၈.၆ ။ စၞောန်ထ္ၜးကဵု ပိဏ္ဍစာရိကဝတ်
၃၆၅။ ပ္ဍဲအခိၚ်ဂှ် ခမဳဳဂမၠိုၚ် သီုမဗိုက် ရုၚ်လတက်လဝ် ဗွဲဟွံဒးရးဂမၠိုၚ် သီုဟွံဍိုက်ပေၚ်ကဵုအယောၚ်အလာဂမၠိုၚ်ဂှ် ဂေတ်ဂ္ၚေၚ်ပိဏ္ဍပါတ်အိုတ်ရ၊ သီုဟွံမွဲကဵုစၟတ်သမ္တီလေဝ် လုပ်အာသ္ၚိအိုတ်ရ၊ သီုဟွံမွဲကဵုစၟတ်သမ္တီလေဝ် တိတ်အိုတ်ရ၊ ဗွဲမပြဟ်လောန်လေဝ် လုပ်အိုတ်ရ၊ ဗွဲမပြဟ်လောန်လေဝ် တိတ်အိုတ်ရ၊ ပ္ဍဲဌာန်သ္ၚောဲလောန်လေဝ် ဒတူအိုတ်ရ၊ ပ္ဍဲဌာန်ကြပ်လောန်လေဝ် ဒတူအိုတ်ရ၊ ဗွဲမလလအ်လောန်လေဝ် ဒတူအိုတ်ရ၊ ဗွဲမပြဟ်လောန်လေဝ် ဒတူအိုတ်ရ။
ပ္ဍဲအခိၚ်ဂှ် ခမဳမဂ္ၚေၚ်ပိဏ္ဍပါတ်မွဲဇကုလေဝ် သီုဟွံစွံသတိ လုပ်အာသ္ၚိမ္ဂး သမ္တီထေၚ်ကေတ်တြၚ်တုဲ လုပ်ဒးအာဂၠမ်မွဲရ၊ ပ္ဍဲဂၠမ်ဂှ် ဗြဴမွဲ သီုဟွံမွဲကဵုယာတ် တိက်ဒၟံၚ်လံက်လ္ၚာရ၊ ခမဳဂှ် ညာတ်ဒးဗြဴမတိက်ဒၟံက်လံက်လ္ၚာ သီုဟွံမွဲကဵုယာတ်တုဲ “ဣဝွံ တြၚ်ဟွံသေၚ်ရ၊ ဂၠမ်ဟေၚ်ရ” ရဴဝွံ တိတ်ကၠုၚ်နူဂၠမ်ဂှ်ရ။ တြုံတၠသ္ၚိ ဗြဴဂှ် ညာတ်ဒး ဗြဴမတိက်ဒၟံၚ်လံက်လ္ၚာ သီုဟွံမွဲကဵုယာတ်တုဲ “ ခမဳဝွံ ပလီုပလာ် သမ္ဘာအဲရ” ရဴဝွံ ရပ်ကေတ်ခမဳဂှ်တုဲ ၜုၚ်တက်ရ၊ ပ္ဍဲအခိၚ်ဂှ် ဗြဴဂှ် ၚုဟ်တိုန် နကဵုဗရုရမျာၚ်ဂှ်တုဲ “ယွံတၠနာဲ တၠအဲ မုဟိုတ် ၜုၚ်တက် ခမဳဝွံရော” ရဴဝွံ ဟီုသ္ဂးကဵုတြုံဂှ်ရ။
ခမဳဝွံ ပလီုပလာ် တၠအဲရ ရဴဝွံ (သ္ဂးရ)။
