၉.၂။ အမ်သဝ် ပ္ဍဲမှာသၟိဒ်ဒ္စါံသာ်
၃၈၄။ ယွံခမဳတအ် သဘဴမဒှ်အမ်သဝ် ဟွံကေၚ်ဒှ်မွဲလှေ်ဂမၠိုၚ် ပ္ဍဲမှာသၟိဒ်ဇၞော်တအ်ဂှ် ဒ္စါံသာ်ဂမၠိုၚ်ဝွံရ၊ အသူဂမၠိုၚ် ညာတ်ကေတ် ညာတ်ကေတ် သဘဴမဒှ်အမ်သဝ် ဟွံကေၚ်ဒှ်မွဲလှေ်ဂမၠိုၚ်တုဲ မိပ်လဟိၚ်လောန် ပ္ဍဲမှာသၟိဒ်ဇၞော်အိုတ်ရ။ ညးမ္ဂး ဒ္စါံသာ်အိုတ်ဂှ်ရော? —
(၁) ယွံခမဳတအ် မှာသၟိဒ်ဇၞော်ဂှ် သဝ်စှေ် ဗွဲအတိုၚ်လၟေၚ်ရ၊ လၟောဝ်စှေ် ဗွဲအတိုၚ်လၟေၚ်ရ၊ လသောဝ်စှေ် ဗွဲအတိုၚ်လၟေၚ်ရ။ ယွံခမဳတအ် စတမ်ဟေၚ်ဟွံဇြိုဟ်တုဲ ပွမသဝ်စှေ် ဗွဲအတိုၚ်လၟေၚ် လၟောဝ်စှေ် ဗွဲအတိုၚ်လၟေၚ် တသောဝ်စှေ် ဗွဲအတိုၚ်လၟေၚ် မှာသၟိဒ်ဇၞော်ဂှ် ဒှ်သဘဴမဒှ်အမ်သဝ် ဟွံကေၚ်ဒှ်မွဲလှေ် ပ္ဍဲမှာသၟိဒ်ဇၞော် ပဌမရ၊ အသူဂမၠိုၚ် ညာတ်ကေတ် ညာတ်ကေတ် သဘဴဂှ်တုဲ မိပ်လဟိၚ်မံၚ် ပ္ဍဲမှာသၟိဒ်ဇၞော်အိုတ်ရ။
(၂) ယွံခမဳတအ် မွဲဂကူပၠန်တုန် မှာသၟိဒ်ဇၞော်ဂှ် မၞုံသဘဴမတန်တဴ ဟွံကလိလောန်အာ သြၚ်ဗၚ်ရ၊ ယွံခမဳတအ် မၞုံသဘဴမတန်တဴဒှ်တုဲ ပွမဟွံကလိလောန်သြၚ်ဗၚ် မှာသၟိဒ်ဝွံလေဝ် ဒှ်သဘဴမဒှ်အမ်သဝ် ဟွံကေၚ်ဒှ်မွဲလှေ် ပ္ဍဲမှာသၟိဒ်ဇၞော် ဒုတိယရ၊ အသူဂမၠိုၚ် ညာတ်ကေတ် ညာတ်ကေတ် သဘဴဂှ်တုဲ မိပ်လဟိၚ်မံၚ် ပ္ဍဲမှာသၟိဒ်ဇၞော်အိုတ်ရ။
(၃) ယွံခမဳတအ် မွဲဂကူပၠန်တုန် မှာသၟိဒ်ဇၞော်ဂှ် ဟွံဆက်ဆောမ် ကေုာံ ဇွသမ္အုဲရ၊ ဇွသမ္အုဲ နွံပ္ဍဲမှာသၟိဒ်ဇၞော်မ္ဂး ကဵုအာစိုပ်သြၚ်ဗၚ် ဗွဲမပြဟ်ရ၊ ကဵုတိုန်လတူသြၚ်ရ၊ ယွံခမဳတအ် ပွမဟွံဆက်ဆောမ်ကေုာံဇွသမ္အုဲ ဇွသမ္အုဲနွံ ပ္ဍဲမှာသၟိဒ်ဇၞော်မ္ဂး ပွမကဵုအာစိုပ်သြၚ်ဗၚ် ဗွဲမပြဟ် ပွမကဵုတိုန်လတူသြၚ် မှာသၟိဒ်ဝွံလေဝ် ဒှ်သဘဴမဒှ်အမ်သဝ် ဟွံကေၚ်ဒှ်မွဲလှေ် ပ္ဍဲမှာသၟိဒ်ဇၞော်တတိယရ၊ အသူဂမၠိုၚ် ညာတ်ကေတ် ညာတ်ကေတ် သဘဴဂှ်တုဲ မိပ်လဟိၚ်မံၚ် ပ္ဍဲမှာသၟိဒ်ဇၞော်အိုတ်ရ။
