၇၂.၃။ ပွမဖအောဝ်ဗလး သၟာဂစိုတ်မၞိဟ်ဂမၠိုၚ်
၃၄၀။ ပ္ဍဲအခိၚ်ဂှ် ဒေဝဒတ် ပြာပ်အာဇရေၚ် ကောန်သၟိၚ်ဗၠာဲအဇာတသတြုတုဲ “ယွံသၟိၚ်မရာဇ် ဩဝ်ဖအောဝ်ဗလး တြုံသကအ်ဂမၠိုၚ်မဂစိုတ် ခမဳဂေါတမညိ” ရဴဝွံ ဟီုသ္ဂးကဵု ကောန်သၟိၚ်ဗၠာဲ အဇာတသတြုရ။
ပ္ဍဲအခိၚ်ဂှ် ကောန်သၟိၚ်အဇာတသတြုဂှ် “ယွံသကအ်တအ် အတိုၚ်တဳလပိုဉ် ဒေဝဒတ်ဟီုဂှ် ဩဝ်သ္ပအိုတ်ညိ” ရဴဝွံ ဖအောဝ်စကာ တြုံသကအ်ဂမၠိုၚ်ရ။
ပ္ဍဲအခိၚ်ဂှ် ဒေဝဒတ်ဂှ် “ယွံဒကာ ဩဝ်အာညိ၊ ခမဳဂေါတမ သ္ပဒတဴဒၟံၚ် ပ္ဍဲဌာန်မၞုံယၟုဝွံရ၊ ဂစိုတ်ထောံ ခမဳဂေါတမဂှ်တုဲမ္ဂး ဩဝ်ကၠုၚ် နကဵုဂၠံၚ်တရဴဝွံညိ” ရဴဝွံ ဖအောဝ်စကာ တြုံမွဲရ။
ပ္ဍဲဂၠံၚ်တရဴဂှ် “ဂစိုတ်ထောံ တြုံမွဲမကၠုၚ် နကဵုဂၠံၚ်တရဴဝွံတုဲမ္ဂး ဩဝ်ကၠုၚ် နကဵုဂၠံၚ်တရဴဝွံအိုတ်ညိ” ရဴဝွံ ဖျေံစွံလဝ်တြုံဂမၠိုၚ်ၜါတၠရ။
ပ္ဍဲဂၠံၚ်တရဴဂှ် “ဂစိုတ်ထောံ တြုံဂမၠိုၚ်ၜါတၠ မကၠုၚ် နကဵုဂၠံၚ်တရဴဝွံတုဲမ္ဂး ဩဝ်ကၠုၚ်နကဵုဂၠံၚ်တရဴဝွံအိုတ်ညိ” ရဴဝွံ ဖျေံလဝ်တြုံဂမၠိုၚ်ပန်တၠရ။
ပ္ဍဲဂၠံၚ်တရဴဂှ် “ဂစိုတ်ထောံ တြုံဂမၠိုၚ်ပန်တၠ မကၠုၚ် နကဵုဂၠံၚ်တရဴဝွံတုဲမ္ဂး ဩဝ်ကၠုၚ်နကဵုဂၠံၚ်တရဴဝွံအိုတ်ညိ” ရဴဝွံ ဖျေံလဝ်တြုံဒ္စါံတၠရ။
ပ္ဍဲဂၠံၚ်တရဴဂှ် “ဂစိုတ်ထောံ တြုံဂမၠိုၚ်ဒ္စါံတၠ မကၠုၚ်နကဵုဂၠံၚ်တရဴဝွံတုဲမ္ဂး ဩဝ်ကၠုၚ်နကဵုဂၠံၚ်တရဴဝွံအိုတ်ညိ” ရဴဝွံ ဖျေံစွံလဝ်တြုံဂမၠိုၚ်စှ်တြဴတၠရ။
ပ္ဍဲအခိၚ်ဂှ် တြုံမွဲတၠဂှ် ဂိုၚ်ကေတ်သၞာ်ကေုာံခဒံၚ် ကၟာဲကေတ် တ္ၚကေုာံဍေၚ်လဴတုဲ ပြာပ်အာဇရေၚ် တဳလမၞုံပိုဉ်ကျာ်တြဲပ္ဍဲကြဴ ဒတူဒၟံၚ် ပ္ဍဲဇရေၚ်တဳလမၞုံပိုဉ်ကျာ်တြဲ နကဵုဇကုမကြံၚ်မ္ၚိုဟ် ‘ဟွံချဳဇတဝ်’ သီုမဖေက်လကိုတ်သမ္ၚာတ် ဇတဝ်ဖြာပ်ဖြာပ်ရ။