“ယွံတၠနာဲ ခမဳဝွံ ဟွံပလီုပလာ် အဲရ၊ ခမဳဂှ် ဟွံလေပ်သ္ပရ” ရဴဝွံ ဟီုသ္ဂးတုဲ ကဵုဗလးထောံခမဳဂှ်ရ။ ပ္ဍဲအခိၚ်ဂှ် ခမဳဂှ် အာအာရှာမ်တုဲ ဟီုလဴဗ္စ ဟိုတ်ပရူပရာဂှ် ကုခမဳဂမၠိုၚ်ရ၊ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဳဂမၠိုၚ် သီုမဗိုက် ရုၚ်လတက်လဝ် ဗွဲဟွံဒးရးဂမၠိုၚ် သီုဟွံဍိုက်ပေၚ်ကဵုအယောၚ်အလာဂမၠိုၚ်ဂှ် ဂေတ်ဂ္ၚေၚ်ပိဏ္ဍပါတ်အိုတ်ရော?၊ သီုဟွံမွဲကဵုစၟတ်သမ္တီလေဝ် လုပ်အာသ္ၚိအိုတ်ရော?၊ သီုဟွံမွဲကဵုစၟတ်သမ္တီလေဝ် တိတ်အိုတ်ရော?၊ ဗွဲမပြဟ်လောန်လေဝ် လုပ်အိုတ်ရော?၊ ဗွဲမပြဟ်လောန်လေဝ် တိတ်အိုတ်ရော?၊ ပ္ဍဲဌာန်သ္ၚောဲလောန်လေဝ် ဒတူအိုတ်ရော?၊ ပ္ဍဲဌာန်ကြပ်လောန်လေဝ် ဒတူအိုတ်ရော?၊ ဗွဲမလလအ်လောန်လေဝ် ဒတူအိုတ်ရ၊ ဗွဲမပြဟ်လောန်လေဝ် ဒတူအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ ပ ။ ဟီုဂရိုဟ်တုဲ။ ပ ။ တွံကဵုဂလာန်ဓရ်တုဲမ္ဂး သ္ဂးကဵု ခမဳဂမၠိုၚ်ရ။
၃၆၆။ ယွံခမဳတအ် ဒှ်သာ်ဂှ်မ္ဂး ကြပ်ပညပ်တဴ ဒ္ဂေတ်ဝတ်ကုခမဳ မဂေတ်ဂ္ၚေၚ်ပိဏ္ဍပါတ်ဂမၠိုၚ်ရ၊ အတိုၚ်ဒ္ဂေတ်ဝတ်ဂှ် ခမဳမဂေတ်ဂ္ၚေၚ်ပိဏ္ဍပါတ်ဂမၠိုၚ် ဒးဒ္ဂေတ်ရ။
ယွံခမဳတအ် ခမဳမဂေတ်ဂ္ၚေၚ်ပိဏ္ဍပါတ်ဂှ် “ပ္ဍဲလၟုဟ်ဟေၚ် ကြပ်လုပ်ကွာန်ရ” ရဴဝွံ ဗိုက်သပိုၚ် ဗွဲဗၞဳအဝဏ်မညဳသာ နမဂြောပ်ဗ္ဒန် ဗၞဳအဝဏ်ပိပြကာ, (ဗၞဳအဝဏ်တၚ်က္ၜံၚ်ၜါလပါ်ကဵုပံၚ်ကဠုတ်−မိက်သ္ဂးရ)။ ဒက်ဇုက်ကာယဗန်တုဲ သၠောံရုၚ်လတက်သ္ၚာသကိုပ်ဂမၠိုၚ် မထပ်လဝ်တုဲ စုတ်ခၟောံသ္ၚာတုဲ ကြာတ်ကြဴတုဲမ္ဂး ဂိုၚ်ကေတ်ဗဗေၚ်တုဲ ဟွံလဇုဲလောန် ဟွံပြဟ်လောန် သ္ဒးလုပ်ကွာန် ဗွဲမဒးရးရ။
