၆.၃.၂။ ကပေါတ် ဟွံထေက်ကဵုပါ်ပရအ်ဂမၠိုၚ်
၃၂၂။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်သာရဝှ် ဗၞတ်မိပ်လဟိၚ်တုဲမ္ဂး က္ညဂ္ၚေၚ်အာဒေသစာရိတ် ဇနပိုဒ်ကဳဋာဂိရိ မွဲဟာန်ကေုာံခမဳသၚ်ဂမၠိုၚ်မဂၠိုၚ် မၞုံဗၞတ်မသန်ကၠံကီု မွဲဟာန်ကေုာံသာရိပိုတ် မောဂ္ဂလာန်ဂမၠိုၚ်ကီုရ။ ခမဳအဿဇိပုနဗ္ဗသုကဂမၠိုၚ် “တဳလမၞုံပိုဉ်ကျာ်တြဲ မွဲဟာန်ကေုာံခမဳသၚ်ဂမၠိုၚ်မဂၠိုၚ် မၞုံဗၞတ်မသုန်ကၠံကီု မွဲဟာန်ကေုာံသာရိပိုတ်မောဂ္ဂလာန်ဂမၠိုၚ်ကီု က္ညကၠုၚ်ကဳဋာဂိရိရ ရဴဝွံ ဂွံမိၚ်ကေတ်အိုတ်ရ။ ယွံကောန်တၠတအ် ပ္ဍဲအခိၚ်လၟုဟ် ပိုဲညးဂမၠိုၚ် ပါ်ပရအ်ထောံ ဘာသၞာသတိက်သၞာဒၟံၚ် သၚ်အိုတ်သီုအိုတ်စိုအ်၊ သာရိပိုတ်မောဂ္ဂလာန်ဂမၠိုၚ် မၞုံပၟိက်ဆန္ဒယုတ်မာအိုတ်ရ၊ ဗက်အလိုက်ဓရ်မယုတ်သဝ်ဂမၠိုၚ်အိုတ်ရ၊ ပိုဲညးဂမၠိုၚ် ကြက်ဟွံလးကဵု ဘာသၞာသတိက်သၞာဒၟံၚ် သွက်သာရိပိုတ်မောဂ္ဂလာန်ဂမၠိုၚ်ဂှ်အိုတ်ရ” ရဴဝွံ ဟီုသ္ဂးအိုတ်တုဲ ခမဳအဿဇိပုနဗ္ဗသုကဂမၠိုၚ်ဂှ် ပါ်ပရအ်ထောံ ဘာသၞာသတိက်သၞာဒၟံၚ် သၚ်အိုတ်သီုအိုတ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ အတိုၚ်လၟေၚ်လၟေၚ် က္ညဂေတ်ဂ္ၚေၚ်အာဒေသစာရိတ်မ္ဂး စိုပ်ကၠုၚ် ဇနပိုဒ်ကဳဋာဂိရိရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် ယွံခမဳတအ် မၞးတအ်ညးဂမၠိုၚ် ဩဝ်အာအိုတ်ညိ၊ ပြာပ်အာဇရေၚ် ခမဳအဿဇိပုနဗ္ဗသုကဂမၠိုၚ်တုဲ “ယွံကောန်တၠတအ် တဳလမၞုံပိုဉ်ကျာ်တြဲ မွဲဟာန်ကေုာံခမဳသၚ်ဂမၠိုၚ်မဂၠိုၚ် မၞုံဗၞတ်မသုန်ကၠံကီု မွဲဟာန်ကေုာံသာရိပိုတ်မောဂ္ဂလာန်ဂမၠိုၚ်ကီု က္ညကၠုၚ်ကဳဋာဂိရိရ။ ယွံကောန်တၠတအ် သွက်တဳလမၞုံပိုဉ်ကျာ်တြဲကီု သွက်ခမဳသၚ်ကီု သွက်တဳလပိုဉ်သာရိပိုတ် မောဂ္ဂလာန်ဂမၠိုၚ်ကီု ဒးလးကဵုဘာသၞာသတိက်သၞာဒၟံၚ်ရ ရဴဝွံ ဩဝ်ဟီုအိုတ်ညိ” ရဴဝွံ သ္ဂးကဵုခမဳဂမၠိုၚ်ရ။
