၇.၂.၂။ ပရူပရာကောန်သၟိၚ်ဗၠာဲအဇာတသတြု
၃၃၉။ ပ္ဍဲအခိၚ်ဂှ် ဒေဝဒတ်ပြာပ်အာဇရေၚ် ကောန်သၟိၚ်ဗၠာဲအဇာတသတြုတုဲ—
“ယွံကောန်သၟိၚ် ပ္ဍဲကိုပ်ကၠာတေံ မၞိဟ်ဂမၠိုၚ် အာယုက်ဂၠိၚ်အိုတ်ရ၊ ပ္ဍဲအခိၚ်လၟုဟ် အာယုက်ဂၠေံအိုတ်ရ။ တၠအဲ ဟိုတ်မဒးချိုတ်အာကဵု ဘဝကောန်သၟိၚ်ဗၠာဲ နွံရ၊ ယွံကောန်သၟိၚ် ဟိုတ်ဂှ်ရ တၠအဲ ဂစိုတ်ကၠေံ မအံက်တုဲ ဩဝ်ဒှ်သၟိၚ်ညိ၊ အဲ ဂစိုတ်ကျာ်တြဲတုဲ ကြက်ဒှ်ကျာ်ရ” ရဴဝွံ (ဟီုသ္ဂးရ)။
ပ္ဍဲအခိၚ်ဂှ် ကောန်သၟိၚ်အဇာတသတြုဂှ် “တဳလပိုဉ်ဒေဝဒတ် ဣဒ္ဓိကြဳဇှ်အာနုဘဴဇၞော်ရ၊ တဳလပိုဉ်ဒေဝဒတ် တီတန်ဒှ်ရ” ရဴဝွံ ဒက်စုတ်ၜုန်သော် ပ္ဍဲဒဳတုဲ ပ္ဍဲအခိၚ်လဒေါဝ်တ္ၚဲဒၚ်ဒၚ်ဖေက်လကိုတ်သမ္ၚာတ် သီုမဇတဝ်ဖြာပ်ဖြာပ်ဂှ် ဗွဲမပြဟ်ဟေၚ် လုပ်အာအပ္ဍဲနန်ရ။ အမာတ်ဇၞော်ပၟၚ်ပၟဲလမျီုဂမၠိုၚ် ပ္ဍဲအပ္ဍဲနန် ဗွဲမပြဟ် သီုမဖေက်လကိုတ်သမ္ၚာတ် ဇတဝ်ဖြာပ်ဖြာပ်တုဲရပ်ကေတ်အိုတ်ရ။ အမာတ်ဇၞော်ဂမၠိုၚ်ဂှ် ဂၠိုက်ဂၠာဲသ္ၚေဝ်ရံၚ်မ္ဂး ညာတ်ဒးၜုတ်သော် မဒက်လဝ်ပ္ဍဲဒဳတုဲ−
“ယွံကောန်သၟိၚ်ဗၠာဲ တၠအဲ မုအရာမွဲ မိက်သ္ပရော?” ရဴဝွံ သၟာန်ကောန်သၟိၚ်ဗၠာဲ အဇာတသတြုအိုတ်ရ။
မိက်ဂစိုတ် မအံက်ရ ရဴဝွံ (သ္ဂးရ)။
မုရဴညးမွဲ ဗတိုက်ဖအောဝ်ရော? ရဴဝွံ (သၟာန်အိုတ်ပၠန်ရ)။
တဳလပိုဉ်ဒေဝဒတ် ဗတိုက်ဖအောဝ်ရ ရဴဝွံ (သ္ဂးရ)။
အမာတ်ဇၞော်ဂမၠိုၚ်လ္ၚဵုဂှ် “ကောန်သၟိၚ်ဗၠာဲ ကေုာံဒေဝဒတ်ကီု ခမဳဂမၠိုၚ်အိုတ်သီုကီု ထေက်ကဵုဂစိုတ်ရ” ရဴဝွံ မၞုံကွေတ်အိုတ်ရ။
အမာတ်ဇၞော်ဂမၠိုၚ်လ္ၚဵုဂှ် “ခမဳဂမၠိုၚ် ဟွံထေက်ကဵုဂစိုတ်ရ၊ ခမဳဂမၠိုၚ် ဟွံလုတ်မှာဒုဟ် မမိက်ကဵုမွဲမွဲအိုတ်ရ၊ ကောန်သၟိၚ်ဗၠာဲ ကေုာံ ဒေဝဒတ်ဂှ် ထေက်ကဵုဂစိုတ်ရ” ရဴဝွံ မၞုံကွေတ်အိုတ်ရ။
