၇.၃.၁။ သဃဘေဒကထာ
၃၄၄။ ပ္ဍဲအခိၚ်ဂှ် ပ္ဍဲတ္ၚဲဥပေါသ်ဂှ် ဒေဝဒတ် ဒၠိုက်ကတဵုနူဒၞာဲတုဲ “ယွံကောန်တၠတအ် ပိုဲညးဂမၠိုၚ် ပြာပ်အာဇရေၚ် ခမဳဂေါတမတုဲ ‘ယွံတဳလမၞုံပိုဉ် တဳလမၞုံပိုဉ်ကျာ်တြဲဂှ် နဟိုတ်မဂၠိုၚ်ဂၠၚ် မၞုံအလေံ ဟီုသ္ဂးတဴဂုဏ် ပွမပၟိက်အောန် ။ ပ ။ တၞဟ်နပွမပတိတ်ဒြဟတ် နဝဳရိယအိုတ်ရ။ အာတ်ပါတ်အခေါၚ်ရ ယွံကျာ်မၞုံပိုဉ် ခမဳဂမၠိုၚ် စဵုကဵုလအိတ်လမျီု ကဵုဒှ်ညးပဒတဴ ပ္ဍဲဂြိုဟ်အိုတ်ညိ၊ ယြဴခမဳမွဲ တၞီလုပ်ကွာန်မ္ဂး၊ ကုခမဳဂှ် ကဵုအာစိုပ်ဒုဟ်ညိ ။ ပ ။ စဵုကဵုလအိတ်လမျီု လ္ပကဵုစကဖျုန်အိုတ်ညိ၊ ယြဴခမဳမွဲ စကဖျုန်မ္ဂး၊ ကုခမဳဂှ် ကဵုအာစိုပ်ဒုဟ်ညိ” ရဴဝွံ အာတ်တဴဝတ္ထုဂမၠိုၚ်မသုန်သာ်ဝွံအိုတ်တုဲရ၊ (ပ္ဍဲအရာဂှ်) ဝတ္ထုဂမၠိုၚ်မသုန်သာ်ဝွံ ခမဳဂေါတမ ဟွံကဵုအခေါၚ်ရ၊ ပိုဲညးဂမၠိုၚ်ဂှ် သှ်ပတူ နကဵုဝတ္ထုဂမၠိုၚ် မသုန်သာ်ဝွံတုဲ ဒ္ဂေတ်အိုတ်စိုအ်၊ တဳလပိုဉ် သ္ဍိုက်မၠိုက် ဝတ္ထုဂမၠိုၚ်မသုန်သာ်ဝွံ ဩဝ်ဂိုၚ်ကေတ် ဇြေဟ်လိက်မာဲညိ” ရဴဝွံ ကဵုဂိုၚ်ကေတ် ဇြေဟ်လိက်မာဲရ။
ပ္ဍဲအဃောအခိၚ်ဂှ် ခမဳကောန်ညးဝဇ္ဇဳရးဂမၠိုၚ် ဗၞတ်မသုန်ကၠံ ပဒတဴဍုၚ်ဝေသာလဳဂှ် ဍောတ်လေဝ်ဍောတ်အိုတ်ရ၊ ပ္ဍဲဝိနယ်လေဝ် ဟွံစဳကၠးဆိုက်ဗ္ဒက်အိုတ်ရ၊ ခမဳဂမၠိုၚ်ဂှ် “ဣဝွံတုန် ဓမ္မရ၊ ဣဝွံတုန် ဝိနယရ၊ ဣဝွံတုန် ဒၠောံဗတောန်ကျာ်ရ” ရဴဝွံ ဂိုၚ်ကေတ် ဇြေဟ်လိက်မာဲအိုတ်ရ။ ပ္ဍဲအခိၚ်ဂှ် ဒေဝဒတ် ပါ်ဒကးသၚ်တုဲ ကော်ဂွံခမဳဂမၠိုၚ်ဗၞတ်မသုန်ကၠံတုဲ စ္ဍးအာဌာန်ဂယာသဳသရ၊ ပ္ဍဲအခိၚ်ဂှ် သာရိပိုတ် မောဂ္ဂလာန်ဂမၠိုၚ် ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚေဝ်သ္ပဝတ်တုဲမ္ဂး အခိၚ်မဂဇအ်ဒၟံၚ်ပ္ဍဲဒၞာဲမွဲအိုတ်ဂှ် တဳလပိုဉ်သာရိပိုတ်ဂှ်—
“ယွံတဳလမၞုံပိုဉ် ဒေဝဒတ် ပါ်ဒကးသၚ်တုဲ ကော်ဂွံခမဳဂမၠိုၚ်ဗၞတ်မသုန်ကၠံတုဲ စ္ဍးအာဌာန်ဂယာသဳသရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
ယွံသာရိပိုတ်တအ် ပွမဆာန်ဍူ ပ္ဍဲခမဳသၟတ်ဂမၠိုၚ်ဂှ်လေဝ် ဟွံဒှ်ကုမၞးတအ်ညးဂမၠိုၚ်ရသွံ၊ ယွံသာရိပိုတ်တအ် ကိုပ်ကၠာဟဂွံလီုလာ် မသက္ကုဖဵုအိုတ်ဏီ မၞးတအ်ညးဂမၠိုၚ် ဩဝ်အာအိုတ်ညိ ရဴဝွံ (သ္ဂးရ)။
“ယွံကျာ်မၞုံပိုဉ် ခိုဟ်သန်ရ” ရဴဝွံ သာရိပိုတ် မောဂ္ဂလာန်ဂမၠိုၚ် ဒုၚ်ဝန်ကုတဳလမၞုံပိုဉ်ကျာ်တြဲတုဲမ္ဂး ဒၠိုက်ကတဵုနူဒၞာဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး သ္ပရှေ်သှေ်ရဴဂဴကၠာ ပြာပ်အာ ဌာန်ဂယာသဳသအိုတ်ရ။
