၄.၁.၈။ ဥပက္ခာဋသိက္ခာပိုဒ်
527) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဲပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တြုံမွဲဂှ် “ကြက်ဂြောပ်လတက်ကဵုဒါန် ကုတဳလပိုဉ်ဥပနန္ဒ နကဵုသ္ၚာရ” ရဴဝွံ ဟီုသ္ဂးကဵုသမ္ဘာရ၊ ခမဳဂ္ၚေၚ်စဴပိဏ္ဍပါတ်မွဲဇကု မိၚ်အာဂလာန်မဟီုသ္ဂး တြုံဂှ်ရ။ ပ္ဍဲအခိၚ်ဂှ် ခမဳဂှ် ပြာပ်အာဇရေၚ် တဳလပိုဉ်ဥပနန္ဒ ကောန်သၟိၚ်သာကျဝၚ်တုဲ— “ယွံကောန်တၠဥပနန္ဒ တၠအဲ ဒှ်ညးပိုန်ဇၞော်ရ၊ ပ္ဍဲဌာန်မၞုံယၟုဝွံ တြုံမွဲဂှ် ‘ကြက်ဂြောပ်လတက်ကဵုဒါန် ကုတဳလပိုဉ်ဥပနန္ဒ နကဵုသ္ၚာရ’ ရဴဝွံ ဟီုသ္ဂးကဵုသမ္ဘာရ” ရဴဝွံ တဳလပိုဉ်ဥပနန္ဒ ကောန်သၟိၚ်သာကျဝၚ်ရ။ ယွံကောန်တၠ နွံဒၟံၚ်ရ၊ ညးဂှ် ဒကာကၠောန်ၜိုတ်ဥပကာအဲရ ရဴဝွံ သ္ဂးရ၊ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် ပြာပ်အာဇရေၚ်တြုံဂှ်တုဲမ္ဂး— “ယွံဒကာ တၠအဲ မိက်ဂြောပ်လတက်ကဵုဒါန်အဲ နကဵုသ္ၚာရ” ဟီုဂှ် ဍာံပြဟာ ရဴဝွံသၟာန်ရ။ ယွံကောန်နာဲ ကြက်ဂြောပ်လတက်ကဵုဒါန် တဳလပိုဉ်ဥပနန္ဒ နကဵုသ္ၚာရ ရဴဝွံ ကသပ်ဒှ်ကုအဲဍိက်ရ ရဴဝွံ (ဂရၚ်ပတီရ)။ ယွံဒကာ ယဝ်တၠအဲ မိက်ဂြောပ်လတက်ကဵုဒါန်အဲ နကဵုသ္ၚာဒှ်မ္ဂး ဩဝ်ဂြောပ်လတက်ကဵုဒါန် နသ္ၚာမၞုံသဘဴမဖှ်သာ်ဝွံညိ၊ နကဵုသ္ၚာ အဲရပ်စပ်သုၚ်စောဲဟွံသေၚ်ဂှ် ၜိုန်ဂြောပ်လတက်ကဵုဒါန်လေဝ် ပသာ်ဂွံသ္ပဂှ်ရော? ရဴဝွံ (သ္ဂးရ)။ ပ္ဍဲအခိၚ်ဂှ် တြုံဂှ် “ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သာကျဝၚ်ဝွံ ပၟိက်ဇၞော်အိုတ်ရ၊ ဟွံအေၚ်သတှေ်အိုတ်ရ၊ (ဟွံတရိုပ်စိုတ်အိုတ်ရ) ကုခမဳဂမၠိုၚ်ဝွံ တၞဟ်နပွမဂြောပ်လတက်ကဵုဒါန် နသ္ၚာဂှ် ဟွံလောဲသွာရ၊ မုဟိုတ် တဳလပိုဉ်ဥပနန္ဒ သီုအဲဟဂပ်ဝ်ဘိက်နိမန်လဝ် ပ္ဍဲကိုပ်ကၠာဂှ် ပြာပ်ကၠုၚ်ဇရေၚ်အဲတုဲ အာစိုပ်ပွမစဳရေၚ်လောန် ပ္ဍဲသ္ၚာဂှ်ရော?” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “တဳလပိုဉ်ဥပနန္ဒ ကောန်သၟိၚ်သာကျဝၚ် သီုမဟဂပ်ဝ်ဘိက်နိမန်လဝ် ပ္ဍဲကိုပ်ကၠာဂှ် ပြာပ်အာဇရေၚ်သမ္ၚေဟ်တုဲ မုဟိုတ် သ္ဂောံအာစိုပ် ပွမစဳရေၚ်လောန်ပ္ဍဲသ္ၚာဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် တဳလပိုဉ်ဥပနန္ဒ ကောန်သၟိၚ်သာကျဝၚ် နဟိုတ်မဂၠိုၚ်အိုတ်တုဲ ဂရၚ်ပတီ ဟီုပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံဥပနန္ဒ တၠအဲ သီုမဟဂပ်ဝ်ဘိက်နိမန်လဝ် ပ္ဍဲကိုပ်ကၠာဂှ် ပြာပ်အာဇရေၚ်သမ္ၚေဟ်တုဲ အာစိုပ်ပွမစဳရေၚ်လောန် ပ္ဍဲသ္ၚာရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ ယွံဥပနန္ဒ ဒှ်ကဠောမသ ကေုာံတၠအဲဟာ၊ ဟွံဒှ်ကဠောမသဟာ ရဴဝွံ (သၟာန်တိုန်ဂှ်)— ယွံကျာ်မၞုံပိုဉ် ဟွံဒှ်ကဠောမသရ ရဴဝွံ (ဂရၚ်ပတီရ)။ ယွံတြုံမလ္ၚုသၟး (နူမဂ်ဖိုလ်) တြုံဟွံသေၚ်ကဵုကဠောမသဂှ် ဗဗွဲသပ္ပါယ်ကီု ဟွံဗဗွဲသပ္ပါယ်ကီု နွံကီု ဟွံမွဲကီု ဒဒက်တဴညးဟွံသေၚ်ကဵုကဠောမသဂှ် တီကေတ်ဟွံမာန်ရ၊ ယွံတြုံမလ္ၚုသၟး (နူမဂ်ဖိုလ်) သီုဒှ်သာ်ဂှ် တၠအဲဂှ် ဟီုမဟဂပ်ဝ်ဘိက်နိမန်လဝ် ပ္ဍဲကိုပ်ကၠာ ပြာပ်အာဇရေၚ်သမ္ၚေဟ် ဟွံသေၚ်ကဵုကဠောမသတုဲ အာစိုပ်ပွမစဳရေၚ်လောန် ပ္ဍဲသ္ၚာရသွံ၊ ယွံတြုံမလ္ၚုသၟး (နူမ္ဂဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
528) ရန်တၟံကဵုခမဳဟေၚ်တုဲ ‘နၚုဟ်သ္ၚာဝွံ ရာန်သ္ၚာတုဲ ကြက်ဂြောပ်လတက်ကဵုဒါန် ခမဳမၞုံယၟုဝွံ နကဵုသ္ၚာရ’ ရဴဝွံ သမ္ၚေဟ်တြုံကီု သမ္ၚေဟ်ဗြဴကီု မဟွံသေၚ်ကဵုကဠောမသဂှ် ဂပ်ဝ်စဳရေၚ်တဴ ၚုဟ်သ္ၚာရ၊ ဇရေၚ်ဒကာတေံဂှ် ဟီုမဟဂပ်ဝ်ဘိက်နိမန်လဝ် ပ္ဍဲကိုပ်ကၠာ ခမဳဂှ်ပြာပ်အာတုဲ ‘ယွံဒကာ အာတ်ပါန်အခေါၚ်ရ၊ နၚုဟ်သ္ၚာဝွံ တၠအဲဒကာ ရာန်သ္ၚာ မၞုံသဘဴမဖှ်သာ်ဝွံတုဲ ဩဝ်ဂြောပ်လတက်ကဵုဒါန်အဲညိ’ ရဴဝွံ သ္ပဟိုတ်ကဵုဒဒှ်မၞုံပၟိက်ခိုဟ်ဆာဲတုဲ ယဝ်အာစိုပ် ပွမစဳရေၚ်လောန် ပ္ဍဲသ္ၚာမ္ဂး၊ (ကုခမဳဂှ်) ဒးအာပတ် နိဿဂ္ဂိပါဲစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