အမာတ်ဇၞော်ဂမၠိုၚ်လ္ၚဵုဂှ် “ကောန်သၟိၚ်ဗၠာဲ ကေုာံဒေဝဒတ်လေဝ် ဟွံထေက်ကဵုဂစိုတ်ရ၊ ခမဳဂမၠိုၚ်လေဝ် ဟွံထေက်ကဵုဂစိုတ်ရ၊ ထေက်ကဵုဟီုလဴဗ္စ ကုသၟိၚ်ဇၞော်ရ၊ အတိုၚ်သၟိၚ်ဇၞော်ဟီုဂှ် သ္ပအိုတ်ရ” ရဴဝွံ မၞုံကွေတ်အိုတ်ရ။
ကြဴနူဂှ် အမာတ်ဇၞော်ဂမၠိုၚ်ဂှ် ရပ်ကေတ် ကောန်သၟိၚ်ဗၠာဲအဇာတသတြုတုဲ ပြာပ်အာဇရေၚ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးအိုတ်တုဲ ဂရၚ်ပတီဟီုလဴဗ္စ ဟိုတ်ပရူပရာဂှ် ကုသၟိၚ်ဗိမ္ဗိသာရ မၞုံယၟုသေနိယ တၠညးမဂဓရးအိုတ်ရ။
ယွံသကအ်တအ် အမာတ်ဇၞော်ဂမၠိုၚ် ပသာ်မၞုံကွေတ်အိုတ်ရော? ရဴဝွံ (သၟာန်ရ)။
ယွံတၠညးသၟိၚ်ဇၞော် အမာတ်ဇၞော်ဂမၠိုၚ်လ္ၚဵုဂှ် “ကောန်သၟိၚ်ဗၠာဲ ကေုာံဒေဝဒတ်ကီု ခမဳဂမၠိုၚ်အိုတ်သီုကီု ထေက်ကဵုဂစိုတ်ရ” ရဴဝွံ မၞုံကွေတ်အိုတ်ရ။
အမာတ်ဇၞော်ဂမၠိုၚ်လ္ၚဵုဂှ် “ခမဳဂမၠိုၚ် ဟွံထေက်ကဵုဂစိုတ်ရ၊ ခမဳဂမၠိုၚ် ဟွံလုတ်မှာဒုဟ် မမိက်ကဵုမွဲမွဲအိုတ်ရ၊ ကောန်သၟိၚ်ဗၠာဲ ကေုာံ ဒေဝဒတ်ဂှ် ထေက်ကဵုဂစိုတ်ရ” ရဴဝွံ မၞုံကွေတ်အိုတ်ရ။
အမာတ်ဇၞော်ဂမၠိုၚ်လ္ၚဵုဂှ် “ကောန်သၟိၚ်ဗၠာဲ ကေုာံဒေဝဒတ်လေဝ် ဟွံထေက်ကဵုဂစိုတ်ရ၊ ခမဳဂမၠိုၚ်လေဝ် ဟွံထေက်ကဵုဂစိုတ်ရ၊ ထေက်ကဵုဟီုလဴဗ္စ ကုသၟိၚ်ဇၞော်ရ၊ အတိုၚ်သၟိၚ်ဇၞော်ဟီုဂှ် သ္ပအိုတ်ရ” ရဴဝွံ မၞုံကွေတ်အိုတ်ရ။