ကြဴနူဂှ် ခမဳမွဲဇကု သီုမရိုအ်ယာံဂတေဝ်ဒၟံၚ် ပ္ဍဲဇရေၚ်တဳလမၞုံပိုဉ်ကျာ်တြဲဂှ် ဒတူဒၟံၚ်ရ၊ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ်—
“ယွံခမဳ တၠအဲ မုဟိုတ်လရိုအ်ယာံဂတေဝ်ဒၟံၚ်ရော?” ရဴဝွံ သၟာန်ခမဳဂှ်ရ။
ယွံတဳလမၞုံပိုဉ် သာရိပိုတ် မောဂ္ဂလာန်ဂမၠိုၚ် မဒှ်ကွးအဂ္ဂသာဝက တဳလမၞုံပိုဉ်ကျာ်တြဲဂှ်လေဝ် သ္ဍိုက်မၠိုက်ဓရ် ဒေဝဒတ်ဂမၠိုၚ်ဒှ်တုဲ အာတဴဇရေၚ် ဒေဝဒတ်အိုတ်ရ ရဴဝွံ (ဂရၚ်ပတီရ)။
ယွံခမဳ သာရိပိုတ် မောဂ္ဂလာန်ဂမၠိုၚ် ဟိုတ်အရာမသ္ဍိုက်မၠိုက်ဓရ် ဒေဝဒတ်ဂှ် ဟွံမွဲရ၊ ဗွဲစၟတ်တုန် သာရိပိုတ် မောဂ္ဂလာန်ဂမၠိုၚ်ဂှ် အာတဴတၞဟ်နကဵုခမဳဂမၠိုၚ် ကၠိုဟ်ကေတ်အိုတ်ရ ရဴဝွံ (သ္ဂးရ)။
၃၄၅။ ပ္ဍဲအခိၚ်ဂှ် ဒေဝဒတ် မဒှ်ဃောမဂဇအ်ဒၟံၚ် သီုမတွံဒၟံၚ်ဓရ် နတွဳတွိုၚ်ပရိသာတ်မဂၠိုၚ်ဂှ် ညာတ်ဒးသာရိပိုတ် မောဂ္ဂလာန်ဂမၠိုၚ် မကၠုၚ်နူဇမ္ၚောဲတုဲ “ယွံခမဳတအ် ဩဝ်သ္ၚေဝ်ရံၚ်အိုတ်ညိ၊ အဲ ဂပ်ဝ်တွံလဝ်ဓရ် ဗွဲမဒးရးတုဲရ၊ သာရိပိုတ် မောဂ္ဂလာန်ဂမၠိုၚ် မဒှ်ကွးအဂ္ဂသာဝက ခမဳဂေါတမဂှ်လေဝ် သ္ဍိုက်မၠိုက်ဓရ်အဲဂမၠိုၚ်ဒှ်တုဲ ကၠုၚ်ဇရေၚ်အဲအိုတ်ရ” ရဴဝွံ သ္ဂးကဵုခမဳဂမၠိုၚ်ရ။
သ္ဂးတဴရဴဝွံမ္ဂး ကောကာလိကဂှ် “ယွံကောန်တၠဒေဝဒတ် လ္ပလုပ်နှဴရဴကဵု သာရိပိုတ် မောဂ္ဂလာန်ဂမၠိုၚ်ညိ၊ သာရိပိုတ် မောဂ္ဂလာန်ဂမၠိုၚ် မၞုံပၟိက်ယုတ်ပရေအ်အိုတ်ရ၊ ဗက်အလိုက်ပၟိက်ယုတ်ပရေအ်တံၚ်ဂြဲအိုတ်ရ” ရဴဝွံ သ္ဂးကဵုဒေဝဒတ်ရ။
ယွံကောန်တၠ လ္ပဟီုညိ၊ ပွမကၠုၚ် သာရိပိုတ် မောဂ္ဂလာန်ဂမၠိုၚ်ဂှ် ဟိုတ်မသ္ဍိုက်မၠိုက်ဓရ်အဲဂှ်ရ ဒှ်ပွမကၠုၚ်ခိုဟ်ရ ရဴဝွံ (သ္ဂးရ)။ ပ္ဍဲအခိၚ်ဂှ် ဒေဝဒတ်ဂှ် “ယွံကောန်တၠသာရိပိုတ် ဩဝ်ကၠုၚ်ညိ၊ ဩဝ်ဂဇအ် ပ္ဍဲသၞာဝွံညိ” ရဴဝွံ ဘိက်တဳလပိုဉ်သာရိပိုတ် (သွက်ဂွံဂဇအ်) နကဵုသၞာကဝက်ရ။
“ယွံကောန်တၠ ဒေါံရ” ရဴဝွံ တဳလပိုဉ်သာရိပိုတ် ဂိုၚ်ကေတ် သၞာဂဇအ်သအာၚ်မွဲတုဲ ဂဇအ်ဒၟံၚ်ပ္ဍဲဒၞာဲမဗဗွဲမွဲရ၊ တဳလပိုဉ်မောဂ္ဂလာန်လေဝ် ဂိုၚ်ကေတ် သၞာဂဇအ်သအာၚ်မွဲတုဲ ဂဇအ်ဒၟံၚ်ပ္ဍဲဒၞာဲမဗဗွဲမွဲရ။ ပ္ဍဲအခိၚ်ဂှ် ဒေဝဒတ် လုကဴပိပယျာံဗတမ်ဂှ် နကဵုဂလာန်ဓရ် ကဵုခမဳဂမၠိုၚ်တီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြဴတုဲဒှ်တုဲမ္ဂး—
