဍေံဟွံကၠုၚ်စိုပ် ဗၞတ်စှ်တ္ၚဲဏီ မ္ဂးဂှ် ပ္ဍဲတ္ၚဲပဝါရဏာ မဟွံကၠုၚ်စိုပ် ဗၞတ်စှ်တ္ၚဲဏီ။ တ္ၚဲဝှ်ပေၚ် မ္ဂးဂှ် မိက်သ္ဂးတဴ ပဝါရဏာကတ္တိကာနက္ခတ်ရ။ သ္ၚာမဂပ်ဝ်ကဵုဒါန် ဗွဲမဃရက်ဂဗက် မ္ဂးဂှ် သွက်ဂွံတဝ်စၞေဟ်ပၞာန်လေဝ် မိက်အာရ၊ ဌာန်မွဲသအာၚ်လေဝ် မိက်အာရ၊ ဂိယဲလေဝ် ဒှ်ရ၊ မၞုံကဵုဂၠမ်ဂဝ်လေဝ် ဒှ်ရ၊ ကုညးဟွံမွဲကဵုဓရ်သဒ္ဓါလေဝ် ဓရ်သဒ္ဓါ (တၟိ) ကတဵုဒှ်ရ၊ ကုညးမဟွံလျုၚ်ဇြုၚ်သ္ဍိုက်လေဝ် ပွမလျုၚ်ဇြုၚ်သ္ဍိုက် (တၟိ) ကတဵုဒှ်ရ၊ ညးဂှ် “ယွံတဳလပိုဉ်မပြဲတအ် ဩဝ်က္ညကၠုၚ်အိုတ်ညိ၊ ကြက်ကဵုဒါန်သ္ၚာဒဂိုန်ဝှ်ရ” ရဴဝွံ ဖအောဝ်ဗလးဏာကလုတ် အာဇရေၚ်ခမဳဂမၠိုၚ်မ္ဂး၊ သ္ၚာဝွံ သ္ၚာမဂပ်ဝ်ကဵုဒါန် ဗွဲမဃရက်ဂဗက်မ္ဂးရ။ ခမဳမတီကေတ် ရဴဝွံမ္ဂး ဗွဲမဃရက်ဂဗက်ဂှ် သ္ဒးဒုၚ်ဂိုၚ်ကေတ်ရ၊ ဒုၚ်ဂိုၚ်ကေတ်တုဲပ္ဍဲကြဴ စဵုကဵုကာလအခိၚ်သ္ၚာ သ္ဒးဒေပ်စွံပတန်ရ မ္ဂးဂှ် “သ္ၚာဝွံ မဂပ်ဝ်ကဵုဒါန်ဗွဲမဃရက်ဂဗက်ရောၚ်” ရဴဝွံ သ္ပသမ္တီတုဲ သ္ဒးဒေပ်စွံပတန်ရ။ အခိၚ်သ္ၚာ မ္ဂးဂှ် ဟွံလလးကထိုန်မ္ဂး ဂိတုလအိတ်အိုတ်ဥတုဗြဲ လလးကထိုန် မသုန်ဂိတုဂမၠိုၚ်ရောၚ်။ ယဝ်ဒေပ်စွံပတန် လောန်လတူဂှ် မ္ဂးဂှ် ဟွံလလးကထိုန်မ္ဂး ကဵုကလိလောန်အာတ္ၚဲလအိတ်အိုတ်ဥတုဗြဲမ္ဂး၊ ဒးအာပတ် နိဿဂ္ဂိပါဲစိုတ်ရ၊ လလးကထိုန်မ္ဂး ကဵုကလိလောန်အာတ္ၚဲပိုက်ကထိုန်မ္ဂး၊ ဒးအာပတ်နိဿဂ္ဂိပါဲစိုတ်ရ၊ သ္ဒးသၠးကၠေံ ကုသၚ်ကီု ကုဂိုဏ်ကီု ကုပူဂိုလ်ကီုရ။ ယွံခမဳတအ် ရဴဝွံ သ္ဒးသၠးကၠေံရ ။ ပ ။ “ယွံတဳလပိုဉ်တအ် သ္ၚာမဂပ်ဝ်ကဵုဒါန် ဗွဲမဃရက်ဂဗက်အဲဍိက်ဝွံ ဂပ်ဝ်ကဵုကလိလောန်အခိၚ်သ္ၚာဒှ်တုဲ မၞုံကဵု (ဝိနယ်ကမ်) ပွမဒးသၠးကၠေံရ၊ သ္ၚာဝွံ အဲဍိက် သၠးကဵုကုသၚ်ရ” ။ ပ ။ ရဴဝွံ ဒးကလေၚ်ရ ။ ပ ။ ဒးကလေၚ်ကဵုအိုတ်ရ ။ ပ ။ ကလေၚ်ကဵုကုတဳလပိုဉ်ရ ရဴဝွံ (ဒးကလေၚ်ကဵုရ)။
