၇.၂.၆။ အာတ်ဝတ္ထုမသုန်သာ်
၃၄၃။ ပ္ဍဲအခိၚ်ဂှ် ဒေဝဒတ် ဟိုတ်နူလာဘ်သက္ကာ ဟုတ်ယုတ်အာဂှ်ရ မွဲဟာန်ကေုာံပရိသာတ်အာတ်တုဲ အာတ်တဴပ္ဍဲသ္ၚိဒကာဂမၠိုၚ်တုဲ ဒးစရ။
မၞိဟ်ဂမၠိုၚ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် အာတ်တုဲ အာတ်တဴ ပ္ဍဲသ္ၚိဒကာဂမၠိုၚ်တုဲ မုဟိုတ် စအိုတ်ရော? မုရဴညးမွဲ ဟွံဒးစိုတ် ရှ်သာခိုဟ်ခိုဟ်နွံရော? မုရဴညးမွဲ ဟွံသ္ဍိုက်မၠိုက်ဒးဂၞပ် ရှ်သာဍာတ်ကြိုအ် နွံရော?” ရဴဝွံ ဟီုဂရိုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ်ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ဒေဝဒတ် မွဲဟာန်ကေုာံပရိသာတ် အာတ်တုဲ အာတ်တဴပ္ဍဲသ္ၚိဒကာဂမၠိုၚ်တုဲ စရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ ယွံဒေဝဒတ် တၠအဲမွဲဟာန်ကေုာံပရိသာတ် အာတ်တုဲ အာတ်တဴ ပ္ဍဲသ္ၚိဒကာဂမၠိုၚ်တုဲ စရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။
ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ) ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး—
“ယွံခမဳတအ် ဒှ်သာ်ဂှ်ရ ညးမၞုံပၟိက်မယုတ်မာဂမၠိုၚ် နိဿယ်ဗ္ဒာဲကဵုဗော်သွးတုဲ လ္ပကဵုပါ်ဒကးသၚ်အိုတ်ညိ” ရဴဝွံ သွက်ဂွံလၞိန်ဗပိန် ခမဳမဟွံမွဲကဵုသဳလဂမၠိုၚ်ကီု တၞဟ်နဂွံပဒတဴဗွဲတသိုခ် ကုခမဳမသ္ဍိုက်ဆာန်သဳလဂမၠိုၚ်ကီု တၞဟ်နယိုက်ဒိုက် ဒကာဂမၠိုၚ်ကီု သ္ပဟိုတ်ကဵုဖဵုတၟေၚ်ဂမၠိုၚ်ပိဂကူတုဲ ကြက်ပညပ်တဴ ဘောဇိုန်ခမဳပိဇကု မဂပ်ဝ်ဒုၚ်ဂိုၚ်ကေတ်မွဲဂကောံဓဝ် ပ္ဍဲသ္ၚိဒကာဂမၠိုၚ် ကုခမဳဂမၠိုၚ်ရ၊ ယွံခမဳတအ် ဘောဇိုန်ခမဳပန်ဇကု မဂပ်ဝ်ဒုၚ်ဂိုၚ်ကေတ် မွဲဂကောံဓဝ်ဂှ် ဒးသ္ဂုတ်သွတ် အတိုၚ်ဓရ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ဒေဝဒတ် ပြာပ်အာဇရေၚ် ကောကာလိက ကဋမောဒကတိဿက ကောန်ဂၞကျာ်ခဏ္ဍာ သမုဒ္ဒဒတ္တဂမၠိုၚ်တုဲ “ယွံကောန်တၠတအ် ဩဝ်ကၠုၚ်အိုတ်ညိ၊ ပိုဲညးဂမၠိုၚ် ကြက်သ္ပပွမပါ်ဒကးသၚ် ပွမပလီုပလာ်အာဏာစက် ခမဳဂေါတမအိုတ်ရ” ရဴဝွံ ဟီုသ္ဂးကဵု ကောကာလိကကီု ကဋမောဒကတိဿက ကောန်ဂၞကျာ်ခဏ္ဍာကီု သမုဒ္ဒဒတ္တကီုရ၊ ဟီုသ္ဂးရဴဝွံမ္ဂး ကောကာလိကဂှ် “ယွံကောန်တၠ ခမဳဂေါတမတုန် မၞုံကဵုကြဳဇှ်ဇၞော်ရ၊ မၞုံကဵုအာနုဘဴဇၞော်ရ၊ ပိုဲညးဂမၠိုၚ် ပသာ်သ္ဂောံသ္ပ ပွမပါ်ဒကးသၚ် ပွမလီုပလာ်အာဏာစက် ခမဳဂေါတမအိုတ်ရော? ရဴဝွံ ဟီုသ္ဂးကဵုဒေဝဒတ်ရ။
ယွံကောန်တၠတအ် ဩဝ်ကၠုၚ်အိုတ်ညိ၊ ပိုဲညးဂမၠိုၚ် ပြာပ်အာဇရေၚ် ခမဳဂေါတမတုဲ “ယွံတဳလမၞုံပိုဉ် တဳလမၞုံပိုဉ်ကျာ်တြဲဂှ် နဟိုတ်မဂၠိုၚ်ဂၠၚ် မၞုံအလေံဟီုသ္ဂးတဴဂုဏ် ပွမပၟိက်အောန် ပွမအေၚ်သတှ်ေ (တရိုပ်စိုတ်) ပွမတှ်ေတြဳထောံကိလေသ ပွမခါလယှ်ထောံကိလေသ ပွမရၚ်တၠုၚ်ကဵုလျုၚ်ဇြုၚ်သ္ဍိုက် ပွမဟွံဆန်ၜန်ကိလေသ ပွမပတိတ်ဇြဟတ် နဝဳရိယရ၊ ယွံတဳလမၞုံပိုဉ် ဝတ္ထုဂမၠိုၚ်မသုန်သာ်ဝွံ နဟိုတ်မဂၠိုၚ်ဂၠၚ် ဒှ်တဴ တၞဟ်နပွမပၟိက်အောန် တၞဟ်နပွမအေၚ်သတှ်ေ (တရိုပ်စိုတ်) တၞဟ်နပွမတှ်ေတြဳထောံကိလေသ တၞဟ်နပွမခါလယှ်ထောံကိလေသ တၞဟ်နပွမရေၚ်တၠုၚ်ကဵုလျုၚ်ဇြုၚ်သ္ဍိုက် တၞဟ်နပွမဟွံဆန်ၜန်ကိလေသ တၞဟ်နပွမတိတ်ဇြဟတ် နဝဳရိယအိုတ်ရ၊ အာတ်ပါန်အခေါၚ်ရ ယွံကျာ်မၞုံပိုဉ်။
(၁) ခမဳဂမၠိုၚ် စဵုကဵုလအိတ်လမျီု ကဵုဒှ်ညးပဒတဴဘာဂြိုပ်အိုတ်ညိ၊ ယြဴခမဳမွဲ တၞီလုပ်ဘာဇရေၚ်ကွာန်မ္ဂး ကုခမဳဂှ် ကဵုအာစိုပ်ဒုဟ်ညိ။
(၂) စဵုကဵုလအိတ်လမျီု ကဵုဒှ်ညးပကၚ်ရၚ် ဓုတၚ်ပိဏ္ဍပါတ်အိုတ်ညိ၊ ယြဴခမဳမွဲ ဒုၚ်တဲ (ပွမကဵုပိုဉ် ပိဏ္ဍပါတ်နိမန်ကဵုဒါန်) မ္ဂး ကုခမဳဂှ် ကဵုအာစိုပ်ဒုဟ်ညိ။
(၃) စဵုကဵုလအိတ်လမျီု ကဵုဒှ်ညးပကၚ်ရၚ် ဓုတၚ်ပံသုကူအိုတ်ညိ၊ ယြဴခမဳမွဲ ဒုၚ်တဲသ္ၚာဒကာဂမၠိုၚ် ကဵုဒါန်မ္ဂး၊ ကုခမဳဂှ် ကဵုအာစိုပ်ဒုဟ်ညိ။