(၄) ယွံခမဳတအ် မွဲဂကူပၠန်တုန် ကြုၚ်ဇၞော်ဂမၠိုၚ်အိုတ်သီု မတွံဂးဂၚ်္ဂါ ယမုနာ အစိရဝတဳ သရဘူ မဟဳဂှ် စိုပ်အာမှာသၟိဒ်အိုတ်မ္ဂး သၠးထောံယၟုတၞောဝ်ဒတောဝ်ဂမၠိုၚ် မဒှ်ပ္ဍဲကိုပ်ကၠာတုဲ အာစိုပ်ပွမကော်ခဴ ရဴဝွံမ္ဂး ‘မှာသၟိဒ်ဇၞော်’ ဟေၚ်အိုတ်ရ။ ယွံခမဳတအ် ကြုၚ်ဇၞော်ဂမၠိုၚ်အိုတ်သီု မတွံဂးဂၚ်္ဂါ ယမုနာ အစိရဝတဳ သရဘူ မဟဳဂှ် စိုပ်အာမှာသၟိဒ်အိုတ်မ္ဂး သၠးထောံယၟုတၞောဝ်ဒတောဝ်ဂမၠိုၚ် မဒှ်ပ္ဍဲကိုပ်ကၠာတုဲ အာစိုပ်ပွမကော်ခဴ ရဴဝွံမ္ဂး ‘မှာသၟိဒ်ဇၞော်’ ဟေၚ်ဝွံလေဝ် ဒှ်သဘဴမဒှ် အမ်သဝ် ဟွံကေၚ်ဒှ်မွဲလှေ် ပ္ဍဲမှာသၟိဒ်ဇၞော် စတုတ္ထရ၊ အသူဂမၠိုၚ် ညာတ်ကေတ် ညာတ်ကေတ် သဘဴဂှ်တုဲ မိပ်လဟိၚ်မံၚ် ပ္ဍဲမှာသၟိဒ်ဇၞော်အိုတ်ရ။
(၅) ယွံခမဳတအ် မွဲဂကူပၠန်တုန် ပ္ဍဲလောကဝွံ ၜဳသၟတ် ကြုၚ်သၟတ်ဂမၠိုၚ်အိုတ်သီုလေဝ် လုပ်အာမှာသၟိဒ်အိုတ်ရ၊ ဇၟောဝ်ဍာ်ဗြဲဂမၠိုၚ် နူအာကးအိုတ်သီုလေဝ် စှေ်ကၠုၚ်အိုတ်ရ၊ ဟိုတ်နူဍာ်ဂှ် ပွမယအ် ပွမပေၚ်တၟိုဟ် မှာသၟိဒ်ဇၞော် ဟွံပြာကဋ်ရ။ ယွံခမဳတအ် ပ္ဍဲလောကဝွံ ၜဳသၟတ် ကြုၚ်သၟတ်ဂမၠိုၚ်အိုတ်သီုလေဝ် ပွမလုပ်အာမှာသၟိဒ် ဇၟောဝ်ဍာ်ဗြဲဂမၠိုၚ် နူအာကးအိုတ်သီုလေဝ် ပွမစှေ်ကၠုၚ်၊ ဟိုတ်နူဍာ်ဂှ် ပွမယအ် ပွမပေၚ်တၟိုဟ် မှာသၟိဒ်ဇၞော် ဟွံပြာကဋ်လေဝ် ဒှ်သဘဴ မဒှ်အမ်သဝ် ဟွံကေၚ်ဒှ်မွဲလှေ် ပ္ဍဲမှာသၟိဒ်ဇၞော် ပဉ္စမရ၊ အသူဂမၠိုၚ် ညာတ်ကေတ် ညာတ်ကေတ် သဘဴဂှ်တုဲ မိပ်လဟိၚ်မံၚ် ပ္ဍဲမှာသၟိဒ်ဇၞော်အိုတ်ရ။
(၆) ယွံခမဳတအ် မွဲဂကူပၠန်တုန် မှာသၟိဒ်ဇၞော်ဂှ် မၞုံကဵုရှ်သာပ္ဍုၚ်မွဲဂကူဓဝ်ဟေၚ်ရ။ ယွံခမဳတအ် ပွမမၞုံကဵုရှ်သာပ္ဍုၚ်မွဲဂကူဓဝ် မှာသၟိဒ်ဇၞော်ဝွံလေဝ် ဒှ်သဘဴမဒှ်အမ်သဝ် ဟွံကေၚ်ဒှ်မွဲလှေ် ပ္ဍဲမှာသၟိဒ်ဇၞော် ဆဋ္ဌရ၊ အသူဂမၠိုၚ် ညာတ်ကေတ် ညာတ်ကေတ် သဘဴဂှ်တုဲ မိပ်လဟိၚ်မံၚ် ပ္ဍဲမှာသၟိဒ်ဇၞော်အိုတ်ရ။
