၁.၃.၁။ ဟိုတ်ပရူပရာ ပဌမပညပ်
162) တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာပြသာဒ်မၞုံကဵုဓုပ်ပြကာ အပ္ဍဲဂြိုပ်မဟာဝိုန် ဇရေၚ်ဍုၚ်ဝေသာလဳရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ တွံကဵုဓရ်အသုဘ ကုခမဳဂမၠိုၚ် နဟိုတ်မဂၠိုၚ်ဂၠၚ်ရ၊ တွံကဵုဂုဏ် အသုဘကမ္မဋ္ဌာန်ရ၊ တွံကဵုဂုဏ် ပွမဇၞော်ပၟဝ် အသုဘကမ္မဋ္ဌာန်ရ၊ ရန်တၟံတုဲ ရန်တၟံတုဲ တွံကဵုဂုဏ် အသုဘသမာပတ်ရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် "ခမဳတအ် အဲကျာ် လုကဴလ္ပာ်ဂိတု (စဵုကဵုလ္ပာ်ဂိတု စှ်သုန်တ္ၚဲ) မိက်ဂွံသတၚ်တန်တဴ ညးမွဲဓဝ်ရ၊ ပဲါနူခမဳပလံၚ်ပိဏ္ဍပါတ်တုဲ ညးလဵုမွဲလေဝ် လ္ပပြာပ်ကၠုၚ် ဇရေၚ်အဲကျာ်ညိ" ရဴဝွံ ဟီုလၟိၚ်ကဵု ခမဳဂမၠိုၚ်ရ။ ခမဳဂမၠိုၚ်ဂှ် "ယွံကျာ်မၞုံပိုဉ် ခိုဟ်ရ" ရဴဝွံ ဒုၚ်ဝန် ကုတဳလမၞုံပိုဉ်ကျာ်တြဲတုဲ ပဲါနူခမဳပလံၚ်ပိဏ္ဍပါတ်တုဲ ညးလဵုမွဲလေဝ် ဟွံပြာပ်အာဇရေၚ် တဳလမၞုံပိုဉ်ကျာ်တြဲအိုတ်ရ။ "တဳလမၞုံပိုဉ်ကျာ်တြဲဂှ် နဟိုတ်မဂၠိုၚ်ဂၠၚ် တွံတဴဓရ်အသုဘရ၊ တွံတဴဂုဏ် အသုဘ ကမ္မဋ္ဌာန်ရ၊ တွံတဴဂုဏ် ပွမဇၞော်ပၟဝ်အသုဘကမ္မဋ္ဌာန်ရ၊ ရန်တၟံတုဲ ရန်တၟံတုဲ တွံကဵုဂုဏ် အသုဘသမာပတ်ရ" ရဴဝွံ ခမဳဂမၠိုၚ်ဂှ် ပတိတ်ဇြဟတ် သ္ပလွဳပရာလၟေၚ် ပွမပတိတ်ဇြဟတ် ပ္ဍဲအသုဘဘာဝနာ မတ္ၜန်တ္ၜောဲတဴ နအကာဲအရာဂမၠိုၚ်မဂၠိုၚ်တုဲ ပဒတဴအိုတ်ရ။ ခမဳဂမၠိုၚ်ဂှ် ဇအိုန်ဇရ ပ္ဍဲခန္ဓဇကုဇကုအိုတ်ရ၊ ဂွဂၠေံအိုတ်ရ၊ က္ဍုဟ်မၠေံအိုတ်ရ၊ ဥပမာမ္ဂးတုန် သၟတ်ဗြဴကီု သၟတ်တြုံကီု မဍောတ်သွတ်ၜတ်တကတ် မၞုံအလေံမသ္ပဂ္ညိဂ္ညာတ်ကျိုၚ်ကျဝ်မဟုမ်ဍာ် မွဲဟာန်ကေုာံက္ဍိုပ်တုဲဂှ် ကၠုၚ်ကွက်စုတ်ပ္ဍဲကအ် ဇွဇြုံကီု ဇွကၠဵုကီု ဇွမၞိဟ်ကီုမ္ဂး သၟဟ်ညံၚ်ရဴဇအိုန်ဇရ ဂွဂၠေံ က္ဍုဟ်မၠေံတဴကီု တုပ်သၟဟ်သာ်ဝွံရ ခမဳဂမၠိုၚ်ဂှ် ဇအိုန်ဇရ ပ္ဍဲခန္ဓဇကုဇကုအိုတ်ရ ဂွဂၠေံအိုတ်တုဲ အလဵုဇကုတအ်လေဝ် ပတုံဖျေံဇကုဇကုတအ် နူ'ဇဳဝိတိန္ဒြဳ'လမျီုအိုတ်ရ၊ ကေုာံရၚ်သကအ်လေဝ် ပတုံဖျေံနူ ‘ဇဳဝိတိန္ဒြဳ’ လမျီုအိုတ်ရ၊ ပြာပ်အာဇရေၚ် ခမဳပတောံမိဂလဏ္ဍိကတုဲလေဝ် “ယွံကောန်တၠ အာတ်ပါန်အခေါၚ်တဴရ၊ ဩဝ်ပတုံဖျေံကဵု ပိုဲညးဂမၠိုၚ် နူ ‘ဇဳဝိတိန္ဒြဳ’ လမျီုညိ၊ ဗဗေၚ်သ္ၚာဝွံ ကြက်ဒှ်ဗဗေၚ်သ္ၚာ တၠအဲရ” ရဴဝွံ ဟီုသ္ဂးအိုတ်ရ၊ ပ္ဍဲအခိၚ်ဂှ် ခမဳပတောံမိဂလဏ္ဍိက ကလိဂွံဗဗေၚ်သ္ၚာဂမၠိုၚ် နဒဒှ်ၚုဟ်လိၚ်ဂစိုတ်ဒှ်တုဲ ပတုံဖျေံ ခမဳဂမၠိုၚ်ဗွဲမဂၠိုၚ် နူ'ဇဳဝိတိန္ဒြဳ'လမျီုတုဲ ဂိုၚ်ကေတ်သၞာ်မဗာန်ခြပ်ဒၟံၚ်ဆီတုဲ ပြာပ်အာကြုၚ်ဝဂ္ဂုမုဒါရ။