ယွံသကအ်တအ် ကျာ်ကီု ဓရ်ကီု သၚ်ကီု ပသာ်ဂွံသ္ပရော? ပြဟ်ပြဟ်ဂှ်ဟေၚ် သ္ပပြာကဋ် ဒေဝဒတ် ပ္ဍဲဍုၚ်ရာဇဂြိုဟ် ရဴဝွံမ္ဂး ‘ပ္ဍဲကိုပ်ကၠာတေံ အာကာရအရာဒ္ဂေတ် ဒေဝဒတ်ဒှ်မွဲဗီုရ၊ ပ္ဍဲအခိၚ်လၟုဟ် အာကာရအရာဒ္ဂေတ် ဒေဝဒတ် ဒှ်မွဲဗီုရ၊ ယြဴကမၠောန်ပွမွဲ ဒေဝဒတ်သ္ပနကဵုဇကုကီု နကဵုပါၚ်ကီုရ၊ နကမၠောန်ပွဂှ် ဟဂပ်ဝ်သမ္တီ ရဴဝွံကျာ်ကီု ရဴဝွံမ္ဂးဓရ်ကီု ရဴဝွံမ္ဂးသၚ်ကီုရ၊ နကမၠောန်ပွဂှ် ဂပ်ဝ်သမ္တီ ရဴဝွံမ္ဂး ဒေဝဒတ်ဟေၚ် တုဲရ’ ဟွံသေၚ်ဟာ ရဴဝွံ (သ္ဂးရ)။
ပၞောဝ်ကဵုအမာတ်ဇၞော်ဂမၠိုၚ်ဂှ် အမာတ်ဇၞော်ဂမၠိုၚ်မၞုံကဵုကွေတ်ရဴဝွံမ္ဂး “ကောန်သၟိၚ်ဗၠာဲကေုာံဒေဝဒတ်ကီု ခမဳဂမၠိုၚ်အိုတ်သီုကီု ထေက်ကဵုဂစိုတ်ရ” ဂှ် ဖျေံထောံကဆံၚ်ရ။
အမာတ်ဇၞော်ဂမၠိုၚ် မသ္ဂုတ်သွာတ်ရဴဝွံမ္ဂး “ခမဳဂမၠိုၚ်ဟွံထေက်ကဵုဂစိုတ်ရ၊ ခမဳဂမၠိုၚ် ဟွံလုပ်မှာဒုဟ် မမိက်ကဵုမွဲမွဲအိုတ်ရ၊ ကောန်သၟိၚ်ဗၠာဲ ကေုာံဒေဝဒတ်ဂှ် ထေက်ကဵုဂစိုတ်ရ” ဂှ် ဖျေံစွံပ္ဍဲကဆံၚ် မသဝ်တုဲမ္ဂး အမာတ်ဇၞော်ဂမၠိုၚ် မၞုံကဵုကွေတ်ရဴဝွံမ္ဂး “ကောန်သၟိၚ်ဗၠာဲ ကေုာံဒေဝဒတ်လေဝ် ဟွံထေက်ကဵုဂစိုတ်ရ၊ ခမဳဂမၠိုၚ်လေဝ် ဟွံထေက်ကဵုဂစိုတ်ရ၊ ထေက်ကဵုဟီုလဴဗ္စ ကုသၟိၚ်ဇၞော်ရ၊ အတိုၚ်သၟိၚ်ဇၞော်ဟီုဂှ် သ္ပအိုတ်ရ” ဂှ်တုန် ပတိုန်ကဵုကဆံၚ်ရ။
ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂးဓရးဂှ်−
“ယွံကောန်သၟိၚ်ဗၠာဲ တၠအဲ မုဟိုတ် မိက်ဂစိုတ်အဲရော?” ရဴဝွံ သၟာန်ကောန်သၟိၚ်ဗၠာဲ အဇာတသတြုရ။ ယွံတၠညးမအံက် နွံပၟိက်ကဵုဒဒှ်သၟိၚ်ရ ရဴဝွံ (လဴပတီရ)။
ယွံကောန်သၟိၚ်ဗၠာဲ တၠအဲ နွံပၟိက်ကဵုဒဒှ်သၟိၚ်မ္ဂး “ပိုဉ်သမ္ပတ္တိ သၟိၚ်ဝွံ ဒှ်ပိုဉ်သမ္ပတ္တိ တၠအဲရ” ရဴဝွံ ဟီုသ္ဂးတုဲ ဇိုၚ်နှၚ်အပ်ပြာပ်ကဵုဒဒှ်သၟိၚ် ကုကောန်သၟိၚ်ဗၠာဲအဇာတသတြုရ။