“ယွံကောန်တၠသာရိပိုတ် ခမဳသၚ် စာ်စ္ဍးနူထိနမိဒ္ဓရ၊ ယွံကောန်တၠသာရိပိုတ် ဂလာန်ဓရ် သွက်ခမဳဂမၠိုၚ် ဩဝ်ကဵုပြာကဋ် ပ္ဍဲဉာဏ်တၠအဲညိ၊ စၞိန်စးအဲ ကွိုၚ်ကွုဲရ၊ အဲပၠးကၠေံစၞိန်စးဂှ်ရ” ရဴဝွံ သ္ဂးကဵုတဳလပိုဉ်သာရိပိုတ်ရ။
“ယွံကောန်တၠ ခိုဟ်သန်ရ” ရဴဝွံ တဳလပိုဉ်သာရိပိုတ် ဒုၚ်ဝန် ကုဒေဝဒတ်ရ။ ပ္ဍဲအခိၚ်ဂှ် ခ္ဍပ်ကၠေံသ္ၚာသကိုပ်ဇၞော်ပန်ခ္ဍပ်တုဲ လးပၠးတုဲမ္ဂး သ္ပတဴပွမတိက် နသကဲပုၚ်ရ။
ဒေဝဒတ် ဍောၚ်ၜိုတ်တုဲ မၞုံကဵုသတိဆောတ်ယောၚ် မဟွံမွဲကဵုဉာဏ်မဗ္စာရဏာဂှ် ဗၞတ်မွဲမုဟုတ်ဓဝ်ဟေၚ် တိက်လှိၚ်အာရ။
ပ္ဍဲအခိၚ်ဂှ် တဳလပိုဉ်သာရိပိုတ် ဒၠောံဗတောန်ခမဳဂမၠိုၚ် နကဵုဂလာန်ဓရ် မတွံဂးပါဋိဟာ ပွမတီစိုတ်ညးသအာၚ်တုဲ ပွမဒၠောံဗတောန်ရ၊ ဆေဝ်ဒဝ်ရ။ တဳလပိုဉ်မဟာမောဂ္ဂလာန် ဒၠောံဗတောန်ခမဳဂမၠိုၚ် နကဵုဂလာန်ဓရ် မတွံဂးပါဋိဟာ ပွမထ္ၜးဣဒ္ဓိတုဲဒၠောံဗတောန်ရ၊ ဆေဝ်ဒဝ်ရ။ ကြဴနူဂှ် တဳလပိုဉ်သာရိပိုတ် နပွမတီစိုတ်ညးသအာၚ်တုဲ ဒၠောံဗတောန်ကီု တဳလပိုဉ်မဟာမောဂ္ဂလာန်ဂှ် နပွမထ္ၜးဣဒ္ဓိတုဲ ဒၠောံဗတောန်ကီု ဂပ်ဝ်ဒၠောံဗတောန်ဆေဝ်ဒဝ်အိုတ်မ္ဂး “ဓရ်အိုတ်သီု မၞုံသဘဴပွမကဵုဒှ်ဂှ် မၞုံသဘဴပၠိုတ်ရ” ရဴဝွံ ‘သောတာပတ္တိမဂ်ဉာဏ်’ မတ်ဓရ်မဟွံမွဲကဵုမၠိုက် မစာ်စ္ဍးနူကၠိုက်လ္ၚေၚ် ကိလေသဂှ် ကတဵုဒှ်ကုခမဳဂမၠိုၚ်ဂှ်ရ။
ပ္ဍဲအခိၚ်ဂှ် တဳလပိုဉ်သာရိပိုတ်ဂှ် “ယွံကောန်တၠတအ် ပိုဲညးဂမၠိုၚ် အာဇရေၚ်တဳလမၞုံပိုဉ်ကျာ်တြဲအိုတ်ရ၊ ခမဳမသ္ဍိုက်မၠိုက်ဓရ် တဳလမၞုံပိုဉ်ကျာ်တြဲဂှ် ဩဝ်ကၠုၚ်ညိ” ရဴဝွံ သ္ဂးကဵု ခမဳဂမၠိုၚ်ရ။ ပ္ဍဲအခိၚ်ဂှ် သာရိပိုတ် မောဂ္ဂလာန်ဂမၠိုၚ် ကော်ဂွံခမဳဂမၠိုၚ်မသုန်ကၠံဂှ်တုဲ ပြာပ်အာ ဘာဝေဠုဝန်အိုတ်ရ။ ပ္ဍဲအခိၚ်ဂှ် ကောကာလိကဂှ် ယွံကောန်တၠဒေဝဒတ် ဩဝ်ကတဵုညိ၊ သာရိပိုတ် မောဂ္ဂလာန်ဂမၠိုၚ် ရၚ်တၠုၚ်ဏာ ခမဳဂမၠိုၚ်ဂှ်အိုတ်ရ၊ “ယွံကောန်တၠ ဒေဝဒတ် လ္ပလုပ်နှဴရဴကဵုသာရိပိုတ် မောဂ္ဂလာန်ဂမၠိုၚ်ညိ၊ သာရိပိုတ် မောဂ္ဂလာန်ဂမၠိုၚ် မၞုံပၟိက်ယုတ်ပရေအ်အိုတ်ရ၊ ဗက်အလိုက်ပၟိက် ယုတ်ပရေအ်တံၚ်ဂြဲအိုတ်ရ” ရဴဝွံ သ္ဂးဟီုမံၚ်ကဵုတၠအဲရ ဟွံသေၚ်ရဟာ ရဴဝွံ သ္ဂးတုဲ မ္ၚုဟ်ဒေဝဒတ်ရ။
ပ္ဍဲအခိၚ်ဂှ် ပ္ဍဲဒၞာဲဂှ်ဟေၚ် ဆီဂမ္တဴ ဇအအ်တိတ် နူပါၚ်ဒေဝဒတ်ရ။