သီုမဂြောပ်ဗ္ဒန်လဝ် ဗွဲမဒးရး သ္ဒးအာပ္ဍဲအပ္ဍဲကွာန်ရ၊ သီုမသ္ၚဳလလမ်မၚ်မွဲဣန္ဒြဳ ဗွဲမဒးရး သ္ဒးအာပ္ဍဲအပ္ဍဲကွာန်ရ၊ သီုမဖျေံလဝ်မတ်ဗွဲသၟဝ် သ္ဒးအာပ္ဍဲအပ္ဍဲကွာန်ရ၊ သၠိုက်ပတိုန်သ္ၚာတုဲ ဟဂပ်ဝ်အာ ပ္ဍဲအပ္ဍဲကွာန်ရ၊ သီုမဂြိုၚ်တဴ ဗွဲမသကာတ် ဟဂပ်ဝ်အာ ပ္ဍဲအပ္ဍဲကွာန်ရ၊ မၞုံကဵုဗရုရမျာၚ် မအောန်သာဒှ်တုဲ သ္ဒးအာ ပ္ဍဲအပ္ဍဲကွာန်ရ၊ ဂရိုက်ဂရာၚ်ဂဝုဲပချဳဇကုတုဲ ဟဂပ်ဝ်အာ ပ္ဍဲအပ္ဍဲကွာန်ရ၊ ဂဝုဲကသဳတဲတုဲ ဟဂပ်ဝ်အာ ပ္ဍဲအပ္ဍဲကွာန်ရ၊ ဂရိုက်ကသဳက္ဍိုပ်တုဲ ဟဂပ်ဝ်အာ ပ္ဍဲအပ္ဍဲကွာန်ရ၊ ထံက်ဂန်လဝ်ဂၞိၚ်တုဲ ဟဂပ်ဝ်အာ ပ္ဍဲအပ္ဍဲကွာန်ရ၊ ဓလီုလဝ်က္ဍိုပ်တုဲ ဟဂပ်ဝ်အာ ပ္ဍဲအပ္ဍဲကွာန်ရ၊ ကွာ်ကချေအ်ခ္ဍိုတ် နကဵုဒၞေဟ်,တၞုၚ်ဇိုၚ်တုဲ ဟဂပ်ဝ်အာ ပ္ဍဲအပ္ဍဲကွာန်ရ။
ခမဳမလုပ်သ္ၚိဂှ် “နဂၠံၚ်တရဴဝွံ ကြပ်လုပ်ရ၊ နဂၠံၚ်တရဴဝွံ ကြက်တိတ်ရ” ရဴဝွံ ဒးစၟတ်သမ္တီရ၊ ဟဂပ်ဝ်လုပ် ဗွဲမပြဟ်လောန်ရ၊ ဟဂပ်ဝ်တိတ် ဗွဲမပြဟ်လောန်ရ၊ ဟဂပ်ဝ်ဒတူ ပ္ဍဲဌာန်မသ္ၚောဲလောန်ရ၊ ဟဂပ်ဝ်ဒတူ ပ္ဍဲဌာန်မကြပ်လောန်ရ၊ ဟဂပ်ဝ်ဒတူ ပ္ဍဲဗွဲမလအ်လောန်ရ၊ ဟဂပ်ဝ်ကလေၚ် ဗွဲမပြဟ်ရ၊ “မိက်ကဵုဒါန် (လံၚ်) ပိဏ္ဍပါတ်ဟာ၊ ဟွံမိက်ကဵုဒါန်ဟာ” ရဴဝွံ သီုဒတူဒၟံၚ် ဒးစၟတ်သမ္တီရ။
ဖျေံကၠေံ ကမၠောန်ကီု ဒၠိုက်ကတဵုနူဒၞာဲကီု ဇွိတ်သပေါတ် (ရပ်) ယံက်နော်ကီု ဇွိတ်သပေါတ်ထၟာဲပ္ၚာန်ကီု ကဵုဒတူဒေံါကီုကီု “မိက်ကဵုဒါန်ရ” ရဴဝွံ (ပၠုပ်စိုတ်တုဲ) ဒးဒတူရ။
