၄.၂.၆။ ဨဠကလောမသိက္ခာပိုဒ်
571) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳမွဲဇကုဂှ် ဃောအာတဴ ကောသလဇနပိုဒ် ဍုၚ်သာရဝှ်ဂှ် ပ္ဍဲအကြာဂၠံၚ်တရဴ တသော်သဵုဂမၠိုၚ် ကတဵုဒှ်ကၠုၚ်အိုတ်ရ၊ ပ္ဍဲအခိၚ်ဂှ် ခမဳဂှ် ဒက်ဂွဳကၠေံ တသော်သဵုဂမၠိုၚ် နကဵုသ္ၚာကၞေဟ်တုဲ (ယိုက်) အာရ။ မၞိဟ်ဂမၠိုၚ်ညာတ်ဒးခမဳဂှ်တုဲ “ယွံတဳလပိုဉ် နၚုဟ်မးမၞုံဗၞတ်မုစိ တဳလပိုဉ် ဂပ်ဝ်ရာန်နၚ်အိုတ်ရော? ကြက်ကလိဂွံပရဲ ဗၞတ်မုစိဂှ်ရော?” ရဴဝွံ ဟီုသ္ပဂရိုၚ်စရဵုဗျံက်အိုတ်ရ၊ ခမဳဂှ်မၞိဟ်ဂမၠိုၚ် ဂပ်ဝ်ကဵုသ္ပဂရိုၚ်စရဵုဗျံက်ဒှ်တုဲ မုက်မတ်ဟွံကျေဝ်ဂေါဝ်ဒှ်အာရ၊ ပ္ဍဲအခိၚ်ဂှ် ခမဳဂှ် အာဍုၚ်သာရဝှ်တုဲ သီုမဒတူဒၟံၚ်ဟေၚ် ဗိုတ်ထောံဖျေံ တသော်သဵုဂမၠိုၚ်တုဲ။ ခမဳဂမၠိုၚ် “ယွံကောန်တၠ တၠအဲ မုဟိုတ် သီုမဒတူဒၟံၚ်ဟေၚ် ဗိုတ်ထောံဖျေံ တသော်သဵုဂမၠိုၚ်ဂှ်ရော?” ရဴဝွံ သၟာန်ခမဳဂှ်အိုတ်ရ။ ယွံကောန်တၠတအ် ဟိုတ်ဒဒှ်အိုတ်သီု ဒးဟီုလဴမ္ဂး ဟိုတ်နူဟိုတ်တသော်သဵုဂမၠိုၚ်ဝွံဟေၚ် ဂပ်ဝ်ဟီုသ္ပဂရိုၚ်စရဵုဗျံက်အဲရ ဟွံသေၚ်ဟာ ရဴဝွံ (သ္ဂးရ)။ ယွံကောန်တၠ နူဌာန်ခရာသ္ၚောဲဗၞတ်လဵု ရၚ်တၠုၚ်နၚ် တသော်သဵုဂမၠိုၚ်ဝွံဂှ်ရော? ရဴဝွံ (သၟာန်တိုန်ပၠန်ဂှ်)။ ယွံကောန်တၠ လောန်လတူပိယောဇနာရ ရဴဝဋ္ဌွံ (ဂရၚ်ပတီရ)။ ခမဳပၟိက်အောန်ဂမၠိုၚ်ဂှ် “ခမဳဂှ် မုဟိုတ် လောန်လတူပိယောဇန သ္ဂောံရၚ်တၠုၚ်နၚ်တသော်သဵုဂမၠိုၚ်ဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဂှ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳ တၠအဲ လောန်လတူပိယောဇနာ ရၚ်တၠုၚ်နၚ် တသော်သဵုဂမၠိုၚ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ်တၠအဲ လောန်လတူပိယောဇနာ ရၚ်တၠုၚ်တသော်သဵုဂမၠိုၚ်ဂှ်ရော? (ပွတၠအဲ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
572) ကုခမဳ မသွိုန်ဗပိုန် တရဴအဓာန်မဂၠိုၚ်သ္ၚောဲဂှ် တသော်သဵုဂမၠိုၚ် ကတဵုဒှ်ကၠုၚ်အိုတ်မ္ဂး၊ ခမဳမၞုံပၟိက်ဂှ် ဒုၚ်ဂိုၚ်ကေတ်ရ၊ ဒုၚ်ဂိုၚ်ကေတ်တုဲ ပ္ဍဲကြဴ ညးရၚ်တၠုၚ်ကဵုဟွံမွဲမ္ဂး စဵုကဵုပိယောဇနာ ရၚ်တၠုၚ်ဏာနတဲဇကုမာန်ရ၊ ၜိုန်ညးရၚ်တၠုၚ် ဟွံမွဲလေဝ် လောန်လတူပိယောဇနာဂှ် ယဝ်ရၚ်တၠုၚ်ဏာမ္ဂး၊ (ကုခမဳဂှ်) ဒးအာပတ် နိဿဂ္ဂိပါဲစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
