၈.၇ ။ ဒ္ဂေတ်ဝတ်ခမဳ ပဒတဴပ္ဍဲဂြိုပ်ဂမၠိုၚ်
၃၆၇။ ပ္ဍဲအခိၚ်ဂှ် ခမဳဂမၠိုၚ်ဗွဲမဂၠိုၚ် ပဒတဴ ပ္ဍဲဂြိုပ်အိုတ်ရ၊ ခမဳဂမၠိုၚ်ဂှ် ဟွံပတန်လဝ် ဍာ်သုၚ်အိုတ်ရ၊ ဟွံစွံပတန်လဝ် ဍာ်ရပ်စပ်အိုတ်ရ၊ ဟွံစွံပတန်လဝ် ပၟတ်အိုတ်ရ၊ ဟွံစွံပတန်လဝ် ဒၞိဟ်ပၟတ် ဗၞုတ်ပၟတ်အိုတ်ရ၊ ဟွံတီ ပရူပရာနက္ချတ်ဂမၠိုၚ်အိုတ်ရ၊ ဟွံတီ သွက်ဒိုဟ်ဂမၠိုၚ်အိုတ်ရ။
ကမၠတ်ဒမၠဂမၠိုၚ် အာစိုပ်ဌာန်ဂှ်တုဲ—
“ယွံတဳလပိုဉ်တအ် ဍာ်သုၚ်နွံဟာ” ရဴဝွံ ဂရၚ်ပတီသၟာန် ခမဳဂမၠိုၚ်အိုတ်ရ။
ယွံဒကာ ဟွံမွဲရ ရဴဝွံ (သ္ဂးအိုတ်ရ)။
ယွံတဳလပိုဉ်တအ် ဍာ်ရပ်စပ်နွံဟာ ရဴဝွံ (ဂရၚ်ပတီသၟာန် ခမဳဂမၠိုၚ်အိုတ်ရ။)
ယွံဒကာ ဟွံမွဲရ ရဴဝွံ (သ္ဂးအိုတ်ရ)။
ယွံတဳလပိုဉ်တအ် ပၟတ်နွံဟာ ရဴဝွံ (ဂရၚ်ပတီသၟာန် ခမဳဂမၠိုၚ်အိုတ်ရ။)
ယွံဒကာ ဟွံမွဲရ ရဴဝွံ (သ္ဂးအိုတ်ရ)။
ယွံတဳလပိုဉ်တအ် ဒၞိဟ်ပၟတ် ဗၞုတ်ပၟတ်နွံဟာ ရဴဝွံ (ဂရၚ်ပတီသၟာန် ခမဳဂမၠိုၚ်အိုတ်ရ။)
ယွံဒကာ ဟွံမွဲရ ရဴဝွံ (သ္ဂးအိုတ်ရ)။
ယွံတဳလပိုဉ်တအ် တ္ၚဲဝွံ စိုန်သကီုကေုာံနက္ချတ်လဵုရော ရဴဝွံ (ဂရၚ်ပတီသၟာန် ခမဳဂမၠိုၚ်အိုတ်ရ။)
ယွံဒကာ ပိုဲညးဂမၠိုၚ် ဟွံတီအိုတ်ရ ရဴဝွံ (သ္ဂးအိုတ်ရ)။
ယွံတဳလပိုဉ်တအ် ဣဝွံတုန် ဒှ်ဒိုဟ်လဵုရော ရဴဝွံ (ဂရၚ်ပတီသၟာန် ခမဳဂမၠိုၚ်အိုတ်ရ။)
ယွံဒကာ ပိုဲညးဂမၠိုၚ် ဟွံတီအိုတ်ရ ရဴဝွံ (သ္ဂးအိုတ်ရ)။
ပ္ဍဲအခိၚ်ဂှ် ကမၠတ်ဒမၠဂမၠိုၚ်ဂှ် “ကုခမဳဂမၠိုၚ်ဝွံ ဍာ်သုၚ်ဟွံမွဲ၊ ဍာ်ရပ်စပ်ဟွံမွဲ၊ ပၟတ်ဟွံမွဲ၊ ဒၞိဟ်ပၟတ်ဗၞုတ်ပၟတ်ဟွံမွဲ၊ ဟွံတီ ဟိုတ်ပရူပရာနက္ချတ်ဂမၠိုၚ်အိုတ်ရ၊ ဟွံတီ သွက်ဒိုဟ်ဂမၠိုၚ်အိုတ်ရ၊ ညးဂမၠိုၚ်ဝွံတုန် ကမၠတ်ဒမၠဂမၠိုၚ်ရ၊ ညးဂမၠိုၚ်ဝွံတုန် ခမဳ ဟွံသေၚ်အိုတ်ရ” ရဴဝွံ ၜုၚ်တက်တုဲ စ္ဍးအာအိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုလဴဗ္စ ဟိုတ်ပရူပရာဂှ် ကုခမဳဂမၠိုၚ်အိုတ်ရ။ ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး သ္ဂးကဵုခမဳဂမၠိုၚ်ရ။
