၇.၂.၄။ ပွမကဵုဆီကျာ်ပ္ဍူအာ
၃၄၁။ တဳလမၞုံပိုဉ်ကျာ်တြဲ ပ္ဍဲအခိၚ်မကွာ်ဒၟံၚ်စၚ်္ကြမ် ပ္ဍဲသၞိၚ်ဒဵုဂိဇ္ၛကုဋ်ဂှ် ဒေဝဒတ်တိုန်ဒဵုဂိဇ္ၛကုဋ်တုဲ “နကဵုတၟံကဠောံဝွံ ကြက်ဂစိုတ် ခမဳဂေါတမရ” ရဴဝွံ ပၠူဖျေံ တၟံကဠောံမဇၞော်ရ။
အထောဋ်ဒဵုဂမၠိုၚ်ၜါ ကၠုၚ်တုဲ ဒုၚ်ဂိုၚ်ကေတ် တၟံကဠောံမပၠူဖျေံဂှ်အိုတ်ရ၊ သတှ်ေ (ကွပ်) တၟံ မကလာၚ်တိတ်ကၠုၚ် နူတၟံကဠောံဂှ် ကဵုကတဵုဒှ်ဆီပ္ဍဲဇကု တဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ လ္ၚာ်ရံၚ်လတူတုဲမ္ဂး “ယွံတြုံမလ္ၚုသၟး (နူမဂ်ဖိုလ်) တၠအဲကဵုဇၞော်မောဝ်တဴ ပွမသရာံပါပ် ဗွဲမဂၠိုၚ်ရ၊ တၠအဲ မၞုံကဵုစိုတ်မမိက်ပလီုပလာ် (စိုတ်မဂြိုဟ်စာ) မၞုံစိုတ်မမိက်ဂစိုတ်ဒှ်တုဲ ကဵုကတဵုဒှ်ဆီ ကုအဲကျာ်ရ” ရဴဝွံ သ္ဂးကဵုဒေဝဒတ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ယွံခမဳတအ် ဒေဝဒတ် လ္ၚတ်ဆန်ၜန် အာနန္တရိယကမ်ဝွံ ဗွဲကိုပ်ကၠာတုဲရ၊ နကဵုစိုတ်မမိက်ပလီုပလာ် (စိုတ်မဂြိုဟ်စာ) စိုတ်မမိက်ဂစိုတ်ဂှ် ကဵုကတဵုဒှ်ဆီ ကုအဲကျာ်ရ” ရဴဝွံ သ္ဂးကဵုခမဳဂမၠိုၚ်ရ။
“ဒေဝဒတ် ပတိတ်ဇြဟတ် ပွမဂစိုတ် ကုတဳလမၞုံပိုဉ်ကျာ်တြဲရဂး” ရဴဝွံ ခမဳဂမၠိုၚ် မဂွံမိၚ်ကေတ်ဂှ် နူဌာန်ပွဳပွူပွဳပွူ ဘာတဳလမၞုံပိုဉ်ကျာ်တြဲ မၞုံကဵုဗရုရမျာၚ် မသကာတ်မြဟ်ဇၞော်လှဲဂမၠိုၚ်ဒှ်တုဲ သီုမသ္ပတဴ ပွမဖ္ဍောတ်သှ်ၛာယ်ဂမၠိုၚ်ဂှ် တၞဟ်နဖဵုပွမၚ်မွဲ ပွမဆေဝ်ဒဝ် ပွမဂြောပ်ဗ္ဒန် ကုတဳလမၞုံပိုဉ်ကျာ်တြဲ ကွာ်ဒၟံၚ်စၚ်္ကြမ်အိုတ်ရ။
တဳလမၞုံပိုဉ်ကျာ်တြဲ သ္ဂောံမိၚ်ကေတ် ဗရုရမျာၚ်မသကာတ်မြဟ်ဇၞော်လှဲ ဗရုရမျာၚ်မ ဖ္ဍောတ်သှ်ၛာယ်တုဲ—
“ယွံအာနန္ဒ ဗရုရမျာၚ်မသကာတ်မြဟ်ဇၞော်လှဲ မဖ္ဍောတ်သှ်ၛာယ်ဂှ် မုဗရုရမျာၚ်မွဲရော?” ရဴဝွံ သၟာန်တဳလပိုဉ်အာနန္ဒရ။
