၄.၁.၇။ တတုတ္တရိဝိညတ္တိ သိက္ခာပိုဒ်
522) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် ပြာပ်အာဇရေၚ် ခမဳမၞုံကဵုသ္ၚာ ဒးဒုၚ်ပၠံၚ်ၜးဏာ ကုကမၠတ်ဒမၠဂမၠိုၚ်တုဲ “ယွံကောန်တၠတအ် တဳလမၞုံပိုဉ်ကျာ်တြဲ ကုခမဳမၞုံကဵုသ္ၚာ ဒးဒုၚ်ပၠံၚ်ၜးကဵုကမၠတ်ဒမၠကီု၊ ကုခမဳမၞုံကဵုသ္ၚာ ကၠေံလေၚ်အာကီု တၞဟ်နအာတ်သ္ၚာ သမ္ၚေဟ်တြုံကီု သမ္ၚေဟ်ဗြဴကီု မဟွံသေၚ်ကဵုကဠောမသဂှ် ဂပ်ဝ်ကဵုအခေါၚ်ရ။ ယွံကောန်တၠတအ် ဩဝ်အာတ်သ္ၚာအိုတ်ညိ” ရဴဝွံ ဟီုသ္ဂးအိုတ်ရ။ ယွံကောန်တၠတအ် ဒေါံရ၊ ပိုဲညးဂမၠိုၚ် ဂပ်ဝ်ကလိဂွံသ္ၚာတုဲရ ရဴဝွံ (သ္ဂးအိုတ်ရ)။ ပိုဲဍိက်တအ်ညးဂမၠိုၚ် ကြက်အာတ်ကဵု သွက်တဳလပိုဉ်တအ် ညးဂမၠိုၚ်အိုတ်ရ ရဴဝွံ (ကလေၚ်သ္ဂးအိုတ်ရ)။ ယွံကောန်တၠတအ် ဩဝ်အာတ်အိုတ်ညိ ရဴဝွံ (ကဵုအခေါၚ်အိုတ်ရ)။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ပြာပ်အာဇရေၚ် သမ္ၚေဟ်တၠသ္ၚိဂမၠိုၚ်တုဲ “ယွံကောန်တၠဒကာတအ် ခမဳဒးဒုၚ်ပၠံၚ်ၜးသ္ၚာကဵု ကမၠတ်ဒမၠဂမၠိုၚ်ကၠုၚ်အိုတ်ရ၊ သွက်ခမဳဂမၠိုၚ်ဂှ် ဩဝ်ကဵုဒါန်သ္ၚာအိုတ်ညိ” ရဴဝွံ အာတ်တဴသ္ၚာဂမၠိုၚ်မဂၠိုၚ်အိုတ်ရ။ ပ္ဍဲအခိၚ်ဂှ် တြုံမွဲဂှ် ဃောဂဇအ်ဒၟံၚ် ပ္ဍဲဌာနကၠောန်သ္ပသဘၚ်ကောံဓရီု “ယွံကောန်နာဲ ခမဳဒးဒုၚ်ပၠံၚ်ၜးသ္ၚာကဵု ကမၠတ်ဒမၠဂမၠိုၚ် ကၠုၚ်အိုတ်ရ၊ သွက်ခမဳဂမၠိုၚ်ဂှ် အဲကဵုဒါန်သ္ၚာတုဲရ” ရဴဝွံ သ္ဂးကဵုတြုံမွဲရ၊ တြုံမွဲဂှ်လေဝ် “အဲလေဝ် ကဵုဒါန်သ္ၚာတုဲရ” ရဴဝွံ သ္ဂးရ၊ တြုံမွဲသအာၚ်ပၠန်လေဝ် “အဲလေဝ် ကဵုဒါန်သ္ၚာတုဲရ” ရဴဝွံ သ္ဂးရ၊ မၞိဟ်ဂမၠိုၚ် “မုဟိုတ်ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် သီုဟွံတီဗၞတ်ဗ္ၜတ်အိုတ်ဂှ် အာတ်တဴသ္ၚာ ဗွဲမဂၠိုၚ်အိုတ်ဂှ်ရော? ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် ပွမကူသာန်ယာတ်လေဝ် ကြက်သ္ပအိုတ်ရ။ ဖျာယာတ်လေဝ် ကြက်ပၠးအိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ဟေၚ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “ခမဳဆဗ္ဗဂ္ဂဳဂမၠိုၚ် သီုဟွံတီဗၞတ်ဗ္ၜတ်အိုတ်ဂှ် မုဟိုတ်အာတ်တဴ သ္ၚာဗွဲမဂၠိုၚ်အိုတ်ဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ် ဟီုဂရိုဟ်တၚ်ဒုဟ် ခမဳဆဗ္ဗဂ္ဂဳဂမၠိုၚ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် သီုဟွံတီဗၞတ်ဗ္ၜတ်အိုတ်ဂှ် အာတ်တဴသ္ၚာ ဗွဲမဂၠိုၚ်အိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် သီုဟွံတီဗၞတ်ဗ္ၜတ်အိုတ်ဂှ် မုဟိုတ်အာတ်တဴသ္ၚာ ဗွဲမဂၠိုၚ်အိုတ်ဂှ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
523) သမ္ၚေဟ်တြုံကီု သမ္ၚေဟ်ဗြဴကီု ဟွံသေၚ်ကဵုကဠောမသ ရၚ်တၠုၚ်နၚ်တူရူကဵုခမဳဂှ် နသ္ၚာဂမၠိုၚ်မဂၠိုၚ်တုဲ ဘိက်ကဵုအခေါၚ်မ္ဂး ခမဳဂှ် နူသ္ၚာမဂပ်ဝ်ရၚ်တၠုၚ်နၚ်ဂှ် ဒးသာယျေန်ဒုၚ်ဂိုၚ်ကေတ် သ္ၚာကၞေဟ်မွဲဂတှေ် မွဲဟာန်ကေုာံသပိုၚ်မွဲဂတှေ်ရ၊ သာယျေန်ဒုၚ်ဂိုၚ်ကေတ်လောန်လတူဂှ်မ္ဂး (ကုခမဳဂှ်) ဒးအာပတ် နိဿဂ္ဂိပါဲစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