သာရိပိုတ် မောဂ္ဂလာန်ဂမၠိုၚ် ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ်တုဲမ္ဂး အခိၚ်မဇအ်ဒၟံၚ်ပ္ဍဲဒၞာဲမွဲအိုတ်ဂှ် တဳလပိုဉ်သာရိပိုတ်ဂှ်—
“ယွံတဳမၞုံပိုဉ် ခမဳဘေဒါနုဝတ္တကဂမၠိုၚ် ဂွံပပယျၚ်မွဲလှေ်ပၠန်အိုတ်မ္ဂး ခိုဟ်ရ” ရဴဝွံဂရၚ်ပတီ တဳလမၞုံပိုဉ်ကျာ်တြဲရ။
ယွံသာရိပိုတ် ဟွံဗဗွဲရ၊ တၠအဲ လ္ပသ္ဍိုက်မၠိုက် ပွမပပယျၚ်မွဲလှေ်ပၠန် ခမဳဘေဒါနုဝတ္တကဂမၠိုၚ်ညိ၊ ယွံသာရိပိုတ် ဒှ်သာ်ဂှ်မ္ဂး ဩဝ်ကဵုခမဳဘေဒါနုဝတ္တကဂမၠိုၚ် ဟီုလၟိၚ်ဒေသနာ အာပတ်ထုလ္လစ္စယ်ညိ။ ယွံသာရိပိုတ် ဒေဝဒတ် ပသာ်ဒ္ဂေတ်သ္ပ ကုတၠအဲရော? ရဴဝွံ (သၟာန်ရ)။ ယွံတဳလမၞုံပိုဉ် တဳလမၞုံပိုဉ်ကျာ်တြဲ လုကဴပိပယျာံဗတအ်ဂှ် နကဵုဂလာန်ဓရ် ကဵုခမဳဂမၠိုၚ်တီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြဴတုဲ ဒှ်တုဲမ္ဂး “ယွံသာရိပိုတ် ခမဳသၚ် စာ်စ္ဍးနူထိနမိဒ္ဓရ၊ ယွံသာရိပိုတ်ဂလာန်ဓရ် သွက်ခမဳဂမၠိုၚ် ဩဝ်ကဵုပြကဋ် ပ္ဍဲဉာဏ်တၠအဲညိ၊ စၞိန်စးအဲကွိုၚ်ကွုဲရ၊ အဲပၠးကၠေံစၞိန်စးဂှ်ရ” ရဴဝွံ သၟဟ်ညံၚ်ရဴ ဗတိုက်ဖအောဝ်အဲဍိက်ကီု တုပ်သၟဟ်သာ်ဝွံဟေၚ် ဒေဝဒတ်ဒ္ဂေတ်သ္ပရ ရဴဝွံ (ဂရၚ်ပတီရ)။
၃၄၆။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ်—
“ယွံခမဳတအ် ကေၚ်ဒှ်ကၠုၚ် ပ္ဍဲကိုပ်ကၠာတေံတုန် ပ္ဍဲသ္ပိုဟ်ဂြိုပ်ဇၞော်မွဲ လ္စအၚ်လှာဇၞော်နွံမွဲရ၊ နိဿယ်ဗ္ဒာဲကဵုလ္စအၚ်လှာဂှ်တုဲ စိၚ်ဂမၠိုၚ် ပဒတဴဒၟံၚ်အိုတ်ရ။
စိၚ်ဂမၠိုၚ်ဂှ် တၞီစှေ် လ္စအၚ်လှာဂှ်တုဲ ပိုက်ၜေါတ် လွာဒကိုန်, တမ်ရိုဟ်ဒကှ် နကဵုလပှ်တုဲ လယှ်ကၠေံဗွဲမဒးရးတုဲ သ္ၚာဲတဴလွာဒကိုန်, တမ်ရိုဟ်ဒကှ်ဂမၠိုၚ် မဟွံမွဲကဵုသၠိုက်သရီုတုဲ ၚိတ်ဖျေံအိုတ်ရ၊ လွာဒကိုန်, တမ်ရိုဟ်ဒကှ်ဂမၠိုၚ် ဒှ်တဴ တၞဟ်နဖဵုရုပ်သာ်ကီု တၞဟ်နဖဵုဒြဟတ်ကီု စိၚ်ဂမၠိုၚ်ဂှ်ရ၊ ဟိုတ်နူဟိုတ်မတွံဂးလွာဒကိုန်, တမ်ရိုဟ်ဒကှ်ဂှ် ပွမချိုတ်လေဝ် ဟွံအာစိုပ်အိုတ်ရ၊ ဒဒိုခ်မဆိုက်ညောန်ကဵုချိုတ်လေဝ် ဟွံအာစိုပ်အိုတ်ရ။
ယွံခမဳတအ် စိၚ်သၟတ်ဝှ်ၜတ်ဂမၠိုၚ် ပတုပ်ဗက်စိၚ်ဇၞော်ဂမၠိုၚ်ဂှ်တုဲ တၞီစှေ်အာ လ္စအၚ်လှာပိုက်ၜေါတ် လွာဒကိုန်, တမ်ရိုဟ်ဒကှ် နကဵုလပှ်တုဲ သီုဟွံလယှ်ကၠေံဗွဲမဒးရး သ္ၚာဲစလွာဒကိုန်, တမ်ရိုဟ်ဒကှ်ဂမၠိုၚ် မွဲဟာန်ကေုာံသၠိုက်သရီုတုဲ ၚိတ်ဖျေံအိုတ်ရ၊ လွာဒကိုန်, တမ်ရိုဟ်ဒကှ်ဂမၠိုၚ်ဂှ် ဟွံဒှ်တဴ တၞဟ်နဖဵုရုပ်သာ်ကီု တၞဟ်နဖဵုဒြဟတ်ကီု စိၚ်သၟတ်ဂမၠိုၚ်ဂှ်ရ၊ ဟိုတ်နူဟိုတ်မတွံဂး လွာဒကိုန်, တမ်ရိုဟ်ဒကှ်ဂှ် ပွမချိုတ်လေဝ် အာစိုပ်အိုတ်ရ၊ ဒဒိုခ်မဆိုက်ညောန်ကဵုချိုတ်လေဝ် အာစိုပ်အိုတ်ရ။
