၆.၃.၈။ ပွမကဵုသၟိတ် ဒဒှ်မပတမ်ညးကဵုသ္ၚာသၞုက်ဗြဲ

၃၂၉။ ပ္ဍဲအခိၚ်ဂှ် ခမဳ မကဵုသ္ၚာသၞုက်ဗြဲ ကုသၚ် ဟွံမွဲရ ။ ပ ။ ခမဳမကဵုဗဗေၚ် ဟွံမွဲရ ။ ပ ။ ခမဳမဖအောဝ်စကာ ပၟၚ်အာရှာမ် ဟွံမွဲရ ။ ပ ။ ခမဳမဖအောဝ် သာမဏဳ ဟွံမွဲရ၊ သာမဏဳဂမၠိုၚ် ဟိုတ်မဟွံဖအောဝ်စကာဂှ်ရ ဟွံကၠောန်သ္ပ ကမၠောန်ကေၚ်ကာအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳမဍိုက်ပေၚ်တဴကေုာံ အၚ်္ဂမသုန်သာ်ဂှ် ဒးသၟိတ်ပတိုန် ရဴဝွံမ္ဂး ခမဳမဖအောဝ်စကာ သာမဏဳရ။

ခမဳဂှ် ဟွံဗက် ဆန္ဒာဂတိရ။

ဟွံဗက် ဒေါသာဂတိရ။

ဟွံဗက် မောဟာဂတိရ။

ဟွံဗက် ဘယာဂတိရ။

ဖအောဝ်စကာတုဲ ဟွံဂွံဖအောဝ်စကာဏီလေဝ် လေပ်တီရ။

ယွံခမဳတအ် ရဴဝွံ ဒးသၟိတ်ရ၊ ဗွဲကိုပ်ကၠာ သ္ဒးအာတ်ပါန်အခေါၚ် ခမဳရ၊ အာတ်ပါန်အခေါၚ်တုဲပ္ဍဲကြဴ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—

“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳမဖအောဝ် သာမဏဳရ၊ ဣဝွံတုန် ပွမကဵုတီရောၚ်။

ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် သၟိတ်ပတိုန် ခမဳမၞုံယၟုဝွံ ရဴဝွံမ္ဂးခမဳမဖအောဝ်စကာ သာမဏဳရ၊ ယြဴကုတဳလပိုဉ်မွဲ မၞုံကဵုပွမသ္ဍိုက် ပွမသၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳမဖအောဝ်စကာ သာမဏဳရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။

သၚ် ဂပ်ဝ်သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳမဖအောဝ်စကာ သာမဏဳတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။

❀❀❀ ခဏ်တတိယတုဲရ။ ❀❀❀

✵✵✵ သေနာသနက္ခန္ဓကဆဋ္ဌတုဲရ။ ✵✵✵