၈.၁၀ ။ ဝတ်ဒးဒ္ဂေတ် ပ္ဍဲဝစ္စကုဋဳ
၃၇၃။ ပ္ဍဲအခိၚ်ဂှ် ခမဳမွဲဇကု မၞုံကဵုဗြာဟ္မဏဇာတ်ဂှ် သၠးတရဴဇၞော်တုဲမ္ဂး “တရဴဇၞော်ယုတ်သဝ်တုဲ သၟူအမြာဲဟွံဒးရးဝွံ မုရဴညးမွဲ ဂွံကြာတ်ဍာ်ကရာတ်ရော” ရဴဝွံ ဟွံမွဲပၟိက် တၞဟ်နကြာတ်ဍာ်ကရာတ်ရ၊ ပ္ဍဲဝစ္စမဂ် ခမဳဂှ် စၟတျုတန်တဴရ။ ပ္ဍဲအခိၚ်ဂှ် ခမဳဂှ် ဟီုလဴဗ္စ ဟိုတ်ပရူပရာဂှ် ကုခမဳဂမၠိုၚ်ရ။ ယွံကောန်တၠ ပသာ်ရော? တၠအဲ သၠးတရဴဇၞော်တုဲမ္ဂး ဟွံကြာတ်ဍာ်ကရာတ်ဟာ ရဴဝွံ သၟာန်အိုတ်ရ။ ယွံကောန်တၠတအ် ဟွံကြာတ်ဂှ် ဍာံပြရ ရဴဝွံ သ္ဂးရ။ ခမဳ ပၟိက်အောန်ဂမၠိုၚ်ဂှ် “မုဟိုတ် ခမဳဂှ် သၠးတရဴဇၞော်တုဲမ္ဂး ဟွံကြာတ်ဍာ်ကရာတ်ရော” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ ။
“ယွံခမဳ တၠအဲ သၠးတရဴဇၞော်တုဲမ္ဂး ဟွံကြာတ်ဍာ်ကရာတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။
ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ ပ ။ ဟီုဂရိုဟ်တုဲ။ ပ ။ တွံကဵုဂလာန်ဓရ်တုဲမ္ဂး—
“ယွံခမဳတအ် သၠးတရဴဇၞော်တုဲမ္ဂး သီုမၞုံကဵုဍာ် ဟွံကြာတ်ဍာ်ကရာတ်ဂှ် ဟဂပ်ဝ်မံၚ်ရ၊ ကုခမဳ ဟွံကြာတ်ဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် ခမဳဂမၠိုၚ် ပ္ဍဲသ္ၚိဝစ် (သ္ၚိဍာ်) သၠးတရဴဇၞော် အတိုၚ်လၟေၚ်ညးဇၞော်အိုတ်ရ၊ ခမဳသၟတ်ဂမၠိုၚ် ၜိုန်ကၠုၚ်ဗွဲကိုပ်ကၠာလေဝ် သီုမမိက်သၠးတရဴဇၞော်ဂှ် ဒးလၟတ်မၚ်ဒၟံၚ်အိုတ်ရ၊ ခမဳသၟတ်ဂမၠိုၚ် ဒးအေၚ်လဝ်တရဴဇၞော်ဂှ်ရ ဗ္ၜူတုဲလောတ်စှေ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ ။ ယွံခမဳတအ် ဍာံပြဟာ။ ပ ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ ပ ။
“ယွံခမဳတအ် ပ္ဍဲသ္ၚိဝစ် ဟဂပ်ဝ်သၠးတရဴဇၞော် အတိုၚ်လၟေၚ်ညးဇၞော်ရ၊ ကုခမဳသၠးဂှ် ဒးအာပတ်ဒုက္ကဋ်ရ၊ ယွံခမဳတအ် ကဵုအခေါၚ် သွက်ဂွံသၠးတရဴဇၞော် အတိုၚ်လၟေၚ်ညးကၠုၚ်စိုပ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဗွဲမပြဟ်လောန်လေဝ် လုပ်သ္ၚိဝစ်အိုတ်ရ၊ သၠိုက်ပတိုန်သပိုၚ်တုဲလေဝ် လုပ်သ္ၚိဝစ်အိုတ်ရ၊ သီုမခအိဟ် (ဂိုတ်) တဴ အိဟ်အိဟ်ဂမၠိုၚ်လေဝ် သၠးတရဴဇၞော်အိုတ်ရ၊ သီုမစတဴဆုဒကဂမၠိုၚ်လေဝ် သၠးတရဴဇၞော်အိုတ်ရ၊ ပ္ဍဲမ္ၚးဒၞိဟ်ကရံက်တရဴဇၞော်လေဝ် သၠးတရဴဇၞော်အိုတ်ရ၊ ပ္ဍဲမ္ၚးဒၞိဟ်ကရံက်တရဴသၟတ်လေဝ် သၠးတရဴသၟတ်အိုတ်ရ၊ ပ္ဍဲဒၞိဟ်တရဴသၟတ်လေဝ် ချဟ်စုတ်ဍာ်ပါၚ်အိုတ်ရ၊ နဃရိုအ် (လေံကၞေဟ်) မသကာတ်လေဝ် ဗိုၚ် (ဃမိုၚ်) အိုတ်ရ၊ ဃရိုအ်ဗိုၚ်တုဲလေဝ် ပတုံဖျေံပ္ဍဲကတိုၚ်တရဴဇၞော်အိုတ်ရ၊ ဗွဲမပြဟ်လောန်လေဝ် တိတ်ကၠုၚ်အိုတ်ရ၊ သၠိုက်ပတိုန်သပိုၚ်တုဲလေဝ် တိတ်ကၠုၚ်အိုတ်ရ၊ သ္ပဗရုစာပ်စာပ်တုဲလေဝ် ကြာတ်ဍာ်ကရာတ်အိုတ်ရ၊ ပ္ဍဲခရော်ဍာ်ကရာတ်လေဝ် သၟေဟ်စွံလဝ်ဍာ်အိုတ်ရ။
ခမဳပၟိက်အောန်ဂမၠိုၚ်ဂှ် “ ခမဳဆဗ္ဗဂ္ဂဳဂမၠိုၚ် ဗွဲမပြဟ်လောန်လေဝ် လုပ်သ္ၚိဝစ်အိုတ်ရော?၊ သၠိုက်ပတိုန်သပိုၚ်တုဲလေဝ် လုပ်သ္ၚိဝစ်အိုတ်ရော?၊ သီုမခအိဟ် (ဂိုတ်) တဴ အိဟ်အိဟ်ဂမၠိုၚ်လေဝ် သၠးတရဴဇၞော်အိုတ်ရော?၊ သီုမစတဴဆုဒကဂမၠိုၚ်လေဝ် သၠးတရဴဇၞော်အိုတ်ရော?၊ ပ္ဍဲမ္ၚးဒၞိဟ်ကရံက်တရဴဇၞော်လေဝ် သၠးတရဴဇၞော်အိုတ်ရော?၊ ပ္ဍဲမ္ၚးဒၞိဟ်ကရံက်တရဴသၟတ်လေဝ် သၠးတရဴသၟတ်အိုတ်ရော?၊ ပ္ဍဲဒၞိဟ်တရဴသၟတ်လေဝ် ချဟ်စုတ်ဍာ်ပါၚ်အိုတ်ရော?၊ နဃရိုအ် (လေံကၞေဟ်) မသကာတ်လေဝ် ဗိုၚ် (ဃမိုၚ်) အိုတ်ရော?၊ ဃရိုအ်ဗိုၚ်တုဲလေဝ် ပတုံဖျေံပ္ဍဲကတိုၚ်တရဴဇၞော်အိုတ်ရော?၊ ဗွဲမပြဟ်လောန်လေဝ် တိတ်ကၠုၚ်အိုတ်ရော?၊ သၠိုက်ပတိုန်သပိုၚ်တုဲလေဝ် တိတ်ကၠုၚ်အိုတ်ရော?၊ သ္ပဗရုစာပ်စာပ်တုဲလေဝ် ကြာတ်ဍာ်ကရာတ်အိုတ်ရော?၊ ပ္ဍဲခရော်ဍာ်ကရာတ်လေဝ် သၟေဟ်စွံလဝ်ဍာ်အိုတ်ရော? ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ ။
ယွံခမဳတအ် ဍာံပြဟာ။ ပ ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ ပ ။ ဟီုဂရိုဟ်တုဲ။ ပ ။ တွံကဵုဂလာန်ဓရ်တုဲမ္ဂး သ္ဂးကဵုခမဳဂမၠိုၚ်ရ။
၃၇၄။ ယွံခမဳတအ် ဒှ်သာ်ဂှ်မ္ဂး ကြက်ပညပ်တဴ ဝတ်မဒးဒ္ဂေတ် ပ္ဍဲသ္ၚိဝစ် ကုခမဳဂမၠိုၚ်ရ၊ အတိုၚ်ဒ္ဂေတ်ဝတ်ဂှ် ခမဳဂမၠိုၚ် ဒး ဒ္ဂေတ် ပ္ဍဲသ္ၚိဝစ်ရ။
