၄.၁.၁၀။ ရာဇသိက္ခာပိုဒ်
537) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် အမာတ်ဇၞော်မွဲ မဒှ်ဒကာကၠောန်ၜိုတ် တဳလပိုဉ်ဥပနန္ဒ ကောန်သၟိၚ်သာကျဝၚ်ဂှ် “နၚုဟ်သ္ၚာဝွံ ရာန်သ္ၚာတုဲ ဩဝ်ဂြောပ်လတက်ကဵုဒါန် ကုတဳလပိုဉ်ဥပနန္ဒ နကဵုသ္ၚာညိ” ရဴဝွံ ဖအောဝ်ဗလးဏာ ကဵုပလံၚ်ၚုဟ်သ္ၚာ ဇရေၚ်တဳလပိုဉ်ဥပနန္ဒ ကောန်သၟိၚ်သာကျဝၚ် နကလုတ်ရ။ ပ္ဍဲအခိၚ်ဂှ် ကလုတ်ဂှ် ပြာပ်အာဇရေၚ် တဳလပိုဉ်ဥပနန္ဒ ကောန်သၟိၚ်သာကျဝၚ်တုဲ “ယွံတဳလပိုဉ် ၚုဟ်သ္ၚာဝွံ ရန်တၟံကဵုတဳလပိုဉ်တုဲ ဂပ်ဝ်ရၚ်တၠုၚ်နၚ်ရ။ တဳလပိုဉ် ဩဝ်ဒုၚ်ဂိုၚ်ကေတ်ၚုဟ်သ္ၚာဝွံညိ” ရဴဝွံ ဂရၚ်ပတီ တဳလပိုဉ်ဥပနန္ဒ ကောန်သၟိၚ်သာကျဝၚ်ရ၊ ဂရၚ်ပတီရဴဝွံမ္ဂး တဳလပိုဉ်ဥပနန္ဒကောန်သၟိၚ်သာကျဝၚ်ဂှ် “ယွံဒကာ ပိုဲညးဂမၠိုၚ် ၚုဟ်သ္ၚာဂှ်တုန် ဟွံဒုၚ်ဂိုၚ်ကေတ်အိုတ်ရ၊ ပိုဲညးဂမၠိုၚ် ပ္ဍဲအခိၚ်မဗဗွဲဂှ် ဒုၚ်ဂိုၚ်ကေတ် သ္ၚာမဂပ်ဝ်ဟေၚ်အိုတ်ရ” ရဴဝွံ သ္ဂးကဵုကလုတ်ဂှ်ရ။ သ္ဂးရဴဝွံမ္ဂး ကလုတ်ဂှ် “ကုတဳလပိုဉ်ဂှ် ညးကၠောန်ကေၚ်ကာဇၞော်သၟတ် မမိက်ကဵုမွဲမွဲ နွံဟာ” ရဴဝွံ ဂရၚ်ပတီ သၟာန်တဳလပိုဉ်ဥပနန္ဒ ကောန်သၟိၚ်သာကျဝၚ်ရ။ ပ္ဍဲအခိၚ်ဂှ် ဥပးမွဲ အာတဴအာရှာမ် နကဵုကိစ္စကေၚ်ကာထေက်ကဵုသ္ပမွဲမွဲရ။ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ်ဂှ် “ယွံဒကာ ဥပးဝွံတုန် ညးသ္ပကေၚ်ကာဇၞော်သၟတ်ခမဳဂမၠိုၚ်ရ” ရဴဝွံ သ္ဂးကဵုကလုတ်ဂှ်ရ။ ပ္ဍဲအခိၚ်ဂှ် ကလုတ်ဂှ် ကဵုဥပးဂှ်တီကေတ်တုဲ ပြာပ်အာဇရေၚ်တဳလပိုဉ်ဥပနန္ဒ ကောန်သၟိၚ်သာကျဝၚ်တုဲ “ယွံတဳလပိုဉ် ညးသ္ပကေၚ်ကာဇၞောန်သၟတ် တဳလပိုဉ် မဂပ်ဝ်စၞောန်ထ္ၜးဂှ် အဲဍိက် ဂပ်ဝ်ကဵုတီကေတ်တုဲရ၊ ပ္ဍဲအခိၚ်မဗဗွဲ တဳလပိုဉ်ဩဝ်ပြာပ်အာညိ၊ ကြက်ဂြောပ်လတက်ကဵုဒါန် တဳလပိုဉ် နကဵုသ္ၚာရ” ရဴဝွံ ဂရၚ်ပတီ တဳလပိုဉ်ဥပနန္ဒ ကောန်သၟိၚ်သာကျဝၚ်ရ။ ပ္ဍဲအခိၚ်ဂှ် အမာတ်ဇၞော်ဂှ် “တဳလပိုဉ်ဂှ် ဩဝ်ပြဘိုဂ်သုၚ်စောဲ သ္ၚာဂှ်ညိ၊ ပိုဲဍိက်တအ်ညးဂမၠိုၚ် နွံပၟိက်ကဵုတဳလပိုဉ် ပြဘိုဂ်သုၚ်စောဲသ္ၚာဂှ်အိုတ်ရ” ရဴဝွံ ဖအောဝ်ဗလးဏာကလုတ် ဇရေၚ်တဳလပိုဉ်ဥပနန္ဒ ကောန်သၟိၚ်သာကျဝၚ်ရ။ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် မမိက်ကဵုမွဲမွဲလေဝ် ဟွံဟီုသ္ဂးကဵုဥပးဂှ်ရ။ မရနုက်ကဵုၜါဝါလေဝ် “တဳလပိုဉ်ဂှ် ဩဝ်ပြဘိုဂ်သုၚ်စောဲ သ္ၚာဂှ်ညိ၊ ပိုဲဍိက်တအ်ညးဂမၠိုၚ် နွံပၟိက်ကဵုတဳလပိုဉ် ပြဘိုဂ်သုၚ်စောဲသ္ၚာဂှ်အိုတ်ရ” ရဴဝွံ ဖအောဝ်ဗလးဏာကလုတ် ဇရေၚ်တဳလပိုဉ်ဥပနန္ဒ ကောန်သၟိၚ်သာကျဝၚ်ရ။ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် မမိက်ကဵုမွဲမွဲလေဝ် ဟွံဟီုသ္ဂးကဵုဥပးဂှ်ရ။ မရနုက်ကဵုပိဝါလေဝ် “တဳလပိုဉ်ဂှ် ဩဝ်ပြဘိုဂ်သုၚ်စောဲ သ္ၚာဂှ်ညိ၊ ပိုဲဍိက်တအ်ညးဂမၠိုၚ် နွံပၟိက်ကဵုတဳလပိုဉ် ပြဘိုဂ်သုၚ်စောဲသ္ၚာဂှ်အိုတ်ရ” ရဴဝွံ ဖအောဝ်ဗလးဏာကလုတ် ဇရေၚ်တဳလပိုဉ်ဥပနန္ဒ ကောန်သၟိၚ်သာကျဝၚ်ရ။ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် မမိက်ကဵုမွဲမွဲလေဝ် ဟွံဟီုသ္ဂးကဵုဥပးဂှ်ရ။ ပ္ဍဲအခိၚ်ဂှ် ဒှ်အခိၚ်ကောံဓရီု ကောန်ညးနိဂီုဂမၠိုၚ်ရ။ ဂကောံကောန်ညးနိဂီုလေဝ် “ကုညးကၠုၚ်စိုပ် ပ္ဍဲလက္ကရဴအိုတ်ဂှ် တပ်ဒဏ်မသုန်စှော်ဒကေဝ်ရ” ရဴဝွံ သ္ပစွံလဝ်ကတိကဝတ်ရ။ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် ပြာပ်အာဇရေၚ်ဥပးဂှ်တုဲ— “ယွံဒကာ အဲနွံပၟိက်သ္ၚရ” ရဴဝွံ သ္ဂးကဵုဥပးဂှ်ရ။ ယွံတဳလပိုဉ် တ္ၚဲဏအ်ဗၞတ်မွဲတ္ၚဲ တဳလပိုဉ် ဩဝ်လၟတ်မၚ်လဇကၠာညိ။ အခိၚ်ကောံဓရီု ကောန်ညးနိဂီုဂမၠိုၚ်ရ။ ဂကောံကောန်ညးနိဂီုလေဝ် “ကုညးကၠုၚ်စိုပ် ပ္ဍဲလက္ကရဴအိုတ်ဂှ် တပ်ဒဏ်မသုန်စှော်ဒကေဝ်ရ” ရဴဝွံ သ္ပစွံလဝ်ကတိကဝတ်ရ ရဴဝွံ (ဂရၚ်ပတီရ)။ “ယွံဒကာ တ္ၚဲဏအ်ဟေၚ် ဩဝ်ကဵုသ္ၚာ ကုအဲညိ” ရဴဝွံ တံၚ်ဓဇက် ပ္ဍဲယာတ်ဗွိုက်ဍုတ်ဂၠိက်ရ။ ပ္ဍဲအခိၚ်ဂှ် ဥပးဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် ဂပ်ဝ်ဟီုကရေပ်ကရောတ်အတေၚ်ဒှ်တုဲ ရာန်ကဵုသ္ၚာ သွက်တဳလပိုဉ်ဥပနန္ဒ ကောန်သၟိၚ်သာကျဝၚ်တုဲ လက္ကရဴမှသ္ဂောံအာရ။ မၞိဟ်ဂမၠိုၚ် “ယွံကောန်နာဲ တၠအဲ မုဟိုတ် ကၠုၚ်စိုပ်နူလက္ကရဴဂှ်ရော? တၠအဲ ကျအာမသုန်စှော်ဒကေဝ်ရ” ရဴဝွံ ဟီုသ္ဂးကဵုဥပးဂှ်အိုတ်ရ။ ပ္ဍဲအခိၚ်ဂှ် ဥပးဂှ် ဟီုလဴဟိုတ်ပရူပရာဂှ် ကုမၞိဟ်ဂမၠိုၚ်ရ။ မၞိဟ်ဂမၠိုၚ် “ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သာကျဝၚ်ဝွံ ပၟိက်ဇၞော်အိုတ်ရ၊ ဟွံအေၚ်သတှေ်အိုတ်ရ၊ (ဟွံတရိုပ်စိုတ်အိုတ်ရ)။ ကုခမဳဂမၠိုၚ်ဝွံ ကေၚ်ကာဇၞော်သၟတ်လေဝ် တၞဟ်နပွမသ္ပကီုဂှ် ဟွံလောဲသွာရ။ ဥပးဂှ် ‘ယွံတဳလပိုဉ် တ္ၚဲဏအ်ဗၞတ်မွဲတ္ၚဲ ဩဝ်လၟတ်မၚ်လဇကၠာညိ’ ရဴဝွံ သီုဂပ်ဝ်သ္ဂးတဴဂှ် မုဟိုတ် ဟွံလၟတ်မၚ်လဇအိုတ်ဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “တဳလပိုဉ်ဥပနန္ဒ ကောန်သၟိၚ်သာကျဝၚ် ဥပးဂှ် ‘ယွံတဳလပိုဉ် တ္ၚဲဏအ်ဗၞတ်မွဲတ္ၚဲ ဩဝ်လၟတ်မၚ်လဇကၠာညိ’ ရဴဝွံ သီုဂပ်ဝ်သ္ဂးတဴဂှ် မုဟိုတ် ဟွံလၟတ်မၚ်လဇအိုတ်ဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် တဳလပိုဉ်ဥပနန္ဒ ကောန်သၟိၚ်သာကျဝၚ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံဥပနန္ဒ တၠအဲ ဥပးဂှ် ‘ယွံတဳလပိုဉ် တ္ၚဲဏအ်ဗၞတ်မွဲတ္ၚဲ ဩဝ်လၟတ်မၚ်လဇ ကုပိုဲညးတအ် ညးဂမၠိုၚ်ကၠာညိ’ ရဴဝွံ သီုဂပ်ဝ်သ္ဂးတဴဂှ် ဟွံလၟတ်မၚ်လဇရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲ ဥပးဂှ် ‘ယွံတဳလပိုဉ် တ္ၚဲဏအ်ဗၞတ်မွဲတ္ၚဲ ဩဝ်လၟတ်မၚ်လဇ ကုပိုဲညးတအ် ညးဂမၠိုၚ်ကၠာညိ’ ရဴဝွံ သီုဂပ်ဝ်သ္ဂးတဴဂှ် ဟွံလၟတ်မၚ်လဇဂှ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
538) ရန်တၟံကဵုခမဳဟေၚ်တုဲ သၟိၚ်ကီု ညးခစသၟိၚ်ကီု ဗဗၞးကီု သမ္ၚေဟ်ကီု ‘နၚုဟ်သ္ၚာဝွံ ရာန်သ္ၚာတုဲ ဩဝ်ဂြောပ်လတက်ကဵုဒါန် ကုခမဳမၞုံယၟုဝွံ နကဵုသ္ၚာညိ’ ရဴဝွံ ဖအောဝ်ဗလးနၚ် ကဵုပလံၚ်ၚုဟ်သ္ၚာ နကလုတ်ရ။ ကလုတ်ဂှ် ပြာပ်အာဇရေၚ် ခမဳဂှ်တုဲ ‘ယွံတဳလပိုဉ် ရန်တၟံကဵုတဳလပိုဉ်တုဲ ဂပ်ဝ်ရၚ်တၠုၚ်နၚ် ၚုဟ်သ္ၚာဝွံရ။ တဳလပိုဉ် ဩဝ်ဒုၚ်ဂိုၚ်ကေတ် ၚုဟ်သ္ၚာဝွံညိ’ ရဴဝွံ ယဝ်သ္ဂးမ္ဂး၊ ခမဳဂှ် “ယွံဒကာ ပိုဲညးဂမၠိုၚ် ၚုဟ်သ္ၚာဂှ်တုန် ဟွံဒုၚ်ဂိုၚ်ကေတ်အိုတ်ရ၊ ပိုဲညးဂမၠိုၚ် ပ္ဍဲအခိၚ်မဗဗွဲဂှ် ဒုၚ်ဂိုၚ်ကေတ် သ္ၚာမဂပ်ဝ်ဟေၚ်အိုတ်ရ” ရဴဝွံ သ္ဒးသ္ဂးကဵုကလုတ်ဂှ်ရ။ ကလုတ်ဂှ် “ကုတဳလပိုဉ်ဂှ် ညးကၠောန်ကေၚ်ကာဇၞော်သၟတ် မမိက်ကဵုမွဲမွဲနွံဟာ” ရဴဝွံ ယဝ်သ္ဂးမ္ဂး။ ယွံခမဳတအ် ညးမၞုံပၟိက်ကဵုသ္ၚာဂှ် ပၟၚ်အာရှာမ်ကီု ဥပးကီု ‘ယွံဒကာ ညးဝွံညးသ္ပကေၚ်ကဇၞော်သၟတ် ခမဳဂမၠိုၚ်ရ’ ရဴဝွံ သ္ဒးစၞောန်ထ္ၜးရ။ ကလုတ်ဂှ် ကဵုညးသ္ပကေၚ်ကာဇၞော်သၟတ်ဂှ် တီကေတ်တုဲ ပြာပ်အာဇရေၚ် ခမဳဂှ်တုဲ ‘ယွံတဳလပိုဉ် ညးသ္ပကေၚ်ကာဇၞော်သၟတ် တဳလပိုဉ်ဂပ်ဝ်စၞောန်ထ္ၜးဂှ် အဲဍိက် ဂပ်ဝ်ကဵုတီကေတ်တုဲရ။ ပ္ဍဲအခိၚ်မဗဗွဲ တဳလပိုဉ် ဩဝ်ပြာပ်အာညိ၊ ကြက်ဂြောပ်လတက်ကဵုဒါန် တဳလပိုဉ် နကဵုသ္ၚာရ’ ရဴဝွံ ယဝ်သ္ဂးမ္ဂး၊ ယွံခမဳတအ် ညးမၞုံပၟိက်ကဵုသ္ၚာဂှ် ပြာပ်အာဇရေၚ် ညးသ္ပကေၚ်ကာဇၞော်သၟတ်တုဲ ‘ယွံဒကာ အဲနွံပၟိက်ကဵုသ္ၚာရ’ ရဴဝွံ ဗၞတ်ၜါပိဝါ သ္ဒးအာတ်ရ၊ သ္ဒးကဵုသတိရ၊ ဗၞတ်ၜါပိဝါ အာတ်မ္ဂး ကဵုသတိမ္ဂး ကဵုစိုပ်ဒတုဲသ္ၚာဂှ်မ္ဂး ပွမကဵုစိုပ်ဒတုဲရဴဝွံ ဆာဲသန်ရ၊ ယဝ်ဟွံကဵုစိုပ်ဒတုဲမ္ဂး စဵုကဵုဗၞတ်ပန်ဝါ မသုန်ဝါ တြဴဝါ ကၞပ်သ္ၚောံသ္ၚိတ်ဇြ ရန်တၟံတုဲ သ္ဒးဒတူဒၟံၚ်မ္ဂး ကဵုစိုပ်ဒတုဲသ္ၚာဂှ်မ္ဂး၊ ပွမကဵုစိုပ်ဒတုဲ ရဴဝွံဆာဲသန်ရ၊ ပတိတ်ဇြဟတ် လောန်လတူ (အာတ်၊ ကဵုသတိဗၞတ်ၜါဝါ ပိဝါ ဒတူပန်ဝါ မသုန်ဝါ တြဴဝါ) ဒှ်တုဲ ယဝ်ကဵုစိုပ်ဒတုဲ သ္ၚာဂှ်မ္ဂး ဒးအာပတ် နိဿဂ္ဂိပါဲစိုတ်ရ။ ယဝ်ဟွံကဵုစိုပ်ဒတုဲမ္ဂး ဇရေၚ်ဒကာမရၚ်တၠုၚ်နၚ် ၚုဟ်သ္ၚာတမ်တေံဂှ် ‘ယွံဒကာတအ် မၞးတအ်ညးဂမၠိုၚ် ရန်တၟံကဵုခမဳတုဲ ၚုဟ်သ္ၚာမဂပ်ဝ်ပလံၚ်နၚ်ဂှ် ဟဂွံဒုၚ်စသိုၚ်ဖဵု မမိက်ကဵုမွဲမွဲ ကုခမဳဂှ်ရ။ ယွံဒကာတအ် ဩဝ်ကလေၚ်အာတ်ကေတ်ထောံ ဂြပ်ဇကုအိုတ်ညိ၊ ဂြပ်မၞးတအ်ညးဂမၠိုၚ် လ္ပကဵုလာဲလေၚ်အာညိ’ ရဴဝွံ အလဵုဇကုလေဝ် သ္ဒးအာရ၊ ကလုတ်လေဝ် သ္ဒးဖအောဝ်ဗလးဏာရ ဣဝွံတုန် ဒ္ဂေတ်ဝတ် ပ္ဍဲအရာဖအောဝ်ကဵု ပလံၚ်ၚုဟ်သ္ၚာရောၚ် (ရဴဝွံ ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
