၆.၃.၁။ ကပေါတ်ဟွံထေက်ကဵုသၠးဂမၠိုၚ်

၃၂၁။ ပ္ဍဲအခိၚ်ဂှ် ခမဳပဒတဴဘာဂမၠိုၚ် ပ္ဍဲဘာသၟတ်မွဲ ဇရေၚ်ဍုၚ်သာရဝှ်ဂှ် ဒးလးကဵု ဘာသၞာသတိက်သၞာဒၟံၚ် သွက်ခမဳအာဂန္တုက ခမဳကွာ်တရဴဂမၠိုၚ်တုဲ ဒှ်ဂဗုတ်ပလာဲထုဲအိုတ်ရ။ ပ္ဍဲအခိၚ်ဂှ်—

“ယွံကောန်တၠတအ် ပ္ဍဲအခိၚ်လၟုဟ် ပိုဲညးဂမၠိုၚ် ဒးလးကဵု ဘာသၞာသတိက်သၞာဒၟံၚ် သွက်ခမဳအာဂန္တုက ခမဳကွာ်တရဴဂမၠိုၚ်ဂှ်ရ ဒှ်ဒၟံၚ်ဂဗုတ်ပလာဲထုဲအိုတ်ရ၊ ယွံကောန်တၠတအ် ပ္ဍဲအခိၚ်လၟုဟ် ပိုဲညးဂမၠိုၚ် ကဵုထောံ ဘာသၞာသတိက် သၞာဒၟံၚ် သၚ်အိုတ်သီု ကုခမဳမွဲဇကုအိုတ်စိုအ်၊ ကြက်ပြဘိုဂ်သုၚ် ကပေါတ်ဒြပ်ခမဳဂှ်အိုတ်ရ” ရဴဝွံ ကသပ်ဒှ် ကုခမဳဂမၠိုၚ်ဂှ်ရ။

ခမဳဂမၠိုၚ်ဂှ် ကဵုထောံ ဘာသၞာသတိက်သၞာဒၟံၚ်သၚ်အိုတ်သီု ကုခမဳမွဲဇကုအိုတ်ရ၊ ခမဳအာဂန္တုကဂမၠိုၚ် “ယွံကောန်တၠတအ် ဩဝ်လးကဵု ဘာသၞာသတိက်သၞာဒၟံၚ် သွက်ပိုဲညးဂမၠိုၚ်အိုတ်ညိ” ရဴဝွံ ဟီုသ္ဂးကဵု ခမဳဂမၠိုၚ်ဂှ်အိုတ်ရ။ ယွံကောန်တၠတအ် ဘာသၞာသတိက်သၞာဒၟံၚ်သၚ်ဟွံမွဲရ၊ ပိုဲညးဂမၠိုၚ် ကဵုထောံ ဘာသၞာသတိက်သၞာဒၟံၚ်သၚ်အိုတ်သီု ကုခမဳမွဲဇကုတုဲရ ရဴဝွံဟီုသ္ဂးအိုတ်ရ။ ယွံကောန်တၠတအ် မၞးတအ်ညးဂမၠိုၚ် သၠးထောံ ဘာသၞာသတိက်သၞာဒၟံၚ်သၚ်အိုတ်သီုအိုတ်ဟာ ရဴဝွံ (သၟာန်အိုတ်ရ)။ ဍာံပြရ ယွံကောန်တၠတအ် ရဴဝွံ (ဟီုသ္ဂးအိုတ်ရ)။

ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂမၠိုၚ် သၠးထောံ ဘာသၞာသတိက်သၞာဒၟံၚ် သၚ်အိုတ်သီုအိုတ်ရော?။ ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ခမဳဂမၠိုၚ် သၠးထောံ ဘာသၞာသတိက်သၞာဒၟံၚ် သၚ်အိုတ်သီုအိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ ယွံခမဳတအ် တြုံမဒှ်လ္ၚုသၟး (နူမဂ်ဖိုလ်) ဂမၠိုၚ်ဂှ် မုဟိုတ် သၠးထောံ ဘာသၞာသတိက်သၞာဒၟံၚ် သၚ်အိုတ်သီုအိုတ်ရော?၊ ယွံခမဳတအ် (ပွခမဳဂမၠိုၚ် သ္ပဒးဝွံ) ကုးညးဟွံလျုၚ် ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး သ္ဂးကဵုခမဳဂမၠိုၚ်ရ။

