၄.၁.၇.၁။ ပွံက်တတုတ္တရိဝိညတ္တ သိက္ခာပိုဒ်
524) ခမဳဂှ် မ္ဂးဂှ် ခမဳမၞုံကဵုသ္ၚာကမၠတ်ဒမၠ မဂပ်ဝ်ပၠံၚ်ၜးဏာ။ ညးဟွံသေၚ်ကဵုကဠောမသ မ္ဂးဂှ် နူလ္ပာ်မိအံက်ကီု နူလ္ပာ်မအံက်ကီု စဵုကဵုစိုပ်လ္ၚေဝ် အပါဇၞော် အပါနက်ထပှ်ဒတောဝ်ဂှ် ဟွံဆက်စပ်ရ။ သမ္ၚေဟ်တြုံ၊ တၠသ္ၚိတြုံ မ္ဂးဂှ် ညးတြုံမမိက်ကဵုမွဲမွဲ မပဒတဴပ္ဍဲသ္ၚိရောၚ်။ သမ္ၚေဟ်ဗြဴ၊ တၠသ္ၚိဗြဴ မ္ဂးဂှ် ညးဗြဴမမိက်ကဵုမွဲမွဲ မပဒတဴပ္ဍဲသ္ၚိရောၚ်။ နကဵုသ္ၚာဂမၠိုၚ်မဂၠိုၚ် မ္ဂးဂှ် နကဵုသ္ၚာဂမၠိုၚ်ဗွဲမဂၠိုၚ်။ ရၚ်တၠုၚ်နၚ်တူရူတုဲ ဘိက်ကဵုအခေါၚ် မ္ဂးဂှ် ယြဴဗၞတ်မွဲ နွံပၟိက်ရ၊ ဗၞတ်ရ ဩဝ်ဒုၚ်ဂိုၚ်ကေတ်ညိ ရဴဝွံ (ဘိက်ကဵုအခေါၚ်မ္ဂး)။ ခမဳဂှ် နူသ္ၚာမဂပ်ဝ်ရၚ်တၠုၚ်နၚ်ဂှ် ဒးသာယျောန် ဒုၚ်ဂိုၚ်ကေတ် သ္ၚာကၞေဟ်မွဲဂတှေ် မွဲဟာန်ကေုာံသပိုၚ်မွဲဂတှေ်ရ မ္ဂးဂှ် ယွံကၠေံအာပိဂတှေ်မ္ဂး၊ ဒးသာယျောန် ဒုၚ်ဂိုၚ်ကေတ်ၜါဂတှေ်ရ၊ ကၠေံအာၜါဂတှေ်မ္ဂး ဒးသာယျေန်ဒုၚ်ဂိုၚ်ကေတ် မွဲဂတှေ်ရ၊ ကၠေံအာမွဲဂတှေ်မ္ဂး မမိက်ကဵုမွဲမွဲလေဝ် ဟဂပ်ဝ်သာယျေန် ဒုၚ်ဂိုၚ်ကေတ်ရ။ သာယျေန် ဒုၚ်ဂိုၚ်ကေတ် လောန်လတူဂှ် မ္ဂးဂှ် အာတ်လောန်လတူ (သ္ၚာကၞေဟ်မွဲဂတှေ် မွဲဟာန်ကေုာံသပိုၚ်မွဲဂတှေ်) ဂှ်မ္ဂး ဟိုတ်နူပယောဂ ပွမပတိတ်ဇြဟတ် (ဒးအာပတ်) ဒုက္ကဋ်ရ။ ဟိုတ်ပွမကလိဂွံ မၞုံကဵု (ဝိနယ်ကမ်) ပွမဒးသၠးရ၊ ဂပ်ဝ်သ္ဒးသၠးကေၠရ၊ သ္ဒးသၠးကၠေံကုသၚ်ကီု ကုဂိုဏ်ကီု ကုပူဂိုလ်ကီုရ။ ယွံခမဳတ် ရဴဝွံ သ္ဒးသၠးကၠေံရ ။ ပ ။ “ယွံတဳလပိုဉ်တအ် သ္ၚာဝွံ အဲဍိက် ပြာပ်အာဇရေၚ်သမ္ၚေဟ်တြုံ ဟွံသေၚ်ကဵုကဠောမသတုဲ ဂပ်ဝ်အာတ်လောန်လတူ (သ္ၚာကၞေဟ်မွဲဂတှေ် မွဲဟာန်ကေုာံသပိုၚ်မွဲဂတှေ်) ဒှ်တုဲ မၞုံကဵု (ဝိနယ်ကမ်) ပွမဒးသၠးကၠေံရ။ သ္ၚာဝွံ အဲဍိက် သၠးကဵုကုသၚ်ရ” ။ ပ ။ ရဴဝွံ ဒးကလေၚ်ရ ။ ပ ။ ရဴဝွံ ဒးကလေၚ်ကဵုအိုတ်ရ ။ ပ ။ ကလေၚ်ကဵုကုတဳလပိုဉ်ရ ရဴဝွံ (ဒးကလေၚ်ကဵုရ)။
