၆.၃.၆။ ပွမကဵုသၟိတ် ဒဒှ်ခမဳ စၞောန်ထ္ၜးပိဏ္ဍပါတ်

၃၂၆။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် သွက်ဇကုတအ် ဂိုၚ်ကေတ် ဘတ်မပြဲဂမၠိုၚ်တုဲမ္ဂး ဘတ်မယုတ်ပရေအ်ဂမၠိုၚ်ဂှ် ကဵုကုခမဳဂမၠိုၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳမဍိုက်ပေၚ်တဴ ကေုာံအၚ်္ဂဂမၠိုၚ် မသုန်သာ်ဂှ် ဒးသၟိၚ်ပတိုန် ရဴဝွံမ္ဂး ခမဳစၞောန်ထ္ၜး ပိဏ္ဍပါတ်ရ။ ခမဳဂှ် ဟွံဗက် ဆန္ဒာဂတိရ။ ဟွံဗက် ဒေါသာဂတိရ။ ဟွံဗက် မောဟာဂတိရ။ ဟွံဗက် ဘယာဂတိရ။ စၞောန်ထ္ၜးတုဲ ဟွံဂွံစၞောန်ထ္ၜးဏီလေဝ် လေပ်တီရ။ ယွံခမဳတအ် ရဴဝွံ ဒးသၟိတ်ရ၊ ဗွဲကိုပ်ကၠာ သ္ဒးအာတ်ပါန်အခေါၚ် ခမဳရ၊ အာတ်ပါန်အခေါၚ်တုဲပ္ဍဲကြဴ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ— “ယွဴတဳလပိုဉ်တအ် သၚ် ဩဝ်ကလၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳစၞောန်ထ္ၜးပိဏ္ဍပါတ်ရ၊ ဣဝွံတုန် ပွမကဵုတီရောၚ်။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳစၞောန်ထ္ၜးပိဏ္ဍပါတ်ရ၊ ယြဴကုတဳလပိုဉ်မွဲ မၞုံကဵုပွမသ္ဍိုက် ပွမသၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳစၞောန်ထ္ၜးပိဏ္ဍပါတ်ရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ သၚ် ဟဂပ်ဝ်သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳစၞောန်ထ္ၜးပိဏ္ဍပါတ်တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။ ပ္ဍဲအခိၚ်ဂှ် “မုရဴသာ်လဵု ဂပ်ဝ်စၞောန်ထ္ၜးပိဏ္ဍပါတ်ရော?” ရဴဝွံ ကသပ်ဒှ် ကုခမဳစၞောန်ထ္ၜးပိဏ္ဍပါတ်ဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ချူဂၞတ်စုတ် ပ္ဍဲဒုန်ကရေက်ကီု ပ္ဍဲဂၠး (မပတမ်သၠတာ) ကီုတုဲ ဂၟာဲထကဵုတုဲမ္ဂး တၞဟ်နစၞောန်ထ္ၜးပိဏ္ဍပါတ် ကဵုအခေါၚ်ရ ရဴဝွံ (သ္ဂးရ)။