၆.၃.၉။ ပွမကဵုသၟိတ် ဒဒှ်ညးသၠးပရိက္ခာရာဗၞတ်ညိနာၚ်

၃၂၈။ ပ္ဍဲအခိၚ်ဂှ် ပ္ဍဲတိုပ်ဒြပ်သၚ် ပရိက္ခာရာဗၞတ်ညိနာၚ် ကတဵုဒှ်ကၠုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလပိုဉ် ကျာ်တြဲအိုတ်ရ။ ယွံခမဳတအ် ခမဳမဍိုက်ပေၚ်တဴ ကေုာံအၚ်္ဂဂမၠိုၚ်မသုန်သာ်ဂှ် ဒးသၟိတ်ပတိုန်ရဴဝွံမ္ဂး ခမဳမသၠး ပရိက္ခရာဗၞတ်ညိနာၚ်ရ။ ခမဳဂှ် ဟွံဗက်ဆန္ဒာဂတိရ။ ဟွံဗက် ဒေါသာဂတိရ။ ဟွံဗက် မောဟာဂတိရ။ ဟွံဗက် ဘယာဂတိရ။ သၠးတုဲ ဟွံဂွံသၠးဏီလေဝ် လေပ်တီရ။ ယွံခမဳတအ် ရဴဝွံ ဒးသၟိတ်ရ၊ ဗွဲကိုပ်ကၠာ သ္ဒးအာတ်ပါန်အခေါၚ် ခမဳရ၊ အာတ်ပါန်အခေါၚ်တုဲပ္ဍဲကြဴ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ— “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး သၚ် သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳမသၠး ပရိက္ခရာဗၞတ်ညိနာၚ်ရ၊ ဣဝွံတုန် ပွမကဵုတီရောၚ်။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် သၟိတ်ပတိုန် ခမဳမၞုံယၟုဝွံ ရဴဝွံမ္ဂးခမဳသၠး ပရိက္ခရာဗၞတ်ညိနာၚ်ရ၊ ယြဴကုတဳလပိုဉ်မွဲ မၞုံကဵုပွမသ္ဍိုက် ပွမသၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳမသၠး ပရိက္ခရာဗၞတ်ညိနာၚ်ရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ သၚ် ဂပ်ဝ်သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳမသၠး ပရိက္ခရာဗၞတ်ညိနာၚ်တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဂးကဵုတီရ ရဴဝွံ သ္ဂးရ)။ ခမဳမသၠး ပရိက္ခာရာဗၞတ်ညိနာၚ်ဂှ် ဒးကဵုတၞိၚ်မွဲတၞုၚ်ရ၊ ဒးကဵုၜုန်သၟတ်မွဲရ၊ ဒးကဵုဒၞပ်မွဲချဴရ၊ ဒးကဵုကာယဗန်မွဲတၞုၚ်ရ၊ ဒးကဵုဇုက်ကၟာဲရ၊ ဒးကဵုခ္ဍိုဟ်ဍာ်ယာတ်ရ၊ ဒးကဵုခ္ဍိုဟ်ဍာ်ဓမၚ်ကရိုဏ်ရ၊ အမာတ်ဇမၠိၚ်ရ၊ (ကောန်ကၞၚ်သ္ၚာမဂၠိၚ်)၊ ဒးကဵုအမာတ်အနာံမဂၠေံရ၊ ဒးကဵုဗွဝ်ဂၞါသ္ၚိသ္ၚာဇၞော်ရ၊ ဒးကဵုဗွဝ်ဂၞါသ္ၚိသ္ၚာဇၞော်ရ၊ ဒးကဵုဗွဝ်ဂၞဴသ္ၚိသ္ၚာဍောတ်ရ၊ ဒးကဵုအမာံဇမၠိၚ်ရ၊ ဒးကဵုအမာတ်ဇမၠေံရ။ ကၠေၚ်သွဟ် ဍာ်သာဲ တၚ်လာဲသၚ်ဂမၠိုၚ် နွံမ္ဂး ဒးကဵုသွက်ဂွံကၠာန်မွဲဝါရ၊ မွဲလှေ်ပၠန်လေဝ် မိက်ကၠာန်မ္ဂး မွဲလှေ်ပၠန်လေဝ် ဒးကဵုရ။