၄.၃.၈။ အစ္စေကစဳဝရသိက္ခာပိုဒ်
646) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုည်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် အမာတ်ဇၞော်မွဲ မဒှ်အခိၚ်ညောန်ကဵုတိတ်တရဴ ဌာန်သအာၚ်ဂှ် “ယွံတဳလပိုဉ်မပြဲတအ် ဩဝ်က္ညကၠုၚ်အိုတ်ညိ၊ ကြက်ကဵုဒါန်သ္ၚာဒဂိုန်ဝှ်ရ” ရဴဝွံ ဖအောဝ်ဗလးဏာကလုတ် ဇရေၚ်ခမဳဂမၠိုၚ်ရ၊ ခမဳဂမၠိုၚ် “တဳလမၞုံပိုဉ်ကျာ်တြဲဂှ် ဟဂပ်ဝ်ကဵုအခေါၚ် သ္ၚာဒဂိုန်ဝှ် ကုခမဳဂမၠိုၚ် မဒၠိုက်ကတဵု နူဝှ်ဏီရ” ရဴဝွံ ဒှ် ‘သံသယကုက္ကုစ္စ’ ပွမချပ်သၠေဟ်ပၟာဂမၠိုၚ်တုဲ ဟွံက္ညအာအိုတ်ရ၊ ပ္ဍဲအခိၚ်ဂှ် အမာတ်ဇၞော်ဂှ် “တဳလပိုဉ်မပြဲဂမၠိုၚ် သီုဂပ်ဝ်ဖအောဝ်ဗလးဏာကလုတ်ဂှ် မုဟိုတ် ဟွံက္ညကၠုၚ်အိုတ်ဂှ်ရော? အဲတုန် ကြက်သ္ဒးအာ သွက်ဂွံတဝ်စၞေဟ်ပၞာန်ရ၊ ဇြိုၚ်ဂွံတီကေတ် ဂျိုၚ်လမျီုမာန်ရ၊ ဇြိုၚ်ဂွံတီကေတ် ချိုတ်မာန်ရ” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဂမၠိုၚ် သ္ဂောံမိၚ်ကေတ်ဂလာန်အမာတ်ဇၞော်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ပ္ဍဲအခိၚ်ဂှ် ဟိုတ်နူဟိုတ်အရာဝွံ တီလပိုဉ်ကျာ်တြဲ တွံဂလာန်ဓရ်တုဲ “ယွံခမဳတအ် ဒုၚ်ဂိုၚ်ကေတ်သ္ၚာမဂပ်ဝ်ကဵုဒါန် ဗွဲမဃရက်ဂဗက်တုဲ တၞဟ်နဒေပ်စွံပတန်ဂှ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။
647) ပ္ဍဲအခိၚ်ဂှ် ခမဳဂမၠိုၚ် “ဒုၚ်ဂိုၚ်ကေတ် သ္ၚာမဂပ်ဝ်ကဵုဒါန် ဗွဲမဃရက်ဂဗက်တုဲ တၞဟ်နဒေပ်စွံပတန် တဳလမၞုံပိုဉ်ကျာ်တြဲ ကဵုအခါၚ်ရ” ရဴဝွံ ဒုၚ်ဂိုၚ်ကေတ် သ္ၚာမဂပ်ဝ်ကဵုဒါန် ဗွဲမဃရက်ဂဗက်ဂမၠိုၚ်တုဲ ဒေပ်စွံပတန်လဝ်လောန်မွဲဂိတုအိုတ်ရ။ တဳလပိုဥ်အာနန္ဒ ဂေတ်ဂ္ၚေၚ် ဒေသစာရိတ် လၟေၚ်ဘာမ္ဂး ညာတ်ဒးသ္ၚာဂမၠိုၚ် စိုက်တုဲဒက်ကွက်လဝ် ပ္ဍဲဒုန်တေၚ်သ္ၚာဂှ်တုဲ “ယွံကောန်တၠတအ် သ္ၚာဂမၠိုၚ် စိုက်တုဲဒက်ကွက်လဝ် ပ္ဍဲဒုန်တေၚ်သ္ၚာဂှ် ဒှ်သ္ၚာဂမၠိုၚ် မုရဴညးမွဲဂှ်ရော?” ရဴဝွံ သၟာန်ခမဳဂမၠိုၚ်ရ။ ယွံကောန်တၠ သ္ၚာမဂပ်ဝ်ကဵုဒါန် ဗွဲမဃရက်ဂဗက် ပိုဲညးဂမၠိုၚ်ရ ရဴဝွံ (ဟီုသ္ဂးအိုတ်ရ)။ ယွံကောန်တၠတအ် သ္ၚာဂမၠိုၚ်ဝွံ ဒေပ်စွံပတန်လဝ် ဗၞတ်လလအ်လဵုအိုတ်ဂှ်ရော? ရဴဝွံ (သၟာန်တိုန်ပၠန်ရ)။ ပ္ဍဲအခိၚ်ဂှ် ခမဳဂမၠိုၚ် ဟီုလဴကဵုအခိၚ် အတိုၚ်ဒေက်စွံပတန်လဝ် ကုတဳလပိုဉ်အာနန္ဒအိုတ်ရ။ တဳလပိုည်အာနန္ဒဂှ် “မုဟိုတ် ခမဳဂမၠိုၚ် ဒုၚ်ဂိုၚ်ကေတ် သ္ၚာမဂပ်ဝ်ကဵုဒါန် ဗွဲမဃရက်ဂဗက်တုဲ သ္ဂောံကဵုကလိလောန်အခိၚ်သ္ၚာအိုတ်ဂှ်ရော?” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ပ္ဍဲကြဴနူဂှ် တဳလပိုဉ်အာနန္ဒ ဟီုဂရိုဟ်တၚ်ဒုဟ် ခမဳဂမၠိုၚ်ဂှ် နဟိုတ်မဂၠိုၚ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ ။ ပ ။ “ယွံခမဳတအ် ခမဳဂမၠိုၚ် ဒုၚ်ဂိုၚ်ကေတ် သ္ၚာမဂပ်ဝ်ကဵုဒါန် သ္ၚာမဂပ်ဝ်ကဵုဒါန် ဗွဲမဃရက်ဂဗက်တုဲ ကဵုကလိလောန် အခိၚ်သ္ၚာအိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဥ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ်တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် ဒုၚ်ဂိုၚ်ကေတ် သ္ၚာမဂပ်ဝ်ကဵုဒါန် ဗွဲမဃရက်ဂဗက်တုဲ သ္ဂောဴကဵုကလိလောန် အခိၚ်သ္ၚာအိုတ်ဂှ်ရော? ယွံခမဳတအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်အိုတ်ညိ။
648) ပ္ဍဲတ္ၚဲဂိတုဝှ်ပေၚ် မဟွံကၠုၚ်စိုပ် (ဒေက်ဒၟံၚ်) စှ်တ္ၚဲဏီဂှ် သ္ၚာမဂပ်ဝ်ကဵုဒါန် ဗွဲမဃရက်ဂဗက် ကတဵုဒှ်ကၠုၚ် ကုခမဳဟေၚ်မ္ဂး၊ ခမဳမတီကေတ် ရဴဝွံမ္ဂး ဗွဲမဃရက်ဂဗက်ဂှ် သ္ဒးဒုၚ်ဂိုၚ်ကေတ်ရ၊ ဒုၚ်ဂိုၚ်ကေတ်တုဲပ္ဍဲကြဴ စဵုကဵုကာလအခိၚ်သ္ၚာ သ္ဒးဒေပ်စွံပတန်ရ၊ ယဝ်ဒေပ်စွံပတန် လောန်လတူဂှ်မ္ဂး၊ (ကုခမဳ) ဂှ် ဒးအာပတ်နိဿဂ္ဂိပါဲစိုတ်ရ ရဴဝွံ (ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ ရဴဝွံ သ္ဂးရ)။