ယွံခမဳတအ် တုပ်သၟဟ်သာ်ဝွံဟေၚ် ဒေဝဒတ် ပတုပ်ဗက်အဲတုဲ မသ္ပဂှ် ကြက်ဒးချိုတ် ဗွဲဒဒိုခ်ရ” ရဴဝွံ သ္ဂးကဵုခမဳဂမၠိုၚ်ရ။
စိၚ်သၟတ် မပတုပ်ဗက် စိၚ်ဇၟူဇၞော် မဇီုထ္ပက်တိတုဲ အာကၠုၚ်ပ္ဍဲၜဳကြုၚ်ဂမၠိုၚ် သီုမစတဴ လွာဒကိုန်, တမ်ရိုဟ်ဒကှ်ဂမၠိုၚ်ဂှ် စဒး လွာဒကိုန်, တမ်ရိုဟ်ဒကှ်ဂမၠိုၚ် မၞုံကဵုသၠိုက်သရီုတုဲ သၟဟ်ညံၚ်ရဴဒးချိုတ်ကီု ဒေဝဒတ် မသ္ပပတုပ်ဗက်အဲကျာ်ဂှ် အာစိုပ် ဒဒိုခ်ဂှ်ဒှ်တုဲ ကြက်ဒးချိုတ်ရ။
၃၄၇။ ယွံခမဳတအ် ခမဳ မဍိုက်ပေၚ်တဴ ကေုာံအၚ်္ဂဂမၠိုၚ်ဒ္စါံသာ်ဂှ် ထေက်ကြိုက်ကဵုတၞဟ်နအာ နဒဒှ်ကလုတ်ရ။ ညးမ္ဂး ဒ္စါံသာ်အိုတ်ဂှ်ရော?
ယွံခမဳတအ် ပ္ဍဲသာသနာဝွံ ခမဳဂှ် ကလၚ်လေဝ် ကလၚ်လေပ်ရ၊ ကလေၚ်ဟီုလေဝ် ကလေၚ်ဟီုလေပ်ရ၊ ကတ်ဗတောန်လေဝ် ကတ်ဗတောန်လေပ်ရ၊ ပကၚ်ရၚ်လေဝ် ပကၚ်ရၚ်လေပ်ရ၊ စၟတ်သမ္တီလေဝ် စၟတ်သမ္တီလေပ်ရ၊ အလဵုဇကုလေဝ် လေပ်တီရ၊ ကဵုညးတၞဟ်သအာၚ်လေဝ် လေပ်ကဵုတီရ၊ ပ္ဍဲဒတုဲဖဵုနွံ ဟွံမွဲလေဝ် စဳကၠးရ၊ ပွမကယျာန်ဓဝါတ်လေဝ် ဟွံလေပ်သ္ပရ။ ယွံခမဳတအ် ခမဳမဍိုက်ပေၚ်တဴ ကေုာံအၚ်္ဂဂမၠိုၚ်ဒ္စါံသာ်ဝွံ ထေက်ကြိုက်ကဵု တၞဟ်နအာ နဒဒှ်ကလုတ်ရ။ ယွံခမဳတအ် သာရိပိုတ် မဍိုက်ပေၚ်တဴကေုာံအၚ်္ဂဂမၠိုၚ်ဒ္စါံသာ်ဂှ် ထေက်ကြိုက်ကဵု တၞဟ်နအာ နဒဒှ်ကလုတ်ရ။ ညးမ္ဂး ဒ္စါံသာ်အိုတ်ဂှ်ရော?
ယွံခမဳတအ် ပ္ဍဲသာသနာဝွံ သာရိပိုတ်ဂှ် ကလၚ်လေဝ် ကလၚ်လေပ်ရ၊ ကလေၚ်ဟီုလေဝ် ကလေၚ်ဟီုလေပ်ရ၊ ကတ်ဗတောန်လေဝ် ကတ်ဗတောန်လေပ်ရ၊ စၟတ်သမ္တီလေဝ် စၟတ်သမ္တီလေပ်ရ၊ အလဵုဇကုလေဝ် လေပ်တီရ၊ ကဵုညးတၞဟ်သအာၚ်လေဝ် လေပ်ကဵုတီရ၊ ပ္ဍဲဒတုဲဖဵု, ဟွံမွဲလေဝ် စဳကၠးရ၊ ပွမကယျာန်ဓဝါတ်လေဝ် ဟွံလေပ်သ္ပရ။ ယွံခမဳတအ် သာရိပိုတ် မဍိုက်ပေၚ်တဴ ကေုာံအၚ်္ဂဂမၠိုၚ် ဒ္စါံသာ်ဝွံ ထေက်ကြိုက်ကဵု တၞဟ်နအာ နဒဒှ်ကလုတ်ရ ရဴတွံ (ဟီုသ္ဂးရ)။
ယြဴခမဳမွဲ အာစိုပ်ပရိသာတ် မဟီုဂလာန်ကြံၚ်မ္ၚိုဟ်တုဲ ဟွံချဳဇတဝ်ရ၊ ဂလာန်လေဝ်ဟွံကဵုဟုတ်ယုတ်ရ၊ ဂလာန်ပရိုၚ်လေဝ် ဟွံဂြောပ်ဗ္ဒန်ရ၊ သီုဟွံမွဲကဵုသၠေဟ်ပၟာဂှ် လေပ်ဟီုသ္ဂးရ၊ ဒးဒုၚ်သၟာန်ကီုလေဝ် ဟွံထေဲပၞတ်ရ၊ ခမဳမၞုံသဘဴမဖှ်သာ်ဂှ် ဗွဲစၟတ်မ္ဂး ထေက်ကြိုက်ကဵု တၞဟ်နအာ နဒဒှ်ကလုတ်ရ။