တဳလမၞုံပိုဉ်ကျာ်တြဲ ညာတ်ဒး တြုံမဒတူဒၟံၚ် နကဵုဇကုမကြံၚ်မ္ၚိုဟ် ‘ဟွံချဳဇတဝ်’ သီုမဖေက်လကိုတ် သမ္ၚာတ် ဇတဝ်ဖြာပ်ဖြာပ်ဂှ်တုဲ “ယွံဒကာ ဩဝ်ကၠုၚ်ညိ၊ လ္ပဖေက်ညိ” ရဴဝွံ (သ္ဂးရ)။
ပ္ဍဲအခိၚ်ဂှ် တြုံမွဲတၠဂှ် စွံထောံသၞာ်ကေုာံခဒံၚ် ပ္ဍဲဌာန်မဗဗွဲ ဖျေံကၠေံ တ္ၚကေုာံဍေၚ်လဴတုဲ ပြာပ်အာဇရေၚ်တဳလမၞုံပိုဉ်ကျာ်တြဲပ္ဍဲကြဴ မာစှေ် ပ္ဍဲဒၠးဇိုၚ်တဳလမၞုံပိုဉ်ကျာ်တြဲတုဲမ္ဂး—
‘’ယွံကျာ်မၞုံပိုဉ် အတိုၚ်မဒိုဟ်ဓီု အတိုၚ်မဝိဝိၚ် အတိုၚ်မဟွံဍိုဟ်ကေက်စဳကၠး ဒုဟ်ဓလီုဍိုက်ဒး အဲဍိက်တုဲရ။ အဲဍိက်ဂှ် မၞုံစိုတ်မမိက်ပလီုပလာ် (မဒြိုဟ်စာ) မၞုံစိုတ်မမိက်ဂစိုတ်ဒှ်တုဲ ပြာပ်ကၠုၚ်ဌာန်ဝွံရ။ ယွံကျာ်မၞုံပိုဉ် ဒုဟ်ဍိက်ဂှ် ဗွဲအစောံဒုဟ် တၞဟ်နဂွံသ္ၚဳလလမ်မၚ်မွဲ ပ္ဍဲကာလကြဴ တဳလမၞုံပိုဉ်ကျာ်တြဲ ဩဝ်အေၚ်ဒုၚ်ညိကျာ်” ရဴဝွံ ဂရၚ်ပတီရ။
ယွံဒကာ အတိုၚ်မဒိုဟ်ဓီု အတိုၚ်မဝိဝိၚ် အတိုၚ်ဟွံဍိုဟ်ကေက်စဳကၠး ဗွဲစၟတ် ဒုဟ်ဓလီုဍိုက်ဒး တၠအဲတုဲရ။ တၠအဲ မၞုံစိုတ်မမိက်ပလီုပလာ် (မဒြိုဟ်စာ) မၞုံစိုတ်မမိက်ဂစိုတ်ဒှ်တုဲ ပြာပ်ကၠုၚ်ဌာန်ဝွံရ။
ယွံဒကာ တၠအဲ ယြဴဟိုတ်မွဲ ညာတ်ကေတ်ဒုဟ် ဗွဲအစောံဒုဟ်တုဲ ဇအုဲဇဗကၠေံ ဗွဲမဗဗွဲကဵုဓရ်ရ၊ ဟိုတ်ဂှ်ရ ဒုဟ်တၠအဲဂှ် ပိုဲအေၚ်ဒုၚ်အိုတ်ရ။ ယွံဒကာ ယြဴညးမွဲ ညာတ်ကေတ်ဒုဟ် ဗွဲအစောံဒုဟ်တုဲ ဇအုဲဇဗကၠေံ ဗွဲမဗဗွဲကဵုဓရ်ရ၊ ပ္ဍဲကာလကြဴလေဝ် သ္ၚဳလလမ်မၚ်မွဲရ၊ ပွမသ္ပရဴဝွံ ဒှ်ဟိုတ်မဇၞော်မောဝ် ပ္ဍဲဒၠောံဗတောန်ကျာ်ဟေၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ တွံကဵုဂလာန်ဓရ် မဒှ်အတိုၚ်လၟေၚ် ကုတြုံဂှ်ရ၊ ဂလာန်ဓရ်မဒှ်အတိုၚ်လၟေၚ်ဂှ်တုန် ညးဍေံဂှ်ရော?၊ ဂလာန်မစပ်ကဵုဒါနကီု ဂလာန်မစပ်ကဵုသဳလကီုဂလာန်မစပ်ကဵုဍုၚ်သွဝ်ကီု ဒုဟ်ကီု ပွမယုတ်သဝ်ကီု ပွမကၠိခ္ဍက် ကာမဂုဏ်ဂမၠိုၚ်ကီု ဖဵုပ္ဍဲပွမတိတ်ဗၠး (နူကာမဂုဏ်ဂမၠိုၚ်) ကီု ထ္ၜးကဵုရ။
တဳလမၞုံပိုဉ်ကျာ်တြဲ ပ္ဍဲအခိၚ်မတီကေတ် မၞုံကဵုစိုတ်မဒုၚ်စရၚ် မၞုံကဵုစိုတ်မဍိုန်ညောန် မၞုံကဵုစိုတ်စာ်စ္ဍးနူ’နဳဝရဏ’ ကၟာတ်လဒဵု မၞုံကဵုစိုတ်မြဟ်တိုန် မၞုံကဵုစိုတ်မလျုၚ်ဇြုၚ်သ္ဍိုက် ပ္ဍဲတြုံဂှ် ထ္ၜးကဵု ‘ဒုက္ခသစ္စ’ ဒဒိုခ်ကီု ‘သမုဒယသစ္စ’ ဟိုတ်ဒဒိုခ်ကတဵုဒှ်ကီု ‘နိရောဓသစ္စ’ အရာဒဒိုခ် ပၠိုတ်ကီု ‘မဂ္ဂသစ္စ’ ဂၠံၚ်တရဴဒှ်ဟိုတ်အာစိုပ်အရာဒဒိုခ်ပၠိုတ်ကီု မဒှ်ဓရ်ဒေသနာ ‘သာမုက္ကံသိက’ မတီညာတ် ဓမံက်ပတိတ်အလဵုဇကုကျာ်ဂမၠိုၚ်ရ။ ယာတ်ဗုသအး မစာ်စ္ဍးနူကမၠိကၠိခ္ဍက်ဂှ် သၟဟ်ညံၚ်ရဴ ဒုၚ်ဂိုၚ်ကေတ်ဍာ်လွံက် ဗွဲမဒးရးကီု တုပ်တဴသာ်ဂှ်ရ ပ္ဍဲဒၞာဲဂှ်ဟေၚ် “ဓရ်အိုတ်သီု မၞုံသဘဴ ပွမကတဵုဒှ်ဂှ် မၞုံသဘဴပၠိုတ်ရ” ရဴဝွံ ‘သောတာပတ္တိမဂ်ဉာဏ်’ မတ်ဓရ် မဟွံမွဲကဵုမၠိုက် မစာ်စ္ဍး နူကၠိုက်လ္ၚေၚ်ကိလေသဂှ် ကတဵုဒှ် ကုတြုံဂှ်ရ။
