၉.၁။ အာတ်အခေါၚ် သွက်ဂွံစၞောန်ထ္ၜးပါတိမုက်
၃၈၃။ ပ္ဍဲအခိၚ်တဳလပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲပြာသာဒ် ဝိသာခါ မစိုန်ဒှ်ညံၚ်ရဴမိ မိဂါရသေဌဳ အပ္ဍဲဘာပုဗ္ဗရာမ် ဇရေၚ်ဍုၚ်သာရဝှ်ဂှ် ပ္ဍဲတ္ၚဲဥပေါသ် သီုကဵုခမဳသၚ်မတွဳဗွိုၚ်လဝ် ဂဇအ်ဒၟံၚ်ရ။ ပ္ဍဲအခိၚ်ဂှ် တဳလပိုဉ်အာနန္ဒ ဗတမ်ဂၠုဒှ်တုဲ ပယာံပထမ ကလိလောန်အာမ္ဂး ကတဵုနူဒၞာဲတုဲ လ္ၜက်ကၠေဟ်ပတိုန်သ္ၚာ ပ္ဍဲလတူပၞးပါဲတုဲ ပၚ်ဏာတဲလပါ်ကျာ်တြဲနွံတုဲ—
“ယွံတဳလမၞုံပိုဉ် ဗတမ်ဂၠုရကျာ်၊ ပယာံပထမ ကလိလောန်အာတုဲရကျာ်၊ ခမဳသၚ် ဒးဂဇအ်ဒၟံၚ် ဗွဲမလအ်ရကျာ်၊ ယွံတဳလမၞုံပိုဉ် တဳလမၞုံပိုဉ်ကျာ်တြဲ ထ္ၜးပါတိမုက် ကဵုခမဳဂမၠိုၚ်ညိကျာ်” ရဴဝွံ ဂရၚ်ပတီရ။
ဂရၚ်ပတီ ရဴသာ်ဝွံမ္ဂး ကျာ်တြဲ ပဒတဴဒၟံၚ်သ္ၚိတ်သ္ၚိတ်ရ။ မရနုက်ကဵုၜါဝါလေဝ် တဳလပိုဉ်အာနန္ဒ ဗတမ်ဂၠုဒှ်တုဲ ပယာံမဇ္ၛိမ ကလိလောန်အာမ္ဂး ကတဵုနူဒၞာဲတုဲ လ္ၜဟ်ကၠေဟ်ပတိုန်သ္ၚာ ပ္ဍဲလတူပၞးပါဲတုဲ ပၚ်ဏာတဲလပါ်ကျာ်တြဲနွံတုဲ—
“ယွံတဳလမၞုံပိုဉ် ဗတမ်ဂၠုရကျာ်၊ ပယာံမဇ္ၛိမ ကလိလောန်အာတုဲရကျာ်၊ ခမဳသၚ် ဒးဂဇအ်ဒၟံၚ် ဗွဲမလအ်ရကျာ်၊ ယွံတဳလမၞုံပိုဉ် တဳလမၞုံပိုဉ်ကျာ်တြဲ ထ္ၜးပါတိမုက်ကဵုခမဳဂမၠိုၚ်ညိကျာ်” ရဴဝွံ ဂရၚ်ပတီရ။
မရနုက်ကဵုၜါဝါလေဝ် ကျာ်တြဲ ပဒတဴဒၟံၚ်သ္ၚိတ်သ္ၚိတ်ရ။ မရနုက်ကဵုပိဝါလေဝ် တဳလပိုဉ်အာနန္ဒ ဗတမ်ဂၠုဒှ်တုဲ ပယာံပစ္ဆိမ ကလိလောန်အာမ္ဂး အရှိုဏ်တိုန်ဒှ်တုဲ ဗတမ်ဂှ် မၞုံကဵုမုက္ခဝါ မသ္ဍိုက်မၠိုက်မ္ဂး ကတဵုနူဒၞာဲတုဲ လ္ၜဟ်ကၠေဟ်ပတိုန်သ္ၚာ ပ္ဍဲလတူပၞးပါဲတုဲ ပၚ်ဏာတဲလပါ်ကျာ်တြဲနွံတုဲ “ယွံတဳလမၞုံပိုဉ် ဗတမ်ဂၠုရကျာ်၊ ပယာံပစ္ဆိမ ကလိလောန်အာတုဲရကျာ်၊ အရှိုဏ်တိုန်တုဲရကျာ်၊ ဗတမ်ဂှ် မၞုံကဵုမုက္ခဝါ မသ္ဍိုက်မၠိုက်ရကျာ်၊ ခမဳသၚ် ဒးဂဇအ်ဒၟံၚ် ဗွဲမလအ်ရကျာ်၊ ယွံတဳလမၞုံပိုဉ် တဳလမၞုံပိုဉ်ကျာ်တြဲ ထ္ၜးပါတိမုက်ကဵုခမဳဂမၠိုၚ်ညိကျာ်” ရဴဝွံ ဂရၚ်ပတီရ။ ယွံအာနန္ဒ ပရိသာတ် ဟွံသအးဇ္ၚးရ ရဴဝွံ (သ္ဂးရ)။
ပ္ဍဲအခိၚ်ဂှ် “ကျာ်တြဲ ရန်တၟအ်ကဵုညးလဵုတုဲ ‘ယွံအာနန္ဒ ပရိသာတ် ဟွံသအးဇ္ၚးရ’ ရဴဝွံ ဂွံသ္ဂးဂှ်ရော?။ ရဴဝွံ ကသပ်ကတဵုဒှ် ကုတဳလပိုဉ်မောဂ္ဂလာန်ရ။ ကြဴနူဂှ် တဳလပိုဉ်မဟာမောဂ္ဂလာန် ပိုၚ်ခြာကေတ် စိုတ်ခမဳသၚ်အိုတ်သီု နကဵုစိုတ်ဇကုတုဲ သပၠုပ်စိုတ်ရ။ တဳလပိုဉ်မဟာမောဂ္ဂလာန် ညာတ်ကေတ်ပူဂိုလ် ‘ဒုဿဳလ’ ဟွံမွဲကဵုသဳလ မဂဇအ်ဒၟံၚ် လဒေါဝ်ခမဳသၚ် မၞုံကဵုဒ္ဂေတ်မယုတ်သဝ် ဟွံသအးဇ္ၚးတုဲ မၞုံကဵုဒ္ဂေတ်မထေက်ကဵုသၠေဟ်ပၟာ မဂြောပ်ဗ္ဒန်တဴကမၠောန် သီုဟွံသေၚ်ကဵုခမဳ ရဴဝွံမ္ဂးခမဳ သီုဟွံဒ္ဂေတ်တဴ ဒ္ဂေတ်မပြဲ ဒုၚ်ဝန် ရဴဝွံမ္ဂး ဒ္ဂေတ်မပြဲ မအုဲဒၟံၚ်ပ္ဍဲအပ္ဍဲ မဍုက်ဒၟံၚ်ဍာ်ဗြဲကိလေသ ဍေံမဒှ်ညံၚ်ခၟိက်ဟန်ဗန်တုဲ ကတဵုနူဒၞာဲတုဲမ္ဂး ပြာပ်အာဇရေၚ်ပူဂိုလ်ဂှ်တုဲ “ယွံကောန်တၠ ဩဝ်ကတဵုညိ၊ ကျာ်တြဲ ညာတ်မံၚ်တၠအဲရ၊ တၠအဲဂှ် ဟွံမွဲကဵုပံၚ်ဖက်မွဲစွံ ကေုာံခမဳဂမၠိုၚ်ရ” ရဴဝွံ ၜိုန်သ္ဂးသာ်ဂှ်ကီုလေဝ် ပူဂိုလ်ဂှ် ကၞပ်သ္ၚောံဒၟံၚ်ရ။
မရနုက်ကဵုၜါဝါကီုလေဝ် တဳလပိုဉ်မဟာမောဂ္ဂလာန်ဂှ် “ယွံကောန်တၠ ဩဝ်ကတဵုညိ၊ ကျာ်တြဲ ညာတ်မံၚ်တၠအဲရ၊ တၠအဲဂှ် ဟွံမွဲကဵုပံၚ်ဖက်မွဲစွံ ကေုာံခမဳဂမၠိုၚ်ရ” ရဴဝွံ ၜိုန်ဟီုသ္ဂးလေဝ် ပူဂိုလ်ဂှ် ကၞပ်သ္ၚောံဒၟံၚ်ရ။
မရနုက်ကဵုပိဝါကီုလေဝ် တဳလပိုဉ်မဟာမောဂ္ဂလာန်ဂှ် “ယွံကောန်တၠ ဩဝ်ကတဵုညိ၊ ကျာ်တြဲ ညာတ်မံၚ်တၠအဲရ၊ တၠအဲဂှ် ဟွံမွဲကဵုပံၚ်ဖက်မွဲစွံ ကေုာံခမဳဂမၠိုၚ်ရ” ရဴဝွံ ၜိုန်ဟီုသ္ဂးလေဝ် ပူဂိုလ်ဂှ် ကၞပ်သ္ၚောံဒၟံၚ်ရ။
ပ္ဍဲအခိၚ်ဂှ် တဳလပိုဉ်မဟာမောဂ္ဂလာန် ဂန်ရပ်ကေတ် ပ္ဍဲသပါတဲပူဂိုလ်ဂှ်တုဲ ပတိတ်ဏာမ္ၚးမုက်ပါၚ်တြၚ်တုဲ ထပက်စုတ်ထောံ သၞောဝ်တြၚ်တုဲ ပြာပ်အာဇရေၚ်ကျာ်တြဲတုဲမ္ဂး “ယွံတဳလပိုဉ် အဲဍိက် ဂပ်ဝ်ကဵုပူဂိုလ်ဂှ် တိတ်အာတုဲရကျာ်၊ ပရိသာတ် သအးဇ္ၚးရကျာ်၊ ယွံတဳလပိုဉ်ကျာ်တြဲ ထ္ၜးပါတိမုက် ကုခမဳဂမၠိုၚ်ညိကျာ်” ရဴဝွံ ဂရၚ်ပတီ ကုတဳလမၞုံပိုဉ်ကျာ်တြဲရ။ ယွံမောဂ္ဂလာန် ဒှ်အမ်သဝ်ကွေံရ၊ ယွံမောဂ္ဂလာန် ဟွံကေၚ်ဒှ်မွဲလှေ် ဒှ်ကွေံရ၊ တြုံမလ္ၚုအာနူမဂ်ဖိုလ်ဂှ် မၚ်ဒၟံၚ်စဵုကဵု မဒးဂန်ရပ်ကေတ် သပါတဲကီုရသွံ ရဴဝွံ (သ္ဂးရ)။
