၇.၂.၅။ ကဵုဗလးစိုၚ်နာဠာဂိရိ
၃၄၂။ ပ္ဍဲအခိၚ်ဂှ် ပ္ဍဲဍုၚ်ရာဇဂြိုဟ် စိၚ်မၞုံယၟုနာဠာဂိရိ ကြမ်ကြသအဵုသအာ်ရ၊ လေပ်ဂစိုတ်မၞိဟ်ရ၊ ဒေဝဒတ် လုပ်အာဍုၚ်ရာဇဂြိုဟ်တုဲ အာရုၚ်စိၚ်တုဲမ္ဂး−
“ယွံမၞးတအ် ပိုဲညးဂမၠိုၚ်တုန် ညးဍုက်ကေဝ်ဒဒှ်ေဒယှ်ကဵုသၟိၚ်ဂမၠိုၚ်ရ၊ ညးကဆံၚ်ဂုဏ်သဝ်ဂှ် သွက်ဂွံကဵုကဆံၚ်သၠုၚ်တိုန်ကီု သွက်ဂွံကဵုဇွောံမစရိတ်ဂိတုဂၠိုၚ်တိုန်ကီု သၟဟ်စောံအိုတ်ရ၊ ယွံမၞးတအ် ဟိုတ်ဂှ်ရ ခမဳဂေါတမ အခိၚ်မက္ညကၠုၚ် ဂၠံၚ်တရဴဝွံ သှ်ကၠေံစိၚ်နာဠာဂိရိဝွံတုဲ ဩဝ်ဗလးဏာ ဂၠံၚ်တရဴဝွံအိုတ်ညိ” ရဴဝွံ ဟီုသ္ဂးကဵုဂမာစိၚ်ဂမၠိုၚ်ရ။
“ယွံတဳလပိုဉ် ခိုဟ်ရ” ရဴဝွံ ဂမာစိၚ်ဂမၠိုၚ်ဂှ် ဒုၚ်ဝန် ဒေဝဒတ်အိုတ်ရ။
ပ္ဍဲအခိၚ်ဂှ် တဳလမၞုံကဵုပိုဉ်ကျာ်တြဲ ပ္ဍဲအခိၚ်နူဂယး ဗိုက်ပဠေဝ်ပဠေတ်သ္ၚာတုဲ သီုမထ္ၜဂိုၚ်ရပ်ကေတ်ဗဗေၚ်သ္ၚာဂှ် က္ညလုပ်အာဂ္ၚေၚ်ပိဏ္ဍပါတ် အပ္ဍဲဍုၚ်ရာဇဂြိုဟ် မွဲဟာန်ကေုာံခမဳဂမၠိုၚ်မဂၠိုၚ်ရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ က္ညအာဂၠံၚ်တရဴဂှ်ရ။ ဂမာစိၚ်ဂမၠိုၚ်ဂှ် ညာတ်ဒးတဳလမၞုံပိုဉ်ကျာ်တြဲ မက္ညကၠုၚ်နဂၠံၚ်တရဴဂှ်တုဲ သှ်ဗလးကၠေံစိၚ်နာဠာဂိရိတုဲ သကဵုအာဂၠံၚ်တရဴဂှ်အိုတ်ရ။ စိၚ်နာဠာဂိရိ ညာတ်ဒး တဳလမၞုံပိုဉ်ကျာ်တြဲ မက္ညကၠုၚ်ဒၟံၚ် နူဇမ္ၚောဲတုဲ ယာပတိုန်လပှ်တုဲမ္ဂး သီုမပကာပၠးပကိုၚ်လဝ် သၠကတောဝ်ကေုာံဗ္တဂှ် ဂြိပ်တူရူကၠုၚ်ကဵု တဳလမၞုံပိုဉ်ကျာ်တြဲရ။
ခမဳဂမၠိုၚ် ညာတ်ဒး စိၚ်နာဠာဂိရိ မကၠုၚ်နူဇမ္ၚောဲတုဲ—
“ယွံတဳလမၞုံပိုဉ် စိၚ်နာဠာဂိရိဝွံ ကြမ်ကြသအဵုသအာ်ရ၊ လေပ်ဂစိုတ်မၞိဟ်ရ၊ ကၠုၚ်ဒၟံၚ်ဂၠံၚ်တရဴဝွံရ၊ ယွံတဳလမၞုံပိုဉ် တဳလမၞုံပိုဉ်ကျာ်တြဲ မပတၠပိုဉ်တြဴပြကာ သြဝ်ပါဲအာညိ၊ တဳလမၞုံပိုဉ်ကျာ်တြဲ မက္ညကၠုၚ်ခိုဟ်ဆာဲ သြဝ်ပါဲအာညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဩဝ်ကၠုၚ်အိုတ်ညိ၊ လ္ပဖေက်အိုတ်ညိ။ ယွံခမဳတအ် နကဵုလွဳပရာညးသအာၚ် ဟိုတ်အရာမဂစိုတ် ကျာ်တြဲမာန်ဂှ် အခေါၚ်ဟွံမွဲရ။ ယွံခမဳတအ် ကျာ်တြဲဂမၠိုၚ် သီု (ညးသအာၚ်ဂမၠိုၚ်) ဟွံဒးသ္ပလွဳပရာ သ္ပပရိနိဗ္ဗာန်အိုတ်ရ ရဴဝွံ (သ္ဂးရ)။
