၈.၉ ။ ဝတ်ဒးဒ္ဂေတ် ပ္ဍဲသ္ၚိဇရုၚ်ပလက်
၃၇၁။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ၜိုန်ခမဳထေရ်ဇၞော်ဂမၠိုၚ် ဂပ်ဝ်ဆေဝ်ဒဝ်အိုတ်လေဝ် သ္ပဟိုတ်ကဵု ဟွံရှေ်သှေ်ရဴဂဴတုဲ ပ္ဍဲသ္ၚိဇရုၚ်ပလက် ပတိုန်(စုတ်) အှော်ဗွဲမဂၠိုၚ်တုဲ စံၚ်ဗဂဵုပၟတ် ကၟာတ်ဒဝ်ထောံတြၚ်တုဲမ္ဂး ဂဇအ်ဒၟံၚ်ပ္ဍဲဇရေၚ်တြၚ်အိုတ်ရ။ ခမဳဂမၠိုၚ် ဟွံကလိဂွံပၞော်တြၚ်ဒှ်တုဲ ဟိုတ်မဂမ္တဴဂှ်ရ ဗ္ၜူတုဲ လောတ်အိုတ်ရ။ ခမဳ ပၟိက်အောန်ဂမၠိုၚ်ဂှ်—
“မုဟိုတ် ခမဳဆဗ္ဗဂ္ဂဳဂမၠိုၚ် ၜိုန်ခမဳထေရ်ဇၞော်ဂမၠိုၚ် ဂပ်ဝ်ဆေဝ်ဒဝ်အိုတ်လေဝ် သ္ပဟိုတ်ကဵု ဟွံရှေ်သှေ်ရဴဂဴတုဲ ပ္ဍဲသ္ၚိဇရုၚ်ပလက် ပတိုန် (စုတ်) အှော်ဗွဲမဂၠိုၚ်တုဲ စံၚ်ဗဂဵုပၟတ် ကၟာတ်ဒဝ်ထောံတြၚ်တုဲမ္ဂး ဂဇအ်ဒၟံၚ်ပ္ဍဲဇရေၚ်တြၚ်အိုတ်ရော?။ ခမဳဂမၠိုၚ် ဟွံကလိဂွံပၞော်တြၚ်ဒှ်တုဲ ဟိုတ်မဂမ္တဴဂှ်ရ ဗ္ၜူတုဲ လောတ်အိုတ်ရ ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ ။
“ယွံခမဳတအ် ခမဳဆဗ္ဗဂ္ဂဳဂမၠိုၚ် ၜိုန်ခမဳထေရ်ဇၞော်ဂမၠိုၚ် ဂပ်ဝ်ဆေဝ်ဒဝ်အိုတ်လေဝ် သ္ပဟိုတ်ကဵု ဟွံရှေ်သှေ်ရဴဂဴတုဲ ပ္ဍဲသ္ၚိဇရုၚ်ပလက် ပတိုန် (စုတ်) အှော်ဗွဲမဂၠိုၚ်တုဲ စံၚ်ဗဂဵုပၟတ် ကၟာတ်ဒဝ်ထောံတြၚ်တုဲမ္ဂး ဂဇအ်ဒၟံၚ်ပ္ဍဲဇရေၚ်တြၚ်အိုတ်ရ။ ခမဳဂမၠိုၚ် ဟွံကလိဂွံပၞော်တြၚ်ဒှ်တုဲ ဟိုတ်မဂမ္တဴဂှ်ရ ဗ္ၜူတုဲ လောတ်အိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး—
ယွံခမဳတအ် ခမဳထေရ်ဇၞော် သီုမဂပ်ဝ်ဆေဝ်ဒဝ်ဂှ် သ္ပဟိုတ်ကဵုဟွံရှေ်သှေ်ရဴဂဴတုဲ ပ္ဍဲသ္ၚိဇရုၚ်ပလက် ပတိုန် (စုတ်) အှော်ဗွဲမဂၠိုၚ်တုဲ ဟဂပ်ဝ်စံၚ်ဗဂဵုပၟတ်ရ။ ကုခမဳ မစံၚ်ဗဂဵုဂှ် ဒးအာပတ် ဒုက္ကဋ်ရ။
ယွံခမဳတအ် ကၟာတ်ဒဝ်ထောံတြၚ်တုဲ ဟဂပ်ဝ်ဂဇအ် ပ္ဍဲဇရေၚ်တြၚ်ရ၊ ကုခမဳ မဂဇအ်ဂှ် ဒးအာပတ်ဒုက္ကဋ်ရ ရဴဝွံ သ္ဂးကဵုခမဳဂမၠိုၚ်ရ။
၃၇၂။ ယွံခမဳတအ် ဒှ်သာ်ဂှ်မ္ဂး ကြက်ပညပ်တဴ ဒ္ဂေတ်ဝတ် ပ္ဍဲသ္ၚိဇရုၚ်ပလက် ကုခမဳဂမၠိုၚ်၊ အတိုၚ်ဒ္ဂေတ်ဝတ်ဂှ် ခမဳဂမၠိုၚ် ဒးဒ္ဂေတ် ပ္ဍဲသ္ၚိဇရုပ်ပလက်ရ။