(၄) စဵုကဵုလအိတ်လမျီု ကဵုဒှ်ညးပကၚ်ရၚ် ဓုတၚ်ရုက္ခမူအိုတ်ညိ၊ ယြဴခမဳမွဲ ပြာပ်အာဘာမၞုံကဵုစၟဳမ္ဂး ကုခမဳဂှ် ကဵုအာစိုပ်ဒုဟ်ညိ။
(၅) စဵုကဵုလအိတ်လမျီု လ္ပကဵုစဖျုန်ကအိုတ်ညိ၊ ယြဴခမဳမွဲ စဖျုန်ကမ္ဂး ကုခမဳဂှ် ကဵုအာစိုပ်ဒုဟ်ညိ” ရဴဝွံ အာတ်တဴ ဝတ္ထုဂမၠိုၚ်မသုန်သာ်ဝွံအိုတ်မ္ဂး၊ ဝတ္ထုဂမၠိုၚ်မသုန်သာ်ဝွံ ခမဳဂေါတမ ကြက်ဟွံကဵုအခေါၚ်ရ၊ ပိုဲညးဂမၠိုၚ် နကဵုဝတ္ထုဂမၠိုၚ်မသုန်သာ်ဝွံ ကြက်ကဵုဂကောံ မၞိဟ်တီကေတ်အိုတ်ရ။ ယွံကောန်တၠတအ် နဝတ္ထုဂမၠိုၚ်မသုန်သာ်ဝွံ တၞဟ်နသ္ပပွမပါ်ဒကးသၚ် ပွမပလီုပလာ် အာဏာစက် ခမဳဂေါတမ သၟဟ်ရထဟေၚ်ရ၊ ယွံကောန်တၠတအ် မၞိဟ်ဂမၠိုၚ်လျုၚ်ဇြုၚ်သ္ဍိုက် ပွမအေၚ်သတှ်ေတွဵုအိုတ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ဒေဝဒတ် မွဲဟာန်ကေုာံပရိသာတ် ပြာပ်အာဇရေၚ် တဳလမၞုံပိုဉ်ကျာ်တြဲတုဲလ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး ဂဇအ်ကေတ်ပ္ဍဲဒၞာဲမွဲတုဲ—
ယွံတဳလမၞုံပိုဉ် တဳလမၞုံပိုဉ်ကျာ်တြဲဂှ် နဟိုတ်မဂၠိုၚ်ဂၠၚ် မၞုံအလေံဟီုသ္ဂးတဴဂုဏ် ပွမပၟိက်အောန် ။ ပ ။ ပွမပတိတ်ဇြဟတ် နဝဳရိယရ၊ ယွံတဳလမၞုံပိုဉ် ဝတ္ထုဂမၠိုၚ် မသုန်သာ်ဝွံ နဟိုတ်မဂၠိုၚ်ဂၠၚ် ဒှ်တဴ တၞဟ်နပွမပၟိက်အောန် ။ ပ ။ တၞဟ်နပွမပတိတ်ဇြဟတ် နဝဳရိယအိုတ်ရ၊ အာတ်ပါန်အခေါၚ်ရ ယွံကျာ်မၞုံပိုဉ် ခမဳဂမၠိုၚ် စဵုကဵုလအိတ်လမျီု ကဵုဒှ်ညးပဒတဴ ဘာဂြိုပ်အိုတ်ညိ၊ ယြဴခမဳမွဲ တၞီလုပ်ကွာန်မ္ဂး၊ ကုခမဳဂှ် ကဵုအာစိုပ်ဒဟ်ညိ ။ ပ ။ စဵုကဵုလအိတ်လမျီု လ္ပကဵုစဖျုန်ကအိုတ်ညိ၊ ယြဴခမဳမွဲ စဖျုန်ကမ္ဂး၊ ကုခမဳဂှ် ကဵုသစိုပ်ဒုဟ်ညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။ (ပါဠိဟွံခ္ဍန်ရ)
