၄.၂.၄။ ဆဗ္ဗဿသိက္ခာပိုဒ်
557) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဂမၠိုၚ် ဇၟာပ်သၞာံ ကဵုခၞံသၞာသောန်အိုတ်ရ၊ ခမဳဂမၠိုၚ်ဂှ် “ဩဝ်ကဵုတသော်သဵုဂမၠိုၚ်အိုတ်ညိ၊ နွံပၟိက်ကဵုတသော်သဵုဂမၠိုၚ်အိုတ်ရ” ရဴဝွံ အာတ်ဂၠိုၚ်ဂမၠိုၚ်ဒှ်တုဲ ပဒတဴအိုတ်ရ။ မၞိဟ်ဂမၠိုၚ် “ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သာကျဝၚ် ဇၟာပ်သၞာံ မုဟိုတ်သကဵုခၞံတဴ သၞာသောန်အိုတ်ဂှ်ရော? ‘ဩဝ်ကဵုတသော်သဵုဂမၠိုၚ်အိုတ်ညိ၊ နွံပၟိက်ကဵုတသော်သဵုဂမၠိုၚ်ရ’ ရဴဝွံ အာတ်ဂၠိုၚ်ဂမၠိုၚ်ဒှ်တုဲ ပဒတဴအိုတ်ဂှ်ရော? ကုပိုဲညးဂမၠိုၚ်တုန် နွံအိုတ်ရ၊ ယြဴကောန်ၚာ်သၟတ် ပိုဲညးဂမၠိုၚ် တရဴဇၞော်လေဝ် သၠးစုတ် (ပ္ဍဲလတူသၞာသောန်ဂမၠိုၚ်) အိုတ်ရ၊ တရဴသၟတ်လေဝ် သၠးစုတ်အိုတ်ရ၊ ကၞိဂမၠိုၚ်လေဝ် ကိတ်တဴ (သၞာသောန်ဂမၠိုၚ်) အိုတ်ရ၊ ‘ဩဝ်ကဵုတသော်သဵုဂမၠိုၚ်အိုတ်ညိ၊ နွံပၟိက်ကဵုတသော်သဵုဂမၠိုၚ်ရ’ ရဴဝွံ အာတ်ဂၠိုၚ်ဂမၠိုၚ်ဒှ်တုဲ ပဒတဴအိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက်ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “ခမဳဂမၠိုၚ် ဇၟာပ်သၞာံ မုဟိုတ် သကဵုခၞံသၞာသောန်အိုတ်ဂှ်ရော? “ဩဝ်ကဵုတသော်သဵုဂမၠိုၚ်အိုတ်ညိ၊ နွံပမိက်ကဵုတသော်သဵုဂမၠိုၚ်ရ’ ရဴဝွံ အာတ်ဂၠိုၚ်ဂမၠိုၚ်ဒှ်တုဲ ပဒတဴအိုတ်ဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဂမၠိုၚ်ဂှ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် ဇၟာပ်သၞာံ သကဵုခၞံသၞာသောန်အိုတ်ရ၊ ဩဝ်ကဵုတသော်သဵုဂမၠိုၚ်အိုတ်ညိ၊ နွံပၟိက်ကဵုတသော်သဵုဂမၠိုၚ်ရ ရဴဝွံ အာတ်ဂၠိုၚ်ဂမၠိုၚ်ဒှ်တုဲ ပဒတဴအိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် မုဟိုတ် ဇၟာပ်သၞာံ သကဵုခၞံသၞာသောန်အိုတ်ဂှ်ရော? “ဩဝ်ကဵုတသော်သဵုဂမၠိုၚ်အိုတ်ညိ၊ နွံပၟိက်ကဵုတသော်သဵုဂမၠိုၚ်ရ” ရဴဝွံ အာတ်ဂၠိုၚ်ဂမၠိုၚ်ဒှ်တုဲပဒတဴအိုတ်ဂှ်ရော? (ပွမၞးတအ်ညးဂမၠိုၚ်) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
558) ယြဴခမဳမွဲ ကဵုခၞံသၞာသောန်တၟိတုဲ ပ္ဍဲကြဴ လုကဴတြဴသၞာံဂမၠိုၚ် သ္ဒးပကၚ်ရၚ်ရ၊ အပ္ဍဲတြဴသၞာံ သၠးကၠေံသၞာသောန်ဂှ်တုဲကီု ဟွံသၠးကၠေံတုဲကီု ယဝ်ကဵုခၞံသၞာသောန်တၟိ မွဲသအာၚ်မ္ဂး၊ (ကုခမဳ) ဂှ် ဒးအာပတ် နိဿဂ္ဂိပါဲစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