ပ္ဍဲအခိၚ်ဂှ် တြုံဂှ် ညာတ်ကေတ်ဓရ်တုဲဂှ်ဒှ်တုဲ အာစိုပ်ဓရ်တုဲဂှ်ဒှ်တုဲ တီကေတ်ဓရ်တုဲဂှ် ဒှ်တုဲ တၞီလုပ်အာဓရ်တုဲဂှ်ဒှ်တုဲ ကလိလောန်အာ သၠေဟ်ပၟာတုဲဂှ်ဒှ်တုဲ စာ်စ္ဍးနူချပ်သၠေဟ်ပၟာ သာ်တေံဟာ, သာ်ဏအ်ဟာတုဲဂှ်ဒှ်တုဲ အာစိုပ်ဂံၚ်သကာ (သက်လှက်) ပ္ဍဲသာသနာကျာ်တြဲတုဲဂှ်ဒှ်တုဲ ဟွံမွဲကဵုညးလျုၚ်ပတှ်ေ မသအာၚ်နူကျာ်ဂှ်ဒှ်တုဲ—
“ယွံတဳလမၞုံပိုဉ် (ဓရ်ဂှ်) ထေက်ကဵုသ္ဍိုက်မၠိုက်လောန်ရ၊ ယွံတဳလမၞုံပိုဉ် (ဓရ်ဂှ်) ထေက်ကဵုသ္ဍိုက်မၠိုက်လောန်ရ၊ ဗွဲဥပမာမ္ဂးတုန် ဝတ္ထုဗကပ်စွံလဝ်ဂှ် သၟဟ်ညံၚ်ရဴဂတးလ္ၚာကဵုကီု ဝတ္ထုဂြောပ်ဗ္ဒန်လဝ်ဂှ် သၟဟ်ညံၚ်ရဴပံက်ထ္ၜးကဵုကီု ကုညး မတ်ဂေတ်တၠိၚ်ဂၠံၚ်ဂှ် သၟဟ်ညံၚ်ရဴ ဟီုလဴကဵုဂၠံၚ်ဍာန်ဍာံစၟတ်ကီု “ညးမၞုံကဵုမတ်မညာတ်ဂမၠိုၚ်ဂှ် ကြက်ဂွံညာတ်ကေတ် ရုပ်သာ်ဂမၠိုၚ်အိုတ်ရ” ရဴဝွံ ပ္ဍဲတိုက်ဒမၠုဂှ် သၟဟ်ညံၚ်ရဴစံၚ်ဗဂဵုကဵု ပၟတ်ကၠေၚ်သ္ဍဴကီု တုပ်သၟဟ်သာ်ဂှ် ဟေၚ်ရ တဳလမၞုံပိုဥ်ဂှ် နကဵုဟိုတ်တၞဟ်တၞဟ် တွံထ္ၜးကဵုဓရ်ရ၊ ယွံတဳလမၞုံပိုဉ် အဲဍိက်ဂှ် ပြာပ်ခ သ္ပစ္ၜုဲစ္ၜော်သကအ်ဗ္ဒကဵု တဳလမၞုံပိုဉ်ကျာ်တြဲရ၊ ဓရ်ဂှ်လေဝ် ပြာပ်ခ သ္ပစ္ၜုဲစ္ၜော်သကအ်ဗ္ဒရ၊ သၚ်ဂှ်လေဝ် ပြာပ်ခ သ္ပစ္ၜုဲစ္ၜော်သကအ်ဗ္ဒရ၊ ယွံတဳလမၞုံပိုဉ် တဳလမၞုံပိုဉ်ဂှ် သ္ပတမ်နူတ္ၚဲဝွံတုဲစဵုကဵုလအိတ်လမျီု အဲဍိက်ဂှ် ဥပးပြာပ်ခ သ္ပစ္ၜုဲစ္ၜော်သကအ်ဗ္ဒရ ရဴဝွံ သြဝ်ဂိုၚ်သမ္တီလဝ်ညိ” ရဴဝွံဂရၚ်ပတီ တဳမၞုံပိုဉ်ကျာ်တြဲရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ “ယွံဒကာ တၠအဲ ဩဝ်လ္ပအာ နဂၠံၚ်တရဴဝွံညိ ဩဝ်အာ နဂၠံၚ်တရဴဝွံညိ” ရဴဝွံ သ္ဂးတုဲ ဗလးထောံတြုံဂှ် နဂၠံၚ်တရဴမွဲသအာၚ်ရ။
