၄.၃.၇။ မဟာပေသကာရသိက္ခာပိုဒ်
641) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဋ္ဌဳ ဇရေၚ်ဍုၚ်သာရဝှ်ဂှ် တြုံမွဲဂှ် ပ္ဍဲအခိၚ်ညောန်ကဵုတိတ်တရဴဌာန်သအာၚ်ဂှ် “ကေဝ်တောဝ်တုဲ ဩဝ်ကဵုဏာ ကုသၟာယန်သေဝ် မၞုံယၟုဝွံညိ၊ တုတ်သ္ၚာတုဲ ဩဝ်စွံပတန်လဝ်ညိ၊ ကလေၚ်စိုပ်ကၠုၚ်မ္ဂး ကြက်ဂြောပ်လတက် ကဵုတဳလပိုဉ်ဥပနန္ဒ နကဵုသ္ၚာရ” ရဴဝွံ ဟီုသ္ဂးကဵုသမ္ဘာရ။ ခမဳဇၞော်စဴပိဏ္ဍပါတ်မွဲဇကုမိၚ်ဂလာန်မဟီုသ္ဂး တြုံဂှ်ရ။ ပ္ဍဲအခိၚ်ဂှ် ခမဳဂှ် ပြာပ်အာဇရေ တဳလပိုဉ်ဥပနန္ဒ ကောန်သၟိၚ်သာကျဝၚ်တုဲ− “ယွံကောန်တၠဥပနန္ဒ တၠအဲ ဒှ်ညးပိုန်ဇၞော်ရ၊ ပ္ဍဲဌာန်မၞုံယၟုဝွံ တြုံမွဲဂှ် ပ္ဍဲအခိၚ်ညောန်ကဵုတိတ်တရဴဌာန်သအာၚ်ဂှ် ‘ကေဝ်တောဝ်တုဲ ဩဝ်ကဵုဏာ ကုသၟယန်သေဝ် မၞုံယၟုဝွံညိ၊ တုတ်သ္ၚာတုဲ ဩဝ်စွံပတန်လဝ်ညိ၊ ကလေၚ်စိုပ်ကၠုၚ်မ္ဂး ကြက်ဂြောပ်လတက် ကဵုတဳလပိုဉ်ဥပနန္ဒနကဵုသ္ၚာရ’ ရဴဝွံ ဟီုသ္ဂးကဵုသမ္ဘာရ” ရဴဝွံ သ္ဂးကဵုတဳလပိုဉ်ဥပနန္ဒ ကောန်သၟိၚ်သာကျဝၚ်ရ။ ယွံကောန်တၠ နွံဒၟံၚ်ရ၊ ညးဂှ် ဒကာကၠောန်ၜိုတ်ဥပကာအဲရ ရဴဝွံ သ္ဂးရ။ သၟာယန်သေဝ်ဂှ်လေဝ် ဒှ်ညးကၠောန်ၜိုတ်ဥပကာ တဳလပိုဉ်ဥပနန္ဒ ကောန်သၟိၚ်သာကျဝၚ်ဟေၚ်ရ၊ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် ပြာပ်အာဇရေၚ် သၟာယန်သေဝ်ဂှ်တုဲ “ယွံဒကာ ရန်တၟံကဵုအဲတုဲ ဂပ်ဝ်ကဵုတုတ်သ္ၚာဝွံရ၊ ဩဝ်သ္ပ ဇမၠိၚ်ဂၠိၚ်ဂၠိၚ် အနာံသၠဲသၠဲ ဖျုန်တီုတီုညိ၊ ဂပ်ဝ်တုတ် ဂပ်ဝ်တြး ဂပ်ဝ်စတ်နဒုန်စရံၚ် (ဂ္စာန်ဇဵုနာဲ) ဂပ်ဝ်ဂြးဗွဲမဒးရးလေဝ် ဩဝ်သ္ပညိ” ရဴဝွံ သ္ဂးကဵုသၟာယန်သေဝ်ဂှ်ရ။ ယွံတဳလပိုဉ် ညးဂမၠိုၚ်ဂှ် “နတောဝ်ဝွံ ဩဝ်တုတ်သ္ၚာညိ” ရဴဝွံ ကေဝ်တောဝ်တုဲ ကဵုတဴ ကုအဲဍိက်အိုတ်ရ၊ တၞနသ္ပ ဇမၠိၚ်ဂၠိၚ်ဂၠိၚ် အနာံသၠဲသၠဲ ဖျုန်တီုတီုဂှ် ဟွံသၟဟ်ရထရ၊ ယွံတဳလပိုဉ် တၞဟ်နပွမသ္ပ မဂပ်ဝ်တုတ် ဂပ်ဝ်တြး ဂပ်ဝ်စတ်နဒုန်စရံၚ် (ဂ္စာန်ဇဵုနာဲ) ဂပ်ဝ်ဂြး ဗွဲမဒးရးဂှ်တုန် သၟဟ်ရထရ ရဴဝွံ (ဂရၚ်ပတီရ)။ ယွံဒကာ ဖအောဝ်ဗတိုက်ရ၊ တၠအဲ ဩဝ်သ္ပဇမၠိၚ်ဂၠိၚ်ဂၠိၚ် အနာံသၠဲသၠဲ ဖျုန်တီုတီုညိ၊ စပ်ကေုာံတောဝ်တုဲ ကြက်ဒှ်ဂဗုဓ်ဓဝိၚ်ဓဝါဲ ဟွံသေၚ်ရ ရဴဝွံ (သ္ဂးရ)။ ပ္ဍဲအခိၚ်ဂှ် သၟာယန်သေဝ်ဂှ် တောဝ်အတိုၚ်မရၚ်တၠုၚ်နၚ်ဂှ် စုတ်ပ္ဍဲကၠောဝ်တုဲ ပြာပ်အာဇရေၚ်ဗြဴဂှ်တုဲမ္ဂး “နွံပၟိက်ကဵုတောဝ်ရ ယွံနာဲဗြဴ” ရဴဝွံ သ္ဂးကဵုဗြဴဂှ်ရ။ ယွံကောန်နာဲ အဲဂှ် “နတောဝ်ဝွံ ဩဝ်တုတ်သ္ၚာညိ” ရဴဝွံ ဂပ်ဝ်ဟီုသ္ဂးကဵုတၠအရ ဟွံသေၚ်ဟာ ရဴဝွံ (သ္ဂးရ)။ ယွံနာဲဗြဴ “နတောဝ်ဝွံ ဩဝ်တုတ်သ္ၚာညိ” ရဴဝွံ တၠအဲ ဂပ်ဝ်ဟီုသ္ဂးကဵုအဲဂှ် ဍာံပြရ၊ ၜိုန်ဂှ်လေဝ် တဳလပိုဉ်ဥပနန္ဒဂှ် ယွံဒကာ ဩသ္ပ ဇမၠိၚ်ဂၠိၚ်ဂၠိၚ် အနာံသၠဲသၠဲ ဖျုန်တီုတီုညိ၊ စပ်ကေုာံတောဝ်တုဲ ကြက်ဒှ်ဂဗုဓ်ဓဝိၚ်ဓဝါဲ ဟွံသေၚ်ရ ရဴဝွံ သ္ဂးကဵုအဲရ ရဴဝွံ (သ္ဂးရ)။ ပ္ဍဲအခိၚ်ဂှ် ဗြဴဂှ် ဗၞတ်တောဝ်ကဵုဏာပဌမတုဲတေံဂှ် ထပ်ကဵုဏာတောဝ်ရ၊ “တြုံဂှ် ကလေၚ်စိုပ်ကၠုၚ်နူဌာန်သအာၚ်ရ” ရဴဝွံ တဳလပိုဉ်ဥပနန္ဒ ကောန်သၟိၚ်သာကျဝၚ် သ္ဂောံမိၚ်ကေတ်မ္ဂး ပြာပ်အာဇရေၚ် တြုံဂှ်တုဲ ဂဇအ်ဒၟံၚ် ပ္ဍဲသၞာမလးပညပ်လဝ်ရ။ ပ္ဍဲအခိၚ်ဂှ် တြုံဂှ် ပြာပ်အာဇရေၚ် တဳလပိုဥ်ဥပနန္ဒ ကောန်သၟိၚ်သာကျဝၚ်တုဲ လ္ၚောဝ်သ္ပဝတ်တုဲမ္ဂး ဂဇအ်ဒၟံၚ် ပ္ဍဲဒၞါဲမွဲတုဲ “သ္ၚာဂှ် တုတ်တုဲရဟာ” ရဴဝွံ သၟာန်သမ္ဘာဇကု။ ယွံကော သ္ၚာဂှ် တုတ်တုဲရ ရဴဝွံ (သ္ဂးရ)။ ဩဝ်ရၚ်တၠုၚ်ကေတ်နၚ်ညိ၊ ကြက်ဂြောပ်ကဵုတဳလပိုဉ်ဥပနန္ဒ နကဵုသ္ၚာရရဴဝွံ (သ္ဂး)ရ။ ပ္ဍဲအခိၚ်ဂှ် ဗြဴဂှ် ရၚ်တၠုၚ်နၚ်သ္ၚာဂှ်တုဲ ဒုၚ်ကဵုကုတြုံတၠသ္ၚိတုဲ ဟီုလဴဟိုတ်ပရူပရာဂှ်ရ၊ ပ္ဍဲအခိၚ်ဂှ် တြုံဂှ် ကဵုဒါန်သ္ၚာ ကုတဳလပိုဉ်ဥပနန္ဒ ကောန်သၟိၚ်သာကျဝၚ်တုဲ ပ္ဍဲကြဴ “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ ပၟိက်ဇၞော်အိုတ်ရ၊ ဟွံအေၚ်သတှေ်အိုတ်ရ၊ (ဟွံတရိုပ်စိုတ်အိုတ်ရ၊) တၞဟ်နပွမဂြောပ်လတက်ကဵုခမဳဂမၠိုၚ်ဝွံ နသ္ၚာဂှ် ဟွံလောဲသွာရ၊ မုဟိုတ် တဳလပိုဉ်ဥပနန္ဒ သီုအဲဟဂပ်ဝ် ဘိက်နိမန်လတ် ပ္ဍဲကိုပ်ကၠာဂှ် ပြာပ်အာဇရေၚ် သၟာယန်သေဝ်ဂမၠိုၚ်တုဲ အာစိုပ်ပွမစဳရေၚ်လောန် ပ္ဍဲသ္ၚာဂှ်ရော?” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်တြုံဂှ် မဟီုဂရိုဟ်ပျုတ်ဗ္ဒေက်ဟီုထ္ၜးဒုဟ်အိုတ်ရ။ ခမဳပၟိက်အောန်ဂမၠိုၚ်ဂှ် “တဳလပိုဉ်ဥပနန္ဒ ကောန်သၟိၚ်သာကျဝၚ် ပြာပ်အာဇရေၚ် သၟာယန်သေဝ်ဂမၠိုၚ် ဒဒက်တဴဒကာ သီုမဟဂပ်ဝ်ဘိက်နိမန်လဝ် ပ္ဍဲကိုပ်ကၠာတုဲ မုဟိုတ်သ္ဂောံ အာစိုပ်ပွမစဳရေၚ်လောန် ပ္ဍဲသ္ၚာဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် တဳလပိုဉ်ဥပနန္ဒ ကောန်သၟိၚ်သာကျဝၚ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံဥပနန္ဒ တၠအဲ ပြာပ်အာဇရေၚ် သၟာန်ယဝ်သေဝ်ဂမၠိုၚ် ဒဒက်တဴကာ သီုမဟဂပ်ဝ်ဘိက်နိမန်လဝ် ပ္ဍဲကိုပ်ကၠာတုဲ အာစိုပ်ပွမစဳရေၚ်လောန် ပ္ဍဲသ္ၚာဟီုဂှ် ဍာံပြဟာ” ရဴဝွံ စၟဳစၟတ် သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ ယွံဥပနန္ဒ ဒှ်ကဠောမသ ကေုာံတၠအဲဟာ၊ ဟွံဒှ်ကဠောမသဟာ ရဴဝွံ (သၟာန်တိုန်) ယွံကျာ်မၞုံပိုဉ် ဟွံဒှ်ကဠောမသရ ရဴဝွံ (ဂရၚ်ပတီရ)။ ယွံတြုံမလ္ၚုသၟး (နူမဂ်ဖိုလ်) ညးဟွံသေၚ်ကဵုကဠောမသဂှ် ဗဗွဲသပ္ပါယ်ကီု ဟွံဗဗွဲသပ္ပါယ်ကီု နွံကီု ဟွံမွဲကီု ဒဒက်တဴညးဟွံထေက်ကဵုကဠောမသဂှ် တီကေတ် ဟွံမာန်ရ၊ ယွံတြုံမလ္ၚုသၟး (နူမဂ်ဖိုလ်) သီုဒှ်သာ်ဂှ် တၠအဲဂှ် ပြာပ်အာဇရေၚ် သၟာယန်သေဝ်ဂမၠိုၚ် ဒဒက်တဴဒကာ ဟွံသေၚ်ကဵုကဠောမသ သီုမဟဂပ်ဝ်ဘိက်နိမန်လဝ် ပ္ဍဲကိုပ်ကၠာတုဲ အာစိုပ် ပွမစဳရေၚ်လောန် ပ္ဍဲသ္ၚာဂှ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲ သ္ပဒး) ဝွံ ကုညးဟွံလျုၚ်ဇြုၚ်သ္ဍိုၚ်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
642) ရန်တၟံကဵုခမဳဟေၚ်တုဲ သမ္ၚေဟ်တြုံကီု သမ္ၚေဟ်ဗြဴကီု ဖအောဝ်ကဵုသၟာယန်သေဝ်ဂမၠိုၚ် တုတ်သ္ၚာဂှ် သီုဟဂပ်ဝ်ဘိက်နိမန် ပ္ဍဲကိုပ်ကၠာ ပြာပ်အာဇရေၚ် သၟာယန်သေဝ်ဂမၠိုၚ်တုဲ ‘ယွံဒကာ သ္ၚာဝွံ ရန်တၟံကဵုအဲဟေၚ်တုဲ ဂပ်ဝ်တုတ်ရ၊ ဩဝ်သ္ပ ဇမၠိၚ်ဂၠိၚ်ဂၠိၚ် အနာံသၠဲသၠဲ ဖျုန်တီုတီုအိုတ်ညိ၊ ဂပ်ဝ်တုတ် ဂပ်ဝ်တြး ဂပ်ဝ်စတ်ဒုန်စရံၚ် (ဂ္စာန်ဇဵုနာဲ) ဂပ်ဝ်ဂြးဗွဲမဒးရးလေဝ် ဩဝ်သ္ပအိုတ်ညိ၊ ပိုဲညးဂမၠိုၚ် ထေက်ကဵုဒးကဵုဗၞတ်ညိနာၚ်ဂှ် ဒုၚ်ကဵုကုဒကာတအ်ညးဂမၠိုၚ်မာန်အိုတ်ရ’ ရဴဝွံ ယဝ်အာစိုပ် ပွမစဳရေၚ်လောန် ပ္ဍဲသ္ၚာမ္ဂး ခမဳဂှ် သ္ဂးရဴဝွံတုဲ ဒုၚ်ကဵု ထေက်ကဵုဒးကဵု ဗၞတ်ညိနာၚ်ဂှ်မ္ဂး၊ ဗွဲတွဵုမယုတ် အယာံမာတ်ပိဏ္ဍပါတ်လေဝ် ဒုၚ်ကဵုမ္ဂး၊ (ကုခမဳ) ဒးအာပတ် နိဿဂ္ဂိပါဲစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
