၈.၈ ။ ဒ္ဂေတ်ဝတ် ပ္ဍဲဘာသၞာသတိက်သၞာဒၟံၚ်
၃၆၉။ ပ္ဍဲအခိၚ်ဂှ် ခမဳဂမၠိုၚ်ဗွဲမဂၠိုၚ် ဇိၚ်သ္ၚာ ပ္ဍဲအမှဲအကးအိုတ်ရ၊ ခမဳဆဗ္ဗဂ္ဂဳဂမၠိုၚ် ဂရိုက်သၞာသတိက်သၞာဒၟံၚ် ပ္ဍဲဌာန်ဒစးကျာအိုတ်ရ၊ ခမဳဂမၠိုၚ် တ္ၜန်တ္ၜောဲနှဴရဴ နမၠိုက်အိုတ်ရ။ ခမဳပၟိက်အောန်ဂမၠိုၚ်ဂှ် “ မုဟိုတ် ခမဳဆဗ္ဗဂ္ဂဳဂမၠိုၚ် ဂရိုက်သၞာသတိက်သၞာဒၟံၚ် ပ္ဍဲဌာန်ဒစးကျာအိုတ်ရော?၊ ခမဳဂမၠိုၚ် တ္ၜန်တ္ၜောဲနှဴရဴ နမၠိုက်အိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ ။ ယွံခမဳတအ် ခမဳဆဗ္ဗဂ္ဂဳဂမၠိုၚ် ဂရိုက်သၞာသတိက်သၞာဒၟံၚ် ပ္ဍဲဌာန်ဒစးကျာအိုတ်ရ၊ ခမဳဂမၠိုၚ် တ္ၜန်တ္ၜောဲနှဴရဴ နမၠိုက်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ ပ ။ ဟီုဂရိုဟ်တုဲ။ ပ ။ တွံကဵုဂလာန်ဓရ်တုဲမ္ဂး သ္ဂးကဵုခမဳဂမၠိုၚ်ရ။
၃၇၀။ ယွံခမဳတအ် ဒှ်သာ်ဂှ်မ္ဂး ကြက်ပညပ်တဴ ဒ္ဂေတ်ဝတ် ပ္ဍဲဘာသၞာသတိက်သၞာဒၟံၚ် ကုခမဳဂမၠိုၚ်ရ၊ အတိုၚ်ဒ္ဂေတ်ဝတ်ဂှ် ခမဳဂမၠိုၚ် ဒးဒ္ဂေတ် ပ္ဍဲဘာသၞာသတိက်သၞာဒၟံၚ်ရ။ ဘာယဝ်သၟိက်ဟန်ဗန်နွံမ္ဂး သၟဟ်ရထမ္ဂး သၟဟ်အစောံမ္ဂး ဒးကွဟ်ၚးတးရ။
ခမဳမသောၚ်ဖ္ဍောၚ်ၚးတးဘာဂှ် ဗွဲကိုပ်ကၠာ ရၚ်တၠုၚ်ပတိတ် ဗဗေၚ်သ္ၚာတုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် သၞာနိသဳဒိုန်သၞာလးတိက်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်ရၚ်တၠုၚ်ပတိတ် ဖုန်ဂၞဳတုဲ သ္ဒးစွံလဝ် ပ္ဍဲဒၞာဲမဗဗွဲရ၊ ဇံၚ်ခါတ်ဂှ် သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠတြၚ် ဇဵုတြၚ်ဂှ် ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ဂတဵုဂှ် သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠတြၚ် ဇဵုတြၚ်ဂှ် ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် ဇိုၚ်ဇံၚ်ဂမၠိုၚ်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် ထၟာဲဂစှ် (ထၟာဲတဲ) တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် ဂတဵုဒလာဲတုဲ သ္ဒးစွံလဝ် ပ္ဍဲဒၞာဲမဗဗွဲရ၊ သၞာလးတိဂှ် သမ္တီလဝ် ဒၞာဲလးလၟိုန်တုဲ ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ပ္ဍဲဘာ ယဝ်သ္ၚိစၟဇာဖိုၚ်နွံမ္ဂး သ္ဒးပါဲကၠေံ နူသၠဖ္ဍာန် ဗွဲကိုပ်ကၠာရ၊ သ္ဒးဇိုတ်ပေါတ်ဗတၚ်ကျာ ကေုာံ သကဲခဒမ်ဂမၠိုၚ်ရ။