ကဵုဒါန် (လံၚ်) ပိဏ္ဍပါတ်မ္ဂး နကဵုတဲပါဲ ဖါဲကၠေံသ္ၚာတုဲ နကဵုတဲပုၚ် ဖျဝ်ဖျေံဗဗေၚ်တုဲ မိန်လဝ်ဗဗေၚ် နကဵုတဲဂမၠိုၚ်ၜါလပါ်တုဲ သ္ဒးဒုၚ်ဂိုၚ်ကေတ် ပိဏ္ဍပါတ်ရ၊ ဟဂပ်ဝ်သ္ၚေဝ်ရံၚ်မုက္ခဝါဗြဴမကဵုဒါန်ပိဏ္ဍပါတ်၊ မိက်ကဵုဒါန် (လံၚ်) သွဟာ၊ ဟွံမိက်ကဵုဒါန်ဟာ” ရဴဝွံ ဒးစၟတ်သမ္တီရ။ ဖျေံကၠေံ ကမၠောန်ကီု ဒၠိုက်ကတဵုနူဒၞာဲကီု ဇွိတ်သပေါတ် (ရပ်) ယံက်နော်ကီု ဇွိတ်သပေါတ်ထၟာဲပ္ၚာန်ကီု ကဵုဒတူဒေံါကီုကီု “မိက်ကဵုဒါန်ရ” ရဴဝွံ (ပၠုပ်စိုတ်တုဲ) ဒးဒတူရ။ ကဵုဒါန်ပိဏ္ဍပါတ်တုဲမ္ဂး ဂြောပ်ဗ္ဒန်ကၠေံဗဗေၚ် နကဵုသ္ၚာတုဲ ဟွံပြဟ်ဟွံလဇုဲ ဒးကလေၚ်စဴ ဗွဲမဒးရးရ။
သီုမဂြောပ်ဗ္ဒန်လဝ် ဗွဲမဒးရး သ္ဒးအာပ္ဍဲအပ္ဍဲကွာန်ရ၊ သီုမသ္ၚဳလလမ်မၚ်မွဲဣန္ဒြဳ ဗွဲမဒးရး သ္ဒးအာပ္ဍဲအပ္ဍဲကွာန်ရ၊ သီုမဖျေံလဝ်မတ်ဗွဲသၟဝ် သ္ဒးအာပ္ဍဲအပ္ဍဲကွာန်ရ၊ သၠိုက်ပတိုန်သ္ၚာတုဲ ဟဂပ်ဝ်အာ ပ္ဍဲအပ္ဍဲကွာန်ရ၊ သီုမဂြိုၚ်တဴ ဗွဲမသကာတ် ဟဂပ်ဝ်အာ ပ္ဍဲအပ္ဍဲကွာန်ရ၊ မၞုံကဵုဗရုရမျာၚ် မအောန်သာဒှ်တုဲ သ္ဒးအာ ပ္ဍဲအပ္ဍဲကွာန်ရ၊ ဂရိုက်ဂရာၚ်ဂဝုဲပချဳဇကုတုဲ ဟဂပ်ဝ်အာ ပ္ဍဲအပ္ဍဲကွာန်ရ၊ ဂဝုဲကသဳတဲတုဲ ဟဂပ်ဝ်အာ ပ္ဍဲအပ္ဍဲကွာန်ရ၊ ဂရိုက်ကသဳက္ဍိုပ်တုဲ ဟဂပ်ဝ်အာ ပ္ဍဲအပ္ဍဲကွာန်ရ၊ ထံက်ဂန်လဝ်ဂၞိၚ်တုဲ ဟဂပ်ဝ်အာ ပ္ဍဲအပ္ဍဲကွာန်ရ၊ ဓလီုလဝ်က္ဍိုပ်တုဲ ဟဂပ်ဝ်အာ ပ္ဍဲအပ္ဍဲကွာန်ရ၊ ကွာ်ကချေအ်ခ္ဍိုတ် နကဵုဒၞေဟ်,တၞုၚ်ဇိုၚ်တုဲ ဟဂပ်ဝ်အာ ပ္ဍဲအပ္ဍဲကွာန်ရ။
