၆.၂.၉။ ပွမကဵုသၟိတ်ရဴဝွံမ္ဂး ညးကဵုဂိုၚ်ကေတ်ဘာ

၃၁၇။ ပ္ဍဲအခိၚ်ဂှ် “မုရဴညးမွဲ ထေက်ကဵုဒုၚ်ဂိုၚ်ကေတ် ဘာသၞာသတိက် သၞာဒၟံၚ်ဂမၠိုၚ်ရော?” ရဴဝွံ ကသပ်ဒှ် ကုခမဳဂမၠိုၚ်ရ။

ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

ယွံခမဳတအ် ခမဳမဍိုက်ပေၚ်တဴ ကေုာံအၚ်္ဂဂမၠိုၚ်မသုန်သာ်ဂှ် ဒးသၟိတ်ပတိုန်ရဴဝွံမ္ဂး ခမဳမကဵုဒုၚ်ဂိုၚ်ကေတ်ဘာရ။ ခမဳဂှ် ဟွံဗက် ဆန္ဒာဂတိရ။ ဟွံဗက် ဒေါသာဂတိရ။ ဟွံဗက်မောဟာဂတိရ။ ဟွံဗက်ဘယာဂတိရ။ ဂိုၚ်ကေတ်တုဲ ဟွံဂွံဂိုၚ်ကေတ်ဏီလေဝ် လေပ်တီရ၊ ယွံခမဳတအ် ရဴဝွံ ဒးသၟိတ်ရ၊ ဗွဲကိုပ်ကၠာ သ္ဒးအာတ်ပါန်အခေါၚ် ခမဳရ၊ အာတ်ပါန်အခေါၚ်တုဲ ပ္ဍဲကြဴခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—

“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳမကဵုဒုၚ်ဂိုၚ်ကေတ်ဘာရ၊ ဣဝွံတုန် ပွမကဵုတီရောၚ်။

ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳမကဵုဒုၚ်ဂိုၚ်ကေတ်ဘာရ၊ ယြဴကုတဳလပိုဉ်မွဲ မၞုံကဵုပွမသ္ဍိုက် ပွမသၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳမကဵုဒုၚ်ဂိုၚ်ကေတ်ဘာရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။

သၚ် ဂပ်ဝ်သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳမကဵုဒုၚ်ဂိုၚ်ကေတ်ဘာတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။

၃၁၈။ ပ္ဍဲအခိၚ်ဂှ် “မုရဴသာ်လဵု ထေက်ကဵုကဵုဒုၚ်ဂိုၚ်ကေတ်ဘာရော?” ရဴဝွံ ကသပ်ဒှ်ကုခမဳ မကဵုဒုၚ်ဂိုၚ်ကေတ်ဘာဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဗွဲကိုပ်ကၠာ တၞဟ်နရိုဟ်လၟိဟ် ခမဳဂမၠိုၚ် ရိုဟ်လၟိဟ်ခမဳဂမၠိုၚ်တုဲပ္ဍဲကြဴ တၞဟ်နရိုဟ်လၟိဟ် သၞာသတိက်ဂမၠိုၚ် ရိုဟ်လၟိဟ်သၞာသတိက်ဂမၠိုၚ်တုဲပ္ဍဲကြဴ တၞဟ်နပွမဒုၚ်ဂိုၚ်ကေတ် ဗွဲအပိုၚ်အခြာသၞာသတိက်ဂှ် ကဵုအခေါၚ်ရ ရဴဝွံ (သ္ဂးရ)။ ဂပ်ဝ်ကဵုဒုၚ်ဂိုၚ်ကေတ် ဗွဲအပိုၚ်အခြာ သၞာသတိက်အိုတ်မ္ဂး သၞာသတိက်ဂမၠိုၚ် ပဵုသာန်ဒၟံၚ်အိုတ်ရ ။ ပ ။ ယွံခမဳတအ် ကဵုအခေါၚ် တၞဟ်နကဵုဒုၚ်ဂိုၚ်ကေတ် ဗွဲအပိုၚ်အခြာဘာရ ရဴဝွံ (သ္ဂးရ)။

ကဵုဒုၚ်ဂိုၚ်ကေတ် ဗွဲအပိုၚ်အခြာဘာအိုတ်မ္ဂး ဘာဂမၠိုၚ် ပဵုသာန်ဒၟံၚ်အိုတ်ရ ။ ပ ။ ယွံခမဳတအ် ကဵုအခေါၚ် တၞဟ်နကဵုဒုၚ်ဂိုၚ်ကေတ် ဗွဲအပိုၚ်အခြာပြဝိုဏ်ရ ရဴဝွံ (သ္ဂးရ)။

