၄.၂.၅.၁။ ပွံက်နိသဳဒနသန္တတသိက္ခာပိုဒ်
568) နိသဳဒိုန် မ္ဂးဂှ် သ္ဂးတဴ သၞာံမၞုံကဵုတသာဲရ။ သၞာ မ္ဂးဂှ် သီုဟွံတုတ်ပၠးတုဲ သၞာမဂပ်ဝ်ခၞံလဝ်ရောၚ်။ ဍေံမမိက်ကဵုခၞံတုဲ မ္ဂးဂှ် (အလဵုဇကု) ခၞံကီု ဖအောဝ်ကီု (ညးသအာၚ်) ခၞံကီု။ သၞာတြေမ် မ္ဂးဂှ် သၞာမဂပ်ဝ်ဗိုက်လဝ် ဗၞတ်မွဲဝါဟေၚ် မဂပ်ဝ်ရုၚ်လဝ် ဗၞတ်မွဲဝါဟေၚ်ရောၚ်။ (ဗိုက်လတက်ဗၞတ်ၜါဟီုဂှ် လးဂဇအ်မွဲဝါ လးတိတ်မွဲဝါ မိက်သ္ဂးရ၊) တၞဟ်နသ္ပပွမလီုကၠေံသာ် နူပွဳပွူသၞာတြေမ် သ္ဒးဂိုၚ်ကေတ် ဗၞတ်မွဲက္ဍစ္ဍေန်တဲကျာ်ရ မ္ဂးဂှ် တၞဟ်နသွက်ဂွံခိုၚ် ကုတ်ကေတ် ခ္ဍမ်ခ္ဍမ်ကီု ပန်ကၠၚ်ကီုတုဲ ပ္ဍဲမွဒၞါဲလေဝ် သ္ဒးပၠးလးရ၊ သှ်ပၠိုဟ် (လလိုဟ်) ကၠေံတုဲလေဝ် သ္ဒးပၠးလးရ။ ခမဳ သီုဟွံဂိုၚ်ကေတ် ဗၞတ်မွဲက္ဍစၞေန်တဲကျာ် နူပွဳပွူသၞာတြေမ်ဂှ် မ္ဂးဂှ် နူပွဳပွူသၞာတြေမ်ဂှ် ဟွံဂိုၚ်ကေတ် ဗၞတ်မွဲက္ဍစၞေန်တဲကျာ်တုဲ။ (အလဵုဇကုလေဝ်) ခၞံသၞာနိသဳုဒိုန်တၟိမွဲသအာၚ်မ္ဂး၊ (ညးသအာၚ်ဂမၠိုၚ်လေဝ်) ကဵုခၞံမ္ဂး၊ ဟိုတ်နူပယောဂ ပွမပတိတ်ဇြဟတ် (ဒးအာပတ်) ဒုက္ကဋ်ရ၊ ဟိုတ်ပွမကလိဂွံ မၞုံကဵု (ဝိနယ်ကမ်) ပွမဒးသၠးရ၊ ဂပ်ဝ်သ္ဒးသၠးကၠေံရ၊ သ္ဒးသၠးကၠေံကုသၚ်ကီု ကုဂိုဏ်ကီု ကုပူဂိုလ်ကီုရ။ ယွံခမဳတအ် ရဴဝွံ သ္ဒးသၠးကၠေံရ ။ ပ ။ “ယွံတဳလပိုဉ်တအ် သၞာနိသဳဒိုန်အဲဍိက်ဝွံ နူပွဳပွူသၞာတြေမ် သီုဟွံဂိုၚ်ကေတ် ဗၞတ်မွဲက္ဍစၞေန်တဲကျာ်တုဲ ဂပ်ဝ်ကဵုခၞံဒးတုဲ မၞုံကဵု (ဝိနယ်ကမ်) ပွမဒးသၠးကၠေံရ၊ သၞာနိသဳဒိုန်ဝွံ အဲဍိက်သၠးကဵုကုသၚ်ရ” ။ ပ ။ ရဴဝွံ ဒးကလေၚ်ရ ။ ပ ။ ရဴဝွံ ဒးကလေၚ်ကဵုအိုတ်ရ ။ ပ ။ ကလေၚ်ကဵုကုတဳလပိုဉ်ရ ရဴဝွဴ (ဒးကလေၚ်ကဵုရ)။
569) ဇကု ခၞံလဝ်ဟွံစိုပ်ဒတုဲဏီဂှ် အလဵုဇကု ကဵုစိုပ်ဒတုဲမ္ဂး၊ ဒးအာပတ်နိဿဂ္ဂိပါဲစိုတ်ရ။ ဇကု ခၞံလဝ်ဟွံစိုပ်ဒတုဲဏီဂှ် ကဵုညးသအာၚ်ဂမၠိုၚ် စိုပ်ဒတုဲမ္ဂး၊ ဒးအာပတ်နိဿဂ္ဂိပါဲစိုတ်ရ။ ညးသအာၚ်ဂမၠိုၚ် ခၞံလဝ်ဟွံစိုပ်ဒတုဲဏီဂှ် အလဵုဇကု ကဵုစိုပ်ဒတုဲမ္ဂး၊ ဒးအာပတ်နိဿဂ္ဂိပါဲစိုတ်ရ။ ညးသအာၚ်ဂမၠိုၚ် ခၞံလဝ်ဟွံစိုပ်ဒတုဲဏီဂှ် ကဵုညးသအာၚ်ဂမၠိုၚ် စိုပ်ဒတုဲမ္ဂး၊ ဒးအာပတ် နိဿဂ္ဂိပါဲစိုတ်ရ။ တၞဟ်နသွက်ညးသအာၚ် (အလဵုဇကုလေဝ်) ခၞံမ္ဂး၊ (ညးသအာၚ်ဂမၠိုၚ်လေဝ်) ကဵုခၞံမ္ဂး၊ ဒးအာပတ်ဒုက္ကဋ်ရ။
570) နူပွဳပွူသၞာတြေမ် ဂိုၚ်ကေတ် ဗၞတ်မွဲက္ဍစၞေန်တဲကျာ်တုဲ ခၞံမ္ဂး၊ ဟွံဒးအာပတ်ရ၊ ဟွံကလိဂွံတုဲ သီုဟွံဂိုၚ်ကေတ်ဂှ် ခၞံမ္ဂး၊ ဟွံဒးအာပတ်ရ၊ ညးသအာၚ်ခၞံလဝ်တုဲဂှ် ကလိဂွံတုဲ ပြဘိုဂ်သုၚ်စောဲမ္ဂး၊ ဟွံဒးအာပတ်ရ၊ ခၞံတဴသၠဖ္ဍာန်ကီု သၞာလးတိကီု ယာတ်သၞိက်ကီု ဖုန်ကီု ဂၞဳကီုမ္ဂး၊ ဟွံဒးအာပတ်ရ၊ နသၟိတ်ခမဳဂမၠိုၚ် (ခၞံမ္ဂး)၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳမကလိလောန်ကၠာတဲဂှ် ဟွံဒးအာပတ်ရ။ နိသဳဒနသန္ထတသိက္ခာပိုဒ် ပဉ္စမတုဲရ။