163) ပ္ဍဲကြဴနူဂှ် ကုခမဳပတောံမိဂလဏ္ဍိက မကြဴကြာတ်သအးဇ္ၚးဒၟံၚ်သၞာ် မဗာန်ခြပ်ဒၟံၚ်ဆီဂှ်— “ကုအဲဂှ် ဟွံကလိဂွံ (ဒတုဲဖဵုမြမောဝ်) ရသွံ၊ ကလိဂွံ (ဒတုဲမြမောဝ်) ဟွံဒးရးရသွံ၊ အဲဂှ် ဂပ်ဝ်ကလိဂွံ (ဒဒှ်မၞိဟ်) ဗွဲဟွံဒးရးရသွံ၊ ပွမကလိဂွံ (ဒဒှ်မၞိဟ်) ဗွဲမဒးရး ဟွံသေၚ်ရသွံ၊ အဲဆန်ၜန်ဒး ပွသရာမ်ပါပ် ဗွဲမဂၠိုၚ်ရသွံ၊ ယြဴအဲမွဲ ပတုံဖျေံခမဳဂမၠိုၚ် မၞုံကဵုဒ္ဂေတ်သဳလ မၞုံကဵုဓရ်မခိုဟ်ပြဲ နူ ‘ဇဳဝိတိန္ဒြဳတုဲ’ ရဴဝွံ ပွမဂွိၚ်စံၚ်တဴဗွဲကြဴ ပွမသၠိုက်သ္ၚောံစိုတ် ဒှ်ကၠုၚ်ဟေၚ်ရ။ ပ္ဍဲအခိၚ်ဂှ် ကောန်ဒေဝတဴမွဲ မလုပ်ဗော်ဂိုဏ်ဒေဝတဴမာရ်ဂှ် ကွာ်ကၠုၚ် ပ္ဍဲလတူဒၠးဍာ် မဟွံပါ်ဒကးတုဲ “ယွံညးသပ္ပုရိုသ် ခိုဟ်သန်ကွေံရ၊ ခိုဟ်သန်ကွေံရ၊ ယွံညးသပ္ပုရိုသ် ကုအဲဂှ် ကလိဂွံ (ဒတုဲဖဵုမြမောဝ်) ရသွံ၊ ယွံညးသပ္ပုရိုသ် ကလိဂွံ (ဒဒှ်မၞိဟ်) ဗွဲမဒးရးရသွံ၊ ယွံညးသပ္ပုရိုဟ် တၠအဲ ဂွံဆန်ၜန်ဒး ပွကုသိုလ်ထၟိက် ဗွဲမဂၠိုၚ်တုဲရ၊ ယြဴတၠအဲမွဲ ခမဳ မတတ်ကၠောံ (နူသံသာ) ဟွံမာန်ဏီဂမၠိုၚ်ဂှ် ဂွံကဵုတတ်ကၠောံအာတုဲရ” ရဴဝွံ ဟီုသ္ဂးကဵု ခမဳပတောံမိဂလဏ္ဍိကရ။ ပ္ဍဲအခိၚ်ဂှ် ခမဳပတောံမိဂလဏ္ဍိကဂှ် “ကုအဲဂှ် ကလိဂွံ (ဒတုဲမြမောဝ်) ရဂး၊ အဲ ဂပ်ဝ် ကလိဂွံ (ဒဒှ်မၞိဟ်) ဗွဲမဒးရးရဂး၊ အဲဆန်ၜန်ဒး ပွကုသိုလ်ထၟိက် ဗွဲမဂၠိုၚ်တုဲရဂး၊ ယြဴအဲမွဲ ခမဳမတတ်ကၠောံ (နူသံသာ) ဟွံမာန်ဏီဂမၠိုၚ်ဂှ် ဂွံကဵုတတ်ကၠောံအာတုဲရဂး” ရဴဝွံ ဂိုၚ်ကေတ် သၞာ်မကေက်တုဲ ပြာပ်အာနူဘာမွဲကဵုဘာမွဲ နူပြဝိုဏ်မွဲကဵုပြဝိုဏ်မွဲတုဲ “ညးလဵုမွဲ ဟွံတတ်ကၠောံ နူသံသာဏီဂှ်ရော? ညးလဵုမွဲ ဂွံကဵုတတ်ကၠောံဂှ်ရော?” ရဴဝွံ သၟာန်သၟုက်ရ။ ပၞောဝ်ခမဳဂမၠိုၚ်ဂှ် ကုခမဳ တဏှာရာဂ ဟွံစာ်စ္ဍးဏီဂမၠိုၚ် ပ္ဍဲအခိၚ်မသၟာန်သာ်ဂှ် ပွမဖေက်ဂၟံက် ပွမဇကုကြံၚ်မ္ၚိုဟ် ပွမနရဴသော်ဇကုဂမၠိုၚ် ဒှ်အိုတ်ရ၊ ကုခမဳ တဏှာရာဂ စာ်စ္ဍးတုဲဂမၠိုၚ်တုန် ပ္ဍဲအခိၚ်မသၟာန်သာ်ဂှ် ပွမဖေက်ဂၟံက် ပွမဇကုကြံၚ်မ္ၚိုဟ် ပွမနရဴသော်ဇကုဂမၠိုၚ် ဟွံဒှ်အိုတ်ရ။ ပ္ဍဲအခိၚ်ဂှ် ခမဳပတောံမိဂလဏ္ဍိကဂှ် ခမဳမွဲဇကုဂှ်လေဝ် နမွဲတ္ၚဲဓဝ် ပတုံဖျေံနူ ‘ဇဳဝိတိန္ဒြဳ’ လမျီုရ၊ ခမဳၜါဇကုဂမၠိုၚ်လေဝ် နမွဲတ္ၚဲဓဝ် ပတုံဖျေံနူ ‘ဇဳဝိတိန္ဒြဳ’ လမျီုရ၊ ခမဳပိဇကုဂမၠိုၚ်လေဝ် နမွဲတ္ၚဲဓဝ် ပတုံဖျေံနူ ‘ဇဳဝိတိန္ဒြဳ’ လမျီုရ၊ ခမဳပန်ဇကုဂမၠိုၚ်လေဝ် နမွဲတ္ၚဲဓဝ် ပတုံဖျေံနူ ‘ဇဳဝိတိန္ဒြဳ’ လမျီုရ၊ ခမဳမသုန်ဇကုဂမၠိုၚ်လေဝ် နမွဲတ္ၚဲဓဝ် ပတုံဖျေံနူ ‘ဇဳဝိတိန္ဒြဳ’ လမျီုရ၊ ခမဳစှ်ဇကုဂမၠိုၚ်လေဝ် နမွဲတ္ၚဲဓဝ် ပတုံဖျေံနူ ‘ဇဳဝိတိန္ဒြဳ’ လမျီုရ၊ ခမဳၜါစှော်ဇကုဂမၠိုၚ်လေဝ် နမွဲတ္ၚဲဓဝ် ပတုံဖျေံနူ ‘ဇဳဝိတိန္ဒြဳ’ လမျီုရ၊ ခမဳပိစှော်ဇကုဂမၠိုၚ်လေဝ် နမွဲတ္ၚဲဓဝ် ပတုံဖျေံနူ ‘ဇဳဝိတိန္ဒြဳ’ လမျီုရ၊ ခမဳပန်စှော်ဇကုဂမၠိုၚ်လေဝ် နမွဲတ္ၚဲဓဝ် ပတုံဖျေံနူ ‘ဇဳဝိတိန္ဒြဳ’ လမျီုရ၊ ခမဳမသုန်စှော်ဇကုဂမၠိုၚ်လေဝ် နမွဲတ္ၚဲဓဝ် ပတုံဖျေံနူ ‘ဇဳဝိတိန္ဒြဳ’ လမျီုရ၊ ခမဳတြဴစှော်ဇကုဂမၠိုၚ်လေဝ် နမွဲတ္ၚဲဓဝ် ပတုံဖျေံနူ ‘ဇဳဝိတိန္ဒြဳ’ လမျီုရ။