“ခိုဟ်သန်ရ ယွံတဳလပိုဉ်” ရဴဝွံ ခမဳဂမၠိုၚ် ဒုၚ်ဝန် ကုတဳလမၞုံပိုဉ်ကျာ်တြဲတုဲ ပြာပ်အာဇရေၚ် ခမဳအဿဇိပုနဗ္ဗသုကဂမၠိုၚ်တုဲ “ယွံကောန်တၠတအ် တဳလမၞုံပိုဉ်ကျာ်တြဲ မွဲဟာန်ကေုာံခမဳသၚ်ဂမၠိုၚ်မဂၠိုၚ် မၞုံဗၞတ်မသုန်ကၠံကီု မွဲဟာန်ကေုာံသာရိပိုတ် မောဂ္ဂလာန်ဂမၠိုၚ်ကီု က္ညကၠုၚ်ကဳဋာဂိရိရ။ သွက်တဳလမၞုံပိုဉ်ကျာ်တြဲကီု သွက်ခမဳသၚ်ကီု သွက်တဳလပိုဉ်သာရိပိုတ် မောဂ္ဂလာန်ဂမၠိုၚ်ကီု ဩဝ်လးကဵုဘာသၞာသတိက်သၞာဒၟံၚ်အိုတ်ညိ” ရဴဝွံ သ္ဂးကဵုခမဳအဿဇိပုနဗ္ဗသုကဂမၠိုၚ်ရ။
ယွံကောန်တၠတအ် ဘာသၞာသတိက်သၞာဒၟံၚ်သၚ် ဟွံမွဲရ၊ အလုံအိုတ်သီုဂှ် ပိုဲညးဂမၠိုၚ် ပါ်ပရအ်ထောံတုဲရ၊ ယွံကောန်တၠတအ် ပွမက္ညကၠုၚ် တဳလမၞုံပိုဉ်ကျာ်တြဲဂှ် ဒှ်ပွမက္ညကၠုၚ်ခိုဟ်ဆာဲရ၊ တဳလမၞုံပိုဉ်ကျာ်တြဲ ကြက်ပဒတဴ ဘာမၞုံပၟိက်ဂှ်ရ၊ သာရိပိုတ်မောဂ္ဂလာန်ဂမၠိုၚ် မၞုံပၟိက်ဆန္ဒယုတ်မာအိုတ်ရ၊ ဗက်လိုက်ပၟိက်ဓရ်မယုတ်သဝ်ဂမၠိုၚ်အိုတ်ရ၊ ပိုဲညးဂမၠိုၚ် လးကဵုဘာသၞာသတိက်သၞာဒၟံၚ် သွက်သာရိပိုတ်မောဂ္ဂလာန်ဂမၠိုၚ်ဂှ် ဟွံမာန်အိုတ်ရ” ရဴဝွံ ဟီုသ္ဂးအိုတ်ရ။
ယွံကောန်တၠတအ် မၞးတအ်ညးဂမၠိုၚ် ပါ်ပရအ်ထောံ ဘာသၞာသတိက်သၞာဒၟံၚ်သၚ်အိုတ်ဟာ ရဴဝွံ (သၟာန်အိုတ်ရ)။ ဍာံပြရ ယွံကောန်တၠတအ် ရဴဝွံ (ဟီုသ္ဂးအိုတ်ရ)။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳအဿဇိပုနဗ္ဗသုကဂမၠိုၚ် ပါ်ပရအ်ထောံ ဘာသၞာသတိက်သၞာဒၟံၚ်သၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ပ ။
ယွံခမဳတအ် ဍာံပြဟာ ။ ပ ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်အိုတ်ရ၊ ယွံခမဳတအ် တြုံမဒှ်လ္ၚုသၟး (နူမဂ်ဖိုလ်) ဂမၠိုၚ်ဂှ် မုဟိုတ် ပါ်ပရအ်ထောံ ဘာသၞာသတိက်သၞာဒၟံၚ် သၚ်အိုတ်ရော?၊ ယွံခမဳတအ် (ပွခမဳဂမၠိုၚ် သ္ပဒးဝွံ) ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး သ္ဂးကဵုခမဳဂမၠိုၚ်ရ။ ယွံခမဳတအ် ကပေါတ်ဒြပ် ဟွံထေက်ကဵုပါ်ပရအ်ဂမၠိုၚ် မသုန်သာ်ဝွံ သၚ်ကီု ဂိုဏ်ကီု ပူဂိုလ်ကီု ဟွံထေက်ကဵုပါ်ပရအ်အိုတ်ရ၊ ၜိုန်ပါ်ပရအ်လေဝ် ဟွံဒှ်ပါ်ပရအ်အိုတ်ရ၊ ကုခမဳမပါ်ပရအ်ဂှ် ဒးအာပတ်ထုလ္လစ္စယ်ရ။