၃၆၈။ ယွံခမဳတအ် ဒှ်သာ်ဂှ်မ္ဂး ကြပ်ပညပ်တဴ ဒ္ဂေတ်ဝတ် ကုခမဳပဒတဴပ္ဍဲဂြိုပ်ဂမၠိုၚ်ရ၊ အတိုၚ်ဒ္ဂေတ်ဝတ်ဂှ် ခမဳပဒတဴပ္ဍဲဂမၠိုၚ် ဒးဒ္ဂေတ်ရ။
ယွံခမဳတအ် ခမဳပဒတဴပ္ဍဲဂြိုပ်ဂှ် ဒၠိုက်ကတဵုပြဟ်ပြဟ်တုဲ စုတ်ဗဗေၚ် ပ္ဍဲထိုၚ် (ဖျေဲ) တုဲမ္ဂး ကွက်ကၟာဲ ပ္ဍဲပၞးတုဲ ပတိုန်လဝ်သ္ၚာ ပ္ဍဲပၞးတုဲ လိုန်ဍိုက်ဒၞပ် လပှ်သီဂိုၚ်ဒေပ် ကယျာဆု ကယျာတိတုဲ ကၟာတ်ဒဝ်ကၠေံ တြၚ်ဇၞော်ဗတၚ်ကျာတုဲမ္ဂး သ္ဒးစှေ်နူဘာရ။ “လၟုဟ်ဝွံဟေၚ် ကြက်လုပ်ကွာန်ရ” ရဴဝွံ သၠောတ်ဒၞပ်တုဲ ဖျဝ်ဂရိုက်တုဲမ္ဂး စုတ်ပ္ဍဲထိုၚ် ကွက်ကၟာဲပ္ဍဲပၞးတုဲ ဗိုက်သပိုၚ်ဗွဲဗၞဳ အဝဏ်မညဳသာ နမဂြောပ်ဗ္ဒန် ဗၞဳအဝဏ်ပိပြကာ, ဒက်ဇုက်ကာယဗန်တုဲသၠောံရုၚ်လတက်သ္ၚာသကိုပ်ဂမၠိုၚ် မထပ်လဝ်တုဲ စုတ်ခၟောံသ္ၚာတုဲ ကြာတ်ကြဴတုဲမ္ဂး ဂိုၚ်ကေတ် ဗဗေၚ်တုဲ ဟွံလဇုဲလောန် ဟွံပြဟ်လောန် သ္ဒးလုပ်ကွာန် ဗွဲမဒးရးရ၊ သီုမဂြောပ်ဗ္ဒန်လဝ် ဗွဲမဒးရး သ္ဒးအာပ္ဍဲအပ္ဍဲကွာန်ရ။ ပ ။ ထံက်ဂန်လဝ်ဂၞိၚ်တုဲ ဟဂပ်ဝ်အာ ပ္ဍဲအပ္ဍဲကွာန်ရ၊ ဓလီုလဝ်က္ဍိုပ်တုဲ ဟဂပ်ဝ်အာ ပ္ဍဲအပ္ဍဲကွာန်ရ၊ ကွာ်ကချေအ်ခ္ဍိုတ် နကဵုဒၞေဟ်,တၞုၚ်ဇိုၚ်တုဲ ဟဂပ်ဝ်အာ ပ္ဍဲအပ္ဍဲကွာန်ရ။
ခမဳမလုပ်သ္ၚိဂှ် “နဂၠံၚ်တရဴဝွံ ကြပ်လုပ်ရ၊ နဂၠံၚ်တရဴဝွံ ကြက်တိတ်ရ” ရဴဝွံ ဒးစၟတ်သမ္တီရ၊ ဟဂပ်ဝ်လုပ် ဗွဲမပြဟ်လောန်ရ၊ ဟဂပ်ဝ်တိတ် ဗွဲမပြဟ်လောန်ရ၊ ဟဂပ်ဝ်ဒတူ ပ္ဍဲဌာန်မသ္ၚောဲလောန်ရ၊ ဟဂပ်ဝ်ဒတူ ပ္ဍဲဌာန်မကြပ်လောန်ရ၊ ဟဂပ်ဝ်ဒတူ ပ္ဍဲဗွဲမလအ်လောန်ရ၊ ဟဂပ်ဝ်ကလေၚ် ဗွဲမပြဟ်ရ၊ ခမဳတဒတူဂှ် “မိက်ကဵုဒါန် (လံၚ်) ပိဏ္ဍပါတ်ဟာ၊ ဟွံမိက်ကဵုဒါန်ဟာ” ရဴဝွံ ဒးစၟတ်သမ္တီရ။