ယွံဒေဝဒတ် ဟွံဗဗွဲထေက်ကြိုက်ရ၊ ယြဴခမဳမွဲ နွံပၟိက်မ္ဂး၊ (ခမဳဂှ်) ဩဝ်ကဵုဒှ်ညးပဒတဴ ဘာဂြိုပ်ညိ၊ ယြဴခမဳမွဲ နွံပၟိက်မ္ဂး၊ (ခမဳဂှ်) ဩဝ်ကဵုဒှ်ညးပဒတဴဘာကွာန်ညိ၊ ယြဴခမဳမွဲ နွံပၟိက်မ္ဂး၊ (ခမဳဂှ်) ဩဝ်ကဵုဒှ်ညးပကၚ်ရၚ်ဓုတၚ်ပိဏ္ဍပါတ်ညိ၊ ယြဴခမဳမွဲ နွံပၟိက်မ္ဂး၊ (ခမဳဂှ်) ဩဝ်ကဵုဒှ်ညးပကၚ်ရၚ်ဓုတၚ်ပံသုကူညိ၊ ယြဴခမဳမွဲ နွံပၟိက်မ္ဂး၊ (ခမဳဂှ်) ဩဝ်ကဵုဒှ်ညးဒုၚ်တဲသ္ၚာ ဒကာဂမၠိုၚ်ကဵုဒါန်ညိ၊ ယွံဒေဝဒတ် လုကဴဒ္စါံဂိတုဂမၠိုၚ် အဲ ဂပ်ဝ်ကဵုလဝ်အခေါၚ် သၞာသတိက် သၞာဒၟံၚ်သၟဝ်တၞံဆုတုဲရ၊ ဂပ်ဝ်ကဵုလဝ်အခေါၚ် ကဖျုန်မသအးဇ္ၚး နူလအိတ်ပိ မဂပ်ဝ်တွံဂး ဟဂပ်ဝ်ညာတ် ဟဂပ်ဝ်မိၚ် ဟဂပ်ဝ်သၠေဟ်ပၟာတုဲရ ရဴဝွံ (သ္ဂးရ)။
ပ္ဍဲအခိၚ်ဂှ် ဒေဝဒတ် “တဳလမၞုံပိုဉ်ကျာ်တြဲ ဟွံကဵုအခေါၚ် ဝတ္ထုမသုန်သာ်ဝွံရ” ရဴဝွံမိပ်သၠောၚ်သ္ပဝ်မြဟ်တိုန်ဒှ်တုဲ မွဲဟာန်ကေုာံပရိသာတ် ဒၠိုက်ကတဵုနူဒၞာဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး သ္ပရှေ်သှေ်ရဴဂဴကၠာ ပါဲစ္ဍးအာရ။
ပ္ဍဲအခိၚ်ဂှ် ဒေဝဒတ် လုပ်အာ ဍုၚ်ရာဇဂြိုပ်တုဲ “ယွံကောန်တၠတအ် ပိုဲညးဂမၠိုၚ် ပြာပ်အာဇရေၚ် ခမဳဂေါတမတုဲ ‘ယွံတဳလမၞုံပိုဉ် တဳလမၞုံပိုဉ်ကျာ်တြဲဂှ် နဟိုတ်မဂၠိုၚ်ဂၠၚ် မၞုံအလေံ ဟီုသ္ဂးတဴဂုဏ် ပွမပၟိက်အောန် ။ ပ ။ တၞဟ်နပွမပတိတ်ဇြဟတ် နဝဳရိယအိုတ်ရ။ အာတ်ပါတ်အခေါၚ်ရ ယွံကျာ်မၞုံပိုဉ် ခမဳဂမၠိုၚ် စဵုကဵုလအိတ်လမျီု ကဵုဒှ်ညးပဒတဴပ္ဍဲဂြိုပ်အိုတ်ညိ၊ ယြဴခမဳမွဲ တၞီလုပ်ကွာန်မ္ဂး၊ ကုခမဳဂှ် ကဵုအာစိုပ် ဒုဟ်ညိ ။ ပ ။ စဵုကဵုလအိတ်လမျီု လ္ပကဵုစဖျုန်ကအိုတ်ညိ၊ ယြဴခမဳမွဲ စဖျုန်ကမ္ဂး၊ ကုခမဳဂှ် ကဵုအာစိုပ်ဒုဟ်ညိ’ ရဴဝွံ အာတ်တဴ ဝတ္ထုဂမၠိုၚ် မသုန်သာ်ဝွံအိုတ်တုဲရ၊ ဝတ္ထုဂမၠိုၚ် မသုန်သာ်ဝွံ ခမဳဂေါတမ ဟွံကဵုအခေါၚ်ရ၊ ပိုဲညးဂမၠိုၚ်ဂှ် ဒဂိုန်ဒ္ဂေတ် နကဵုဝတ္ထုဂမၠိုၚ်မသုန်သာ်ဝွံ အိုတ်ရ” ရဴဝွံ ကဵုဂကောံမၞိဟ်တီကေတ် နဝတ္ထုဂမၠိုၚ် မသုန်သာ်ရ။