ခမဳဂမၠိုၚ်ဂှ် မရနုက်ကဵုၜါဝါလေဝ် ။ ပ ။ ခမဳဂမၠိုၚ် မရနုက်ကဵုပိဝါလေဝ် “ယွံတဳလမၞုံပိုဉ် စိၚ်နာဠာဂိရိဝွံ ကြမ်ကြသအဵုသအာ်ရ၊ လေပ်ဂစိုတ်မၞိဟ်ရ၊ ကၠုၚ်ဒၟံၚ်ဂၠံၚ်တရဴဝွံရ၊ ယွံတဳလမၞုံပိုဉ် တဳလမၞုံပိုဉ်ကျာ်တြဲ မပတၠပိုဉ်တြဴပြကာ သြဝ်ပါဲအာညိ၊ တဳလမၞုံပိုဉ်ကျာ်တြဲ မက္ညကၠုၚ်ခိုဟ်ဆာဲ သြဝ်ပါဲအာညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဩဝ်ကၠုၚ်အိုတ်ညိ၊ လ္ပဖေက်အိုတ်ညိ။ ယွံခမဳတအ် နကဵုလွဳပရာညးသအာၚ် ဟိုတ်အရာမဂစိုတ် ကျာ်တြဲမာန်ဂှ် အခေါၚ်ဟွံမွဲရ။ ယွံခမဳတအ် ကျာ်တြဲဂမၠိုၚ် သီု (ညးသအာၚ်ဂမၠိုၚ်) ဟွံဒးသ္ပလွဳပရာ သ္ပပရိနိဗ္ဗာန်အိုတ်ရ ရဴဝွံ (သ္ဂးရ)။
ပ္ဍဲအခိၚ်ဂှ် မၞိဟ်ဂမၠိုၚ် တိုန်ပ္ဍဲပြာသာဒ်ဇမၠိၚ်ဂမၠိုၚ်ကီု ပ္ဍဲပြာသာဒ်ခၠုပ်ဂမၠိုၚ်ကီု ပ္ဍဲကၟဳသ္ၚိဂမၠိုၚ်ကီုတုဲ ပဒတဴဒၟံၚ်အိုတ်ရ။
ပၞောဝ်မၞိဟ်ဂမၠိုၚ်ဂှ် မၞိဟ်ဟွံမွဲကဵုပွမပတှ်ေ ပွမလျုၚ်ဇြုၚ်သ္ဍိုက် ဟွံမွဲကဵုဉာဏ်ဂမၠိုၚ် “ယွံသကအ်တအ် ခမဳဇၞော်ဂှ် ရုပ်သာ်ကျေဝ်ဂေါဝ်လောန်ရ၊ စိၚ် ကြက်ဂပ်ဝ်ပြိုက်ပျဲရ” ရဴဝွံ ဟီုသ္ဂးအိုတ်ရ။
ၜိုန်ဂှ် မၞိဟ်မၞုံကဵုပွမပတှ်ေ ပွမလျုၚ်ဇြုၚ်သ္ဍိုက် မၞုံကဵုပညာ မၞုံကဵုဉာဏ်ဂမၠိုၚ်တုန် “ယွံသကအ်တအ် စိၚ် (နာဠာဂိရိ) ဂှ် ခြာဟွံလအ် ကြက်ထ္ပက်ပၞာန် ကေုာံစိၚ် (မတွံဂးကျာ်တြဲ) ရသွံ” ရဴဝွံ ဟီုသ္ဂးအိုတ်ရ။