ပ္ဍဲအခိၚ်ဂှ် တြုံဂမၠိုၚ်ၜါတၠဂှ် “ပသာ်ရော? တြုံမွဲတၠဂှ် လအ်ကၠုၚ်ကွေံရ” ရဴဝွံ အာတဴ တရဴဒ္စးအိုတ်အိုတ်မ္ဂး ညာတ်ဒး တဳလမၞုံပိုဉ်ကျာ်တြဲ မဂဇအ်ဒၟံၚ်ပ္ဍဲသၟဝ်တမ်ဆုတုဲ ပြာပ်အာဇရေၚ်တဳလမၞုံပိုဉ်ကျာ်တြဲတုဲပ္ဍဲကြဴ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ ဂဇအ်ဒၟံၚ် ပ္ဍဲဒၞာဲမွဲအိုတ်ရ၊ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ တွံကဵုဂလာန်ဓရ် မဒှ်အတိုၚ်လၟေၚ် ကုတြုံဂမၠိုၚ်ဂှ်ရ။ ပ ။
အာစိုပ်ဂံၚ်သကာ (သက်လှက်) ပ္ဍဲသာသနာကျာ်တြဲတုဲဂှ် ဒှ်တုဲ ဟွံမွဲကဵုညးလျုၚ်ပတှ်ေ မသအာၚ်နူကျာ်ဂှ်ဒှ်တုဲ—
“ယွံတဳလမၞုံပိုဉ် (ဓရ်ဂှ်) ထေက်ကဵုသ္ဍိုက်မၠိုက်လောန်ရ ။ ပ ။ ယွံတဳလမၞုံပိုဉ် တဳလမၞုံပိုဉ်ဂှ် သ္ပတမ်နူတ္ၚဲဝွံတုဲ စဵုကဵုလမျီု ပိုဲဍိက်တအ်ညးဂမၠိုၚ်ဂှ် ဥပးပြာပ်ခ သ္ပစ္ၜုဲစ္ၜော်သကအ်ဗ္ဒဂမၠိုၚ်ရ ရဴဝွံ ဩဝ်ဂိုၚ်သမ္တီလဝ်ညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲအိုတ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ “ယွံဒကာတအ် မၞးတအ်ညးဂမၠိုၚ် ဩဝ်လ္ပအာ နဂၠံၚ်တရဴဝွံအိုတ်ညိ၊ ဩဝ်အာ နဂၠံၚ်တရဴဝွံအိုတ်ညိ” ရဴဝွံ သ္ဂးတုဲ ဗလးထောံတြုံဂမၠိုၚ်ၜါတၠဂှ် နဂၠံၚ်တရဴမွဲသအာၚ်ရ။
ပ္ဍဲအခိၚ်ဂှ် တြုံဂမၠိုၚ်ပန်တၠဂှ် ။ ပ ။
ပ္ဍဲအခိၚ်ဂှ် တြုံဂမၠိုၚ်ဒ္စါံတၠဂှ် ။ ပ ။
