၄.၂.၇။ ဨဠကလောမဓောဝါပနသိက္ခာပိုဒ်

576) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာနိဂြောဓာရာမ် ဇရေၚ်ဍုၚ်ကပ္ပိလဝှ် သက္ကရးဂှ် ခမဳဆဗ္ဗဂ္ဂဳဂမၠိုၚ် လပိုက်ကြာတ်ကြဴလေဝ် ကဵုလပိုက်ကြာတ်ကြဴ တသော်သဵုဂမၠိုၚ် ကုခမဳဗြဴဂမၠိုၚ်အိုတ်ရ၊ ဖျောန်လေဝ်ကဵုဖျောန်အိုတ်ရ၊ သှ်ပၠိုဟ်လေဝ် ကဵုသှ်ပၠိုဟ်အိုတ်ရ၊ ခမဳဗြဴဂမၠိုၚ် မဒးလပိုက်ကြာတ်ကြဴဖျောန်သှ်ပၠိုဟ် တသော်သဵုဂမၠိုၚ်ဂှ် ဒးဗလးထောံလဝ် ကမၠောန်ကေၚ်ကာ ပွမကတ်ဗတောန်သိက္ခာပိုဒ် ပွမကလေၚ်သၟာန်သၟုက်ဂတးဂတန် ကေုာံအဓိသဳလ အဓိစိတ္တ အဓိပညာဂမၠိုၚ်အိုတ်ရ။ ပ္ဍဲအခိၚ်ဂှ် မဟာပဇာပတိဂေါတမဳ ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝ် တဳလမၞုံပိုဉ်ကျာ်တြဲတုဲမ္ဂး ဒတူဒၟံၚ် ပ္ဍဲဗ္ဒါဲမွဲရ၊ မဟာပဇာပတိဂေါတမဳ မဒတူဒၟံၚ် ပ္ဍဲဒၞါဲမွဲဂှ် “ယွံဂေါတမဳ ခမဳဗြဴဂမၠိုၚ် သီုဟွံဝိဝိၚ်ဟိုတ်မာဲ ပတိတ်ဇြဟတ်ဗွဲမသကာတ်ဂှ် မၞုံကဵုစိုတ်မတန်ကြန်ဂမၠိုၚ်ဒှ်တုဲ ပဒတဴဒၟံၚ်အိုတ်ဟာ” ရဴဝွံ တဳလမၞုံပိုဉ်ကျာ်တြဲ သၟာန်ရ။ ယွံကျာ်မၞုံပိုဉ် သာ်လဵု သတိပွမဟွံဝိဝိၚ်ဟိုတ်မာဲ ဂွံနွံကုခမဳဗြဴဂမၠိုၚ်မာန်ဂှ်ရော? ခမဳဆဗ္ဗဂ္ဂဳဂမၠိုၚ် လပိုက်ကြာတ်ကြဴလေဝ် ကဵုလပိုက်ကြာတ်ကြဴ တသော်သဵုဂမၠိုၚ် ကုခမဳဗြဴဂမၠိုၚ်အိုတ်ရ၊ ဖျောန်လေဝ် ကဵုဖျောန်အိုတ်ရ၊ သှ်ပၠိုဟ်လေဝ် ကဵုသှ်ပၠိုဟ်အိုတ်ရ၊ ခမဳဗြဴဂမၠိုၚ် မဒးလပိုက်ကြာတ်ကြဴဖျောန်သှ်ပၠိုဟ် တသော်သဵုဂမၠိုၚ်ဂှ် ဒးဗလးထောံလဝ် ကမၠောန်ကေၚ်ကာပွမကတ်ဗတောန်သိက္ခာပိုဒ် ပွမကလေၚ်သၟာန်သၟုက်ဂတးဂတန် ကေုာံခမဳသဳလ အဓိစိတ္တ အဓိပညာဂမၠိုၚ်အိုတ်ရ ရဴဝွံ (ဂရၚ်ပတီရ)။ ပ္ဍဲအခိၚ်ဂှ် မဟာပဇာပတိဂေါတမဳဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုတီညာတ် (ဒတုဲဖဵုမြမောဝ်) ကဵုဒဂိုန်ကေတ် (ဓရ်) (သွက်ဂွံဒ္ဂေတ်ဓရ်) ကဵုကေက်သကာတုဲ ကဵုမြဟ်မြာတုဲဒှ်တုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ သ္ပရှေ်သှေ်ရဴဂဴကၠာ ပါဲစ္ဍးအာရ၊ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ် ကောံဓရီုတုဲမ္ဂး— “ယွံခမဳတအ် မၞးတအ်ညးဂမၠိုၚ် လပိုက်ကြာတ်ကြဴလေဝ် ကဵုလပိုက်ကြာတ်ကြဴတသော်သဵုဂမၠိုၚ် ကုခမဳဗြဴဂမၠိုၚ်အိုတ်ရ၊ ဖျောန်လေဝ် ကဵုဖျောန်အိုတ်ရ၊ သှ်ပၠိုဟ်လေဝ် ကဵုသှ်ပၠိုဟ်အိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ ယွံတြုံမလ္ၚုသၟး (နူမဂ်ဖိုလ်) တအ် ညးဟွံသေၚ်ကဵုကဠောမသဂမၠိုၚ်ဂှ် ဗဗွဲသပ္ပါယ်ကီု ဟွံဗဗွဲသပ္ပါယ်ကီု မၞုံကဵုလျုၚ်ဇြုၚ်သ္ဍိုက်ကီု ဟွံမွဲကဵုလျုၚ်ဇြုၚ်သ္ဍိုက်ကီု ဒဒက်တဴညးဂမၠိုၚ် ဟွံသေၚ်ကဵုကဠောမသဂှ် တီကေတ်ဟွံမာန်ရ၊ ယွံတြုံမလ္ၚုသၟး (နူမဂ်ဖိုလ်) တအ် သီုဒှ်တဴသာ်ဂှ် မၞးတအ်ညးဂမၠိုၚ် ဖအောဝ်ကဵုခမဳဗြဴဂမၠိုၚ် ဟွံသေၚ်ကဵုကဠော လပိုက်ကြာတ်ကြဴတသော်သဵုဂမၠိုၚ်အိုတ်ဂှ်ရော? ဖျောန်လေဝ် ကဵုဖျောန်အိုတ်ဂှ်ရော? သှ်ပၠိုဟ်လေဝ်ကဵုသှ်ပၠိုဟ်အိုတ်ဂှ်ရော? ယွံတြုံမလ္ၚုသၟး(နူမဂ်ဖိုလ်) တအ် (ပွမၞးတအ်ညးဂမၠိုၚ်သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။

577) ယြဴခမဳမွဲ ကုခမဳဗြဴဂမၠိုၚ် ဟွံသေၚ်ကဵုကဠော လပိုက်ကြာတ်ကြဴလေဝ် ကဵုလပိုက်ကြာတ်ကြဴတသော်သဵုဂမၠိုၚ်မ္ဂး၊ ဖျောန်လေဝ် ကဵုဖျောန်မ္ဂး၊ သှ်ပၠိုဟ်လေဝ် ကဵုသှ်ပၠိုဟ်မ္ဂး၊ (ကုခမဳ) ဂှ် ဒးအာပတ် နိဿဂ္ဂိပ္ပါဲစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။