164) ပ္ဍဲကြဴနူဂှ် တဳလမၞုံပိုဉ်ကျာ်တြဲ ကလိလောန်အာ လ္ပာ်ဂိတုဂှ် ဒၠိုက်ကတဵုနူမသတၚ်ဒၟံၚ်ညးမွဲဓဝ်တုဲ “ယွံအာနန္ဒ ပသာ်ဂှ်ရော? ဂကောံခမဳဂှ် ညံၚ်ရဴကြဳအောန်ကီု ဒှ်အာဂှ်ရော?” ရဴဝွံ သ္ဂးကဵုတဳလပိုဉ် အာနန္ဒရ။ ယွံကျာ်မၞုံပိုဉ် ဒဒှ်အိုတ်သီုဂှ် ဂရၚ်ပတီရ၊ တဳလမၞုံပိုဉ်ကျာ်တြဲ တွံကဵုဓရ်အသုဘ ကုခမဳဂမၠိုၚ် နဟိုတ်မဂၠိုၚ်ဂၠၚ်ရ၊ တွံကဵုဂုဏ် အသုဘကမ္မဋ္ဌာန်ရ၊ တွဴကဵုဂုဏ် ပွမဇၞော်ပၟဝ် အသုဘကမ္မဋ္ဌာန်ရ၊ ရန်တၟံတုဲ ရန်တၟံတုဲ တွံကဵုဂုဏ် အသုဘသမာပတ်ရ။ ယွံကျာ်မၞုံပိုဉ် ခမဳဂမၠိုၚ်ဂှ် “တဳလမၞုံပိုဉ်ကျာ်တြဲဂှ် နဟိုတ်မဂၠိုၚ်ဂၠၚ် တွံတဴဓရ်အသုဘရ၊ တွံတဴဂုဏ် အသုဘကမ္မဋ္ဌာန်ရ၊ တွံတဴဂုဏ် ပွမဇၞော်ပၟဝ်အသုဘကမ္မဋ္ဌာန်ရ၊ ရန်တၟံတုဲ ရန်တၟံတုဲ တွံကဵုဂုဏ် အသုဘသမာပတ်ရ” ရဴဝွံ ပတိတ်ဇြဟတ်သ္ပလွဳပရာ လၟေၚ်ပွမပတိတ်ဇြဟတ် ပ္ဍဲအသုဘဘာဝနာ မတ္ၜန်တ္ၜောဲတဴ နအကာဲအရာဂမၠိုၚ်မဂၠိုၚ်တုဲ ပဒတဴအိုတ်ရ။ ခမဳဂမၠိုၚ်ဂှ် ဇအိုန်ဇရ ဂွံဂၠေံ က္ဍုဟ်မၠေံ ပ္ဍဲခန္ဓဇကုဇကုအိုတ်ရ၊ ဥပမာမ္ဂးတုန် သၟတ်ဗြဴကီု သၟတ်တြုံကီု မဍောတ်ၜတ်တကတ် မၞုံအလေံမသ္ပဂ္ညိဂ္ညာတ်ကျိုၚ်ကျဝ် မဟုမ်ဍာ်မွဲဟာန်ကေုာံက္ဍိုပ်တုဲဂှ် ကၠုၚ်ကွက်စုတ်ပ္ဍဲကအ် ဇွဇြုံကီု ဇွကၠဵုကီု ဇွမၞိဟ်ကီုမ္ဂး သၟဟ်ညံၚ်ရဴဇအိုန်ဇရ ဂွဂၠေံက္ဍုဟ်မၠေံတဴကီု တုပ်သၟဟ်သာ်ဝွံရ ခမဳဂမၠိုၚ်ဂှ် ဇအိုန်ဇရ ဂွဂၠေံက္ဍုဟ်မၠေံ ပ္ဍဲခန္ဓဇကုဇကုအိုတ်တုဲ အလဵုအလဵုဇကုတအ်လေဝ် ပတုံဖျေံဇကုဇကုတအ် နူ ‘ဇဳဝိတိန္ဒြဳ’ လမျီုအိုတ်ရ၊ ကေုာံရၚ်သကအ်လေဝ် ပတုံဖျေံ နူ ‘ဇဳဝိတိန္ဒြဳ’ လမျီုအိုတ်ရ၊ ပြာပ်အာဇရေၚ် ခမဳပတောံမိဂလဏ္ဍိကတုဲလေဝ် “ယွံကောန်တၠ အာတ်ပါန်အခေါၚ်ရ၊ ဩဝ်ပတုံဖျေံကဵု ပိုဲညးဂမၠိုၚ် နူ ‘ဇဳဝိတိန္ဒြဳ’ လမျီုညိ၊ ဗဗေၚ်သ္ၚာဝွံ ကြက်ဒှ်ဗဗေၚ်သ္ၚာ တၠအဲရ” ရဴဝွံ ဟီုသ္ဂးအိုတ်ရ။ ယွံကျာ်မၞုံပိုဉ် ပ္ဍဲအခိၚ်ဂှ် ခမဳပတောံမိဂလဏ္ဍိက ကလိဂွံဗဗေၚ်သ္ၚာဂမၠိုၚ်တုဲ နဒဒှ်ၚုဟ်လိၚ်ဂစိုတ်ဒှ်တုဲ ခမဳမွဲဇကုဂှ်လေဝ် နမွဲတ္ၚဲဓဝ် ဂစိုတ်ထောံရ ။ ပ ။ ခမဳတြဴစှော်ဇကုဂမၠိုၚ်လေဝ် နမွဲတ္ၚဲဓဝ် ဂစိုတ်ထောံရ။ ယွံကျာ်မၞုံပိုဉ် အာတ်ပါန်အခေါၚ်ရ၊ တဳလမၞုံပိုဉ်ကျာ်တြဲ ယြဴနအာကာဲအရာ မသအာၚ်နူအသုဘကမ္မဋ္ဌာန်မွဲ ဂကောံခမဳဝွံ တန်တဴပ္ဍဲအရဟတ္တဖိုလ်ရ၊ နအကာဲအရာဂှ် ဩဝ်တွံကဵုဟိုတ်အရာ ကမ္မဋ္ဌာန်သအာၚ်ညိ ရဴဝွံ ဂရၚ်ပတီရ။ “ယွံအာနန္ဒ ယဝ်ဒှ်သာ်ဂှ်မ္ဂး ခမဳဂမၠိုၚ်သီုဖအိုတ် မသ္ပနိဿယ်ဗ္ဒာဲကဵု ဍုၚ်ဝေသာလဳတုဲ ပဒတဴဒၟံၚ်ဂှ် ဩဝ်ကဵုကောံဓရီု ပ္ဍဲဇြပ်တာန်ဆံၚ်ကောံဓရီုညိ ရဴဝွံ သ္ဂးတဴမ္ဂး “ယွံကျာ်မၞုံပိုဉ် ခိုဟ်ရ” ရဴဝွံ တဳလပိုဉ်အာနန္ဒ ဂရၚ်ပတီဒုၚ်ဝန် ကုတဳလမၞုံပိုဉ်ကျာ်တြဲတုဲ ခမဳဂမၠိုၚ်သီုဖအိုတ် မသ္ပနိဿယ်ဗ္ဒာဲကဵု ဍုၚ်ဝေသာလဳတုဲ ပဒတဴဒၟံၚ်ဂှ် ကဵုကောံဓရီု ပ္ဍဲဇြပ်တာန်ဆံၚ် ကောံဓရီုတုဲမ္ဂး ပ္ၚောံပြာပ်အာ ဇရေၚ်တဳလမၞုံပိုဉ်ကျာ်တြဲတုဲ— “ယွံကျာ်မၞုံပိုဉ် ဂကောံခမဳ ကောံဓရီုဒၟံၚ်အိုတ်တုဲရ၊ ပ္ဍဲအခိၚ်လၟုဟ် သွက်သ္ဂောံက္ညအာဂှ် တဳလမၞုံပိုဉ်ကျာ်တြဲ တီကေတ်အခိၚ်ညိ၊ သွက်သ္ဂောံက္ညအာဂှ် ဒှ်အတိုၚ်ပၟိက် တဳလမၞုံပိုဉ်ကျာ်တြဲ ဟေၚ်ရ” ရဴဝွံ ဂရၚ်ပတီရ။
165) ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပြာပ်အာ ဇြပ်တာန်ဆံၚ်ကောံဓရီုတုဲ ဂဇအ်ဖျေံ ပ္ဍဲဒၞဲါမလးပညပ်လဝ်သၞာတုဲမ္ဂး သ္ဂးတိုန်ကဵုခမဳဂမၠိုၚ်ရ။ “ယွံခမဳတအ် အာနာပါနဿတိသမာဓိဝွံ ဂပ်ဝ်ဇၞော်ပၟဝ် ဂပ်ဝ်လ္ၚတ်သ္ပဗွဲမဂၠိုၚ်ကဵုဝါမ္ဂး ၜိုဟ်လေဝ် ၜိုဟ်လလမ်ရ၊ ပြဲလေဝ် ပြဲရ၊ သွက်ဒးလံၚ် (ဗပေၚ်စုတ်)လေဝ် ဟွံမွဲပၟိက်ရ၊ ဒၞဲါဌာန်ဒှ်တသိုခ်လေဝ် ဒှ်ရ၊ ဓရ်အကုသိုလ်မယုတ်မာဂမၠိုၚ် ဇၟာပ်မကတဵုဒှ် ဇၟာပ်မကတဵုဒှ်လေဝ် နမွဲခဏဓဝ် ကဵုကၠေံဗ္ဒန် ပၠိုတ်လလမ်အာမာန်ရ။ ယွံခမဳတအ် ဥပမာတုန် ပ္ဍဲဂိတုဒဂိုန် မဒှ်လအိတ်ဥတုက္ညၚ်ဂမၠိုၚ် ဗြဲဇၞော်မဂူစှေ်ကၠုၚ် ဟွံသေၚ်ကဵုအခိၚ်ဂှ် ဗၞတ်မွဲခဏဓဝ် သၟဟ်ညံၚ်ရဴကဵုကၠေံအိုတ် လလမ်ပၠိုတ်ကၠေံ မၠိုက်လက်ကၠိုက်မတိုန်ကၠုၚ်လတူကီု တုပ်သၟဟ်သာ်ဝွံဟေၚ် ယွံခမဳတအ် အာနာပါနဿတိသမာဓိဝွံ ဂပ်ဝ်ဇၞော်ပၟဝ် ဂပ်ဝ်လ္ၚတ်သ္ပဗွဲမဂၠိုၚ်ကဵုဝါမ္ဂး ၜိုဟ်လေဝ် ၜိုဟ်လလမ်ရ၊ ပြဲလေဝ် ပြဲရ၊ သွက်ဒးလံၚ် (ဗပေၚ်စုတ်) လေဝ် ဟွံမွဲပၟိက်ရ၊ ဒၞဲါဌာန်ဒှ်တသိုခ်လေဝ် ဒှ်ရ၊ ဓရ်အကုသိုလ်မယုတ်မာဂမၠိုၚ် ဇၟာပ်မကတဵုဒှ် ဇၟာပ်မကတဵုဒှ်လေဝ် နမွဲခဏဓဝ် ကဵုကၠေံဗ္ဒန် ပၠိုတ်လလမ်အာမာန်ရ။ ယွံခမဳတအ် အာနာပါနဿသတိသမာဓိဝွံ ဂပ်ဝ်ဇၞော်ပၟဝ် ဂပ်ဝ်သ္ပဗွဲမဂၠိုၚ်ကဵုဝါ သာ်လဵုမ္ဂး ၜိုဟ်လေဝ် ၜိုဟ်လလမ် ပြဲလေဝ် ပြဲရော? သွက်ဒးလံၚ် (ဗပေၚ်စုတ်) လေဝ် ဟွံမွဲပၟိက် ဒၞဲါဌာန်ဒှ်တသိုခ်လေဝ်ဒှ်တုဲ ဓရ်အကုသိုလ်မယုတ်မာဂမၠိုၚ် ဇၟာပ်မကတဵုဒှ် ဇၟာပ်မကတဵုဒှ်လေဝ် နမွဲခဏဓဝ် ကဵုကၠေံဗ္ဒန် ပၠိုတ်လလမ်အာမာန်ဂှ်ရော? ယွံခမဳတအ် ပ္ဍဲသာသနာဝွံ ခမဳဂှ် ပြာပ်အာ ဂြိုပ်တုဲကဵုဒှ် ပြာပ်အာသၟဝ်တမ်ဆုတုဲကဵုဒှ် ပြာပ်အာဌာန်လ္ၚုသ္ၚိတ်ဇြတုဲကဵုဒှ် တၚ်ထွာဲတုဲမ္ဂး စွံပတန်လဝ် ဇကုတပ်တပ်တုဲ သတိဂှ်ကတဵုဗဒှ်တူရူဏာကဵုကမ္မဌာန်တုဲ ဂဇအ်ဒၟံၚ်ရ။ ခမဳဂှ် မၞုံကဵုသတိတုဲဟေၚ် ယီု (တသိုဟ်) တိတ်ရ၊ မၞုံကဵုသတိတုဲဟေၚ် ယီုလုပ် (ခရောတ်ပၠုပ်) ရ၊ ယီုတိတ်ဂၠိၚ်ဂၠိၚ်လေဝ် “ယီုတိတ်ဂၠိၚ်ဂၠိၚ်ရ” ရဴဝွံ တီရ၊ ယီုလုပ်ဂၠိၚ်ဂၠိၚ်လေဝ် “ယီုလုပ်ဂၠိၚ်ဂၠိၚ်ရ” ရဴဝွံ တီရ၊ ယီုတိတ်ဂၠေံဂၠေံလေဝ် “ယီုတိတ်ဂၠေံဂၠေံရ” ရဴဝွံ တီရ၊ ယီုလုပ် ဂၠေံဂၠေံလေဝ် “ယီုလုပ်ဂၠေံဂၠေံရ” ရဴဝွံ တီရ။ သီုကဵုပြာကဋ်တဴ ဂကောံရုပ် (ယီုတိတ်) တမ် လဒေါဝ် ကၞောတ်အိုတ်သီုဂှ် ယီုတိတ်ရ ရဴဝွံ ပတိတ်ဇြဟတ်တုဲ ဒ္ဂေတ်တဴရ၊ သီုကဵုပြာကဋ်တဴ ဂကောံရုပ် (ယီုလုပ်) တမ် လဒေါဝ် ကၞောတ်အိုတ်သီုဂှ် ယီုလုပ်ရ ရဴဝွံ ပတိတ်ဇြဟတ်တုဲ ဒ္ဂေတ်တဴရ၊ သီုကဵုလလမ်ကၠေံ ယီုတိတ်မသကာတ်မြဟ်ဂှ် ယီုတိတ်ရ ရဴဝွံ ပတိတ်ဇြဟတ်တုဲ ဒ္ဂေတ်တဴရ၊ သီုကဵုလလမ်ကၠေံ ယီုလုပ်မသကာတ်မြဟ်ဂှ် ယီုလုပ်ရ ရဴဝွံ ပတိတ်ဇြဟတ်တုဲ ဒ္ဂေတ်တဴရ။ သီုမပြာကဋ်တဴ ‘ပဳတိ’ ပွမသ္ဍိုက်မၠိုက်ဂှ် ယီုတိတ်ရ ရဴဝွံ ပတိတ်ဇြဟတ်တုဲ ဒ္ဂေတ်တဴရ၊ သီုမပြာကဋ်တဴ ‘ပဳတိ’ ပွမသ္ဍိုက်မၠိုက်ဂှ် ယီုလုပ်ရ ရဴဝွံ ပတိတ်ဇြဟတ်တုဲ ဒ္ဂေတ်တဴရ၊ သီုမပြာကဋ်တဴ ‘သုခ’ ပွမဒှ်တသိုခ်ဂှ် ယီုတိတ်ရ ရဴဝွံ ပတိတ်ဇြဟတ်တုဲ ဒ္ဂေတ်တဴရ၊ သီုမပြာကဋ်တဴ ‘သုခ’ ပွမဒှ်တသိုခ်ဂှ် ယီုလုပ်ရ ရဴဝွံ ပတိတ်ဇြဟတ်တုဲ ဒ္ဂေတ်တဴရ။ သီုမကဵုပြာကဋ်တဴ စိတ္တသၚ်္ခါရ (မတွံဂး ဝေဒနာသညာ) ဂှ် ယီုတိတ်ရ ရဴဝွံ ပတိတ်ဇြဟတ်တုဲ ဒ္ဂေတ်တဴရ၊ သီုမကဵုပြာကဋ်တဴ စိတ္တသၚ်္ခါ (မတွံဂးဝေဒနာသညာ) ဂှ် ယီုလုပ်ရ ရဴဝွံ ပတိတ်ဇြဟတ်တုဲ ဒ္ဂေတ်တဴရ။ သီုမကဵုလလမ်ကၠေံ စိတ္တသၚ်္ခါရ (ဝေဒနာသညာ) ဂှ် ယီုတိတ်ရ ရဴဝွံ ပတိတ်ဇြဟတ်တုဲ ဒ္ဂေတ်တဴရ၊ သီုမကဵုလလမ်ကၠေံ စိတ္တသၚ်္ခါရ (ဝေဒနာသညာ) ဂှ်ယီုလုပ်ရ ရဴဝွံ ပတိတ်ဇြဟတ်တုဲ ဒ္ဂေတ်တဴရ။ သီုမကဵုပြာကဋ် တီတဴစိုတ်ဂှ် ယီုတိတ်ရ ရဴဝွံ ပတိတ်ဇြဟတ်တုဲ ဒ္ဂေတ်တဴရ၊ သီုမကဵုပြာကဋ် တီတဴစိုတ်ဂှ် ယီုလုပ်ရ ရဴဝွံ ပတိတ်ဇြဟတ်တုဲ ဒ္ဂေတ်တဴရ။ သီုမကဵုစိုတ်မြဟ်မြာလောန် ။ ပ ။ သီုမစွံပတန်လဝ်စိုတ် ဗွဲမဒးရး ။ ပ ။ သီုမကဵုစိုတ်တိတ်ဗၠး (နူမပ္တံနဳဝရဏ) ။ ပ ။ သီုမမၠာ်သ္ၚေဝ်ဂၠိုၚ်ဂၠိုၚ်ကဵုဝါ ရဴဝွံမ္ဂး အနိစ္စ ။ ပ ။ သီုမမၠာ်သ္ၚေဝ်ဂၠိုၚ်ဂၠိုၚ်ကဵုဝါ ပွမစာ်စ္ဍးနူရာဂ ။ ပ ။ သီုမမၠာ်သ္ၚေဝ်ဂၠိုၚ်ဂၠိုၚ်ကဵုဝါ ပွမပၠိုတ်လလမ် ။ ပ ။ သီုမမၠာ်သ္ၚေဝ်ဂၠိုၚ်ဂၠိုၚ်ကဵုဝါ ပွမသၠးကၠေံမွဲလှေ်ပၠန်ဂှ် "ယီုတိတ်ရ" ရဴဝွံ ပတိတ်ဇြဟတ်တုဲ ဒ္ဂေတ်တဴရ၊ သီုမမၠာ်သ္ၚေဝ်ဂၠိုၚ်ဂၠိုၚ်ကဵုဝါ ရဴဝွံမ္ဂး ပွမသၠးကၠေံ မွဲလှေ်ပၠန်ဂှ် "ယီုလုပ်ရ" ရဴဝွံ ပတိတ်ဇြဟတ်တုဲ ဒ္ဂေတ်တဴရ။ ယွံခမဳတအ် အာနာပါနဿတိသမာဓိ ဂပ်ဝ်ဇၞော်ပၟဝ် ဂပ်ဝ်လ္ၚတ်သ္ပ ဗွဲမဂၠိုၚ်ကဵုဝါ ရဴဝွံဂှ် ၜိုဟ်လေဝ် ၜိုဟ်လလမ်ရ၊ ပြဲလေဝ် ပြဲရ၊ သွက်ဒးလံၚ် (ဗပေၚ်စုတ်) လေဝ် ဟွံမွဲပၟိက်ရ၊ ဒၞဲါဌာန်ဒှ်တသိုခ်လေဝ် ဒှ်ရ၊ ဓရ်အကုသိုလ်မယုတ်မာဂမၠိုၚ် ဇၟာပ်မကတဵုဒှ် ဇၟာပ်မကတဵုဒှ်လေဝ် နမွဲခဏဓဝ် ကဵုကၠေံဗ္ဒန် ပၠိုတ်လလမ်အာမာန်ရ” ရဴဝွံ တွံတဴရ။
166) ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဟိုတ်နူဟိုတ်အရာဝွံ ကဵုခမဳသၚ်ကောံဓရီုတုဲမ္ဂး “ယွံခမဳတအ် ခမဳဂမၠိုၚ် အလဵုဇကုတအ်လေဝ် ပတုံဖျေံ ဇကုဇကုတအ် နူ ‘ဇဳဝိတိန္ဒြဳ’ လမျီုအိုတ်ရ၊ ကေုာံရၚ်သကအ်လေဝ် ပတုံဖျေံ နူ ‘ဇဳဝိတိန္ဒြဳ’ လမျီုအိုတ်ရ၊ ခမဳပတောံမိဂလဏ္ဍိကဂှ်လေဝ် “ယွံကောန်တၠ အာတ်ပါန်အခေါၚ်ရ၊ ဩဝ်ပတုံဖျေံကဵု ပိုဲညးဂမၠိုၚ် နူ ‘ဇဳဝတိန္ဒြဳ’ လမျီုအိုတ်ညိ၊ ဗဗေၚ်သ္ၚာဝွံ ကြက်ဒှ်ဗဗေၚ်သ္ၚာ တၠအဲရ” ရဴဝွံ ပြာပ်အာတုဲ ဟီုသ္ဂးအိုတ်ရ သ္ဂောံမိၚ်ကေတ်ရဴဝွံဂှ် ဍာံပြဟာ ရဴဝွံ စၟဳစၟတ်သၟာန်သၟုက် ခမဳဂမၠိုၚ်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ “ယွံခမဳတအ် ဟွံထေက် ကုခမဳဂမၠိုၚ်ရ၊ ဟွံဗဗွဲရ၊ ဟွံသပ္ပါယ်ရ၊ အာကာရအရာ ခမဳတအ် ဟွံသေၚ်ရ၊ ဟွံဂပ်ဝ်ရ၊ ဟွံထေက်ကဵုသ္ပရ၊ “ယွံခမဳတအ် မုဟိုတ် ခမဳဂမၠိုၚ်ဂှ် အလဵုဇကုတအ်လေဝ် ပတုံဖျေံဇကုဇကုတအ် နူ ‘ ဇဳဝိတိန္ဒြဳ’ လမျီုအိုတ်ဂှ်ရော? ကေုာံရၚ်သကအ်လေဝ် ပတုံဖျေံ နူ ‘ဇဳဝိတိန္ဒြဳ’ လမျီုအိုတ်ဂှ်ရော? ခမဳပတောံမိဂလဏ္ဍိကဂှ်လေဝ် “ယွံကောန်တၠ အာတ်ပါန်အခေါၚ်ရ၊ ဩဝ်ပတုံဖျေံကဵုပိုဲညးဂမၠိုၚ် နူ ‘ဇဳဝိတိန္ဒြဳ’ လမျီုညိ၊ ဗဗေၚ်သ္ၚာဝွံ ကြက်ဒှ်ဗဗေၚ်သ္ၚာ တၠအဲရ” ရဴဝွံ ပြာပ်အာတုဲ ဟီုသ္ဂးအိုတ်ဂှ်ရော? ယွံခမဳတအ် ပွဝွံ ကုညးမဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက် ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
167) ယြဴခမဳမွဲ ဖအောဝ်လလဴ (နစိုတ်စေတနာ မမိက်ဂစိုတ်) တုဲ ပတုံဖျေံ ဇကုညးမဒှ်ဇာတ်မၞိဟ် နူ ‘ဇဳဝိတိန္ဒြဳ’ လမျီုမ္ဂး၊ လွဟ်လနက်မပ္တံၜုန်မြ မလေပ်ရေၚ်တၠုၚ် ‘ဇဳဝိတိန္ဒြဳ’ လမျီုညးဂှ်လေဝ် ဂၠာဲသ္ၚေဝ်တုဲ စွံပတန်လဝ် (ပ္ဍဲဇရေၚ်) မ္ဂး၊ ခမဳဝွံလေဝ် အာစိုပ်ပွမကျနူသာသနာရ၊ ဟွံမွဲပွမပံၚ်ဖက်မွဲစွံ ကေုာံခမဳခိုဟ်ဆာဲဂမၠိုၚ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံသ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
168) ပ္ဍဲအခိၚ်ဂှ် ဥပးမွဲ ဂိယဲဒၟံၚ်ရ၊ သမ္ဘာဥပးဂှ် ရုပ်သာ်ကျေဝ်လောန်ရ၊ ထေက်ကဵုဗဵုစခိုဟ်ရ၊ ကဵုစိုတ်ဇြုၚ်ကေတ်မာန်ရ၊ ခမဳဆဗ္ဗဂ္ဂဳဂမၠိုၚ် မၞုံစိုတ်စောဲစပ် ပ္ဍဲဗြဴဂှ်အိုတ်ရ၊ “ယွံကောန်တၠတအ် ယဝ်ဥပးဂှ် ဂျိုၚ်ဒၟံၚ်လမျီုမ္ဂး ပိုဲညးဂမၠိုၚ် ကလိဂွံဗြဴဂှ်မာန် ဟွံသေၚ်အိုတ်ရ၊ ယွံကောန်တၠတအ် လၟုဟ်ပိုဲညးဂမၠိုၚ် ဟီုထိုၚ်သးဂုဏ်ပွမချိုတ် ကုဥပးဂှ်အိုတ်စိုအ်” ရဴဝွံ ကသပ်ဒှ်ကုခမဳဆဗ္ဗဂ္ဂဳ ဂမၠိုၚ်တုဲမ္ဂး ခမဳဆဗ္ဗဂ္ဂဳဂမၠိုၚ် ပြာပ်အာဇရေၚ်ဥပးဂှ်တုဲ— “ယွံဥပး တၠအဲဒှ်ညးမၞုံပွထၟိက် မဂပ်ဝ်သ္ပလဝ်တုဲရ၊ ဒှ်ညးမၞုံကုသိုလ် မဂပ်ဝ်သ္ပလဝ်တုဲရ၊ ဒှ်ညးဆေဝ်တာကၠေံ အရာဖေက်ဂၟံက်တုဲရ၊ ပွယုတ်မာ မဂပ်ဝ်သ္ပတုဲ ဟွံမွဲကုတၠအဲရ၊ ပွကြမ်ကြသကာတ်မြဟ် မဂပ်ဝ်သ္ပတုဲ ဟွံမွဲရ၊ ပွကြံၚ်မ္ၚိုဟ်ဓဇန် မဂပ်ဝ်သ္ပလဝ်တုဲ ဟွံမွဲရ၊ တၠအဲဂပ်ဝ်သ္ပ ပွထၟိက်တုဲရ၊ တၠအဲ ဂပ်ဝ်ဝေၚ်ပါဲကၠေံ ပွမသရာမ်ပါပ်တုဲရ၊ နပွမဂျိုၚ်လမျီုမယုတ်မာဝွံ မုဖဵုနွံ ကုတၠအဲရော? လတူပွမဂျိုၚ်လမျီု ပွမချိုတ်ဂှ် ပြဲကုတၠအဲဏီရ၊ တၠအဲစုတိကလိလောန် နူဘဝဝွံတုဲ ခန္ဓဇကုလီုလာ်တုဲ ပ္ဍဲကြဴနူချိုတ်တုဲဂှ် ကြက်သ္ဂောံကတဵုဒှ် ပ္ဍဲဍုၚ်သွဝ် ဒှ်လအာဂတိခိုဟ်ဆာဲရ၊ ပ္ဍဲဍုၚ်သွဝ်ဂှ် တရိုပ်စိုတ်ဍိုက်ပေၚ်တဴ နကာမဂုဏ်ဒေဝတဴဂမၠိုၚ် မသုန်ပြကာဒှ်တုဲ ကြက်သ္ဂောံဒုၚ်စသိုၚ် မိပ်မိပ်ဇြိပ်ဇြိပ်ရ” ရဴဝွံ ဟီုသ္ဂးကဵုဥပးဂှ်အိုတ်ရ။