ခမဳ မအာသ္ၚိဝစ်ဂှ် ဒတူဒၟံၚ်ပ္ဍဲမ္ၚးတုဲ သ္ဒးခ္ဍက်ခအေမ်ရ၊ ခမဳဂမၠိုၚ် မဂဇအ်ဒၟံၚ် ပ္ဍဲသ္ၚိဝစ်လေဝ် သ္ဒးခ္ဍက်ခအေမ်ရ၊ လ္ၜက်စွံသ္ၚာ ပ္ဍဲဒုန်တေၚ်သ္ၚာကီု ပ္ဍဲဇုက်တေၚ်ဗလဲသ္ၚာကီုတုဲ ဟွံပြဟ်ဟွံလဇုဲ သ္ဒးလုပ်အာသ္ၚိဝစ် ဗွဲမဒးရးရ၊ ဟဂပ်ဝ်လုပ် ဗွဲမပြဟ်လောန်ရ၊ သၠိုက်ပတိုန်သပိုၚ်တုဲ ဟဂပ်ဝ်လုပ်ရ၊ သီုမဒတူဒၟံၚ် ပ္ဍဲဒၞပ်သၠးတရဴဇၞော်ဂှ် ဒးသၠိုက်ပတိုန်သပိုၚ်ရ၊ သီုမခအိဟ်တဴ ဟဂပ်ဝ်သၠးတရဴဇၞော်ရ၊ သီုမစတဴဆုဒက ဟဂပ်ဝ်သၠးတရဴဇၞော်ရ၊ ဟဂပ်ဝ်သၠးတရဴဇၞော် ပ္ဍဲမ္ၚးဒၞိဟ်ကရံက်တရဴဇၞော်ရ၊ ဟဂပ်ဝ်သၠးတရဴသၟတ် ပ္ဍဲဒၞိဟ်ကရံက်တရဴသၟတ်ရ၊ ဟဂပ်ဝ်ချဟ်စုတ်ဍာ်ပါၚ် ပ္ဍဲဒၞိဟ်ကရံက်တရဴသၟတ်ရ၊ ဟဂပ်ဝ်ဗိုၚ် နကဵုဃရိုအ်မသကာတ်မြဟ်ရ၊ ဟဂပ်ဝ်ဒတုံဖျေံ ဃရိုအ် ပ္ဍဲကတိုၚ်တရဴဇၞော်ရ၊ သီုမတန်တဴဒၟံၚ် ပ္ဍဲဒၞပ်သၠးတရဴဇၞော်ဂှ် ဒးဂြောပ်ဗ္ဒန်လဝ်ရ၊ ဟဂပ်ဝ်တိတ် ဗွဲမပြဟ်လောန်ရ၊ သၠိုက်ပတိုန်သပိုၚ်တုဲ ဟဂပ်ဝ်တိတ်ရ၊ သီုမတန်တဴဒၟံၚ် ပ္ဍဲဒၞပ်ကြာတ်ဍာ်ကရာတ်ဂှ် ဟွံထေက်ကဵုသၠိုက်ပတိုန်သပိုၚ်ရ၊ သီုမသ္ပဗရုစာပ်စာပ် ဟဂပ်ဝ်ကြာတ်ဍာ်ကရာတ်ရ၊ ဟဂပ်ဝ်သၟေဟ်စွံလဝ်ဍာ် ပ္ဍဲခရော်ဍာ်ကရာတ်ရ၊ သီုမတန်တဴဒၟံၚ် ပ္ဍဲဒၞပ်ကြာတ်ဍာ်ကရာတ်ဂှ် ဒးဂြောပ်ဗ္ဒန်လဝ်ရ။
သ္ၚိဝစ် ကၠေဝ်ဗာန်တရဴဇၞော်မ္ဂး ဒးကြာတ်ကြဴရ၊ နတိုၚ်ဃရိုအ် (သုၚ်စောဲတုဲ) ပေၚ်မ္ဂး ဒးကိုဟ်ချာဲဃရိုအ်ရ၊ သ္ၚိဝစ် သၟိက်ဟန်ဗန်နွံဒှ်မ္ဂး သ္ဒးကွဟ်ကၟဟ်သ္ၚိဝစ်ရ၊ ခုၚ်တိဗွဝ် သၟိက်ဟန်ဗန်နွံဒှ်မ္ဂး သ္ဒးကွဟ်ကၟဟ် ခုၚ်တိဗွဝ်ရ၊ ပြဝိုဏ် သၟိက်ဟန်ဗန်နွံဒှ်မ္ဂး သ္ဒးကွဟ်ကၟဟ် ပြဝိုဏ်ရ၊ မုက်ထော်တြၚ် သၟိက်ဟန်ဗန်နွံဒှ်မ္ဂး သ္ဒးကွဟ်ကၟဟ် မုက်ထော်တြၚ်ရ၊ ပ္ဍဲနုၚ်ဍာ်ကြာတ် (နုၚ်သအးသ္ၚိဍာ်) ဍာ်ဟွံမွဲဒှ်မ္ဂး သ္ဒးဗပေၚ်စုတ်ဍာ်ရ။ ယွံခမဳတအ် ဣဝွံတုန် ဝတ်ဒ္ဂေတ်ဝတ် ခမဳဂမၠိုၚ် မဒးဒ္ဂေတ်ပ္ဍဲသ္ၚိဝစ်ရ၊ အတိုၚ်ဒ္ဂေတ်ဝတ်ဂှ် ခမဳဂမၠိုၚ် ဒးဒ္ဂေတ် ပ္ဍဲသ္ၚိဝစ်ရ ရဴဝွံ (သ္ဂးရ)။