ဗ္ဒၚ်မသ္ပကလိတ်ကလောတ် နကဵုခၞိက်တိကမၠေတ်ဗကေတ် (နကဵုဆီတၟံ)ဂှ် ပတိုဟ်တိုန်မ္ဂး ဖ္ဍုက်ဍာ်ယာတ်တမြံၚ်တုဲ ဝတ်ကၠေံတုဲမ္ဂး သ္ဒးဇိုတ်ပေါတ်ရ၊ တိမသ္ပလဝ်ကလိတ်ကလောတ် နကဵုသာ်လမ္စံက်ဂှ် ပတိုဟ်တိုန်မ္ဂး ဖ္ဍုက်ယာတ်တမြံၚ်တုဲ ဝတ်ကၠေံတုဲမ္ဂး သ္ဒးပေါတ်ဇိုတ်ရ၊ ဒှ်တိမဟဂွံသ္ပကလိတ်ကလောတ်မ္ဂး လၟုဟ်ဖရုဲဍာ်တုဲ “လ္ပကဵုမၠိုက်တိုန်ဘာညိ” ရဴဝွံ (စွံစိုတ်တုဲ) သ္ဒးကွဟ်ကၟဟ်ရ၊ ပကောံဖအုံလဝ် အိက်ကၟဟ်တုဲ သ္ဒးထောံထောံ ပ္ဍဲဌာန်မဗဗွဲရ။
ဟဂပ်ဝ်ဂရိုက် သၞာသတိက်သၞာဒၟံၚ် ပ္ဍဲဇရေၚ်ခမဳရ၊ ဟဂပ်ဝ်ဂရိုက် သၞာသတိက်သၞာဒၟံၚ် ပ္ဍဲဇရေၚ်ဘာရ၊ ဟဂပ်ဝ်ဂရိုက် သၞာသတိက်သၞာဒၟံၚ် ပ္ဍဲဇရေၚ်ဍာ်သုၚ်ရ၊ ဟဂပ်ဝ်ဂရိုက် သၞာသတိက်သၞာဒၟံၚ် ပ္ဍဲဇရေၚ်ဍာ်ရပ်စပ်ရ၊ ဟဂပ်ဝ်ဂရိုက် သၞာသတိက်သၞာဒၟံၚ် ပ္ဍဲဌာန်ဒစးကျာရ၊ ဒးဂရိုက် သၞာသတိက်သၞာဒၟံၚ် ပ္ဍဲသၟဝ်ဗလဲကျာရ။
စဲတ္ၚဲသအးဇ္ၚး သၞာလးတိတုဲမ္ဂး ဂရိုတ်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲဇိုတ်ပေါတ် ဇိုၚ်ဇံၚ်ဂမၠိုၚ်တုဲမ္ဂး သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဇံၚ်ခါတ်တုဲမ္ဂး ဂရိုက်ထောံတုဲ သ္ပဗွဲမမသဝ်ဒးရး သီုဟွံထ္ဍိမြိလုက်စုက်ဒး သၠတြၚ် ဇဵုတြၚ်ဂှ် သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဂတဵုတုဲမ္ဂး ဂရိုက်ထောံတုဲ သ္ပဗွဲမမသဝ်ဒးရး သီုဟွံထ္ဍိမြိလုက်စုက်ဒး သၠတြၚ် ဇဵုတြၚ်ဂှ် သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဖုန်ဂၞဳတုဲမ္ဂး ဂရိုတ်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး သၞာနိသဳဒိုန် သၞာလးတိက်တုဲမ္ဂး ဂရိုတ်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲဇိုတ်ပေါတ် ထၟာဲဂစှ်တုဲမ္ဂး သ္ဒးကလေၚ်စွံ ပ္ဍဲဒၞာဲအတိုၚ်စွံလဝ်လၟိုန်ရ၊ စဲတ္ၚဲဇိုတ်ပေါတ်ဂတဵုဒလာဲတုဲမ္ဂး သ္ဒးကလေၚ်စွံ ပ္ဍဲဒၞာဲအတိုၚ်စွံလဝ်လၟိုန်ရ။
သ္ဒးစွံဗဗေၚ်သ္ၚာရ။ ခမဳ မိက်ဂွံစွံဗဗေၚ်ဂှ် နကဵုတဲမွဲလပါ်ဂှ် ရပ်ကေတ်ဗဗေၚ်တုဲ နကဵုတဲမွဲလပါ်ဂှ် ဇွိတ်စမ်ရံၚ် သၟဝ်ဇံၚ်ခါတ်ကီု သၟဝ်ဂတဵုကီုတုဲ သ္ဒးစွံရ၊ ဟဂွံစွံဗဗေၚ် ပ္ဍဲတိမဟွံမွဲကဵုသၞာရ။ ခမဳ မိက်ဂွံစွံသ္ၚာဂှ် နကဵုတဲမွဲလပါ်ဂှ် ရပ်ကေတ်သ္ၚာတုဲ နကဵုတဲမွဲလပါ်ဂှ် ဇွိတ်ပေါတ်ထောံဒုန်တေၚ်သ္ၚာ ဇုက်ဗလဲသ္ၚာတုဲ သ္ပလအိတ်မုဟ်ပ္ဍဲလပါ်တေံ သ္ပကဝးပ္ဍဲလပါ်ဏအ်တုဲ သ္ဒးစွံသ္ၚာရ။