“ယွံတဳလမၞုံပိုဉ် ဒေဝဒတ် ပတိတ်ဇြဟတ် ပွမဂစိုတ် ကုတဳလမၞုံပိုဉ်ကျာ်တြဲရဂး” ရဴဝွံခမဳဂမၠိုၚ် ဂွံမိၚ်ကေတ်အိုတ်ရ၊ ယွံကျာ်မၞုံပိုဉ် ခမဳဂမၠိုၚ်ဂှ် နူဌာန်ပွဳပွူပွဳပွူ ဘာတဳလမၞုံပိုဉ်ကျာ်တြဲ မၞုံကဵုဗရုရမျာၚ် မသကာတ်မြဟ်ဇၞော်လှဲဂမၠိုၚ်ဒှ်တုဲ သီုမသ္ပတဴ ပွမဖ္ဍောတ်သှ်ၛာယ်ဂမၠိုၚ်ဂှ် တၞဟ်နဖဵုပွမၚ်မွဲ ပွမဆေဝ်ဒဝ် ပွမဂြောပ်ဗ္ဒန် ကုတဳလမၞုံပိုဉ်ကျာ်တြဲ ကွာ်ဒၟံၚ်စၚ်္ကြမ်အိုတ်ရ။
ယွံတဳလမၞုံပိုဉ် ဗရုရမျာၚ် မသကာတ်မြဟ်ဇၞော်လှဲ မဖ္ဍောတ်သှ်ၛာယ်ဂှ်တုန် ဒှ်ဗရုရမျာၚ်ဂမၠိုၚ်ဝွံရ ရဴဝွံ ဂရၚ်ပတီရ။
ယွံအာနန္ဒ ဒှ်သာ်ဂှ်မ္ဂး နကဵုဂလာန်အဲ “ကျာ်တြဲ ကော်ဒၟံၚ်တဳလပိုဉ်တအ်ရ” ရဴဝွံဩဝ်အာကော် ခမဳဂမၠိုၚ်ဂှ်ညိ ရဴဝွံ သ္ဂးတဴရ။ “ယွံကျာ်မၞုံပိုဉ် ခိုဟ်ရ” ရဴဝွံ တဳလပိုဉ်အာနန္ဒဒုၚ်ဝန် ကုတဳလမၞုံပိုဉ်ကျာ်တြဲတုဲမ္ဂး ပြာပ်အာဇရေၚ် ခမဳဂမၠိုၚ်ဂှ်တုဲ “ကျာ်တြဲ ကော်ဒၟံၚ်တဳလပိုဉ်တအ်ရ” ရဴဝွံ ဟီုသ္ဂးကဵုခမဳဂမၠိုၚ်ဂှ်ရ။ “ယွံကောန်တၠ ခိုဟ်ရ” ရဴဝွံ ဒုၚ်ဝန် ကုတဳလပိုဉ်အာနန္ဒတုဲ ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ်တုဲ ခမဳဂမၠိုၚ် မဂဇအ်ဒၟံၚ်ပ္ဍဲဒၞာဲမဗဗွဲဂှ် တဳလမၞုံပိုဉ်ကျာ်တြဲ သ္ဂးတိုန်ဂလာန်ဝွံရ—
ယွံခမဳတအ် နကဵုလွဳပရာညးသအာၚ် ဟိုတ်အရာမဂစိုတ် ကျာ်တြဲမာန်ဂှ် အခေါၚ်ဟွံမွဲရ။
ယွံခမဳတအ် ကျာ်တြဲဂမၠိုၚ် သီု (ညးသအာၚ်ဂမၠိုၚ်) ဟွံဒးသ္ပလွဳပရာ သ္ပပရိနိဗ္ဗာန်အိုတ်ရ။
ယွံခမဳတအ် အ္စာဂမၠိုၚ်မသုန်တၠဝွံ နွံပြာကဋ် ပ္ဍဲလောကအိုတ်ရ။ မသုန်တၠဂမၠိုၚ်တုန် ညးဍေံဂှ်ရော?