၄.၁.၅.၁။ ပွံက်စဳဝရပဋိဂ္ဂဟဏ သိက္ခာပိုဒ်
512) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂး ခမဳရ။ ဍေံဟွံသေၚ်ကဵုကဠောမသ မ္ဂးဂှ် နူလ္ပာ်မိအံက်ကီု နူလ္ပာ်မအံက်ကီု စဵုကဵုစိုပ်လ္ၚဝ်အပါဇၞော် အပါနက်ထပှ်ဒတောဝ်ဂှ် ဟွံဆက်စပ်ရ။ ခမဳဗြဴ မ္ဂးဂှ် ဗြဴမဒှ်ပယျၚ် ပ္ဍဲဥဘတောသၚ်ရောၚ်။ သ္ၚာ မ္ဂးဂှ် ပၞောဝ်သ္ၚာဂမၠိုၚ်တြဴဂကူ ဗွဲတွဵုမယုတ် သ္ၚာမွဲမွဲဂကူ မရုမ်ဂပ်ကဵုဝိကပ္ပနရောၚ်။ သအာၚ်နူမလှာဲဂတး မ္ဂးဂှ် ဝေၚ်ကၠေံ ပွမလှာဲဂတးတုဲ။ ဒုၚ်ဂိုၚ်ကေတ်မ္ဂး၊ ဟိုတ်နူပယောဂ ပွမပတိတ်ဇြဟတ် (ဒးအာပတ်) ဒုက္ကဋ်ရ။ ဟိုတ်ပွမကလိဂွံ မၞုံကဵု (ဝိနယ်ကမ်) ပွမဒးသၠးရ၊ ဂပ်ဝ်သ္ဒးသၠးကၠေံရ၊ သ္ဒးသၠးကၠေံ ကုသၚ်ကီု ကုဂိုဏ်ကီု ကုပူဂိုလ်ကီုရ။ ယွံခမဳတအ် ရဴဝွံ သ္ဒးသၠးကၠေံရ ။ ပ ။ “ယွံတဳလပိုဉ်တအ် သ္ၚာအဲဍိက်ဝွံ ပါဲကၠေံလှာဲဂတးတုဲ ဂပ်ဝ်ဒုၚ်ဂိုၚ်ကေတ် နူတဲခမဳဗြဴ ဟွံသေၚ်ကဵုကဠောမသဒှ်တုဲ မၞုံကဵု (ဝိနယ်ကမ်) ပွမဒးသၠးကၠေံရ။ သ္ၚာဝွံ အဲဍိက်သၠးကဵုကုသၚ်ရ” ။ ပ ။ ရဴဝွံ ဒးလေၚ်ရ ။ ပ ။ ရဴဝွံ ဒးကလေၚ်ကဵုအိုတ်ရ ။ ပ ။ ကလေၚ်ကဵုကုတဳလပိုဉ်ရ ရဴဝွံ (ဒးကလေၚ်ကဵုရ)။
513) ခမဳဗြဴ ဟွံသေၚ်ကဵုကဠောမသဂှ် မၞုံကဵုစၟတ်သမ္တီ ဟွံသေၚ်ကဵုကဠောမသတုဲ ပါဲကၠေံလှာဲဂတးတုဲ ဒုၚ်ဂိုၚ်ကေတ်သ္ၚာမ္ဂး ဒးအာပတ်နိဿဂ္ဂိပါဲစိုတ်ရ။ ပ္ဍဲခမဳဗြဴ ဟွံသေၚ်ကဵုကဠောမသဂှ် မၞုံကဵုသၠေဟ်ပၟာတုဲ ပါဲကၠေံလှာဲဂတးတုဲ ဒုၚ်ဂိုၚ်ကေတ်သ္ၚာမ္ဂး ဒးအာပတ်နိဿဂ္ဂိပါဲစိုတ်ရ။ ပ္ဍဲခမဳဗြဴ ဟွံသေၚ်ကဵုကဠောမသဂှ် မၞုံကဵုစၟတ်သမ္တီ ကဠောမသတုဲ ပါဲကၠေံလှာဲဂတးတုဲ ဒုၚ်ဂိုၚ်ကေတ်သ္ၚာမ္ဂး ဒးအာပတ်နိဿဂ္ဂိပါဲစိုတ်ရ။ ပါဲကၠေံလှာဲဂတးတုဲ ဒုၚ်ဂိုၚ်ကေတ်သ္ၚာ နူတဲခမဳဗြဴ မဒှ်ပယျၚ်ပ္ဍဲ (ဘိက္ခုနဳသၚ်) မွဲလ္ပာ်မ္ဂး ဒးအာပတ်ဒုက္ကဋ်ရ။ ပ္ဍဲခမဳဗြဴကဠောမသဂှ် မၞုံကဵုစၟတ်သမ္တီ ဟွံသေၚ်ကဵုကဠောမသမ္ဂး ဒးအာပတ်ဒုက္ကဋ်ရ။ ပ္ဍဲခမဳဗြဴကဠောမသဂှ် သၠေဟ်ပၟာမ္ဂး ဒးအာပတ်ဒုက္ကဋ်ရ။ ပ္ဍဲခမဳဗြဴကဠောမသဂှ် မၞုံကဵုစၟတ်သမ္တီ ကဠောမသမ္ဂး ဟွံဒးအာပတ်ရ။
514) ပ္ဍဲခမဳဗြဴ ကဠောမသဂှ် ဟွံဒးအာပတ်။ နကဵုဝတ္ထု မထေက်တန်ၚုဟ်မးမအောန်ဂှ် ဝတ္ထုမထေက်တန်ၚုဟ်မးမဂၠိုၚ်ကီု၊ နကဵုဝတ္ထုမထေက်တန်ၚုဟ်မးမဂၠိုၚ်ဂှ် ဝတ္ထုမထေက်တန်ၚုဟ်မ မအောန်ညိနာၚ်ကီု၊ လှာဲဂတးမ္ဂး ဟွံဒးအာပတ်ရ။ ခမဳဂှ် ဂိုၚ်ကေတ်ဗွဲဍုက်ကေဝ်ဒဒှေ်ဒယှ်မ္ဂး ဂိုၚ်ကေတ် ဗွဲဂြပ်ဂလေံမ္ဂး ဂိုၚ်ကေတ်ပရိက္ခရာ မသအာၚ်နူသ္ၚာမ္ဂး ဟွံဒးအာပတ်ရ။ (ဂိုၚ်ကေတ်သ္ၚာ) သိက္ခာမာန် သာမဏဳဗြဴမ္ဂး (ဟွံဒးအာပတ်ရ။) ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ စဳဝရပဋိဂ္ဂဟဏသိက္ခာပိုဒ် ပဉ္စမတုဲရ။