525) ပ္ဍဲညးဟွံသေၚ်ကဵုကဠောမသဂှ် မၞုံကဵုစၟတ်သမ္တီ ဟွံသေၚ်ကဵုကဠောမသတုဲ အာတ်သ္ၚာ လောန်လတူ (သ္ၚာကၞေဟ်မွဲဂတှေ် မွဲဟာန်ကေုာံသပိုၚ်မွဲဂတှေ်) မ္ဂး ဒးအာပတ်နိဿဂ္ဂိပါဲစိုတ်ရ။ ပ္ဍဲညးဟွံသေၚ်ကဵုကဠောမသဂှ် မၞုံကဵုသၠေဟ်ပၟာတုဲ အာတ်သ္ၚာ လောန်လတူ (သ္ၚာကၞေဟ်မွဲဂတှေ် မွဲဟာန်ကေုာံသပိုၚ်မွဲဂတှေ်) မ္ဂး ဒးအာပတ်နိဿဂ္ဂိပါဲစိုတ်ရ။ ပ္ဍဲညးဟွံသေၚ်ကဵုကဠောမသဂှ် မၞုံကဵုစၟတ်သမ္တီ ကဠောမသတုဲ အာတ်သ္ၚာ လောန်လတူ (သ္ၚာကၞေဟ်မွဲဂတှေ် မွဲဟာန်ကေုာံသပိုၚ်မွဲဂတှေ်) မ္ဂး ဒးအာပတ်နိဿဂ္ဂိပါဲစိုတ်ရ။ ပ္ဍဲညးဒှ်ကဠောမသဂှ် မၞုံကဵုစၟတ်သမ္တီ ဟွံသေၚ်ကဵုကဠောမသမ္ဂး ဒးအာပတ်ဒုက္ကဋ်ရ။ ပ္ဍဲညးဒှ်ကဠောမသဂှ် သၠေဟ်ပၟာမ္ဂး ဒးအာပတ်ဒုက္ကဋ်ရ။ ပ္ဍဲညးဒှ်ကဠောမသဂှ် မၞုံကဵုစၟတ်သမ္တီကဠောမသမ္ဂး ဟွံဒးအာပတ်ရ။
526) သှေ်သၟေဟ်နူသ္ၚာကဵုသပိုၚ်ဂှ် ကြက်ကလေၚ်ရၚ်တၠုၚ်နၚ်ရ သ္ဂးရဴဝွံတုဲ ရၚ်တၠုၚ်ဏာမ္ဂး သှေ်သၟေဟ်ဂှ် ဩဝ်ကဵုဒှ် ကုတဳလပိုဉ်ဟေၚ်ညိ ရဴဝွံ ကဵုဒါန်အိုတ်မ္ဂး ဟွံဒးအာပတ်ရ၊ ကဵုဒါန် သီုဟွံမွဲကဵုဟိုတ် ကမၠတ်ဒမၠပၠံၚ်ၜးအိုတ်မ္ဂး၊ ကဵုဒါန် သီုဟွံသေၚ်ကဵုဟိုတ်သ္ၚာကၠေံလေၚ်အိုတ်မ္ဂး ဟွံဒးအာပတ်ရ၊ ကုညးဒှ်ကဠောမသဂမၠိုၚ် ကုညးဂပ်ဝ်ဘိက်ကဵုလဝ် အခေါၚ်ဂမၠိုၚ် (အာတ်သ္ၚာ လောန်လတူဂှ်မ္ဂး) (ရာန်ကေတ်) နကဵုဂြပ်ဇကု ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ တတုတ္တရိသိက္ခာပိုဒ် သတ္တမတုဲရ။