ကဵုဒုၚ်ဂိုၚ်ကေတ် ဗွဲအပိုၚ်အခြာပြဝိုဏ်အိုတ်မ္ဂး ပြဝိုဏ်ဂမၠိုၚ် ပဵုသာန်ဒၟံၚ်အိုတ်ရ ။ ပ ။ ယွံခမဳတအ် သွက်ဘိုအ်လက်ကရဴလေဝ် ကဵုအခေါၚ် တၞဟ်နကဵုရ ရဴဝွံ (သ္ဂးရ)။

ဂိုၚ်ကေတ် သွက်ဘိုအ်လက်ကရဴတုဲမ္ဂး ခမဳသအာၚ်ကၠုၚ်စိုပ်မ္ဂး၊ ဟွံမိက်ကဵုမ္ဂး ဟွံဒးကဵုရ ရဴဝွံ (သ္ဂးရ)။

ပ္ဍဲအခိၚ်ဂှ် ခမဳဂမၠိုၚ် ကဵုခမဳတန်တဴ ပ္ဍဲမ္ၚးဥပစာသိမ် ဂိုၚ်ကေတ် ဘာသၞာသတိက် သၞာဒၟံၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ် ကဵုခမဳတန်တဴ ပ္ဍဲမ္ၚးဥပစာသိမ် ဂိုၚ်ကေတ် ဘာသၞာသတိက်သၞာဒၟံၚ်ရ၊ ကုခမဳမကဵုဂိုၚ်ကေတ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

ပ္ဍဲအခိၚ်ဂှ် ခမဳဂမၠိုၚ် ဂိုၚ်ကေတ် ဘာသၞာသတိက်သၞာဒၟံၚ်တုဲမ္ဂး အခါကာလအိုတ်သီု ဆေဝ်ဒဝ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဂိုၚ်ကေတ် ဘာသၞာသတိက်သၞာဒၟံၚ်တုဲမ္ဂး အခါကာလအိုတ်သီု ဟဂပ်ဝ်ဆေဝ်ဒဝ်ရ၊ ကုခမဳမဆေဝ်ဒဝ်ဂှ် ဒးအာပတ်ဒုက္ကဋ်ရ။

ယွံခမဳတအ် လုကဴဂိတုဗြဲပိဂိတုဂမၠိုၚ် ကဵုအခေါၚ် တၞဟ်နဆေဝ်ဒဝ်ရ၊ ပ္ဍဲဥတုမုဟ်ကျာ ဥတုက္ညၚ်ဂမၠိုၚ်တုန် ကဵုအခေါၚ် သွက်ဟဂွံဆေဝ်ဒဝ်ရ ရဴဝွံ (သ္ဂးရ)။

ပ္ဍဲအခိၚ်ဂှ် “ပွမဒုၚ်ဂိုၚ်ကေတ်ဘာဂမၠိုၚ် မၞုံဗၞတ်မုစိအိုတ်ရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ပွမဒုၚ်ဂိုၚ်ကေတ်ဘာဂမၠိုၚ် ပွမဒုၚ်ဂိုၚ်ကေတ်ဘာ ပ္ဍဲပုရိမဝှ်ကီု ပွမဒုၚ်ဂိုၚ်ကေတ်ဘာ ပ္ဍဲပစ္ဆိမဝှ်ကီု ပွမဒုၚ်ဂိုၚ်ကေတ်ဘာ ပ္ဍဲမ္ၚးဝှ်ကီု ဣဝွံမၞုံပိဂကူဂမၠိုၚ်ရ။ ပ္ဍဲဂိတုဒဂိုန်မွဲစွေက် ဂပ်ဝ်ဒုၚ်ဂိုၚ်ကေတ် ပွမဒုၚ်ဂိုၚ်ကေတ်ဘာ ပုရိမဝှ်ရ၊ ပ္ဍဲဂိတုခ္ဍဲသဳမွဲစွေက် ဂပ်ဝ်ကဵုဒုၚ်ကေတ် ပစ္ဆိမဝှ်ရ၊ ပ္ဍဲဂိတုဝှ်မွဲစွေက် ဂပ်ဝ်ကဵုဒုၚ်ဂိုၚ်ကေတ် ပွမဒုၚ်ဂိုၚ်ကေတ်ဘာ မ္ၚးဝှ်ရ။ ယွံခမဳတအ် ပွမဒုၚ်ဂိုၚ်ကေတ်ဘာဂမၠိုၚ် ဣဝွံမၞုံပိဂကူဂမၠိုၚ်ရ ရဴဝွံ (သ္ဂးရ)။

❀❀❀ခဏ်ဒုတိယတုဲရ။❀❀❀