၄.၃.၆.၁။ ပွံက်သုတ္တဝိညတ္တိသိက္ခာပိုဒ်

638) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂး ခမဳရ။ အလဵုဇကု မ္ဂးဂှ် အာတ်ကေတ် အလဵုလဵုဇကုတုဲ။ တောဝ် မ္ဂးဂှ် ဗွဲတောဝ်ခေါမ တောဝ် တောဝ်သုတ် တောဝ်သော်သတ် တောဝ်ကာန် တောဝ်ဘၚ်္ဂ မၞုံတြဴဂကူဂမၠိုၚ်ရ။ သၟာယန်သေဝ်ဂမၠိုၚ် မ္ဂးဂှ် ဖအောဝ်ကဵုသၟာကမၠောန်တုတ်တုတ်ဂမၠိုၚ် တုတ်မ္ဂး၊ ရိုဟ်ပယောဂ ရိုဟ်ပယောဂ ပွမပတိတ်ဇြဟတ် (ဒးအာပတ်) ဒုက္ကဋ်ရ၊ ဟိုတ်ပွမကလိဂွံ မၞုံကဵု (ဝိနယ်ကမ်) ပွမဒးသၠးရ၊ သ္ဒးသၠးကၠေံ ကုသၚ်ကီု ကုဂိုဏ်ကီု ကုပူဂိုလ်ကီုရ။ ယွံခမဳတအ် ရဴဝွံ သ္ဒးသၠးကၠေံရ ။ ပ ။ “ယွံတဳလပိုဉ်တအ် သ္ၚာအဲဍိက်ဝွံ အလဵုဇကု အာတ်တောဝ်တုဲ ဖအောဝ်ကဵုသၟာယန်သေဝ် (သၟာတုတ်တုတ်) ဂမၠိုၚ် ဂပ်ဝ်တုတ်ဒှ်တုဲ မၞုံကဵု (ဝိနယ်ကမ်) ပွမဒးသၠးရ၊ သ္ၚာဝွံ အဲဍိက် သၠးကဵုကုသၚ်ရ” ။ ပ ။ ရဴဝွံ ဒးကလေၚ်ရ ။ ပ ။ ရဴဝွံ ဒးကလေၚ်ကဵုအိုတ်ရ ။ ပ ။ ကလေၚ်ကဵု ကုတဳလပိုဉ်ရ ရဴဝွံ (ဒးကလေၚ်ကဵုရ)။

639) ပ္ဍဲမဂပ်ဝ်ဖအောဝ်ကဵုတုတ်ဂှ် မၞုံကဵုစၟတ်သမ္တီ မဂပ်ဝ်ဖအောဝ်ကဵုတုတ်မ္ဂး၊ ဒးအာပတ်နိဿဂ္ဂိပါဲစိုတ်ရ။ ပ္ဍဲမဂပ်ဝ်ဖအောဝ်ကဵုတုတ်ဂှ် မၞုံကဵုသၠေဟ်ပၟာမ္ဂး၊ ဒးအာပတ်နိဿဂ္ဂိပါဲစိုတ်ရ။ ပ္ဍဲမဂပ်ဝ်ဖအောဝ်ကဵုတုတ်ဂှ် မၞုံကဵုစၟတ်သမ္တီ မဟဂပ်ဝ်ဖအောဝ်ကဵုတုတ်မ္ဂး၊ ဒးအာပတ်နိဿဂ္ဂိပါဲစိုတ်ရ။ ပ္ဍဲမဟဂပ်ဝ်ဖအောဝ်ကဵုတုတ်ဂှ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲမဟဂပ်ဝ်ဖအောဝ်ကဵုတုတ်ဂှ် မၞုံကဵုစၟတ်သမ္တီ မဟဂပ်ဝ်ဖအောဝ်ကဵုတုတ်မ္ဂး၊ ဟွံဒးအာပတ်ရ။

640) တၞဟ်နဇိၚ်သ္ၚာ (အာတ်တောဝ်) မ္ဂး၊ ဟွံဒးအာပတ်ရ၊ ပ္ဍဲပယောဂပတ်ကီု ပ္ဍဲဇုက်ကာယဗန်ကီု ပ္ဍဲဇုက်ဒက်ပ္ဍဲပၞး (ဇက်ကၟာဲ) ကီု ပ္ဍဲထိုၚ် (ဖျေဲ) ဗဗေၚ်ကီု ပ္ဍဲခ္ဍိုဟ်ဍာ်ကီု ဟွံဒးအာပတ်ရ၊ ကုကဠောမသဂမၠိုၚ်ကီု ညးဂပ်ဝ်ဘိက်ကဵုလဝ်အခေါၚ်ဂမၠိုၚ်ကီု၊ (အာတ်) တၞဟ်နသွက်ညးသအာၚ်မ္ဂး၊ ရာန်နကဵုဂြပ်ဇကုမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ သုတ္တဝိညတ္တိသိက္ခာပိုဒ် ဆဋ္ဌတုဲရ။