၆.၂.၈။ မပတမ် ပွမဆေဝ်ဒဝ်သၞာ
၃၁၆။ ပ္ဍဲအခိၚ်ဂှ် အမာတ်ဇၞော် မဒှ်အာဇဳဝကမွဲတၠ ကဵုဒါန်ပိဏ္ဍပါတ် ကုသၚ်ရ။ တဳလပိုဉ်ဥပနန္ဒ ကောန်သၟိၚ်သကျဝၚ် က္ညကၠုၚ်နူလက်ကရဴတုဲ ကဵုခမဳဂဇအ်ဒၟံၚ် ပ္ဍဲမသက္ကုခြာမကဵုပိုဉ်ဟွံတုဲဏီဂှ် ဒၠိုက်ကတဵုရ၊ ဘာရုၚ်ကဵုပိုဉ် ဒှ်ကၠိုက်ကၟဵုရုသံၚ်ရ။ ပ္ဍဲအခိၚ်ဂှ် အမာတ်ဇၞော်ဂှ် “ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သကျဝၚ် က္ညကၠုၚ်နူလက်ကရဴတုဲမ္ဂး မုဟိုတ် ကဵုခမဳမဂဇအ်ဒၟံၚ် ပ္ဍဲမသက္ကုခြာကဵုပိုဉ်ဟွံတုဲဏီဂှ် ဒၠိုက်ကတဵုရော? ဘာရုၚ်ကဵုပိုဉ် ဒှ်အာညာန်ညေဲရ။ နပွမဂဇအ် ပ္ဍဲဒၞာဲမွဲသအာၚ်လေဝ် ဂွံအခေါၚ်စအတိုၚ်ပၟိက်ဟေၚ်ရ ဟွံသေၚ်ဟာ” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဂမၠိုၚ် ဂွံမိၚ်ကေတ် ဂလာန်အမာတ်ဇၞော် မဟီုဂရိုဟ်ပျုတ်ဗ္ဒေက် ဟီထ္ၜးဒုဟ်ဂှ်အိုတ်ဟေၚ်ရ။ ခမဳပၟိက်အောန်ဂမၠိုၚ် “တဳလပိုဉ်ဥပနန္ဒ ကောန်သၟိၚ်သကျဝၚ် က္ညကၠုၚ်နူလက်ကရဴတုဲမ္ဂး မုဟိုတ် ကဵုခမဳမဂဇအ်ဒၟံၚ် ပ္ဍဲမသက္ကုခြာမကဵုပိုဉ်ဟွံတုဲဏီဂှ် ဒၠိုက်ကတဵုရော?၊ ဘာရုၚ်ကဵုပိုဉ် ဒှ်အာညာန်ညေဲရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံဥပနန္ဒ တၠအဲ က္ညကၠုၚ်နူလက်ကရဴတုဲမ္ဂး ကဵုခမဳမဒှ်မသက္ကုခြာမကဵုပိုဉ်ဟွံတုဲဏီဂှ် ဒၠိုက်ကတဵုရ၊ ဘာရုၚ်ကဵုပိုဉ် ဒှ်အာညာန်ညေဲရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ ယွံတြုံမဒှ်လ္ၚုသၟး (နူမဂ်ဖိုလ်) တၠအဲ က္ညကၠုၚ်နူလက်ကရဴတုဲမ္ဂး မုဟိုတ် ကဵုခမဳဂဇအ်ဒၟံၚ် ပ္ဍဲမသက္ကုခြာမကဵုပိုဉ်ဟွံတုဲဏီဂှ် ဒၠိုက်ကတဵုရော?၊ ဘာရုၚ်ကဵုပိုဉ် ဒှ်အာညာန်ညေဲရသွံ၊ ယွံတြုံမဒှ်လ္ၚုသၟး (နူမဂ်ဖိုလ်) (ပွမတၠအဲသ္ပဒးဝွံ) ကုညးဟွံ လျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ် တုဲမ္ဂး “ယွံခမဳတအ် ဟဂပ်ဝ်ကဵုခမဳမကဵုပိုဉ်ဟွံတုဲဏီ ဒၠိုက်ကတဵုရ၊ ကုခမဳမကဵုဒၠိုက်ကတဵုဂှ် ဒးအာပတ်ဒုက္ကဋ်ရ။ ယဝ်ကဵုဒၠိုက်ကတဵုမ္ဂး ပဝါရိတ်လေဝ်ဒးရ၊ ‘ဩဝ်အာညိ ဩဝ်ရၚ်တၠုၚ်နၚ်ဍာ်ညိ’ ရဴဝွံ ဒးဟီုရ။ ကလိဂွံပွမရၚ်တၠုၚ်နၚ်ရဴဝွံမ္ဂး ဆာဲသန်ရ၊ ယဝ်ဟွံကလိဂွံမ္ဂး ၚိတ်ကၠေံမပုၚ်ဂမၠိုၚ် ဗွဲမဒးရးတုဲ ဒးကဵုဒၞာဲ ကုခမဳဇၞော်ရ။ ယွံခမဳတအ် အဲဂှ် ‘နဟိုတ်မမိက်ကဵုမွဲမွဲလေဝ် ဂပ်ဝ်ဆေဝ်ဒဝ်ဒၞာဲခမဳဇၞော်ရ’ ရဴဝွံ ဟွံတွံရ၊ ကုခမဳမဆေဝ်ဒဝ်ဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ကဵုခမဳဂိယဲဂမၠိုၚ် ဒၠိုက်ကတဵုအိုတ်ရ။ “ယွံကောန်တၠတအ် ပိုဲညးဂမၠိုၚ် ကတဵုဟွံမာန်အိုတ်ရ၊ ဒှ်ခမဳဂိယဲဂမၠိုၚ်အိုတ်ရ” ရဴဝွံ ခမဳဂိယဲဂမၠိုၚ် ဟီုသ္ဂးအိုတ်ရ။ “ပိုဲညးဂမၠိုၚ် ကြက်ကဵုတဳလပိုဉ်ဂမၠိုၚ် ဒၠိုက်ကတဵုအိုတ်ရ” ရဴဝွံ ထ္ၜလဘာ်ကဵုကတဵုတုဲ ဒတူတုဲမ္ဂး ဗလးထောံအိုတ်ရ။ ခမဳဂိယဲဂမၠိုၚ် ဗ္ၜူစိပ်ဂမၠိုၚ်ဒှ်တုဲ လောတ်စှေ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်ကဵုခမဳမဂိယဲ ဒၠိုက်ကတဵုရ၊ ကုခမဳမကဵုဒၠိုက်ကတဵုဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် “ပိုဲညးဂမၠိုၚ် ဒှ်ခမဳမဂိယဲ မဟဂပ်ဝ်ကဵုဒၠိုက်ကတဵုအိုတ်ရ” ရဴဝွံ ဆေဝ်ဒဝ်သၞာသတိက်သၞာဒၟံၚ်မပြဲဂမၠိုၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် သွက်ဂွံကဵုဒၞာဲမဗဗွဲ ကုခမဳမဂိယဲရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် နမကေတ်မြော်ဂှ် ဆေဝ်ဒဝ် ဘာသၞာသတိက်သၞာဒၟံၚ်ဂမၠိုၚ်အိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် နမကေတ်မြော်ဂှ် ဟဂပ်ဝ်ဆေဝ်ဒဝ် ဘာသၞာသတိက်သၞာဒၟံၚ်ရ၊ ကုခမဳမဆေဝ်ဒဝ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳသတ္တရသဝဂ္ဂဳဂမၠိုၚ် “ပိုဲညးဂမၠိုၚ် ကြက်ပြာပ်လုပ်ဒဂိုန် ပ္ဍဲဌာန်ဝွံအိုတ်ရ” ရဴဝွံ ပဠေဝ်ပဠေတ်တဴ ဘာဇၞော်မွဲဘာ မဒှ်တၞုၚ်တၞးအိုတ်ရ။ ခမဳဆဗ္ဗဂ္ဂဳဂမၠိုၚ် ညာတ်ကေတ် ခမဳသတ္တရသဝဂ္ဂဳဂမၠိုၚ် ပဠေဝ်ပဠေတ်တဴဘာတုဲ “ယွံကောတ်တၠတအ် ခမဳသတ္တရသဝဂ္ဂဳဂမၠိုၚ်ဝွံ ပဠေဝ်ပဠေတ်တဴဘာအိုတ်ရ။ ကြက်ကဵုခမဳဂမၠိုၚ်ဂှ် တိတ်အာလၟုဟ်အိုတ်ရ” ရဴဝွံ ဟီုသ္ဂးအိုတ်ရ။ ခမဳဆဗ္ဗဂ္ဂဳဂမၠိုၚ်လ္ၚဵုဂှ် “ယွံကောန်တၠတအ် စဵုကဵုပဠေဝ်ပဠေတ်တုဲဒှ် ဩဝ်လၟတ်မံၚ်ဒၟံၚ်အိုတ်ညိကၠာ၊ ပဠေဝ်ပဠေတ်တုဲမှ ကြက်ကဵုတိတ်အာအိုတ်ရ” ရဴဝွံ ဟီုသ္ဂးအိုတ်ရ။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် “ယွံကောန်တၠတအ် ဩဝ်ဒၠိုက်ကတဵုအိုတ်ညိ၊ ဘာဂှ် စိုပ်ကုပိုဲညးဂမၠိုၚ်ရ” ရဴဝွံ ဟီုသ္ဂးကဵု ခမဳသတ္တရသဝဂ္ဂဳဂမၠိုၚ်အိုတ်ရ။
ယွံကောန်တၠတအ် ပြဟ်ပြဟ်ဟေၚ် ထေက်ကဵုဒးဟီုလဴဗ္စရ ဟွံသေၚ်ဟာ၊ ပိုဲညးဂမၠိုၚ်လေဝ် ပဠေဝ်ပဠေတ် ဘာမွဲသအာၚ်မာန်အိုတ်ရ ရဴဝွံ (ဟီုသ္ဂးအိုတ်ရ)။
ယွံကောန်တၠတအ် ဘာဂှ် ဒြပ်သၚ် ဟွံသေၚ်ဟာ ရဴဝွံ (သၟာန်အိုတ်ရ)။
ယွံကောန်တၠတအ် ဍာံပြရ၊ ဘာဂှ် ဒြပ်သၚ်ရ ရဴဝွံ (ဟီုသ္ဂးအိုတ်ရ)။
“ယွံကောန်တၠတအ် ဩဝ်ဒၠိုက်ကတဵုအိုတ်ညိ၊ ဘာဂှ် စိုပ်ကုပိုဲညးဂမၠိုၚ်ရ” ရဴဝွံ (ဟီုသ္ဂးအိုတ်ရ)။
ယွံကောန်တၠတအ် ဘာဂှ် ဇၞော်လှဲရ၊ မၞးတအ်ညးဂမၠိုၚ်လေဝ် ဩဝ်ပဒတဴအိုတ်ညိ၊ ပိုဲညးဂမၠိုၚ်လေဝ် ပဒတဴအိုတ်ရ ရဴဝွံ (ဟီုသ္ဂးတိုန်အိုတ်ပၠန်ရ)။
“ယွံကောန်တၠတအ် ဩဝ်ဒၠိုက်ကတဵုအိုတ်ညိ၊ ဘာဂှ် စိုပ်ကုပိုဲညးဂမၠိုၚ်ရ” ရဴဝွံ ဟီုသ္ဂးတုဲ ထေဲပၞတ်သတိုတ် ဟွံမိပ်စိုတ်ဂမၠိုၚ်ဒှ်တုဲ ဂန်ရပ်ကေတ် ပ္ဍဲတမ်ကအ်တုဲမ္ဂး ဗက်ဗ္ဒဴထောံအိုတ်ရ။ ခမဳသတ္တရသဂမၠိုၚ်ဂှ် ဟိုတ်မဒးဒုၚ်ဗက်ဗ္ဒဴထောံဂှ်ရ လရိုအ်ယာံဒၟံၚ်အိုတ်ရ။ ခမဳဂမၠိုၚ် “ယွံကောန်တၠတအ် မၞးတအ်ညးဂမၠိုၚ် မုဟိုတ် လရိုအ်ယာံဒၟံၚ်အိုတ်ရော?” ရဴဝွံ သၟာန်အိုတ်ရ။ ယွံကောန်တၠတအ် ခမဳဆဗ္ဗဂ္ဂဳဂမၠိုၚ်ဝွံ ထေဲပၞတ်သတိုတ် ဟွံမိပ်စိုတ်ဂမၠိုၚ်ဒှ်တုဲ ဗက်ဗ္ဒဴထောံ ပိုဲညးဂမၠိုၚ် နူဘာသၚ်အိုတ်ရ ရဴဝွံ (ကလေၚ်ဟီုလဴထ္ၜးအိုတ်ရ)။
ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ထေဲပၞတ်သတိုတ် ဟွံမိပ်စိုတ်ဂမၠိုၚ်ဒှ်တုဲ ဗက်ဗ္ဒဴထောံခမဳဂမၠိုၚ် နူဘာသၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
“ယွံခမဳတအ် ခမဳဆဗ္ဗဂ္ဂဳဂမၠိုၚ် ထေဲပၞတ်သတိုတ် ဟွံမိပ်စိုတ်ဂမၠိုၚ်ဒှ်တုဲ ဗက်ဗ္ဒဴထောံ ခမဳဂမၠိုၚ် နူဘာသၚ်အိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ) ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး “ယွံခမဳတအ် နပွမထေဲပၞတ်ကီု နပွမဟွံမိပ်စိုတ်ကီု ဟဂပ်ဝ်ဗက်ဗ္ဒဴထောံ ခမဳဂမၠိုၚ် နူဘာသၚ်ရ၊ ကုခမဳမဗက်ဗ္ဒဴထောံဂှ် ဒးကဵုသ္ပ ဗွဲမဗဗွဲကဵုအာပတ်ရ။
“ယွံခမဳတအ် ကဵုအခေါၚ် သွက်ဂွံကဵုသိုၚ်ကေတ် ဘာသၞာသတိက်သၞာဒၟံၚ်ရ” ရဴဝွံ (သ္ဂးရ)။
