၆.၃.၇။ ပွမကဵုသၟိတ် ဒဒှ်မပတမ်ညးလးသၞာ

၃၂၇။ ပ္ဍဲအခိၚ်ဂှ် ခမဳ မလးဘာသၞာသတိက်သၞာဒၟံၚ် ကုသၚ် ဟွံမွဲရ ။ ပ ။ ခမဳပၟၚ်ဒြပ်ဟွံမွဲရ ။ ပ ။ ခမဳမဒုၚ်ဂိုၚ်ကေတ်သ္ၚာ ဟွံမွဲရ ။ ပ ။ ခမဳပါ်ပရအ်သ္ၚာ ဟွံမွဲရ ။ ပ ။ ခမဳမပါ်ပရအ်ယာဂု ဟွံမွဲရ ။ ပ ။ ခမဳမပါ်ပရအ်သတ်ဆု ဟွံမွဲရ ။ ပ ။ ခမဳမပါ်ပရအ် စၞစကွာၚ်ၜဲဟွံမွဲရ ။ ပ ။ စၞစကွာၚ်ၜဲ စွံပတန်လဝ် သီုဟွံပါ်ပရအ်ဂှ် လီုလာ်အာရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳမဍိုက်ပေၚ်တဴ ကေုာံအၚ်္ဂဂမၠိုၚ်မသုန်သာ်ဂှ် ဒးသၟိတ်ပတိုန်ရဴဝွံမ္ဂး ခမဳမပါ်ပရအ် စၞစကွာၚ်ၜဲရ။ ခမဳဂှ် ဟွံဗက် ဆန္ဒာဂတိရ။ ဟွံဗက် ဒေါသာဂတိရ။ ဟွံဗက် မောဟာဂတိရ။ ဟွံဗက် ဘယာဂတိရ။ ပါ်ပရအ်တုဲ ဟွံဂွံပါ်ပရအ်ဏီလေဝ် လေပ်တီရ။ ယွံခမဳတအ် ရဴဝွံ ဒးသၟိတ်ရ။ ဗွဲကိုပ်ကၠာ သ္ဒးအာတ်ပါန်အခေါၚ် ခမဳရ၊ အာတ်ပါန်အခေါၚ်တုဲပ္ဍဲကြဴ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ— “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳမပါ်ပရအ် စၞစကွာၚ်ၜဲရ၊ ဣဝွံတုန် ပွမကဵုတီရောၚ်။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳမပါ်ပရအ် စၞစကွာၚ်ၜဲရ၊ ယြဴကုတဳလပိုဉ်မွဲ မၞုံကဵုပွမသ္ဍိုက် ပွမသၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳမပါ်ပရအ် စၞစကွာၚ်ၜဲရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ သၚ် ဂပ်ဝ်သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳမပါ်ပရအ် စၞစကွာၚ်ၜဲတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။