ပ္ဍဲအခိၚ်ဂှ် တဳလမၞုံကဵုပိုဉ်ကျာ်တြဲ ဓလီုလဝ် စိၚ်နာဠာဂိရိ နကဵုမေတ္တာစိုတ်ရ၊ ပ္ဍဲအခိၚ်ဂှ်စိၚ်နာဠာဂိရိဂှ် ဟိုတ်မဒွံဒး ကေုာံမေတ္တာစိုတ် တဳလမၞုံကဵုပိုဉ်ကျာ်တြဲဂှ်ရ ဖျေံကၠေံ လပှ်တုဲပြာပ်အာဇရေၚ် တဳလမၞုံကဵုပိုဉ်ကျာ်တြဲတုဲမ္ဂး ဒတူဒၟံၚ် ပ္ဍဲဂတတဳလမၞုံကဵုပိုဉ်ကျာ်တြဲရ။ ပ္ဍဲအခိၚ်ဂှ်တဳလမၞုံကဵုပိုဉ်ကျာ်တြဲ ဇွိတ်သပေါတ် ကၟံၚ်ကွိုတ်စိၚ်နာဠာဂိရိ နကဵုတဲပုၚ်တုဲ ဖ္ဍောတ်ကဵုစိၚ် နာဠာဂိရိ နဂါထာဂမၠိုၚ်ဝွံရ။
“ယွံစိၚ်နာဠာဂိရိ လ္ပပြာပ်ကာတ်ကၠုၚ် ဇရေၚ်စိၚ်မတွံဂးကျာ်ညိ၊ ယွံစိၚ်နာဠာဂိရိ ပွမပြာပ်ကာတ်ကၠုၚ် ဇရေၚ်စိၚ်မတွံဂးကျာ်ဂှ် ဒှ်ဒဒိုခ်ဟေၚ်ရ၊ ယွံစိၚ်နာဠာဂိရ ကုညးဂစိုတ်စိၚ်မတွံဂးကျာ်ဂှ် နူဘဝဝွံ အာဘဝကြဴမ္ဂး ဂတိခိုဟ် ဒှ်ဟွံမာန်ရ၊ လ္ပဗ္ၜူမာန်ညိ၊ လ္ပဟိုတ်မာဲညိ၊ ညးဟိုတ်မာဲဂမၠိုၚ်ဂှ် အာစိုပ်ဂတိခိုဟ် ဟွံမာန်အိုတ်ရ၊ ဗွဲမဗဗွဲကဵုအကာဲအရာ မအာစိုပ်ဂတိခိုဟ်မာန်ဂှ် တၠအဲဟေၚ် ဒးသ္ပရ” ရဴဝွံ (သ္ဂးရ)။
ပ္ဍဲအခိၚ်ဂှ် စိၚ်နာဠာဂိရိ ဂိုၚ်ကေတ် ခၞိက်ဇိုၚ်တဳလမၞုံပိုဉ်ကျာ်တြဲဂမၠိုၚ် နကဵုလပှ်တုဲ ကြုဲစုတ် ပ္ဍဲလတူက္ဍိုပ်တုဲမ္ဂး စဵုကဵုစိုပ်ဌာန် မဂွံညာတ်ကေတ်ကျာ် ထံၚ်ကလဵုကျဝ် ဖျဝ်က္ၜံၚ်ၜါ ဆုတ်အာရ။ ကြဴနူဂှ် စိၚ်နာဠာဂိရိဂှ် အာရုၚ်စိၚ်တုဲ ဒတူဒၟံၚ်ပ္ဍဲဒၞာဲဇကုရ၊ နအကာဲအရာဂှ် စိၚ်နာဠာဂိရိ ယေန်သၞာၚ်အာရ။ ပ္ဍဲအခိၚ်ဂှ် မၞိဟ်ဂမၠိုၚ် “ညးလ္ၚဵုဂမၠိုၚ်ဂှ် ဒၠောံဗတောန်တဴ နကဵုလေံဗၞုဟ်ကီု နကဵုဇၜံက်ဂမၠိုၚ်ကီု နကဵုလေံကလး လေံၜဝ်ဂမၠိုၚ်ကီုအိုတ်ရ ကျာ်တြဲဂှ် သီုဗၞုဟ်ဟွံပါသီုလွဟ်လနက်ဟွံပါ ဒၠောံဗတောန်ဏာ စိၚ်နာဠာဂိရိရ” ရဴဝွံ ဖ္ဍောတ်ဂယှေ် နကဵုဂါထာအိုတ်ရ။
“ဒေဝဒတ်ဝွံ ယုတ်မာလောန်ရ၊ ဒှ်ညးဟွံမွဲကျာ်သြဳလောန်ရ၊ ပတိတ်ဇြဟတ် သွက်ဂွံဂစိုတ် ခမဳဂေါတမ ဣဒ္ဓိကြဳဇှ်အာနုဘဴမဇၞော်ရဴဝွံရသွံ” ရဴဝွံ မၞိဟ်ဂမၠိုၚ် ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
လာဘ်သက္ကာ ဟုတ်ယုတ်အာ ကုဒေဝဒတ်တုဲ လာဘ်သက္ကာ တဴတက်ကၠုၚ် ကုတဳလမၞုံပိုဥ်ကျာ်တြဲရ။