ခမဳ မကလေၚ်ကၠုၚ် နူကွာန်ဂ္ၚေၚ်ပိဏ္ဍပါတ် ဗွဲကိုပ်ကၠာဂှ် ဒးလးသၞာရ၊ ဒးစွံပတန်လဝ် ဍာ်ကြဴဇိုၚ် ဂတဵုကြာတ်ဇိုၚ် ကဝေက်ပေါတ်ဇိုၚ် ပ္ဍဲဇရေၚ်ရ၊ ကြဴကြာတ်ခရော် သွက်ဂွံစုတ်က္ဍိုပ်ပုၚ်တုဲ ဒးစွံပတန်လဝ်ရ၊ ဒးစွံပတန်လဝ် ဍာ်သုၚ်ကီု ဍာ်ရပ်စပ်ကီု ပ္ဍဲဇရေၚ်ရ၊ ခမဳ ကလေၚ်ကၠုၚ် နူကွာန်ဂ္ၚေၚ်ပိဏ္ဍပါတ် နူလက်ကရဴဂှ် မိက်ဂွံစ ပုၚ်သှေ်သၟေဟ်ဂှ်မ္ဂး စရ၊ ဟွံမိက်စမ္ဂး ပ္ဍဲဌာန် မဟွံမွဲကဵုတၞံဆုချောဲ မလမ္စံက်ဍိုက်ဍဴလေဝ် ဒးကၠဟ်ကၠေံရ၊ ပ္ဍဲဍာ် မဟွံမွဲကဵုစၟလေဝ် ဒးကိုဟ်ချာဲရ၊ ခမဳဂှ် ဒးထပ်သ္ၚာရ၊ ဒးသီဂိုၚ်ဒေပ် ဍာ်ကြဴဇိုၚ် ဂတဵုကြာတ်ဇိုၚ် ကဝေက်ပေါတ်ဇိုၚ်ရ၊ ကြဴကြာတ်ခရော်သွက်ဂွံစုတ်က္ဍိုပ်ပုၚ်တုဲ ဒးသီဂိုၚ်ဒေပ်ရ၊ ဒးသီဂိုၚ်ဒေပ် ဍာ်သုၚ်ကီု ဍာ်ရပ်စပ်ကီုရ၊ ဒးကွဟ်ကၟဟ်ဘာရုၚ် (ဇြပ်) ကဵုပိုဉ်ရ။ ခမဳညာတ် နုၚ်ဍာ်သွုၚ်ကီု နုၚ်ဍာ်ရပ်စပ်ကီု နုၚ်ဍာ်ကြာတ်ကီု မဟၟဲကဵုဍာ်ဂှ် (စုတ်ဍာ်တုဲ) ဒးစွံပတန်ရ။ ခမဳဂှ် ယဝ်ထ္ၜၚ်ပတိုန်ဟွံမာန်မ္ဂး ကော်ခါတဲ အဖဝ်တုဲ ထ္ၜးပတိုန် နကဵုတဲဂမၠိုၚ်တုဲ ဒးစွံပတန်ရ၊ ဟိုတ်နူဟိုတ် ထ္ၜၚ်ပတိုန်ဟွံမာန်ဂှ် ဟဂပ်ဝ်သ္ပပွမမြော်ဟီုတိတ်ပါၚ်ရ။
ယွံခမဳတအ် ဣဝွံတုန် ဒ္ဂေတ်ဝတ်ခမဳ မဂေတ်ဂ္ၚေၚ်ပိဏ္ဍပါတ်ဂမၠိုၚ်ရ၊ အတိုၚ်ဒ္ဂေတ်ဝတ်ဂှ် ခမဳမဂေတ်ဂ္ၚေၚ်ပိဏ္ဍပါတ်ဂမၠိုၚ် ဒးဒ္ဂေတ်ရ ရဴဝွံ (သ္ဂးရ)။