နူဒိုဟ်ဗၟံက် ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗတၚ်ကျာဒိုဟ်ဗၟံက်ဂမၠိုၚ်ရ၊ နူဒိုဟ်ပလိုတ် ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗတၚ်ကျာဒိုဟ်ပလိုတ်ဂမၠိုၚ်ရ၊ နူဒိုဟ်သၟဝ်ကျာ ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗတၚ်ကျာဒိုဟ်သၟဝ်ကျာဂမၠိုၚ်ရ၊ နူဒိုဟ်သၠုၚ်ကျာ ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗတၚ်ကျာဒိုဟ်သၠုၚ်ကျာဂမၠိုၚ်ရ၊ ဒှ်အခိၚ်ဂမ္တဴမ္ဂး ပ္ဍဲအခိၚ်တ္ၚဲ သ္ဒးကၟာတ်ဒဝ်လဝ် ဗတၚ်ကျာဂမၠိုၚ်ရ၊ ပ္ဍဲအခိၚ်ဗတမ် သ္ဒးပံက်လဝ်ရ။
ပြဝိုဏ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ပြဝိုဏ်ရ။ မုက်ထော်တြၚ်ခဒမ်ဟုမ်ဍာ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် မုက်ထော်တြၚ်ခဒမ်ဟုမ်ဍာ်ရ။ ဇြပ်ကောံဓရီု သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ဇြပ်ကောံဓရီုရ။ ရုၚ်ပၟတ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ရုၚ်ပၟတ်ရ။ သ္ၚိဝစ် (သ္ၚိဍာ်) သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် သ္ၚိဝစ်ရ။ ဍာ်သုၚ်ဟွံမွဲမ္ဂး၊ သ္ဒးစွံပတန် ဍာ်သုၚ်ရ။ ဍာ်ရပ်စပ်ဟွံမွဲမ္ဂး၊ သ္ဒးစွံပတန် ဍာ်ရပ်စပ်ရ။ ပ္ဍဲနုၚ်ဍာ်ကြာတ် (နုၚ်သအးသ္ၚိဍာ်) ဍာ်ဟွံမွဲမ္ဂး၊ သ္ဒးဗပေၚ်စုတ်ဍာ်ရ။
ယဝ်ပဒတဴ မွဲဟာန် ကေုာံ ခမဳဇၞော် ပ္ဍဲမွဲဘာဓဝ်မ္ဂး ဟွံဂရၚ်ပတီလဴဗ္စ ခမဳဇၞော်တုဲ ဟဂပ်ဝ်သ္ပ ပွမဂိုၚ်ကတ်ကေတ် ပွမသၟာန်ရ၊ ဟဂပ်ဝ်သ္ပ ပွမသှ်ၛာဲရ၊ ဟဂပ်ဝ်သ္ပ ပွမတွံဓရ်ရ၊ ဟဂပ်ဝ်သ္ပ ပွမဍေန်ပၟတ်ရ၊ ဟဂပ်ဝ်ပလိုတ်ပၟတ်ရ၊ ဟဂပ်ဝ်ပံက် ဗတၚ်ကျာဂမၠိုၚ်အိုတ်ရ၊ ဟဂပ်ဝ်ကၟာတ် ဗတၚ်ကျာဂမၠိုၚ်အိုတ်ရ၊ ယဝ်ကွာ်စၚ်္ကြမ် မွဲဟာန် ကေုာံ ခမဳဇၞော် ပ္ဍဲမွဲစၚ်္ကြမ်ဓဝ်မ္ဂး ဂတမုက်လပါ်ခမဳဇၞော်နွံတုဲ ဒးကွာ်ရ၊ ဟဂပ်ဝ်ကဵုဓဇိုတ်တေက်ဒး ခမဳဇၞော် နကဵုတၞုၚ်မုက်သ္ၚာရ။
ယွံခမဳတအ် ဣဝွံတုန် ဒ္ဂေတ်ဝတ်ခမဳဂမၠိုၚ် ပ္ဍဲဘာသၞာသတိက်သၞာဒၟံၚ်ရ၊ အတိုၚ်ဒ္ဂေတ်ဝတ်ဂှ် ခမဳဂမၠိုၚ် ဒးဒ္ဂေတ်ပ္ဍဲဘာသၞာသတိက်သၞာဒၟံၚ်ရ။