ခမဳ မအာသ္ၚိဇရုၚ်ပလက် ဗွဲကိုပ်ကၠာဂှ် ပတေၚ်ဂၠိုၚ်မ္ဂး ဒးအုဲထောံထောံပတေၚ်ရ၊ သ္ၚိဇရုၚ်ပလက် သၟိက်ဟန်ဗန်နွံဒှ်မ္ဂး သ္ဒးကွဟ်ကၟဟ် သ္ၚိဇရုၚ်ပလက်ရ၊ ခုၚ်တိဗွဝ် သၟိက်ဟန်ဗန်နွံဒှ်မ္ဂး သ္ဒးကွဟ်ကၟဟ် ခုၚ်တိဗွဝ်ရ၊ ပြဝိုဏ် သၟိက်ဟန်ဗန်နွံဒှ်မ္ဂး သ္ဒးကွဟ်ကၟဟ် ပြဝိုဏ်ရ၊ မုက်ထော်တြၚ် သၟိက်ဟန်ဗန်နွံဒှ်မ္ဂး သ္ဒးကွဟ်ကၟဟ် မုက်ထော်တြၚ်ရ၊ ဇြပ်သ္ၚိဇရုၚ်ပလက် သၟိက်ဟန်ဗန်နွံဒှ်မ္ဂး သ္ဒးကွဟ်ကၟဟ် ဇြပ်သ္ၚိဇရုၚ်ပလက်ရ။
သ္ဒးထ္ၜိုန်ကလောံ ခၞိက်ကြကောတ် နကဵုဍာ်ရ၊ သ္ဒးဖ္ဍုက်တိကမၠေတ် နကဵုဍာ်ရ၊ သ္ဒးချာဲဗပေၚ်ဍာ် ပ္ဍဲဒၞိဟ်ဇရဟုမ်ဍာ်ရ၊ ခမဳမလုပ်သ္ၚိဇရုၚ်ပလက်ဂှ် လံက်လေတ်မုက် နကဵုတိကမၠေတ် မဖ္ဍုက်လတ်ဍာ်တုဲ ဂြောပ်ဓလီုလဝ် (နကဵုသၞုက်ဍာ်) နူဂတကီု နူလက်ကရဴကီုတုဲ သ္ဒးလုပ်သ္ၚိဇရုၚ်ပလက်ရ၊ ဃရိတ်ခဇ် ခမဳဇၞော်ဂမၠိုၚ်တုဲ ဟဂပ်ဝ်ဂဇအ်ရ၊ ဟဂပ်ဝ်ဆေဝ်ဒဝ်ခမဳသၟတ်ဂမၠိုၚ် နကဵုသၞာအိုတ်ရ၊ သၟဟ်ရထမ္ဂး ပ္ဍဲသ္ၚိဇရုၚ်ပလက် သ္ဒးပေါတ်မိဟ် ကုခမဳထေရ်ဇၞော်ဂမၠိုၚ်ရ၊ ခမဳမတိတ်ကၠုၚ် နူသ္ၚိဇရုပ်ပလက်ဂှ် ဂိုၚ်ကေတ်ဂတဵုသ္ၚိဇရုၚ်ပလက်တုဲ ဂြောပ်ဓလီုလဝ် (နကဵုသၞုက်ဍာ်) နူဂတကီု နူလက်ကရဴကီုတုဲ သ္ဒးတိတ် နူသ္ၚိဇရုၚ်ပလက်ရ။ သၟဟ်ရထမ္ဂး ပ္ဍဲဍာ်လေဝ် သ္ဒးပေါတ်မိဟ် ကုခမဳထေရ်ဇၞော်ဂမၠိုၚ်ရ၊ ဟဂပ်ဝ်ဟုမ်ဍာ် ပ္ဍဲဂတခမဳထေရ်ဇၞော်ဂမၠိုၚ်ရ၊ ဟဂပ်ဝ်ဟုမ်ဍာ် ပ္ဍဲလတူရ၊ ဟုမ်ဍာ်တုဲ ခမဳမတိုန်ကၠုၚ်ဂှ် သ္ဒးကဵုဂၠံၚ် ကုခမဳမစှေ်ဍာ်ဂမၠိုၚ်၊ ခမဳမတိတ်ကၠုၚ် နူသ္ၚိဇရုၚ်ပလက် လက်ကရဴအိုတ်ဂှ် ပ္ဍဲသ္ၚိဇရုၚ်ပလက် ဒှ်လၟက်သရီုမ္ဂး သ္ဒးကြာတ်ကြဴရ၊ ကြာတ်ကြဴဒၞိဟ်တိကမၠေတ်တုဲ သီဂိုၚ်ဒေပ် ဂတဵုသ္ၚိဇရုၚ်ပလက်တုဲ ပလိုတ်ပၟတ်တုဲ ကၟတ်ဒဝ်တြၚ်တုဲ သ္ဒးစ္ဍးအာရ။ ယွံခမဳတအ် ဣဝွံတုန် ဒ္ဂေတ်ဝတ်ခမဳဂမၠိုၚ် ပ္ဍဲသ္ၚိဇရုၚ်ပလက်ရ၊ အတိုၚ်ဒ္ဂေတ်ဝတ်ဂှ် ခမဳဂမၠိုၚ် ဒးဒ္ဂေတ်ပ္ဍဲသ္ၚိဇရုၚ်ပလက်ရ။