ပ္ဍဲအခိၚ်ဂှ် တြုံဂမၠိုၚ်စှ်တြဴတၠဂှ် “ပသာ်ရော? တြုံဒ္စါံတၠဂှ် လအ်ကၠုၚ်ကွေံရ” ရဴဝွံ အာတဴ တရဴဒ္စးအိုတ်အိုတ်မ္ဂး ညာတ်ဒး တဳလမၞုံပိုဉ်ကျာ်တြဲ မဂဇအ်ဒၟံၚ်ပ္ဍဲသၟဝ်တမ်ဆုတုဲ ပြာပ်အာဇရေၚ်တဳလမၞုံပိုဉ်ကျာ်တြဲတုဲပ္ဍဲကြဴ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ ဂဇအ်ဒၟံၚ် ပ္ဍဲဒၞာဲမွဲအိုတ်ရ၊ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ တွံကဵုဂလာန်ဓရ် မဒှ်အတိုၚ်လၟေၚ် ကုတြုံဂမၠိုၚ်ဂှ်ရ၊ ဂလာန်ဓရ် မဒှ်အတိုၚ်လၟေၚ်ဂှ်တုန် ညးဍေံဂှ်ရော?၊ ဂလာန်မစပ်ကဵုဒါနကီု ။ ပ ။ အာစိုပ်ဂံၚ်သကာ (သက်လှက်) ပ္ဍဲသာသနာကျာ်တြဲတုဲဂှ် ဒှ်တုဲ ဟွံမွဲကဵုညးလျုၚ်ပတှ်ေ မသအာၚ်နူကျာ်ဂှ်ဒှ်တုဲ—
“ယွံတဳလမၞုံပိုဉ် (ဓရ်ဂှ်) ထေက်ကဵုသ္ဍိုက်မၠိုက်လောန်ရ ။ ပ ။ ယွံတဳလမၞုံပိုဉ် တဳလမၞုံပိုဉ်ဂှ် သ္ပတမ်နူတ္ၚဲဝွံတုဲ စဵုကဵုလမျီု ပိုဲဍိက်တအ်ညးဂမၠိုၚ်ဂှ် ဥပးပြာပ်ခ သ္ပစ္ၜုဲစ္ၜော်သကအ်ဗ္ဒဂမၠိုၚ်ရ ရဴဝွံ ဩဝ်ဂိုၚ်သမ္တီလဝ်ညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲအိုတ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ “ယွံဒကာတအ် မၞးတအ်ညးဂမၠိုၚ် ဩဝ်လ္ပအာ နဂၠံၚ်တရဴဝွံအိုတ်ညိ၊ ဩဝ်အာ နဂၠံၚ်တရဴဝွံအိုတ်ညိ” ရဴဝွံ သ္ဂးတုဲ ဗလးထောံတြုံဂမၠိုၚ်ၜါတၠဂှ် နဂၠံၚ်တရဴမွဲသအာၚ်ရ။
ပ္ဍဲအခိၚ်ဂှ် တြုံမွဲတၠဂှ် ပြာပ်အာဇရေၚ် ဒေဝဒတ်တုဲပ္ဍဲကြဴ—
“ယွံတဳလပိုဉ် အဲဍိက် ဂစိုတ်တဳလမၞုံပိုဉ်ကျာ်တြဲဂှ် ဟွံမာန်ရ၊ တဳလမၞုံပိုဉ်ကျာ်တြဲဂှ် ဣဒ္ဓိကြဳဇှ်ဇၞော်ရ၊ အာနုဘဴဇၞော်ရ” ရဴဝွံ ဟီုသ္ဂးကဵုဒေဝဒတ်ရ။
“ယွံဒကာ ဒေါံရ၊ တၠအဲ လ္ပဂစိုတ် ခမဳဂေါတမရ၊ အဲဟေၚ် ဂစိုတ်ခမဳဂေါတမရ” ရဴဝွံ (သ္ဂးရ)။