(၇) ယွံခမဳတအ် မွဲဂကူပၠန်တုန် မှာသၟိဒ်ဇၞော်ဂှ် မၞုံကဵုရတ်မဂၠိုၚ် ရတ်ရိုဟ်လၟိဟ်ဂၞန်ဟွံမာန် မတွံဂးဗၠဲ မၞိက် မၞိက်မတ်ဗ္ဂဲ ကၞုသၚ် တၟံမတ် မတ်တၟံသိလ္လာ သြန် ထဝ် မၞိက်ဗကေတ် မၞိက်ဒဝါန်ရ။ ယွံခမဳတအ် ပွမမၞုံကဵုရတ်မဂၠိုၚ် ရတ်ရိုဟ်လၟိဟ်ဂၞန်ဟွံမာန် မတွံဂးဗၠဲ မၞိက် မၞိက်သာ်စၞာံဒုန် ကၞုသၚ် တၟံမတ် မတ်တၟံသိလ္လာ သြန် ထဝ် မၞိက်ဗကေတ် မၞိက်ဒဝါန် မှာသၟိဒ်ဇၞော်ဝွံလေဝ် ဒှ်သဘဴမဒှ်အမ်သဝ် ဟွံကေၚ်ဒှ်မွဲလှေ် ပ္ဍဲမှာသၟိဒ်ဇၞော် သတ္တမရ၊ အသူဂမၠိုၚ် ညာတ်ကေတ် ညာတ်ကေတ် သဘဴဂှ်တုဲ မိပ်လဟိၚ်မံၚ် ပ္ဍဲမှာသၟိဒ်ဇၞော်အိုတ်ရ။
(၈) ယွံခမဳတအ် မွဲဂကူပၠန်တုန် မှာသၟိဒ်ဇၞော်ဂှ် ဒှ်ဒၞာဲဒၟံၚ်သတ်ဇၞော်ဂမၠိုၚ် မတွံဂးကတိမိ ကတိမိၚ်္ဂလ ကတိမိတိမိၚ်္ဂလ အသူ နာဂ် ဂန္ဓဝ်တအ်ကီု၊ သတ်ဂမၠိုၚ် မၞုံကဵုအတ္တဘဴမဇၞော် စဵုကဵုကၠံယောဇနာ၊ ၜါကၠံယောဇနာ၊ ပိကၠံယောဇနာ၊ ပန်ကၠံယောဇနာ၊ မသုန်ကၠံယောဇနာ တအ်ရ။ ယွံခမဳတအ် ပွမဒှ်ဒၞာဲဒၟံၚ် သတ်ဇၞော်ဂမၠိုၚ်မတွံဂး ကတိမိ ကတိမိၚ်္ဂလ ကတိမိတိမိၚ်္ဂလ အသူ နာဂ် ဂန္ဓဝ်တအ်ကီု၊ သတ်ဂမၠိုၚ် မၞုံကဵုအတ္တဘဴမဇၞော် စဵုကဵုကၠံယောဇနာ ။ ပ ။ မသုန်ကၠံယောဇနာတအ် မှာသၟိဒ်ဇၞော်ဝွံလေဝ် ဒှ်သဘဴမဒှ်အမ်သဝ် ဟွံကေၚ် ဒှ်မွဲလှေ် ပ္ဍဲမှာသၟိဒ်ဇၞော် အဋ္ဌမရ၊ အသူဂမၠိုၚ် ညာတ်ကေတ် ညာတ်ကေတ် သဘဴဂှ်တုဲ မိပ်လဟိၚ်မံၚ် ပ္ဍဲမှာသၟိဒ်ဇၞော်အိုတ်ရ။
ယွံခမဳတအ် သဘဴမဒှ်အမ်သဝ် ဟွံကေၚ်ဒှ်မွဲလှေ်ဂမၠိုၚ် ပ္ဍဲမှာသၟိဒ်ဇၞော်တအ်ဂှ် ဒ္စါံသာ်ဂမၠိုၚ်ဝွံရ၊ အသူဂမၠိုၚ် ညာတ်ကေတ် ညာတ်ကေတ် သဘဴမဒှ်အမ်သဝ် ဟွံကေၚ်ဒှ်မွဲလှေ်ဂမၠိုၚ်ဂှ်တုဲ မိပ်လဟိၚ်လောန် ပ္ဍဲမှာသၟိဒ်ဇၞော်အိုတ်ရ။