ပၞောဝ်ဂကောံဂမၠိုၚ်ဂှ် ယြဴမၞိဟ်ဂမၠိုၚ် ပတှ်ေ (ရတ်ပိပြကာ) အိုတ်ရ၊ ဟွံလျုၚ်ဇြုၚ်သ္ဍိုက်အိုတ်ရ၊ မၞိဟ်ဂမၠိုၚ်ဂှ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ လယှ်ပတိတ် ကိလေသအိုတ်ရ၊ မၞုံကဵုပွမဂယိုၚ်လမျီုအေၚ်သတှ်ေအိုတ်ရ၊ ခမဳဂေါတမ လာဘ်သကာဂၠိုၚ်ဂှ်တုန် ပတိတ်ဒြဟတ်ပကီုလွဳပရာ တၞဟ်နဖဵုလာဘ်သကာဂၠိုၚ်ရ” ရဴဝွံ ဟီုသ္ဂးအိုတ်ရ။
ယြဴမၞိဟ်ဂမၠိုၚ်တုန် ပတှ်ေ (ရတ်ပိပြကာ) အိုတ်ရ၊ လျုၚ်ဇြုၚ်သ္ဍိုက်အိုတ်ရ၊ မၞုံကဵုပညာအိုတ်ရ၊ စဳကၠးဆိုက်ဗ္ဒက်အိုတ်ရ၊ မၞုံကဵုဂမြၚ်ဉာဏ်အိုတ်ရ၊ မၞိဟ်ဂမၠိုၚ်ဂှ် “ဒေဝဒတ် မုဟိုတ် သ္ပလွဳပရာ တၞဟ်နပွမပါ်ဒကးသၚ် တၞဟ်နပွမပလီုပလာ်အာဏာစက် တဳလမၞုံပိုဉ်ကျာ်တြဲရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်ဂှ်အိုတ်ဟေၚ်ရ၊ ခမဳပၟိက်အောန်ဂမၠိုၚ်ဂှ် “ဒေဝဒတ် မုဟိုတ် သ္ပလွဳပရာ တၞဟ်နပွမပါ်ဒကးသၚ် တၞဟ်နပွပလီုပလာ်အာဏာစက်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ဒေဝဒတ် နဟိုတ်ဂမၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ ။
ယွံဒေဝဒတ် တၠအဲ သ္ပလွဳပရာ တၞဟ်နပွမပါ်ဒကးသၚ် တၞဟ်နပွမပလီုပလာ်အာဏာစက်ရဟီုဂှ် ဍာံပြဟာ ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။
ယွံဒေဝဒတ် တၠအဲ လ္ပသ္ဍိုက်မၠိုက် ပွမပါ်ဒကးသၚ်ညိ၊ ယွံဒေဝဒတ် ပွမပါ်ဒကး သၚ်ဂှ် ဇြိုၚ်လောန်ရ၊ ယွံဒေဝဒတ် ညးပါ်ဒကးသၚ်မညဳသာသၟဟ်သၟန်ဂှ် ကဵုဇၞော်မောဝ်တဴ ပွသရာံပါပ် မကဵုတဴ လုကဴမွဲကပ် (ကဝ်) ရ၊ ဒးဒုၚ်စိန်ဂၠက် ပ္ဍဲနရက် လုကဴမွဲကပ်ရ၊ ယွံဒေဝဒတ် ညးမသ္ပ သၚ်မပါ်ဒကး ညံၚ်ဂွံညဳသာသၟဟ်သၟန်ဂှ် ကဵုဇၞော်မောဝ်တဴ ကုသိုလ်မပြဲရ၊ ဂွံမိပ်ဇြိပ်လဟိၚ် ပ္ဍဲဍုၚ်သွဝ် လုကဴမွဲကပ်ရ၊ ယွံဒေဝဒတ် ဟွံဗဗွဲထေက်ကြိုက်ရ၊ ယွံဒေဝဒတ် တၠအဲ လ္ပသ္ဍိုက်မၠိုက် ပွမပါ်ဒကးသၚ်ညိ၊ ယွံဒေဝဒတ် ပွမပါ်ဒကးသၚ်ဂှ် ဇြိုၚ်လောန်ရ ရဴဝွံ (သ္ဂးရ)။