650) ပ္ဍဲသ္ၚာမဂပ်ဝ်ကဵုဒါန် ဗွဲမဃရက်ဂဗက်ဂှ် မၞုံကဵုစၟတ်သမ္တီ သ္ၚာမဂပ်ဝ်ကဵုဒါန် ဗွဲမဃရက်ဂဗက်တုဲ ကဵုကလိလောန်အခိၚ်သ္ၚာမ္ဂး၊ ဒးအာပတ် နိဿဂ္ဂိပါဲစိုတ်ရ။ ပ္ဍဲသ္ၚာမဂပ်ဝ်ကဵုဒါန် ဗွဲမဃရက်ဂဗက်ဂှ် မၞုံကဵုသၠေဟ်ပၟာတုဲ ကဵုကလိလောန်အခိၚ်သ္ၚာမ္ဂး၊ ဒးအာပတ်နိဿဂ္ဂိပါဲစိုတ်ရ။ ပ္ဍဲသ္ၚာမဂပ်ဝ်ကဵုဒါန် ဗွဲမဃရက်ဂဗက်ဂှ် မၞုံကဵုစၟတ်သမ္တီ သ္ၚာမဂပ်ဝ်ကဵုဒါန်ဗွဲမဃရက်ဂဗက်ဟွံသေၚ်တုဲ ကဵုကလိလောန်အခိၚ်သ္ၚာမ္ဂး၊ ဒးအာပတ်နိဿဂ္ဂိပါဲစိုတ်ရ။ ပ္ဍဲမဟဂပ်ဝ်ပတိုန်အဓိဋ္ဌာန်ဏီဂှ် မၞုံကဵုစၟတ်သမ္တီ ပတိုန်အဓိဋ္ဌာန်တုဲမ္ဂး ။ ပ ။ ပ္ဍဲမဟဂပ်ဝ်သ္ပ ဝိကပ္ပနဏီဂှ် မၞုံကဵုစၟတ်သမ္တီ သ္ပဝိကပ္ပနတုဲမ္ဂး။ ပ္ဍဲမဟဂပ်ဝ်သၠးကၠေံဏီဂှ် မၞုံကဵုစၟတ်သမ္တီ သၠးကၠေံတုဲမ္ဂး၊ ပ္ဍဲမဟွံကၠေံလေၚ်အာဂှ် မၞုံကဵုစၟတ်သမ္တီကၠေံလေၚ်မ္ဂး။ ပ္ဍဲမဟွံလီုလာ်ဂှ် မၞုံကဵုစၟတ်သမ္တီ လီုလာ်အာမ္ဂး။ ပ္ဍဲမဟွံတူအာပၟတ်ဂှ် မၞုံကဵုစၟတ်သမ္တီ တူအာပၟတ်မ္ဂး။ ပ္ဍဲမဟဂပ်ဝ်ပၠံၚ်ၜးဏာဂှ် မၞုံကဵုစၟတ်သမ္တီ ဂပ်ဝ်ပၠံၚ်ၜးဏာတုဲ ကဵုကလိလောန်အခိၚ်သ္ၚာမ္ဂး၊ ဒးအာပတ်နိဿဂ္ဂိပါဲစိုတ်ရ။ ဟွံသၠးကၠေံ သ္ၚာမၞုံကဵု (ဝိနယ်ကမ်) ပွမဒးသၠးကၠေံတုဲ ပြဘိုဂ်သုၚ်စောဲမ္ဂး၊ ဒးအာပတ်ဒုက္ကဋ်ရ။ ပ္ဍဲသ္ၚာမဂပ်ဝ်ကဵုဒါန် ဗွဲမဃရက်ဂဗက်ဟွံသေၚ်ဂှ် မၞုံကဵုစၟတ်သမ္တီ သ္ၚာမဂပ်ဝ်ကဵုဒါန် ဗွဲမဃရက်ဂဗက်မ္ဂး၊ ဒးအာပတ်ဒုက္ကဋ်ရ။ ပ္ဍဲသ္ၚာမဂပ်ဝ်ကဵုဒါန် ဗွဲမဃရက်ဂဗက်ဟွံသေၚ်ဂှ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲသ္ၚာမဂပ်ဝ်ကဵုဒါန် ဗွဲမဃရက်ဂဗက်ဟွံသေၚ်ဂှ် မၞုံကဵုစၟတ်သမ္တီ သ္ၚာမဂပ်ဝ်ကဵုဒါန် ဗွဲမဃရက်ဂဗက်ဟွံသေၚ်မ္ဂး၊ ဟွံဒးအာပတ်ရ။
651) အပ္ဍဲအခိၚ် ပတိုန်အဓိဋ္ဌာန်မ္ဂး၊ သ္ပဝိကပ္ပနမ္ဂး၊ သၠးကၠေံမ္ဂး၊ ကၠေံလေၚ်အာမ္ဂး၊ လီုလာ်အာမ္ဂး၊ တူအာပၟတ်မ္ဂး၊ ပၠံၚ်ၜးတုဲ ဂိုၚ်ကေတ်အိုတ်မ္ဂး၊ ဍုက်ကေဝ်ဒဒှ်ေဒယှ်တုဲ ဂိုၚ်ကေတ်အိုတ်မ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲ ဟွံဒးအာပတ်ရ။ အစ္စေကစဳဝရသိက္ခာပိုဒ် အဋ္ဌမတုဲရ။