ဖျေံကၠေံ ကမၠောန်ကီု ဒၠိုက်ကတဵုနူဒၞာဲကီု ဇွိတ်သပေါတ် (ရပ်) ယံက်နော်ကီု ဇွိတ်သပေါတ်ထၟာဲပ္ၚာန်ကီု ကဵုဒတူဒေံါကီုကီု “မိက်ကဵုဒါန်ရ” ရဴဝွံ (ပၠုပ်စိုတ်တုဲ) ဒးဒတူရ။
ကဵုဒါန် (လံၚ်) ပိဏ္ဍပါတ်မ္ဂး နကဵုတဲပါဲ ဖါဲကၠေံသ္ၚာတုဲ နကဵုတဲပုၚ် ဖျဝ်ဖျေံဗဗေၚ်တုဲ မိန်လဝ်ဗဗေၚ် နကဵုတဲဂမၠိုၚ်ၜါလပါ်တုဲ သ္ဒးဒုၚ်ဂိုၚ်ကေတ် ပိဏ္ဍပါတ်ရ၊ ဟဂပ်ဝ်သ္ၚေဝ်ရံၚ်မုက္ခဝါဗြဴမကဵုဒါန်ပိဏ္ဍပါတ်၊ မိက်ကဵုဒါန် (လံၚ်) သွဟာ၊ ဟွံမိက်ကဵုဒါန်ဟာ” ရဴဝွံ ဒးစၟတ်သမ္တီရ။ ဖျေံကၠေံ ကမၠောန်ကီု ဒၠိုက်ကတဵုနူဒၞာဲကီု ဇွိတ်သပေါတ် (ရပ်) ယံက်နော်ကီု ဇွိတ်သပေါတ်ထၟာဲပ္ၚာန်ကီု ကဵုဒတူဒေံါကီုကီု “မိက်ကဵုဒါန်ရ” ရဴဝွံ (ပၠုပ်စိုတ်တုဲ) ဒးဒတူရ။ ကဵုဒါန်ပိဏ္ဍပါတ်တုဲမ္ဂး ဂြောပ်ဗ္ဒန်ကၠေံဗဗေၚ် နကဵုသ္ၚာတုဲ ဟွံပြဟ်ဟွံလဇုဲ ဒးကလေၚ်စဴ ဗွဲမဒးရးရ။
သီုမဂြောပ်ဗ္ဒန်လဝ် ဗွဲမဒးရး သ္ဒးအာပ္ဍဲအပ္ဍဲကွာန်ရ။ ပ ။ ကွာ်ကချေအ်ခ္ဍိုတ် နကဵုဒၞေဟ်,တၞုၚ်ဇိုၚ်တုဲ ဟဂပ်ဝ်အာ ပ္ဍဲအပ္ဍဲကွာန်ရ။ တိတ်ကၠုၚ်နူကွာန်မ္ဂး စုတ်ဗဗေၚ် ပ္ဍဲထိုၚ်တုဲ ကွက်ကၟာဲ ပ္ဍဲပၞး ခ္ဍပ်ကၠေံသ္ၚာ ပတိုန်စွံ ပ္ဍဲက္ဍိုပ်တုဲ သီုမလိုန်ဍိုက်ဒၞပ်ဂှ် ဒးအာရ။ ယွံခမဳတအ် ခမဳပဒတဴပ္ဍဲဂြိုပ်ဂှ် ဒးစွံပတန်လဝ် ဍာ်သုၚ်ရ၊ ဒးစွံပတန်လဝ် ဍာ်ရပ်စပ်ရ၊ ဒးစွံပတန်လဝ် ပၟဝ်ရ၊ ဒးစွံပတန်လဝ် ဒၞိဟ်ပၟတ် ဗၞုဟ်ပၟတ်ရ၊ ဒးစွံပတန်လဝ် လေံဒစုန် ပ္ဍဲဇရေၚ်ရ၊ ဒးဂိုၚ်ကတ်ကေတ် ပရူပရာနက္ချတ်ဂမၠိုၚ်အိုဿီုကီု ပရူပရာနက္ချတ်ဂမၠိုၚ်မွဲလစှေ်ကီုရ၊ ဒးတီစဳကၠး ပ္ဍဲဒိုဟ်ဂမၠိုၚ်ရ။
ယွံခမဳတအ် ဣဝွံတုန် ဒ္ဂေတ်ဝတ် ခမဳပဒတဴပ္ဍဲဂြိုပ်ဂမၠိုၚ်ရ၊ အတိုၚ်ဒ္ဂေတ်ဝတ်ဂှ် ခမဳပဒတဴပ္ဍဲဂြိုပ်ဂမၠိုၚ် ဒးဒ္ဂေတ်ရ ရဴဝွံ (သ္ဂးရ)။
