၆.၃။ ခဏ်တတိယ
၃၁၉။ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သကျဝၚ် ဒုၚ်ဂိုၚ်ကေတ် ဘာသၞာသတိက်သၞာဒၟံၚ် ပ္ဍဲဍုၚ်သာရဝှ်တုဲမ္ဂး အာဘာကွာန်သၟတ်မွဲရ၊ ပ္ဍဲဘာကွာန်သၟတ်ဂှ်လေဝ် ဒုၚ်ဂိုၚ်ကေတ် ဘာသၞာသတိက်သၞာဒၟံၚ်ပၠန်ရ။ ပ္ဍဲအခိၚ်ဂှ် “ယွံကောန်တၠတအ် တဳလပိုဉ်ဥပနန္ဒ ကောန်သၟိၚ်သာကျဝၚ်ဂှ် လေပ်ကယျာန်ဝေါတ်သေက်ဇဵုဂတမတ် ကြဴမတ် ဟီုသ္ဂးစှေ်စးအရေဝ်ဂၠိုၚ်တုဲ ပ္ဍဲသၚ်လေဝ် လေပ်သ္ပအဓိကိုရ်ရ။ ဥပနန္ဒဝွံ လုပ်ဒဂိုန်ပ္ဍဲဘာဝွံမ္ဂး ပိုဲညးဂမၠိုၚ်အိုတ်သီု ကြက်ဟွံဒှ်တသိုခ်အိုတ်ရ၊ လၟုဟ် သၟာန်ဥပနန္ဒဂှ်အိုတ်စိုအ်” ရဴဝွံ ကသပ်ဒှ် ကုခမဳဂမၠိုၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ်—
“ယွံကောန်တၠဥပနန္ဒ တၠအဲ ဒုၚ်ဂိုၚ်ကေတ် ဘာသၞာသတိက် သၞာဒၟံၚ် ပ္ဍဲဍုၚ်သာရဝှ်တုဲရ ဟွံသေၚ်ဟာ” ရဴဝွံ သၟာန်တဳလပိုဉ်ဥပနန္ဒ ကောန်သၟိၚ်သကျဝၚ်အိုတ်ရ။
ဍာံပြရ ယွံကောန်တၠတအ် ရဴဝွံ (သ္ဂးရ)။
ယွံကောန်တၠဥပနန္ဒ တၠအဲ သီုကဵုဒှ်ညးမွဲဓဝ် ဆေဝ်ဒဝ်ကၠေံ ၜါဘာဂမၠိုၚ်ဟာ ရဴဝွံ (သၟာန်အိုတ်ရ)။
ယွံကောန်တၠတအ် လၟုဟ် အဲဍိက် ဗလးကၠေံ ဘာကွာန်ဝွံတုဲ ဒုၚ်ဂိုၚ်ကေတ် ဘာပ္ဍဲဍုၚ် သာရဝှ်ရ ရဴဝွံ (သ္ဂးရ)။
ခမဳပၟိက်အောန်ဂမၠိုၚ်ဂှ် “တဳလပိုဉ်ဥပနန္ဒ ကောန်သၟိၚ်သကျဝၚ် သီုကဵုဒှ်ညးမွဲဓဝ် ဆေဝ်ဒဝ်ကၠေံ ၜါဘာဂမၠိုၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံဥပနန္ဒ တၠအဲ သီုကဵုဒှ်ညးမွဲဓဝ် ဆေဝ်ဒဝ်ကၠေံ ၜါဘာဂမၠိုၚ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။
ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ ယွံတြုံမဒှ်လ္ၚုသၟး (နူမဂ်ဖိုလ်) တၠအဲ သီုကဵုဒှ်ညးမွဲဓဝ် မုဟိုတ် ဆေဝ်ဒဝ်ကၠေံ ၜါဘာဂမၠိုၚ်ရော?၊ ယွံတြုံမဒှ်လ္ၚုသၟး (နူမဂ်ဖိုလ်) တၠအဲ ဒုၚ်ဂိုၚ်ကေတ် ဘာကွာန်ဂှ်တုဲ ဘာပ္ဍဲကွာန်ဝွံ ဗၠးအာရ၊ တၠအဲ ဒုၚ်ဂိုၚ်ကေတ် ဘာကွာန်ဝွံတုဲ ဘာပ္ဍဲကွာန်ဂှ် ဗလးအာရ၊ ယွံတြုံမဒှ်လ္ၚုသၟး (နူမဂ်ဖိုလ်) နနယ်ဝွံ တၠအဲ ဒှ်အာမ္ၚး နူသီုၜါဒၞာဲရ၊ ယွံတြုံမဒှ်လ္ၚုသၟး (နူမဂ်ဖိုလ်) (ပွတၠအဲ သ္ပဒးဝွံ) ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵု လျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး—
