၄.၂.၄.၁။ ပွံဆဗ္ဗဿသိက္ခာပိုဒ်

562) တၟိ မ္ဂးဂှ် သ္ပဟိုတ်ကဵုပွမခၞံတုဲ သ္ဂးရ။ သၞာ မ္ဂးဂှ် သီုဟွံတုတ်ပၠးတုဲ သၞာမဂပ်ဝ်ခၞံလဝ်ရောၚ်။ ကဵုခၞံတုဲ မ္ဂးဂှ် (အလဵုဇကု) ခၞံတုဲကီု ဖအောဝ်ကဵု (ညးသအာၚ်) ခၞံတုဲကီု။ လုကဴတြဴသၞာံဂမၠိုၚ် သ္ဒးပကၚ်ရၚ်ရ မ္ဂးဂှ် နဗၞတ်ဗ္ၜတ်တြဴသၞာံ သ္ဒးပကၚ်ရၚ်ရ။ အပ္ဍဲတြဴသၞာံ မ္ဂးဂှ် အပ္ဍဲကာလမယုတ်ဒေက်သၟဝ်တြဴသၞာံ။ သၠးကၠေံသၞာသောန်ဂှ်တုဲ မ္ဂး ကဵုထောံကုညးသအာၚ်တုဲ။ သီုဟွံသၠးကၠေံ မ္ဂးဂှ် ဟွံကဵုထောံ ကုညးမမိက်ကဵုမွဲမွဲတုဲ။ သီုဟွံကလိဂွံသမ္မုတိ ခမဳဂမၠိုၚ်ဂှ် မ္ဂးဂှ် ပါဲကၠေံပွသၟိတ်ခမဳဂမၠိုၚ်တုဲ။ (အလဵုဇကုလေဝ်) ခၞံသၞာသောန်တၟိ မွဲသအာၚ်မ္ဂး။ (ညးသအာၚ်ဂမၠိုၚ်လေဝ်) ကဵုခၞံမ္ဂး ဟိုတ်နူပယောဂ ပွမပတိတ်ဇြဟတ် (ဒးအာပတ်) ဒုက္ကဋ်ရ၊ ဟိုတ်ပွမကလိဂွံ မၞုံကဵု (ဝိနယ်ကမ်) ပွမဒးသၠးရ၊ ဂပ်ဝသ္ဒးသၠးကၠေံရ၊ သ္ဒးသၠးကၠေံ ကုသၚ်ကီု ကုဂိုဏ်ကီု ကုပူဂိုလ်ကီုရ။ ယွံခမဳတအ် ရဴဝွံ သ္ဒးသၠးကၠေံရ ။ ပ ။ “ယွံတဳလပိုဉ်တအ် သၞာအဲဍိက်ဝွံ သီုဟွံကလိဂွံ သမ္မုတိခမဳဂမၠိုၚ် အပ္ဍဲကာလမယုတ်ဒေက် သၟဝ်တြဴသၞာံ ဂပ်ဝ်ကဵုခၞံဒးတုဲ မၞုံကဵု (ဝိနယ်ကမ်) ပွမဒးသၠးကၠေံရ၊ သၞာသောန်ဝွံ အဲဍိက် သၠးကဵုကုသၚ်ရ” ။ ပ ။ ရဴဝွံ ဒးကလေၚ်ရ ။ ပ ။ ရဴဝွံ ဒးကလေၚ်ကဵုအိုတ်ရ ။ ပ ။ ကလေၚ်ကဵုကုတဳလပိုဉ်ရ ရဴဝွံ (ဒးကလေၚ်ကဵုရ)။

563) ဇကု ခၞံလဝ်ဟွံစိုပ်ဒတုဲဏီဂှ် အလဵုဇကု ကဵုစိုပ်ဒတုဲမ္ဂး၊ ဒးအာပတ်နိဿဂ္ဂိပါဲစိုတ်ရ။ ဇကု ခၞံလဝ်ဟွံစိုပ်ဒတုဲဏီဂှ် ကဵုညးသအာၚ်ဂမၠိုၚ် စိုပ်ဒတုဲမ္ဂး၊ ဒးအာပတ်နိဿဂ္ဂါပါဲစိုတ်ရ။ ညးသအာၚ်ဂမၠိုၚ် ခၞံလဝ်ဟွံစိုပ်ဒတုဲဏီဂှ် အလဵုဇကု ကဵုစိုပ်ဒတုဲမ္ဂး၊ ဒးအာပတ်နိဿဂ္ဂိပါဲစိုတ်ရ။ ညးသအာၚ်ဂမၠိုၚ် ခၞံလဝ်ဟွံစိုပ်ဒတုဲဏီဂှ် ကဵုညးသအာၚ်ဂမၠိုၚ် စိုပ်ဒတုဲမ္ဂး၊ ဒးအာပတ် နိဿဂ္ဂိပါဲစိုတ်ရ။

564) ပေၚ်တြဴသၞာံတုဲ ကဵုခၞံမ္ဂး၊ ဟွံဒးအာပတ်ရ၊ လောန်လတူတြဴသၞာံတုဲ ကဵုခၞံမ္ဂး၊ ဟွံဒးအာပတ်ရ၊ တၞဟ်နသွက်ညးသအာၚ် (အလဵုဇကုလေဝ်) ခၞံမ္ဂး၊ (ညးသအာၚ်ဂမၠိုၚ်လေဝ်) ကဵုခၞံမ္ဂး၊ ဟွံဒးအာပတ်ရ၊ ညးသအာၚ်ခၞံလဝ်တုဲဂှ် ကလိဂွံတုဲ ပြဘိုဂ်သုၚ်စောဲမ္ဂး၊ ဟွံဒးအာပတ်ရ၊ ခၞံတဴသၠဖ္ဍာန်ကီု သၞာလးတိကီု ယာတ်သၞိက်ကီု ဖုန်ကီု ဂၞဳကီုမ္ဂး၊ ဟွံဒးအာပတ်ရ၊ နသၟိတ်ခမဳဂမၠိုၚ် (ခၞံမ္ဂး)၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳမကလိလောန်ကၠာတဲဂှ် ဟွံဒးအာပတ်ရ။ ဆဗ္ဗဿသိက္ခာပိုဒ် စတုတ္ထတုဲရ။