၃၄၈။ ယွံခမဳတအ် ဒေဝဒတ် မၞုံကဵုစိုတ် မိန်ဓရ်အသပ္ပုရိုဟ်ဂမၠိုၚ်ဒ္စါံသာ် မဂပ်ဝ်ဓလီုဍိုက်ရာန်သကိုတ်ဂှ် ကြက်ကတဵုဒှ် ပ္ဍဲအပါယ်ရ၊ ကြက်ကတဵုဒှ် ပ္ဍဲနရက်ရ၊ ကြက်တန်တဴ လုကဴအာယုကပ်ရ၊ ဇအုဲဇဗဝဳဗလးဟွံမာန်ရ။ ညးမ္ဂး ဒ္စါံသာ်အိုတ်ဂှ်ရော? ယွံခမဳတအ် ဒေဝဒတ် မၞုံကဵုစိုတ် မိန်လာဘ် မဂပ်ဝ်ဓလီုဍိုက်ရာန်သကိုတ်ဂှ် ကြက်ကတဵုဒှ် ပ္ဍဲအပါယ်ရ၊ ကြက်ကတဵုဒှ် ပ္ဍဲနရက်ရ၊ ကြက်တန်တဴ လုကဴအာယုကပ်ရ၊ ဇအုဲဇဗဝဳဗလးဟွံမာန်ရ။ ယွံခမဳတအ် ပွမဟွံကလိဂွံလာဘ် ။ ပ ။ ယွံခမဳတအ် ပွမနွံကဵုဒယှ်တှ် ။ ပ ။ ယွံခမဳတအ် ပွမဟွံမွဲကဵုဒယှ်တှ် ။ ပ ။ ယွံခမဳတအ် ပွမသ္ပမြိမြန်ကၠောန်ၜိုတ် ဗွဲမဒးရး ။ ပ ။ ယွံခမဳတအ် ပွမဟွံသ္ပမြိမြန်ကၠောန်ၜိုတ် ဗွဲမဒးရး ။ ပ ။ ယွံခမဳတအ် ပွမမၞုံကဵုပၟိက် မယုတ်သဝ် ။ ပ ။ ယွံခမဳတအ် ဒေဝဒတ် မၞုံကဵုစိုတ် မိန်မၞုံကဵုမိတ်မယုတ်မာ မဂပ်ဝ်ဓလီုဍိုက်ရာန်သကိုတ်ဂှ် ကြက်ကတဵုဒှ် ပ္ဍဲအပါယ်ရ၊ ကြက်ကတဵုဒှ် ပ္ဍဲနရက်ရ၊ ကြက်တန်တဴ လုကဴအာယုကပ်ရ၊ ဇအုဲဇဗဝဳဗလးဟွံမာန်ရ။
ယွံခမဳတအ် ဒေဝဒတ် မၞုံကဵုစိုတ် မိန်ဓရ်အသပ္ပုရိုဟ်ဂမၠိုၚ်ဒ္စါံသာ် မဂပ်ဝ်ဓလီုဍိုက်ရာန်သကိုတ်ဂှ် ကြက်ကတဵုဒှ် ပ္ဍဲအပါယ်ရ၊ ကြက်ကတဵုဒှ် ပ္ဍဲနရက်ရ၊ ကြက်တန်တဴ လုကဴအာယုကပ်ရ၊ ဇအုဲဇဗဝဳဗလးဟွံမာန်ရ။
၃၄၉။ ယွံခမဳတအ် ခမဳဂှ် ဓလီုဍိုက်ကၠေံ ဓလီုဍိုက်ကၠေံ ပွမကလိဂွံလာဘ် မကတဵုဒှ်ကၠုၚ်ဂှ်တုဲ ပဒတဴမံၚ်မ္ဂး ခိုဟ်ရ။ ပွမဟွံကလိဂွံလာဘ် မကတဵဒှ်ကၠုၚ် ။ ပ ။ ပွမဒယှ်တှ် မကတဵုဒှ်ကၠုၚ်။ ပွမဟွံမွဲကဵုဒယှ်တှ် မကတဵုဒှ်ကၠုၚ်။ ပွမသ္ပမြိမြန်ကၠောန်ၜိုတ် ဗွဲမဒးရး မကတဵုဒှ်ကၠုၚ်။ ပွမဟွံသ္ပမြိမြန်ကၠောန်ၜိုတ် ဗွဲမဒးရးမကတဵုဒှ်ကၠုၚ်။ ပၟိက်မယုတ်သဝ် မကတဵုဒှ်ကၠုၚ်။ ဓလီုဍိုက်ကၠေံ ဓလီုဍိုက်ကၠေံ ပွမၞုံကဵုမိတ်သဟာဲမယုတ်မာ မကတဵုဒှ်ကၠုၚ်ဂှ်တုဲ ပဒတဴမံၚ်မ္ဂး ခိုဟ်ရ။
ယွံခမဳတအ် ခမဳဂှ် သ္ပဟိုတ်ကဵုဖဵုတၟေၚ်သာ်လဵုတုဲ ဓလီုဍိုက်ကၠေံ ဓလီုဍိုက်ကၠေံ ပွမကလိဂွံလာဘ် မကတဵုဒှ်ကၠုၚ်ဂှ်တုဲ ဂွံပဒတဴမံၚ်ရော?။ ပွမဟွံကလိဂွံလာဘ် မကတဵုဒှ်ကၠုၚ် ။ ပ ။ ပွမဒယှ်တှ် မကတဵုဒှ်ကၠုၚ်။ ပွမဟွံမွဲကဵုဒယှ်တှ် မကတဵုဒှ်ကၠုၚ်။ ပွမသ္ပမြိမြန်ကၠောန်ၜိုတ် ဗွဲမဒးရး မကတဵုဒှ်ကၠုၚ်။ ပွမဟွံသ္ပမြိမြန်ကၠောန်ၜိုတ် ဗွဲမဒးရးမကတဵုဒှ်ကၠုၚ်။ ပၟိက်မယုတ်သဝ် မကတဵုဒှ်ကၠုၚ်။ ဓလီုဍိုက်ကၠေံ ဓလီုဍိုက်ကၠေံ ပွမၞုံကဵုမိတ်သဟာဲမယုတ်မာ မကတဵုဒှ်ကၠုၚ်ဂှ်တုဲ ဂွံပဒတဴမံၚ်ရော?။