၊ ယွံခမဳတအ် ပ္ဍဲလောကဝွံ အ္စာလ္ၚဵုဂှ် သီုဟွံမွဲကဵု သဳလမသအးဇ္ၚးဂှ် “မၞုံကဵုသဳလ သအးဇ္ၚးရ၊ သဳလအဲ သအးဇ္ၚးရ၊ ဗုဒ္စၚ်ဗ္ၜၚ်ရ၊ ဟွံကၠိခ္ဍက်ရ” ရဴဝွံ ဒုၚ်ဝန်ရ။ အ္စာဂှ် ကွး (ညးတေံ) ဂမၠိုၚ် “တြနာဲအ္စာဝွံ သီုဟွံမွဲကဵု သဳလမသအးဇ္ၚးဂှ် ‘မၞုံကဵုသဳလ မသအးဇ္ၚးရ၊ သဳလအဲသအးဇ္ၚးရ၊ ဗုဒ္စၚ်ဗ္ၜၚ်ရ၊ ဟွံကၠိခ္ဍက်ရ’ ရဴဝွံ ဒုၚ်ဝန်ရ၊ ပိုယ်ညးဂမၠိုၚ် ဟီုလဴဗ္စဟိုတ်ပရူပရာဂှ် ကုမၞိဟ်ဂမၠိုၚ်အိုတ်မ္ဂး အ္စာဂှ် ဟွံသ္ဍိုက်မၠိုက်ရ၊ နကဵုဂလာန် မဟွံသ္ဍိုက်မၠိုက်ဂှ်ပိုယ်ညးဂမၠိုၚ် မုဟိုတ်ဂွံဟီုသ္ဂးကဵု အ္စာဂှ်အိုတ်ရော? ထံၚ်ပၚ်လဝ် နကဵုသ္ၚာ ပိဏ္ဍပါတ် ဘာဂဥုဲ မဒှ်ကြိယာဗာပၟၚ်ပၟဲလမျီုမစှေ်စး ကဵုယဲဂမၠိုၚ်ရ၊ ယြဴကမၠောန်မွဲ အ္စာဂှ် သ္ပရ၊ နကဵုကမၠောန်ဂှ်ဟေၚ် အ္စာဂှ် ကြက်ပြာကဋ်ကၠုၚ်ရ” ရဴဝွံ တီကေတ်အိုတ်ရ။ ယွံခမဳတအ် အ္စာဂမၠိုၚ်မၞုံသဘဴ ရဴဝွံ ညးမဒှ်ကွးဂမၠိုၚ် မၚ်မွဲစဵုဒၞါကဵု နူသဳလအိုတ်ရ၊ အ္စာမၞုံသဘဴရဴဝွံဂှ်လေဝ် ရာဒနာမိက်နွံပၟိက် နူဇရေၚ်ကွးဂမၠိုၚ် ပွမမၚ်မွဲစဵုဒၞါကဵု နူသဳလရ။
ယွံခမဳတအ် မွဲဂကူပၠန်တုန်— ပ္ဍဲလောကဝွံ အ္စာလ္ၚဵုဂှ် သီုဟွံမွဲကဵု ပွမဂယိုၚ်လမျီုမသအးဇ္ၚးဂှ် ။ ပ ။ သီုမၞုံကဵုပွမတွံဓရ် ဟွံသအးဇ္ၚးဂှ် ။ ပ ။ သီုမၞုံကဵုပွမဟီုသှ် ဟွံသအးဇ္ၚးဂှ် ။ ပ ။ သီုမၞုံကဵုလညာတ်ညာဏ် ဟွံသအးဇ္ၚးဂှ် “မၞုံကဵုလညာတ်ဉာဏ် မသအးဇ္ၚးရ၊ လညာတ်ညာဏ်အဲ သအးဇ္ၚးရ၊ ဗုဒ္စၚ်ဗ္ၜၚ်ရ၊ ဟွံကၠိခ္ဍက်ရ” ရဴဝွံ ဒုၚ်ဝန်ရ၊ အ္စာဂှ် ကွး (ညးတေံ) ဂမၠိုၚ် “တြနာဲအ္စာဝွံ သီုမၞုံကဵုညးလညာတ်ဉာဏ်ဟွံသအးဇ္ၚးဂှ် “မၞုံကဵုလညာတ်ညာဏ် မသအးဇ္ၚးရ၊ လညာတ်ညာဏ်အဲ သအးဇ္ၚးရ၊ ဗုဒ္စၚ်ဗ္ၜၚ်ရ၊ ဟွံကၠိခ္ဍက်ရ” ရဴဝွံ ဒုၚ်ဝန်ရ။ ပိုယ်ညးဂမၠိုၚ်ဟီုလဴဗ္စ ဟိုတ်ပရူပရာဂှ် ကုမၞိဟ်ဂမၠိုၚ်အိုတ်မ္ဂး အ္စာဂှ် ဟွံသ္ဍိုက်မၠိုက်ရ၊ နကဵုဂလာန် မဟွံသ္ဍိုက်မၠိုက်ဂှ် ပိုယ်ညးဂမၠိုၚ် မုဟိုတ် ဂွံဟီုသ္ဂးကဵု အ္စာဂှ်အိုတ်ရော?၊ ထံၚ်ပၚ်လဝ် နကဵုသ္ၚာပိဏ္ဍပါတ် ဘာ ဂဥုဲ မဒှ်ကြိယာဗာပၟၚ်ပၟဲလမျီုမစှေ်စး ကဵုယဲဂမၠိုၚ်ရ၊ ယြဴကမၠောန်မွဲ အ္စာဂှ်သ္ပရ၊ နကဵုကမၠောန်ဂှ်ဟေၚ် အ္စာဂှ် ကြက်ပြာကဋ်ကၠုၚ်ရ” ရဴဝွံ တီကေတ်အိုတ်ရ။ ယွံခမဳတအ်အ္စာဂမၠိုၚ်မၞုံသဘဴရဴဝွံ ညးမဒှ်ကွးဂမၠိုၚ် မၚ်မွဲစဵုဒၞာကဵု နူလညာတ်ညာဏ်အိုတ်ရ၊ အ္စာမၞုံသဘဴရဴဝွံဂှ်လေဝ် ရာဒနာမိက်နွံပၟိက် နူဇရေၚ်ကွးဂမၠိုၚ် ပွမမၚ်မွဲစဵုဒၞာကဵု နူလညာတ်ဉာဏ်ရ။ယွံခမဳတအ် အ္စာဂမၠိုၚ်မသုန်တၠဝွံ နွံပြာကဋ် ပ္ဍဲလောကအိုတ်ရ။
ယွံခမဳတအ် အဲတုန် ဟိုတ်မၞုံကဵုသဳလသအးဇ္ၚးဂှ်ရ “မၞုံကဵုသဳလမသအးဇ္ၚးရ၊ သဳလအဲသအးဇ္ၚးရ၊ ဗုဒ္စၚ်ဗ္ၜၚ်ရ၊ ဟွံမွဲကဵုပွမကၠိခ္ဍက်ရ” ရဴဝွံ ဒုၚ်ဝန်ရ၊ ကွးဂမၠိုၚ်လေဝ် ဟွံမၚ်မွဲ ဟွံစဵုဒၞါအဲနူသဳလအိုတ်ရ၊ အဲလေဝ် ဟွံရာဒနာမိက် ဟွံနွံပၟိက် နူဇရေၚ်ကွးဂမၠိုၚ် ပွမမၚ်မွဲစဵုဒၞါ နူသဳလရ။
ယွံခမဳတအ် အဲတုန် ဟိုတ်မၞုံကဵုပွမဂယိုၚ်လမျီု သအးဇ္ၚးဂှ်ရ ။ ပ ။ ဟိုတ်မၞုံကဵု ပွမတွံဓရ်သအးဇ္ၚးဂှ်ရ ။ ပ ။ ဟိုတ်မၞုံကဵုပွမဟီုသှ် သအးဇ္ၚးဂှ်ရ ။ ပ ။ ဟိုတ်မၞုံကဵုလညာတ်ဉာဏ် သအးဇ္ၚးဂှ်ရ “မၞုံကဵုလညာတ်ညာဏ် သအးဇ္ၚးရ၊ လညာတ်ညာဏ်အဲ သအးဇ္ၚးရ၊ ဗုဒ္စၚ်ဗ္ၜၚ်ရ၊ ဟွံမွဲကဵုပွမကၠိခ္ဍက်ရ” ရဴဝွံ ဒုၚ်ဝန်ရ၊ ကွးဂမၠိုၚ်လေဝ် ဟွံမၚ်မွဲ ဟွံစဵုဒၞါအဲ နူလညာတ်ဉာဏ်ရ၊ အဲလေဝ် ဟွံရာဒနာမိက် ဟွံနွံပၟိက် နူဇရေၚ်ကွးဂမၠိုၚ် ပွမမၚ်မွဲစဵုဒၞါ နူလညာတ်ညာဏ်ရ။
ယွံခမဳတအ် နကဵုလွဳပရာညးသအာၚ် ဟိုတ်အရာမဂစိုတ် ကျာ်တြဲမာန်ဂှ် အခေါၚ်ဟွံမွဲရ။ ယွံခမဳတအ် ကျာ်တြဲဂမၠိုၚ် သီု(ညးသအာၚ်ဂမၠိုၚ်) ဟွံဒးသ္ပလွဳပရာ သ္ပပရိနိဗ္ဗာန်အိုတ်ရ။ ယွံခမဳတအ် မၞးတအ်ညးဂမၠိုၚ် သြဝ်က္ညအာဘာ မတန်ဒၟံၚ်လၟိုန်ဒမၠိအိုတ်ညိ၊ ယွံခမဳတအ်ဟဂပ်ဝ်မၚ်မွဲ ကျာ်တြဲဂမၠိုၚ်အိုတ်ရ ရဴဝွံ (သ္ဂးရ)။