“ယွံခမဳတအ် ခမဳမဒှ်မွဲဇကုဓဝ် ဟဂပ်ဝ်ဆေဝ်ဒဝ် ၜါဘာဂမၠိုၚ်အိုတ်ရ၊ ကုခမဳမဆေဝ်ဒဝ်ဂှ် ဒးအာပတ်ဒုက္ကဋ်ရ” ရဴဝွံ (သ္ဂးရ)။
၃၂၀။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် နဟိုတ်မဂၠိုၚ်ဂၠၚ် တွံကဵု ဂလာန်မစပ်ကေုာံဝိနယ် ကုခမဳဂမၠိုၚ်ရ၊ တွံကဵုဂုဏ်ဝိနယ်ရ၊ တွံကဵုဂုဏ်ပွမကတ်ဗတောန် ဝိနယ်ရ၊ ရန်တၟအ်တုဲ ရန်တၟအ်တုဲ (စၞောန်တုဲ) ဟီုသ္ဂးတဴ ဂုဏ်တဳလပိုဉ်ဥပါလိရ။
ခမဳဂမၠိုၚ် “တဳလမၞုံပိုဉ်ကျာ်တြဲတုန် နဟိုတ်မဂၠိုၚ်ဂၠၚ် တွံကဵုဂလာန်မစပ်ကေုာံဝိနယ်ရ၊ တွံကဵုဂုဏ်ဝိနယ်ရ၊ တွံကဵုဂုဏ်ပွမကတ်ဗတောန်ဝိနယ်ရ၊ ရန်တၟအ်တုဲ ရန်တၟအ်တုဲ (စၞောန်တုဲ) ဟီုသ္ဂးတဴ ဂုဏ်တဳလပိုဉ်ဥပါလိရ။ ယွံကောန်တၠတအ် ပ္ဍဲအခိၚ်လၟုဟ် ပိုဲညးဂမၠိုၚ် ကတ်ဗတောန်ဓရ်ဝိနယ် ပ္ဍဲဇရေၚ်တဳလပိုဉ်ဥပါလိအိုတ်စိုအ်” ရဴဝွံ ဟီုသ္ဂးအိုတ်ရ။ ခမဳဂမၠိုၚ်ဗွဲမဂၠိုၚ် မဒှ်မှာထေရ်ဇၞော် မှာထေရ်ဍောတ် မှာထေရ်လဒေါဝ်ဂှ် ကတ်ဗတောန် ဓရ်ဝိနယ် ပ္ဍဲဇရေၚ်တဳလပိုဉ်ဥပါလိအိုတ်ရ။ တဳလပိုဉ်ဥပါလိ ဗွဲအစောမ်ပွမသ္ပရှေ်သှေ်ရဴဂဴ ကုခမဳထေရ်ဇၞော်ဂမၠိုၚ် သီုမဒတူဒၟံၚ်ဂှ် ဗတောန်ကဵုရ။
ခမဳထေရ်ဇၞော်ဂမၠိုၚ်လေဝ် ဗွဲအစောမ်ပွမရှေ်သှေ်ရဴဂဴဓရ် သီုမဒတူဒၟံၚ်ဂှ် ဂိုၚ်ကတ်ကေတ်အိုတ်ရ။ ပ္ဍဲအရာမကတ်ဗတောန်ဂှ် ခမဳထေရ်ဇၞော်ဂမၠိုၚ်လေဝ် ဍောၚ်ၜိုတ်အိုတ်ရ၊ တဳလပိုဉ်ဥပါလိလေဝ် ဍောၚ်ၜိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳသၟတ်ဗေတာန်ထ္ၜးကဵုဂှ် ဗွဲအစောမ်မရှေ်သှေ်ရဴဂဴဓရ် ဂဇအ်ပ္ဍဲသၞာမတုပ်သၟဟ်ကီု ပ္ဍဲသၞာမသၠုၚ်ကီုမာန်ရ၊ ကဵုအခေါၚ် တၞဟ်နဂဇအ်ရ၊ ခမဳဇၞော်မဂိုၚ်ကတ်ကေတ်ဂှ် ဗွဲအစောမ်မရှေ်သှေ်ရဴဂဴဓရ် ဂဇအ်ပ္ဍဲသၞာမတုပ်ကီု ပ္ဍဲသၞာမသဝ်ကီုမာန်ရ၊ ကဵုအခေါၚ်တၞဟ်နဂဇအ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဗွဲမဂၠိုၚ် ဟိုတ်မစၟဳမၚ်ဒၟံၚ် ပွမဗတောန်ထ္ၜးကဵု ပ္ဍဲဇရေၚ်တဳလပိုဉ်ဥပါလိ သီုမဒတူဒၟံၚ်အိုတ်ဂှ်ရ ဍောၚ်ၜိုတ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် တၞဟ်နပွမဂဇအ်မွဲစွံ သွက်ခမဳမၞုံကဵုသၞာတုပ်သၟဟ်ဂမၠိုၚ်ရ ရဴဝွံ (သ္ဂးရ)။ “မုရဴနဗၞတ်မွဲ ဒှ်ခမဳမၞုံကဵုသၞာတုပ်သၟဟ်ရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် တၞဟ်နပွမဂဇအ်မွဲစွံ ကေုာံခမဳမၞုံအပ္ဍဲပိဝှ် (သၟဝ်လတူနူဇကု၊ ဇၞော်ၜါဝှ် ဍောတ်ၜါဝှ်) ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳမၞုံကဵုသၞာမတုပ်သၟဟ်ဂမၠိုၚ်ဗွဲမဂၠိုၚ် ဂဇအ်ပ္ဍဲဇံၚ်တုဲ ပလီုပလာ်ဇံၚ်အိုတ်ရ။ ဂဇအ်ပ္ဍဲဂတဵုတုဲ ပလီုပလာ်ဂတဵုအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ဇံၚ်ကီု ဂတဵုကီု ကုခမဳဂကောံပိဇကုရ ရဴဝွံ (သ္ဂးရ)။
ခမဳဂကောံပိဇကုလေဝ် ဂဇအ်ပ္ဍဲဇံၚ်တုဲ ပလီုပလာ်ဇံၚ်အိုတ်ရ။ ဂဇအ်ပ္ဍဲဂတဵုတုဲ ပလီုပလာ် ဂတဵုအိုတ်ရ ။ ပ ။ ယွံခမဳတအ် ကဵုအခေါၚ် ဇံၚ်ကီု ဂတဵုကီု ကုခမဳဂကောံၜါဇကုရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဂမၠိုၚ် တၞဟ်နပွမဂဇအ်မွဲစွံ ပ္ဍဲသၞာဇမၠိၚ် ကေုာံခမဳဂမၠိုၚ် မၞုံကဵုသၞာဟွံတုပ်သၟဟ် (မဟွံမွဲကဵုအခေါၚ်ဂဇအ်မွဲစွံ)ဂှ် မၞုံကဵု’သံသယကုက္ကုစ္စ’ ပွမချပ်သၠေဟ်ပၟာဟွံဂပ်ဝ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံခမဳတအ် ပါဲကၠေံ ခမၞုဲကီု မၞိဟ်ဗြဴကီု ဥဘတောဗျဉ်ကီုတုဲ ကဵုအခေါၚ် တၞဟ်နပွမဂဇအ်မွဲစွံ ပ္ဍဲသၞာဇမၠိၚ် ကေုာံခမဳဂမၠိုၚ် မဟွံမွဲကဵုအခေါၚ်ဂဇအ်မွဲစွံ သၞာတုပ်သၟဟ်ရ ရဴဝွံ (သ္ဂးရ)။ ပ္ဍဲအခိၚ်ဂှ် “မုရဴနဗၞတ်မွဲ ဒှ်သၞာဇမၠိၚ် ယုတ်အိုတ်ရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် သၞာဂဇအ်ညးပိရုမ်ဂပ်ဂှ် ဒှ်သၞာဇမၠိၚ်ယုတ်အိုတ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ဝိသာခါ မစိုန်ဒှ်ညံၚ်မိ မိဂါရသေဌဳ မိက်ကဵုသိုၚ်ခၞံ ပြာသာဒ်မၞုံကဵုခုၚ်ဒုၚ်သၟဝ် မွဲဟာန်ကေုာံဝိုန်ဂၚ် (တနေဝ်တမေၚ်ကျာ) တၞဟ်နဖဵုသၚ်ရ၊ ပ္ဍဲအခိၚ်ဂှ် “တဳလမၞုံပိုဉ်ကျာ်တြဲ ဂပ်ဝ်ကဵုအခေါၚ် အရပ်စပ်သုၚ်စောဲပြာသာဒ်ဟာ မဟဂပ်ဝ်ကဵုအခေါၚ်ဟာ” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် အရပ်စပ်သုၚ်စောဲပြသာဒ်အိုတ်သီုရ ရဴဝွံ (သ္ဂးရ)။
ပ္ဍဲအခိၚ်ဂှ် ဟိုတ်နူမိနော် သၟိၚ်ပသေနဒဳကောသလ စုတိချိုတ်အာဂှ် အကပ္ပိယဘဏ်ဗွဲမဂၠိုၚ် ကတဵုဒှ်ကၠုၚ် ကုသၚ်ရ။ အကပ္ပိယဘဏ်ဂမၠိုၚ်တုန် ညးဍေံရော?၊ ဇံၚ်မၞုံကဵုဇိုၚ်မဂၠိၚ်နူဗၞတ်ဗ္ၜတ်ဒ္စံါလပုဟ်တဲကျာ်၊ ပၞၚ်မၞုံကဵုရုပ်သတ်ဒမြိုဟ်ပ္ဍဲဇိုၚ် ခေါဇဴဇၞော် မၞုံကဵုတသော်မဂၠိၚ် လတူနူပန်လပုဟ်၊ သၞာတသော်သတ် မစိစောန်လဝ် ရုပ်သတ်ဒမြိုဟ်၊ သၞာတသော်သတ်သာ်ဗု၊ သၞာလး မဂပ်ဝ်ခၞံကၠောန်လဝ် နကဵုတသော်သတ် မၞုံကဵုဍောၚ်ပ္ကဴ မစောန်ပြံက်တဴ၊ သၞာလး မပြိုက်လဝ်ချဵု၊ သၞာလးတသော်သတ် မၞုံကဵုရုပ်တၟေၚ်တၟဟ်၊ သၞာလးတသော်သတ် မၞုံကဵုတသာဲၜါလပါ်၊ သၞာလးတသော်သတ် မၞုံကဵုတသာဲမွဲလပါ်၊ သၞာလးမတုတ်သတ် နကဵုတောဝ်သုတ် မဇိၚ်ကၞတ်လဝ် နတောဝ်ထဝ်၊ သၞာလးပၠုပ်လဝ် တောဝ်သုတ် ပ္ဍဲအကြာတောဝ်ထဝ်တုဲ မဂပ်ဝ်တုတ်လဝ်၊ သၞာလးတသော်သတ်မဇၞော် ဗြဴသၟာလှ်စှေ်တြဴ ဒတူတုဲ လှေ်ရုမ်ဂပ်၊ သၞာလးစးစိၚ်၊ သၞာလးစးချေံ၊ သၞာလးကွဳ၊ သၞာလးမဇိၚ်လဝ် နကဵုစၞာံဗြန်ၜါပိထပ် မသၟဟ်ကေုာံဗၞတ်ဇံၚ်၊ သၞာလးမပြဲ မကၠောန်လဝ်နကဵုစၞာံဒြာဲစၟဝ်၊ သၞာမၞုံကဵုဂၞဳက္ဍိုပ် ဂၞဳဇိုၚ်ၜါလပါ် မဒှ်မွဲဟာန်ကေုာံသၠဖ္ဍာန်ဗကေတ်တအ်ရောၚ်။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။
ယွံခမဳတအ် ကုတ်ကၠေံ ဇိုၚ်ဇံၚ်တုဲ တၞဟ်နပြဘိုဂ်သုၚ်စောဲကီု ပလီုကၠေံရုပ်သတ် ဒမြိုဟ်ပလ္လၚ်တုဲ တၞဟ်နပြဘိုဂ်သုၚ်စောဲကီု သှ်ပၠိုဟ်ကၠေံသၞာပြိုက်ချဵုတုဲ တၞဟ်နပွမသ္ပဂၞဳကီု သၞာသှေ်သၟေဟ်ဂှ် တၞဟ်နသ္ပသၞာလးတိကီု ကဵုအခေါၚ်ရ ရဴဝွံ (သ္ဂးရ)။