ယွံခမဳတအ် ကုခမဳ မပဒတဴ သီုဟွံဓလီုဍိုက် ပွမကလိဂွံလာဘ် မကတဵုဒှ်ကၠုၚ်ဂှ် ဓရ်အာသဝ ကေုာံပွမဍောၚ်ၜိုတ်စိုတ် ပွမဒတူတၠာဲဂမၠိုၚ် ကတဵုဒှ်ကၠုၚ်အိုတ်ရ၊ ကုခမဳ ဓလီုဍိုက်ကၠေံ ဓလီုဍိုက်ကၠေံ ပွမကလိဂွံလာဘ် မကတဵုဒှ်ကၠုၚ်ဂှ်တုဲ ပဒတဴဂှ် ဓရ်အာသဝ ကေုာံ ပွမဍောၚ်ၜိုတ် စိုတ် ပွမဒတူတၠာဲဂမၠိုၚ် ဟွံကတဵုဒှ်ကၠုၚ်အိုတ်ရ။
ယွံခမဳတအ် ပွမဟွံကလိဂွံလာဘ် မကတဵုဒှ်ကၠုၚ် ။ ပ ။ ပွမဒယှ်တှ် ပကတဵုဒှ်ကၠုၚ်။ ပွမဟွံမွဲကဵုဒယှ်တှ် မကတဵုဒှ်ကၠုၚ်။ ပွမသ္ပမြိမြန်ကၠောန်ၜိုတ် ဗွဲမဒးရး မကတဵုဒှ်ကၠုၚ်။ ပွမဟွံသ္ပမြိမြန်ကၠောန်ၜိုတ် ဗွဲမဒးရး မကတဵုဒှ်ကၠုၚ်။ ပၟိက်မယုတ်သဝ် မကဵုဒှ်ကၠုၚ်။ ကုခမဳ မပဒတဴ သီုဟွံဓလီုဍိုက် ပွမၞုံကဵုမိတ်သဟာဲမယုတ်မာ မကတဵုဒှ်ကၠုၚ်ဂှ် ဓရ်အာသဝ ကေုာံပွမဍောၚ်ၜိုတ်စိုတ် ပွမဒတူတၠာဲဂမၠိုၚ် ကတဵုဒှ်ကၠုၚ်အိုတ်ရ၊ ကုခမဳ ဓလီုဍိုက်ကၠေံ ဓလီုဍိုက်ကၠေံ ပွမၞုံကဵုမိတ်သဟာဲမယုတ်မာ မကတဵုဒှ်ကၠုၚ်ဂှ်တုဲ ပဒတဴဂှ် ဓရ်အာသဝ ကေုာံပွမဍောၚ်ၜိုတ်စိုတ် ပွမဒတူတၠာဲဂမၠိုၚ် ဟွံကတဵုဒှ်ကၠုၚ်အိုတ်ရ။ ယွံခမဳတအ် သ္ပဟိုတ်ကဵု ဖဵုတၟေၚ်သာ်ဝွံတုဲ ဓလီုဍိုက်ကၠေံ ဓလီုဍိုက်ကၠေံ ပွမကလိဂွံလာဘ် မကတဵုဒှ်ကၠုၚ်ဂှ်တုဲ ဒးပဒတဴမံၚ်ရ။ ပွမဟွံကလိဂွံလာဘ် မကတဵုဒှ်ကၠုၚ် ။ ပ ။ ပွမဒယှ်တှ် မကတဵုဒှ်ကၠုၚ်။ ပွမဟွံမွဲကဵုဒယှ်တှ် မကတဵုဒှ်ကၠုၚ်။ ပွမသ္ပမြိမြန် ကၠောန်ၜိုတ် ဗွဲမဒးရး မကတဵုဒှ်ကၠုၚ်။ ပွမဟွံသ္ပမြိမြန်ကၠောန်ၜိုတ် ဗွဲမဒးရး မကဵုဒှ်ကၠုၚ်။ ပၟိက်မယုတ်သဝ် မကတဵုဒှ်ကၠုၚ်။ ဓလီုဍိုက်ကၠေံ ဓလီုဍိုက်ကၠေံ ပွမၞုံကဵုမိတ်သဟာဲမယုတ်မာ မကတဵုဒှ်ကၠုၚ်ဂှ်တုဲ ဒးပဒတဴမံၚ်ရ။
ယွံခမဳတအ် ဟိုတ်ဂှ်ရ ပ္ဍဲသာသနာဝွံ ဓလီုဍိုက်ကၠေံ ဓလီုဍိုက်ကၠေံ ပွမကလိဂွံလာဘ် မကတဵုဒှ်ကၠုၚ်ဂှ်တုဲ ကြက်ပဒတဴမံၚ်အိုတ်ရ။ ပွမဟွံကလိဂွံလာဘ် မကတဵုဒှ်ကၠုၚ် ။ ပ ။ ပွမဒယှ်တှ် မကတဵုဒှ်ကၠုၚ်။ ပွမဟွံမွဲကဵုဒယှ်တှ် မကတဵုဒှ်ကၠုၚ်။ ပွမသ္ပမြိမြန်ကၠောန်ၜိုတ် ဗွဲမဒးရး မကတဵုဒှ်ကၠုၚ်။ ပွမဟွံသ္ပမြိမြန်ကၠောန်ၜိုတ်ဗွဲမဒးရးမကတဵုဒှ်ကၠုၚ်။ ပၟိက်မယုတ်သဝ် မကတဵုဒှ်ကၠုၚ်။ ဓလီုဍိုက်ကၠေံ ဓလီုဍိုက်ကၠေံ ပွမၞုံကဵုမိတ်သဟာဲမယုတ်မာ မကတဵုဒှ်ကၠုၚ်ဂှ်တုဲ ကြက်ပဒတဴမံၚ်အိုတ်ရ။ ၃၅၀။ ယွံခမဳတအ် ဒေဝဒတ် မၞုံကဵုစိုတ် မိန်ဓရ်အသပ္ပုရိုဟ်ဂမၠိုၚ်ပိသာ် မဂပ်ဝ် ဓလီုဍိုက်ရာန်သကိုတ်ဂှ် ကြက်ကတဵုဒှ် ပ္ဍဲအပါယ်ရ၊ ကြက်ကတဵုဒှ် ပ္ဍဲနရက်ရ၊ ကြက်တန်တဴ လုကဴအာယုကပ်ရ၊ ဇအုဲဇဗဝဳဗလးဟွံမာန်ရ။ ညးမ္ဂးပိသာ်အိုတ်ဂှ်ရော?— ပွမမၞုံကဵုပၟိက်မယုတ်ပရေအ်၊ ပွမမၞုံကဵုမိတ်မယုတ်မာ၊ နပွမကလိဂွံဓရ်တၟေၚ်ဗၞတ်ညိနာၚ်ဂှ် အာစိုပ်ပွမကျဟောံဗြောံ ပ္ဍဲအကြာရ။
ယွံခမဳတအ် ဒေဝဒတ် မၞုံကဵုစိုတ် မိန်ဓရ်အသပ္ပုရိုဟ်ဂမၠိုၚ်ပိသာ်ဝွံ မဂပ်ဝ်ဓလီုဍိုက် ရာန်သကိုတ်ဂှ် ကြက်ကတဵုဒှ် ပ္ဍဲအပါယ်ရ၊ ကြက်ကတဵုဒှ် ပ္ဍဲနရက်ရ၊ ကြက်တန်တဴ လုကဴအာယုကပ်ရ၊ ဇအုဲဇဗဝဳဗလးဟွံမာန်ရ။
ပ္ဍဲလောကဝွံ ညးမမိက်ကဵုမွဲမွဲ ကာလလဆောဝ်လေဝ် ဟွံထေက်ကဵုဒှ် ညးမၞုံကဵုပၟိက်ယုတ်ပရေအ်ရ၊ ဟိုတ်မၞုံကဵုပၟိက်ယုတ်ပရေအ်ဝွံလေဝ် ဩဝ်တီကေတ် လအာဂတိ ညးမၞုံကဵုပၟိက် ယုတ်ပရေအ်ဂမၠိုၚ်အိုတ်ရ။
ဒေဝဒတ်ဂှ် တၠပညာရ ရဴဝွံ ပြာကဋ်ရ၊ ညးမၞုံကဵုစိုတ် မဂပ်ဝ်ဇၞော်ပၟဝ်တုဲ ရဴဝွံ ဂပ်ဝ်သၟိတ်ဂးရ၊ ညံၚ်ရဴယးတၟးတဴ နကဵုသကအ်တွဳဝါရကီု ရဴဝွံ အဲကျာ် မိၚ်ရ။
ဒေဝဒတ်ဂှ် အာစိုပ်ပွဟိုတ်မာဲဒှ်တုဲ ဟိုတ်မမိက်ထ္ဍိမြိခ္ဍိုက်ခရိုက် အဲကျာ်ဂှ်ရ ဒးအာစိုပ် နရက်အဝဳစိ မၞုံကဵုပၞော်တြၚ်ပန်ပၞော် ထေက်ကဵုဖေက်ဂၟံက်ရ။
ယြဴညးမွဲ လုတ်မှာဒုဟ် ကုကျာ်တြဲ မဟွံထေက်ကဵုလုတ်မှာဒုဟ် မဟွံပတုဲပွသရာံပါပ်ရ၊ ပွသရာံပါပ်ဂှ် အာစိုပ် ပူဂိုလ်မၞုံကဵုစိုတ်မလုတ်မှာဒုဟ် မဟွံမွဲကဵုပွမရှေ်သှေ်ရဴဂဴဂှ်ဟေၚ်ရ။
ယြဴညးမွဲ နကဵုဂျိမွဲနုၚ် ပလီုပလာ် ၜဳမှာသၟိဒ်မာန်ရ ရဴဝွံ သမ္တီထေက်ကေတ်ရ၊ ညးဂှ် နကဵုဂျိမွဲနုၚ်ဂှ် ပလီုပလာ်ဟွံမာန်ရ။ ဟိုတ်ဍေံတုန် မှာသၟိဒ်ဂှ် ဇၞော်လှ်တုဲ ဟိုတ်မထေက်ကဵုဖေက်ဂၟံက်ရောၚ်။
တုပ်သၟဟ်သာ်ဝွံဟေၚ်ရ ယြဴညးမွဲ နဂလာန်မခ္ဍိုက်ခရိုက်ချုက်ချာဲ ပျဲပျာံရာန်သကိုတ် ကျာ်တြဲ မအာစိုပ်ပွမသၟဟ်သၟန် မၞုံကဵုစိုတ်ၜိုတ်လလမ်ရ၊ ဂလာန်မခ္ဍိုက် ခရိုက်ချုက်ချာဲ ညးဂှ် ဟွံစိုပ်ပ္ဍဲကျာ်တြဲရ။
ခမဳမဒ္ဂေတ်လၟေၚ်ဂၠံၚ်တရဴ ယြဴပူဂိုလ်မွဲ အာစိုပ်နိဗ္ဗာန် ဌာန်ဒဒိုခ်အိုတ်ရ၊ တၠပညာဂှ် ဒးသ္ပမိတ်ကဵု ပူဂိုလ်ဂကူဂှ်ရ၊ ဒးသိပ်ဂၠိပ်ဟုဲဟာဲ ပူဂိုလ်ဂှ်ရ။