ကပေါတ်ဒြပ်ဂမၠိုၚ်ဂှ်တုန် ညးဍေံအိုတ်ဂှ်ရော?။
အာရှာမ် ဂအာၚ်အာရှာမ်၊ ဣဝွံတုန် ဂကောံကပေါတ်ဒြပ် ဟွံထေက်ကဵုပါ်ပရအ်ပဌမရ၊ သၚ်ကီု ဂိုဏ်ကီု ပူဂိုလ်ကီု ဟွံထေက်ကဵုပါ်ပရအ်ရ၊ ၜိုန်ပါ်ပရအ်လေဝ် ဟွံဒှ်ပါ်ပရအ်ရ၊ ကုခမဳ မပါ်ပရအ်ဂှ် ဒးအာပတ်ထုလ္လစ္စယ်ရ။
ဘာ ဂအာၚ်ဘာ၊ ဣဝွံတုန် ဂကောံကပေါတ်ဒြပ် ဟွံထေက်ကဵုပါ်ပရအ်ဒုတိယရ၊ သၚ်ကီု ဂိုဏ်ကီု ပူဂိုလ်ကီု ဟွံထေက်ကဵုပါ်ပရအ်ရ၊ ၜိုန်ပါ်ပရအ်လေဝ် ဟွံဒှ်ပါ်ပရအ်ရ၊ ကုခမဳ မပါ်ပရအ်ဂှ် ဒးအာပတ်ထုလ္လစ္စယ်ရ။
ဇံၚ် ဂတဵု ဖုန် ဂၞဳ၊ ဣဝွံတုန် ဂကောံကပေါတ်ဒြပ် ဟွံထေက်ကဵုပါ်ပရအ်တတိယရ၊ သၚ်ကီု ဂိုဏ်ကီု ပူဂိုလ်ကီု ဟွံထေက်ကဵုပါ်ပရအ်ရ၊ ၜိုန်ပါ်ပရအ်လေဝ် ဟွံဒှ်ပါ်ပရအ်ရ၊ ကုခမဳ မပါ်ပရအ်ဂှ် ဒးအာပတ်ထုလ္လစ္စယ်ရ။
နုၚ်ဗရိုတ် ဇရဳဗရိုတ်ဇၞော် ဇရဗရိုတ် ကၠာၚ်ဗရိုတ် ဝါစဳ(ဗဗဴ) မုဲ မြပံၚ် ကွဵုဇၜံက်ပၞုတ်၊ ဣဝွံတုန် ဂကောံကပေါတ်ဒြပ် ဟွံထေက်ကဵုပါ်ပရအ်စတုတ္ထရ၊ သၚ်ကီု ဂိုဏ်ကီု ပူဂိုလ်ကီု ဟွံထေက်ကဵုပါ်ပရအ်ရ၊ ၜိုန်ပါ်ပရအ်လေဝ် ဟွံဒှ်ပါ်ပရအ်ရ၊ ကုခမဳ မပါ်ပရအ်ဂှ် ဒးအာပတ်ထုလ္လစ္စယ်ရ။
ဇုက်လွာ ဒုန် ကၟတ်ဇပူ ကၟာစာဗဲ ချောဲ တိကမၠေတ် ကယျာဆု ကယျာတိ ဣဝွံတုန် ဂကောံကပေါတ်ဒြပ် ဟွံထေက်ကဵုပါ်ပရအ်ပဉ္စမရ၊ သၚ်ကီု ဂိုဏ်ကီု ပူဂိုလ်ကီု ဟွံထေက်ကဵုပါ်ပရအ်ရ၊ ၜိုန်ပါ်ပရအ်လေဝ် ဟွံဒှ်ပါ်ပရအ်ရ၊ ကုခမဳ မပါ်ပရအ်ဂှ် ဒးအာပတ်ထုလ္လစ္စယ်ရ။ ယွံခမဳတအ် ကပေါတ်ဒြပ် ဟွံထေက်ကဵုပါ်ပရအ်ဂမၠိုၚ် မသုန်သာ်ဝွံ သၚ်ကီု ဂိုဏ်ကီု ပူဂိုလ်ကီု ဟွံထေက်ကဵုပါ်ပရအ်အိုတ်ရ၊ ၜိုန်ပါ်ပရအ်လေဝ် ဟွံဒှ်ပါ်ပရအ်အိုတ်ရ၊ ကုခမဳ မပါ်ပရအ်ဂှ် ဒးအာပတ်ထုလ္လစ္စယ်ရ ရဴဝွံ (သ္ဂးရ)။