559) ပ္ဍဲအခိၚ်ဂှ် ခမဳမွဲဇကု ဂိယဲဒၟံၚ် ပ္ဍဲဍုၚ်ကောသမ္ဗဳရ၊ ကဠောမသဂမၠိုၚ် “တဳလပိုဉ်မပြဲ ဩဝ်က္ညကၠုၚ်ညိ၊ ပိုဲဍိက်တအ်ညးဂမၠိုၚ် ကၠောန်ၜိုတ်လွဳလွတ်အိုတ်ရ” ရဴဝွံ ဗလးဏာကလုတ် ဇရေၚ်ခမဳဂှ်အိုတ်ရ။ ခမဳဂမၠိုၚ်လေဝ် “ယွံကောန်တၠ ဩဝ်က္ညအာညိ၊ ကဠောမသဂမၠိုၚ် ကြက်ကၠောန်ၜိုတ်လွဳလွတ် တၠအဲဍိက်ရ” ရဴဝွံ ဟီုသ္ဂးအိုတ်ရ။ ခမဳဂှ် “ယွံကောန်တၠတအ် ‘ခမဳဂှ် ကဵုခၞံသၞာသောန်တၟိတုဲပ္ဍဲကြဴ လုကဴတြဴသၞာံဂမၠိုၚ် သ္ဒးပကၚ်ရၚ်ရ’ ရဴဝွံ တဳလပိုည်ကျာ်တြဲ ပညပ်လဝ်သိက္ခာပိုဒ်ရ၊ အဲလေဝ် ဂိယဲဒၟံၚ်ရ၊ ဂိုၚ်ကေတ်သၞာသောန်တုဲ တၞဟ်နအာဂှ် ဟွံသၟဟ်ရထရ၊ ကုအဲလေဝ် စာ်စ္ဍးနူသၞာသောန်တုဲ ဟွံဒှ်တသိုခ်ရ၊ အဲကြက်ဟွံအာရ” ရဴဝွံ ဟီသ္ဂးရ။ ဂရၚ်ပတီ ဟိုတ်ပရူပရာဝွံ ကုတဳလပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ “ယွံခမဳတအ် ကုခမဳဂိယဲဂှ် ကဵုအခေါၚ် တၞဟ်နကဵုသန္ထတသမ္မုတိ ပွမသၟိတ်ဆေၚ်စပ်ကဵုသၞာသောန်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံ သ္ဂးကဵုရ။ ခမဳဂိယဲဂှ် ပြာပ်အာဇရေၚ်သၚ်တုဲ လ္ၜက်ကၠေဟ်ပတိုန် သ္ၚာကၞေဟ် ပ္ဍဲလတူပၞးပါဲမွဲလ္ပာ်တုဲမ္ဂး လ္ၚောဝ်ဂၠးဇိုၚ် ခမဳထေရ်ဇၞော်ဂမၠိုၚ်တုဲ ဂဇအ်လံက်ဂဇုန် သီုမပၚ်ခၠအ်လဝ်သၟိပ်တဲဂှ် − “ယွံတဳလပိုည်တအ် အဲဍိက် ဂိယဲဒၟံၚ်ရ၊ ဂိုၚ်ကေတ် သၞာသောန်တုဲ တၞဟ်နအာဟွံသၟဟ်ရထရ၊ ယွံတဳလပိုဉ်တအ် အဲဍိက်ဂှ် အာတ်အခေါၚ်သန္ထတသမ္မုတိ ပွမသၟိတ်ဆေၚ်စပ်ကဵုသၞာသောန် ကုသၚ်ရ” ရဴဝွံ ဂပ်ဝ်သ္ဂးရ။ မရနုက်ကဵုၜါဝါလေဝ် သ္ဒးအာတ်ရ၊ မရနုက်ကဵုပိဝါလေဝ် သ္ဒးအာတ်ရ၊ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
560) “ယွံတဳလတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳမၞုံယၟုဝွံ ဂိယဲဒၟံၚ်တုဲ ဂိုၚ်ကေတ် သၞာသောန်တုဲ တၞဟ်နအာဂှ် ဟွံသၟဟ်ရထရ၊ ခမဳဂှ် အာတ်သၚ်သန္ထတသမ္မုတိရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် ကဵုသန္ထတသမ္မုတိ ကုခမဳမၞုံယၟုဝွံရ၊ ဣဝွံတုန် ပွမကဵုတီရောၚ်။ ယွံတဳလတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳမၞုံယၟုဝွံ ဂိယဲဒၟံၚ်တုဲ ဂိုၚ်ကေတ် သၞာသောန်တုဲ တၞဟ်နအာဂှ် ဟွံသၟဟ်ရထရ၊ ခမဳဂှ် အာတ်သၚ်သန္ထတသမ္မုတိရ၊ သၚ် ကဵုသန္ထတသမ္မုတိ ကုခမဳမၞုံယၟုဝွံရ၊ ယြဴကုတဳလပိုဉ်မွဲ သ္ဍိုက်မၠိုက် ပွမကဵုသန္ထတသမ္မုတိ ကုခမဳမၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ သၚ် ဂပ်ဝ်ကဵုသန္ထတသမ္မုတိ ကုခမဳမၞုံယၟုဝွံတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံ သ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုၚ်ဂှ်ရ” ရဴဝွံ (သ္ဒးကဵုတီရ)။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
561) ယြဴခမဳမွဲ ကဵုခၞံသၞာသောန်တၟိတုဲ ပ္ဍဲကြဴ လုကဴတြဴသၞာံဂမၠိုၚ် သ္ဒးပကၚ်ရၚ်ရ၊ အပ္ဍဲတြဴသၞာံ သၠးကၠေံသၞာသောန်ဂှ်တုဲကီု ဟွံသၠးကၠေံတုဲကီု သီုဟွံကလိဂွံ သမ္မုတိခမဳဂမၠိုၚ်ဂှ် ယဝ်ကဵုခၞံ သၞာသောန်တၟိမွဲသအာၚ်မ္ဂး၊ (ကုခမဳဂှ်) ဒးအာပတ် နိဿဂ္ဂိပါဲစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