169) ပ္ဍဲအခိၚ်ဂှ် ဥပးဂှ် “တဳလပိုဉ်မပြဲဂမၠိုၚ် ဟီုဂလာန်ဍာံစၟတ်အိုတ်ရ၊ ဍာံပြရ အဲဂှ်ဒှ်ညးမၞုံပွထၟိက် မဂပ်ဝ်သ္ပလဝ်တုဲရ၊ ဒှ်ညးမၞုံကုသိုလ် မဂပ်ဝ်သ္ပလဝ်တုဲရ၊ ဒှ်ညးဆေဝ်တာကၠေံ အရာဖေက်ဂၟံက်တုဲရ၊ ပွယုတ်မာ မဂပ်ဝ်သ္ပတုဲ ဟွံမွဲကုအဲရ၊ ပွကြမ်ကြသကာတ်မြဟ် မဂပ်ဝ်သ္ပတုဲ ဟွံမွဲရ၊ ပွကြံၚ်မ္ၚိုဟ်ဓဇန် မဂပ်ဝ်သ္ပလဝ်တုဲ ဟွံမွဲရ၊ အဲဂပ်ဝ်သ္ပ ပွထၟိက်တုဲရ၊ အဲ ဂပ်ဝ်ဝေၚ်ပါဲကၠေံ ပွမသရာမ်ပါပ်တုဲရ၊ နပွမဂျိုၚ်လမျီုမယုတ်မာဝွံ မုဖဵုနွံ ကုအဲရော? လတူပွမဂျိုၚ်လမျီု ပွမချိုတ်ဂှ် ပြဲကုအဲဏီရ၊ အဲစုတိကလိလောန် နူဘဝဝွံတုဲ ခန္ဓဇကုလီုလာ်တုဲ ပ္ဍဲကြဴနူချိုတ်တုဲဂှ် ကြက်သ္ဂောံကတဵုဒှ် ပ္ဍဲဍုၚ်သွဝ် ဒှ်လအာဂတိခိုဟ်ဆာဲရ၊ ပ္ဍဲဍုၚ်သွဝ်ဂှ် တရိုပ်စိုတ်ဍိုက်ပေၚ်တဴ နကာမဂုဏ်ဒေဝတဴဂမၠိုၚ် မသုန်ပြကာဒှ်တုဲ ကြက်သ္ဂောံဒုၚ်စသိုၚ် မိပ်မိပ်ဇြိပ်ဇြိပ်ရ” ရဴဝွံ ဥပးဂှ် စၞစမဟွံဗဗွဲဂမၠိုၚ်လေဝ် စရ၊ ကွာၚ်သ္ၚာဲစ မဟွံဗဗွဲဂမၠိုၚ်လေဝ်သ္ၚာဲရ၊ စၞကၠာန်မဟွံဗဗွဲဂမၠိုၚ်လေဝ် ကၠာန်ရ၊ စၞသုၚ်မဟွံဗဗွဲဂမၠိုၚ်လေဝ် သုၚ်ရ၊ စၞစမဟွံဗဗွဲဂမၠိုၚ်လေဝ်စ ကွာၚ်သ္ၚာဲစ မဟွံဗဗွဲဂမၠိုၚ်လေဝ်သ္ၚာဲ စၞကၠာန်မဟွံဗဗွဲဂမၠိုၚ်လေဝ်ကၠာန် စၞသုၚ်မဟွံဗဗွဲဂမၠိုၚ်လေဝ် သုၚ်ဂှ်ရ ယဲမသကာတ်မြဟ် ကတဵုဒှ်ကုဥပးဂှ်တုဲ နကဵုယဲဂှ်ဟေၚ် ဥပးဂှ်စုတိကလိလောန်စဴရ။ သမ္ဘာဥပးဂှ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ ဟွံမွဲဂွလေံအိုတ်ရ၊ ဟွံမွဲသဳလအိုတ်ရ၊ မၞုံအလေံဟီုသ္ဂး ဟွံဍာံစၟတ်အိုတ်ရ၊ သီုကဵုဒှ်သာ်ဂှ် ခမဳဂမၠိုၚ်ဝွံ မၞုံအလေံဒ္ဂေတ်တဴဓရ်အိုတ်ရ၊ မၞုံအလေံဒ္ဂေတ်တဴ ဒ္ဂေတ်မသၟဟ်သၟန်အိုတ်ရ၊ မၞုံအလေံဒ္ဂေတ်တဴမပြဲအိုတ်ရ၊ မၞုံအလေံဟီုသ္ဂး ဍာံစၟတ်အိုတ်ရ၊ မၞုံကဵုသဳလအိုတ်ရ၊ မၞုံသဘဴခိုဟ်ဆာဲအိုတ်ရ ရဴဝွံဂံၚ်ဒုၚ်ဝန်အိုတ်ဏီရ၊ ကုခမဳဂမၠိုၚ်ဝွံ ဒဒှ်ခမဳ ဒဒှ်ညးသပ္ပုရိုဟ်ခိုဟ်ပြဲ ဟွံမွဲတုဲရ၊ ကုခမဳဂမၠိုၚ်ဝွံ ဒဒှ်ခမဳ ဒဒှ်ညးသပ္ပုရိုဟ်ခိုဟ်ပြဲ ကၠေံလီုတုဲရ၊ ကုခမဳဂမၠိုၚ်ဝွံ သာ်လဵု ဒဒှ်ခမဳ ဒဒှ်ညးသပ္ပရိုဟ်ခိုဟ်ပြဲ ဂွံနွံဏီဂှ်ရော? ခမဳဂမၠိုၚ်ဝွံ စာ်စ္ဍးနူဒဒှ်ခမဳ ဒဒှ်ညးသပ္ပုရိုဟ်ခိုဟ်ပြဲအိုတ်တုဲရ၊ ခမဳဂမၠိုၚ်ဝွံ ဟီုထိုၚ်သးဂုဏ်ပွမချိုတ် ကုတြုံတၠသ္ၚိအဲအိုတ်ရ၊ ခမဳဂမၠိုၚ်ဝွံ ဂစိုတ်ထောံ တြုံတၠသ္ၚိအဲအိုတ်တုဲရ” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ မၞိဟ်သအာၚ်ဂမၠိုၚ်လေဝ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ ဟွံမွဲဂွလေံအိုတ်ရ၊ ဟွံမွဲသဳလအိုတ်ရ၊ မၞုံအလေံဟီုသ္ဂး ဟွံဍာံစၟတ်အိုတ်ရ၊ သီုကဵုဒှ်သာ်ဂှ် ခမဳဂမၠိုၚ်ဝွံ မၞုံအလေံဒ္ဂေတ်တဴ ဓရ်အိုတ်ရ၊ မၞုံအလေံဒ္ဂေတ်တဴ ဒ္ဂေတ်မသၟဟ်သၟန်အိုတ်ရ၊ မၞုံအလေံဒ္ဂေတ်တဴမပြဲအိုတ်ရ၊ မၞုံအလေံဟီုသ္ဂး ဍာံစၟတ်အိုတ်ရ၊ မၞုံကဵုသဳလအိုတ်ရ၊ မၞုံသဘဴခိုဟ်ဆာဲအိုတ်ရ ရဴဝွံဂံၚ်ဒုၚ်ဝန်အိုတ်ဏီရ၊ ကုခမဳဂမၠိုၚ်ဝွံ ဒဒှ်ခမဳ ဒဒှ်ညးသပ္ပုရိုဟ်ခိုဟ်ပြဲ ဟွံမွဲတုဲရ၊ ကုခမဳဂမၠိုၚ်ဝွံ ဒဒှ်ခမဳ ဒဒှ်ညးသပ္ပုရိုဟ်ခိုဟ်ပြဲ ကၠေံလီုတုဲရ၊ ကုခမဳဂမၠိုၚ်ဝွံ သာ်လဵုဒဒှ်ခမဳ ဒဒှ်ညးသပ္ပရိုဟ်ခိုဟ်ပြဲ ဂွံနွံဏီဂှ်ရော? ခမဳဂမၠိုၚ်ဝွံ စာ်စ္ဍးနူဒဒှ်ခမဳ ဒဒှ်ညးသပ္ပုရိုဟ်ခိုဟ်ပြဲအိုတ်တုဲရ၊ ခမဳဂမၠိုၚ်ဝွံ ဟီုထိုၚ်သးဂုဏ်ပွမချိုတ် ကုဥပးအိုတ်ရ၊ ခမဳဂမၠိုၚ်ဝွံ ဂစိုတ်ထောံဥပးအိုတ်တုဲရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ် မဟီုဂရိုဟ် ပျုတ်ဗ္ဒေက်ဟီုထ္ၜးဒုဟ်အိုတ်ရ၊ ယြဴခမဳဂမၠိုၚ် ပၟိက်အောန်အိုတ်ရ ။ ပ ။ ခမဳဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ဟီုထိုၚ်သးဂုဏ်ပွမချိုတ် ကုဥပးအိုတ်ဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
170) ပ္ဍဲကြဴနူဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဆဗ္ဗဂ္ဂဳဂမၠိုၚ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ ယွံခမဳတအ် မၞးတအ်ညးဂမၠိုၚ် ဟီုထိုၚ်သးဂုဏ်ပွမချိုတ် ကုဥပအိုတ်ရဟီုဂှ် ဍာံပြဟာရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ “ယွံတြုံမလ္ၚုသၟး (နူမဂ်ဖိုလ်) တအ် (ပွကမၠောန်) ဝွံ ဟွံထေက် ကုခမဳဂမၠိုၚ်ရ၊ ဟွံဗဗွဲရ၊ ဟွံသပ္ပါယ်ရ၊ အာကာရအရာခမဳတအ် ဟွံသေၚ်ရ၊ ဟွံဂပ်ဝ်ရ၊ ဟွံထေက်ကဵုသ္ပရ။ “ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် ဟီုထိုၚ်သးဂုဏ်မချိုတ် ကုဥပးအိုတ်ရော? “ယွံတြုံမလ္ၚုသၟး (နူမဂ်ဖိုလ်) တအ် ပွ (မၞးတအ်ညးဂမၠိုၚ် သ္ပဒး) ဝွံ ကုညးမဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
171) ယြဴခမဳမွဲ ဖအောဝ်လလဴ (နစိုတ်စေတနာ မမိက်ဂစိုတ်) တုဲ ပတုံဖျေံ ဇကုညးမဒှ်ဇာတ်မၞိဟ် နူ ‘ဇဳဝိတိန္ဒြဳ’ လမျီုမ္ဂး၊ လွဟ်လနက်မပ္တံၜုန်မြ မလေပ်ရၚ်တၠုၚ် ‘ဇဳဝိတိန္ဒြဳ’ လမျီုညးဂှ်လေဝ် ဂၠာဲသ္ၚေဝ်တုဲ စွံပတန်လဝ် (ပ္ဍဲဇရေၚ်) မ္ဂး၊ ဂုဏ်ပွမချိုတ်လေဝ် ဟီုထိုၚ်သးမ္ဂး၊ တၞဟ်နပွမချိုတ်လေဝ် ကဵုဒဂိုန်ဂိုၚ်ကေတ်မ္ဂး၊ ‘ယွံတြုံ နပွမဂျိုၚ်လမျီုမယုတ်မာဝွံ မုဖဵုနွံကုတၠအဲဂှ်ရော? လတူပွမဂျိုၚ်လမျီု ပွမချိုတ်ဂှ် ပြဲကုတၠအဲဏီရ’ ရဴဝွံ မၞုံဂၠမ်စိုတ် (မမိက်ကဵုချိုတ်) ရဴဝွံဒှ်တုဲ မၞုံကသပ်စိုတ် (မမိက်ကဵုချိုတ်) ရဴဝွံဒှ်တုဲ နဟိုတ်မဂၠိုၚ် ဂုဏ်ပွမချိုတ်လေဝ် ဟီုထိုၚ်သးရ၊ တၞဟ်နပွမချိုတ်လေဝ် ကဵုဒဂိုန်ဂိုၚ်ကေတ်မ္ဂး၊ ခမဳဝွံလေဝ် အာစိုတ်ပွမကျနူသာသနာရ၊ ဟွံမွဲပွမပံၚ်ဖက်မွဲစွံ ကေုာံခမဳခိုဟ်ဆာဲဂမၠိုၚ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