ယွံခမဳတအ် ကပေါတ်ဒြပ် ဟွံထေက်ကဵုသၠးပွးဂမၠိုၚ်မသုန်သာ်ဝွံ သၚ်ကီု ဂိုဏ်ကီု ပူဂိုလ်ကီု ဟွံထေက်ကဵုသၠးပွးအိုတ်ရ ၜိုန်ရသၠးပွးလေဝ် ဟွံအာစိုပ်သၠးပွးအိုတ်ရ၊ ကုခမဳမသၠးပွးဂှ် ဒးအာပတ်ထုလ္လစ္စယ်ရ။

ကပေါတ်ဒြပ်ဂမၠိုၚ်တုန် ညးဍေံအိုတ်ရော?။

အာရှာမ် ဂအာၚ်အာရှာမ်၊ ဣဝွံတုန် ဂကောံကပေါတ်ဒြပ် ဟွံထေက်ကဵုသၠးပွးပဌမရ၊ သၚ်ကီု ဂိုဏ်ကီု ပူဂိုလ်ကီု ဟွံထေက်ကဵုသၠးပွးရ၊ ၜိုန်သၠးပွးလေဝ် ဟွံအာစိုပ်သၠးပွးရ၊ ကုခမဳ မသၠးပွးဂှ် ဒးအာပတ်ထုလ္လစ္စယ်ရ။

ဘာ ဂအာၚ်ဘာ၊ ဣဝွံတုန် ဂကောံကပေါတ်ဒြပ် ဟွံထေက်ကဵုသၠးပွးဒုတိယရ၊ သၚ်ကီု ဂိုဏ်ကီု ပူဂိုလ်ကီု ဟွံထေက်ကဵုသၠးပွးရ၊ ၜိုန်သၠးပွးလေဝ် ဟွံအာစိုပ်သၠးပွးရ၊ ကုခမဳမသၠးပွးဂှ် ဒးအာပတ်ထုလ္လစ္စယ်ရ။

ဇံၚ်ဂတဵု ဖုန် ဂၞဳ၊ ဣဝွံတုန် ဂကောံကပေါတ်ဒြပ် ဟွံထေက်ကဵုသၠးပွးတတိယရ၊ သၚ်ကီု ဂိုဏ်ကီု ပူဂိုလ်ကီု ဟွံထေက်ကဵုသၠးပွးရ၊ ၜိုန်သၠးပွးလေဝ် ဟွံအာစိုပ်သၠးပွးရ၊ ကုခမဳမသၠးပွးဂှ် ဒးအာပတ်ထုလ္လစ္စယ်ရ။

နုၚ်ဗရိုတ် ဇရဳဗရိုတ်ဇၞော် ဇရဗရိုတ် ကၠာၚ်ဗရိုတ် ဝါစဳ (ဗဗဴ) မုဲ မြပံၚ် ကွဵုဇၜံက်ပၞုတ်၊ ဣဝွံတုန် ဂကောံကပေါတ်ဒြပ် ဟွံထေက်ကဵုသၠးပွးစတုတ္ထရ၊ သၚ်ကီု ဂိုဏ်ကီု ပူဂိုလ်ကီု ဟွံထေက်ကဵုသၠးပွးရ၊ ၜိုန်သၠးပွးလေဝ် ဟွံအာစိုပ်သၠးပွးရ၊ ကုခမဳမသၠးပွးဂှ် ဒးအာပတ်ထုလ္လစ္စယ်ရ။

လွာဇုက် ဒုန် ကၟတ်ဇပူ ကၟာစာဗဲ ချောဲ တိကမၠေတ် ကယျာဆု ကယျာတိ ဣဝွံတုန် ဂကောံကပေါတ်ဒြပ် ဟွံထေက်ကဵုသၠးပွးပဉ္စမရ၊ သၚ်ကီု ဂိုဏ်ကီု ပူဂိုလ်ကီု ဟွံထေက်ကဵုသၠးပွးရ၊ ၜိုန်သၠးပွးလေဝ် ဟွံအာစိုပ်သၠးပွးရ၊ ကုခမဳမသၠးပွးဂှ် ဒးအာပတ်ထုလ္လစ္စယ်ရ။

ယွံခမဳတအ် ကပေါတ်ဒြပ် ဟွံထေက်ကဵုသၠးပွးဂမၠိုၚ် မသုန်သာ်ဝွံ သၚ်ကီု ဂိုဏ်ကီု ပူဂိုလ်ကီု ဟွံထေက်ကဵုသၠးပွးရ၊ ၜိုန်သၠးပွးလေဝ် ဟွံအာစိုပ်သၠးပွးရ၊ ကုခမဳမသၠးပွးဂှ် ဒးအာပတ်ထုလ္လစ္စယ်ရ ရဴဝွံ (သ္ဂးရ)။