ပ္ဍဲအခိၚ်ဂှ် တဳလပိုဉ်အာနန္ဒ ပ္ဍဲအခိၚ်နူဂယ သၠောံရုၚ်လတက်ပဠေဝ်သ္ၚာတုဲ ဂိုၚ်ကေတ်ဗဗေၚ်သ္ၚာတုဲမ္ဂး လုပ်ဂ္ၚေၚ်ပိဏ္ဍပါတ် ဍုၚ်ရာဇဂြိုဟ်ရ။ ဒေဝဒတ် ညာတ်ဒး တဳလပိုဉ်အာနန္ဒ မဂေတ်ဂ္ၚေၚ် ဒၟံၚ်ပိဏ္ဍပါတ် ပ္ဍဲဍုၚ်ရာဇဂြိုဟ်တုဲ ပြာပ်အာဇရေၚ် တဳလပိုဉ်အာနန္ဒတုဲပ္ဍဲကြဴ “ယွံကောန်တၠအာနန္ဒ သ္ပတမ်တ္ၚဲဝွံတုဲ တၞဟ်ခြာကေုာံကျာ်ဟေၚ် တၞဟ်ခြာကေုာံသၚ်ဟေၚ်အဲ ကြက်သ္ပဥပေါသ်ရ၊ ကြက်သ္ပသံဃကမ်ရ” ရဴဝွံ ဟီုသ္ဂးကဵုတဳလပိုဉ်အာနန္ဒရ။
ပ္ဍဲအခိၚ်ဂှ် တဳလပိုဉ်အာနန္ဒ ဂေတ်ဂ္ၚေၚ်ပိဏ္ဍပါတ် ပ္ဍဲဍုၚ်ရာဇဂြိုဟ်တုဲ ကဵုပိုဉ်တုဲပ္ဍဲကြဴ ပါဲစ္ဍးကၠုၚ်နူကွာန်ဂ္ၚေၚ်ပိဏ္ဍပါတ်တုဲ ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး သီုမဂဇအ်ဒၟံၚ် ပ္ဍဲဒၞာဲမွဲဂှ်—
“ယွံတဳလမၞုံပိုဉ် အဲဍိက် ပ္ဍဲအခိၚ်နူဂယး သၠောံရုၚ်လတက်ပဠေဝ်သ္ၚာတုဲ ဂိုၚ်ကေတ်ဗဗေၚ်သ္ၚာတုဲမ္ဂး လုပ်ဂ္ၚေၚ်ပိဏ္ဍပါတ် ဍုၚ်ရာဇဂြိုဟ်ရ။ ယွံတဳလပိုဉ် ဒေဝဒတ် ညာတ်ဒး အဲဍိက် မဂေတ်ဂ္ၚေၚ် ဒၟံၚ်ပိဏ္ဍပါတ် ပ္ဍဲဍုၚ်ရာဇဂြိုဟ်တုဲ ပြာပ်အာဇရေၚ် အဲဍိက်တုဲမ္ဂး ‘ယွံကောန်တၠအာနန္ဒ သ္ပတမ်တ္ၚဲဝွံတုဲ တၞဟ်ခြာကေုာံကျာ်ဟေၚ် တၞဟ်ခြာကေုာံသၚ်ဟေၚ်အဲ ကြက်သ္ပဥပေါသ်ရ၊ ကြက်သ္ပသံဃကမ်ရ’ ရဴဝွံ ဟီုသ္ဂးကဵုအဲဍိက်ရ၊ ယွံတဳလပိုဉ် ဒေဝဒတ် သ္ပတမ်နူတ္ၚဲဝွံတုဲ ကြက်ပါ်ဒကးသၚ်ရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ တီကေတ်ဟိုတ်ဂှ်တုဲ ပ္ဍဲအခိၚ်ဂှ်—
ညးသပ္ပုရိုဟ်ဂှ် သွက်ဂွံပတုဲသ္ပ ပွကုသိုလ် လောဲသွာရ၊ ညးယုတ်မာဂှ် သွက်ဂွံပတုဲသ္ပပွကုသိုလ် ဇြိုၚ်သန်ရ၊ ညးယုတ်မာဂှ် သွက်ဂွံပတုဲသ္ပ ပွသရာံပါပ် လောဲသွာရ၊ ညးသပ္ပုရိုဟ် ခိုဟ်ပြဲဂမၠိုၚ် သွက်ဂွံပတုဲသ္ပပွသရာံပါပ် ဇြိုၚ်သန်ရ ရဴဝွံ ကြီုဂအောတ်တိုန်ဥဒါန်ရ။
✵✵✵ခဏ်ဒုတိယတုဲရ။✵✵✵
