၄.၂.၆.၁။ ပွံက်ဨဠကလောမသိက္ခာပိုဒ်
573) ကုခမဳ မသွိုန်ဗပိုန် တရဴအဓာန်မဂၠိၚ်သ္ၚောဲ မ္ဂးဂှ် ကုခမဳမအာဂၠံၚ်တရဴ။ တသော်သဵုဂမၠိုၚ် ကတဵုဒှ်ကၠုၚ်အိုတ် မ္ဂးဂှ် ကတဵုဒှ်ကၠုၚ် နူဂိုဏ်ကီု နူကဠောမသကီု နူမိတ်သဟာဲကီု ပံသုကူကီု နဂြပ်ဇကုကီုအိုတ်ရ။ ခမဳမၞုံပၟိက်ဂှ် မ္ဂးဂှ် ခမဳသၟိက်မိက်ဂွံဂှ် ဒုၚ်ဂိုၚ်ကေတ်ရ။ ဒုၚ်ဂိုၚ်ကေတ်တုဲ ပ္ဍဲကြဴ စဵုကဵုပိယောဇနာ ရၚ်တၠုၚ်ဏာ တဲဇကုမာန်ရ မ္ဂးဂှ် စဵုကဵုပယောဇနာ ရၚ်တၠုၚ်ဏာ နတဲဇကုမာန်ရ။ ညးရၚ်တၠုၚ်ကဵုဟွံမွဲ မ္ဂးဂှ် ညးဗြဴကီု ညးတြုံကီု ခရှ်ကီု ခမဳကီု ညးသအာၚ်မရၚ်တၠုၚ်ကီု မမိက်ကဵုမွဲမွဲ ဟွံမွဲမ္ဂး။ ၜိုန်ညးရၚ်တၠုၚ် ဟွံမွဲလေဝ် လောနလတူပိယောဇနာဂှ် ယဝ်ရၚ်တၠုၚ်ဏာ မ္ဂးဂှ် ဇိုၚ်ပဌမဂှ် ကဵုကလိလောန်အာ ပိယောဇနာမ္ဂး၊ ဒးအာပတ် နိဿဂ္ဂိပါဲစိုတ်ရ၊ ဒတူဒၟံၚ်ပ္ဍဲအပ္ဍဲပိယောဇနာတုဲ ကဵုဒတုံစှေ် ပ္ဍဲလ္ပာ်မ္ၚးပိယောဇနာမ္ဂး၊ ဒးအာပတ် နိဿဂ္ဂိပါဲစိုတ်ရ။ ဃောညးသအာၚ် ဟွံတီဂှ် စုတ်ပ္ဍဲယာန်ကီု ပ္ဍဲဂြပ်ကီုတုဲ ကဵုကလိလောန်အာ ပိယောဇနာမ္ဂး၊ မၞုံကဵု (ဝိနယ်ကမ်) ပွမဒးသၠးအိုတ်ရ၊ ဂပ်ဝ်သ္ဒးသၠးကၠေံရ၊ သ္ဒးသၠးကၠေံ ကုသၚ်ကီု ကုဂိုဏ်ကီု ကုပူဂိုလ်ကီုရ။ ယွံခမဳတအ် ရဴဝွံ သ္ဒးသၠးကၠေံရ ။ ပ ။ “ယွံတဳလပိုဉ်တအ် တသော်သဵုအဲဍိက်ဂမၠိုၚ်ဝွံ ဂပ်ဝ်ကဵုကလိလောန်ဒးပိယောဇနာတုဲ ထေက်ကဵုဒးသၠးကၠေံအိုတ်ရ၊ တသော်သဵုဂမၠိုၚ်ဝွံ အဲဍိက် သၠးကဵုကုသၚ်ရ” ။ ပ ။ ရဴဝွံ ဒးကလေၚ်ရ ။ ပ ။ ရဴဝွံ ဒးကလေၚ်အိုတ်ရ ။ ပ ။ ကလေၚ်ကဵုကုတဳလပိုဉ်ရ ရဴဝွံ (ဒးကလေၚ်ကဵုရ)။
574) ပ္ဍဲမလောန်လတူပိယောဇနာဂှ် မၞုံကဵုစၟတ်သမ္တီလောန်တုဲ ကဵုကလိလောန်မ္ဂး၊ ဒးအာပတ် နိဿဂ္ဂိပါဲစိုတ်ရ၊ ပ္ဍဲမလောန်လတူပိယောဇနာဂှ် မၞုံကဵုသၠေဟ်ပၟာတုဲ ကဵုကလိလောန်မ္ဂး၊ ဒးအာပတ် နိဿဂ္ဂိပါဲစိုတ်ရ၊ ပ္ဍဲမလောန်လတူပိယောဇနာဂှ် မၞုံကဵုစၟတ်သမ္တီဟွံလောန်တုဲ ကဵုကလိလောန်မ္ဂး၊ ဒးအာပတ်နိဿဂ္ဂိ ပဲါစိုတ်ရ။ ပ္ဍဲမယုက်ဒေက်သၟဝ်ပိယောဇနာဂှ် မၞုံကဵုစၟတ်သမ္တီလောန်မ္ဂး၊ ဒးအာပတ်ဒုက္ကဋ်ရ၊ ပ္ဍဲမယုတ်ဒေက်သၟဝ်ပိယောဇနာဂှ် မၞုံကဵုသၠေဟ်ပၟာမ္ဂး၊၊ ဒးအာပတ်ဒုက္ကဋ်ရ၊ ပ္ဍဲမယုတ်ဒေက်သၟဝ်ပိယောဇနာဂှ် မၞုံကဵုစၟတ်သမ္တီယုတ်ဒေက်မ္ဂး၊ ဟွံဒးအာပတ်ရ။
575) ရၚ်တၠုၚ်ဏာပိယောဇနာမ္ဂး၊ ယုတ်ဒေက်သၟဝ်ပိယောဇနာတုဲ ရၚ်တၠုၚ်ဏာမ္ဂး၊ ဟွံဒးအာပတ်ရ၊ ရၚ်တၠုၚ်ဏာ ရၚ်တၠုၚ်နၚ် ပိယောဇနာမ္ဂး၊ မိက်ပဒတဴ ပ္ဍဲပိယောဇနာတုဲ အာတုဲမ္ဂး နူဂှ်ရၚ်တၠုၚ်ဏာ လ္ပာ်မ္ၚးမ္ဂး၊ ကလိဂွံမဂပ်ဝ်ပၠံၚ်ၜးဏာ ‘ဒမၠကၠဟ်ထောံလဝ်’ တုဲ ရၚ်တၠုၚ်ဏာမ္ဂး၊ ကလိဂွံသၠးကၠေံ ‘သ္ပဝိနယ်ကမ်တုဲ’ ဂှ်တုဲ ရၚ်တၠုၚ်ဏာမ္ဂး၊ ကဵုညးသအာၚ်ရၚ်တၠုၚ်ဏာမ္ဂး၊ ရၚ်တၠုၚ်ဏာ မဂပ်ဝ်ခၞံတုဲ ‘ဒှ်မပ္တံခေါဇဴတုဲ’ မ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ဨဠကလောမသိက္ခာပိုဒ် ဆဋ္ဌတုဲရ။
