၆.၂.၇။ အနုမောဒနာ ဗလးဘာဇေတဝန်
၃၁၅။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ အတိုၚ်လၟေၚ်လၟေၚ် က္ညဂ္ၚေၚ်ဒေသစာရိတ်မ္ဂး စိုပ်ကၠုၚ် ဍုၚ်သာရဝှ်ရ၊ တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ်ရ။ ပ္ဍဲအခိၚ်ဂှ် အနာထပိဏ္ဍိကသေဌဳ ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ်တုဲမ္ဂး သီုမဂဇအ်ဒၟံၚ်ပ္ဍဲဒၞာဲမွဲဂှ် “ယွံတဳလပိုဉ် သွက်တ္ၚဲယးတေံ တဳလမၞုံပိုဉ်ကျာ်တြဲ မွဲဟာန်ကေုာံခမဳသၚ် ဩဝ်ဒုၚ်တဲ ပိဏ္ဍပါတ် အဲဍိက်ညိ” ရဴဝွံ ဂရၚ်ပတီရ၊ တဳလမၞုံပိုဉ်ကျာ်တြဲဂှ် နမမံၚ်ထောံသ္ၚိတ်သ္ၚိတ်ဂှ် ဒုၚ်ကေတ်တဲရ၊ ပ္ဍဲအခိၚ်ဂှ် အနာထပိဏ္ဍိကသေဌဳ တီကေတ် တဳလမၞုံပိုဉ်ကျာ်တြဲ ဒုၚ်တဲတုဲ ဒလိုက်ကတဵုနူဒၞာဲလ္ၚောဝ်သ္ပဝတ် တဳလမၞုံပိုဉ်ကျာ်တြဲ သ္ပရှေ်သှေ်ရဴဂဴတုဲမ္ဂး ပါဲစ္ဍးအာရ။
ကြဴနူဂှ် အနာထပိဏ္ဍိကသေဌဳဂှ် ဗတမ်ဂှ်လောန်ၜက်အာတုဲ ကဵုစဳရေၚ်စၞအာဟာရ ဘောဇိုန်မပြဲပြဲ ပ္ဍဲသ္ၚိဇကုတုဲ ‘တဳလမၞုံပိုဉ် ဒးအခိၚ်ရ၊ ပဠေဝ်ပဠေတ်ပိဏ္ဍပါတ်တုဲရ’ ရဴဝွံ ကဵုဂရၚ်ပတီ ဒးအခိၚ်ကဵုပိုဉ် ကုတဳလမၞုံပိုဉ်ကျာ်တြဲရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပ္ဍဲအခိၚ်နူဂယး ဗိုက်ပဠေဝ်ပဠေတ်သ္ၚာတုဲ သီုမထ္ၜဂိုၚ်ရပ်ကေတ်ဗဗေၚ်သ္ၚာဂှ် က္ညပြာပ်စဴအာသ္ၚိ အနာထပိဏ္ဍိကသေဌဳတုဲမ္ဂး ဂဇအ်ဒၟံၚ်ပ္ဍဲသၞာမလးပညပ်လဝ် မွဲဟာန်ကေုာံခမဳသၚ်ရ၊ ပ္ဍဲအခိၚ်ဂှ် အနာထပိဏ္ဍိကသေဌဳဂှ် အနာထပိဏ္ဍိကသေဌဳဂှ် နကဵုစၞအာဟာရ ဘောဇိုန်မပြဲပြဲ အလဵုဇကု ကၠောန်ၜိုတ်ဥပကာ တြာပ်ဖာပ်ဗ္စ ခမဳသၚ်မၞုံပဓာန်ဍေံ တဳလမၞုံပိုဉ်ကျာ်တြဲ စဵုကဵုတြိုပ်ကဵုစိုတ် စဵုကဵုဒးဆေဝ်တာပဒေါအ်တုဲမ္ဂး တဳလမၞုံပိုဉ်ကျာ်တြဲ ကဵုပိုန်တုဲ ပ္ဍဲအခိၚ်ပါဲကၠေံတဲ နူဗဗေၚ်တုဲဂှ် အနာထပိဏ္ဍိကသေဌဳဂှ် ဂဇအ်ဒၟံၚ်ပ္ဍဲဒၞာဲမွဲတုဲ “ယွံတဳလမၞုံပိုဉ် ပ္ဍဲဘာဇေတဝန်ဂှ် အဲဍိက် ပသာ်ဂွံဒ္ဂေတ် သ္ပရော?” ရဴဝွံ ဂရၚ်ပတီ ကုတဳလမၞုံပိုဉ်ကျာ်တြဲရ။ ယွံသမ္ၚေဟ် ဒှ်သာ်ဂှ်မ္ဂး ဘာဇေတဝန်ဂှ် တၠအဲ ဩဝ်ကဵုဒါန် ကုသၚ်မၞုံပ္ဍဲဒိုဟ်ပန် မကၠုၚ်စိုပ်တုဲ ကြက်ကၠုၚ်စိုပ်ညိ ရဴဝွံ (သ္ဂးရ)။
“ယွံတဳလမၞုံပိုဉ် ခိုဟ်သန်ရ” ရဴဝွံ အနာထပိဏ္ဍိကသေဌဳ ဒုၚ်ဝန် ကုတဳလမၞုံပိုဉ်ကျာ်တြဲတုဲပ္ဍဲကြဴ ဘာဇေတဝန်ဂှ် ကဵုဒါန် ကုသၚ်မၞုံပ္ဍဲဒိုဟ်ပန် မကၠုၚ်စိုပ်တုဲ ကြက်ကၠုၚ်စိုပ်ရ။ ကြဴနူဂှ် တဳလမၞုံပိုဉ်ကျာ်တြဲ သ္ပအနုမောဒနာကဵု အနာထပိဏ္ဍိကသေဌဳ နကဵုဂါထာဂမၠိုၚ်ဝွံရ— “(ဘာဂှ်) ပါဲပၠေၚ်ကၠေံ လၟုဟ်ဂံက်ကီု လၟုဟ်ဂမ္တဴကီု သအာၚ်နူဂှ် သတ်ဂမၠိုၚ်ကီု ဇြုံဂဂဳအယဴဂမၠိုၚ်ကီု ဂမိတ်ဂမၠိုၚ်ကီု ကျာဂံက်ဂမၠိုၚ်ကီု ထၞဟ်ဗြဲဂမၠိုၚ်ကီုမာန်ရ။
သအာၚ်နူဂှ် ကျာမသကာတ်မြဟ် ဂမ္တဴတ္ၚဲမသကာတ်မြဟ် မကတဵုဒှ်ကၠုၚ်လေဝ် ပါဲပၠေၚ်ကၠေံမာန်ရ၊ တၞဟ်နပွမသတိက်သတၚ်ကီု တၞဟ်နပွမဒှ်တသိုခ်ကီု တၞဟ်နပွမလုပ်စၛာန်ကီု တၞဟ်နပွမမၠာ်သ္ၚေဝ် ဝိပဿနာကီု ပွမဂွံကဵုဒါန်ဘာဂှ် ပြဲရ ရဴဝွံ ကျာ်တြဲထိုၚ်သးရ။
ဟိုတ်ဂှ်ရ ညးမၞုံကဵုပညာ မညာတ်အာ ဒတုဲဖဵုဇကုဂှ် ကဵုသိုၚ်ခၞံ ဘာဂမၠိုၚ် မထေက်ကဵုမိပ်လဟိၚ်ရ၊ ပ္ဍဲဘာဂမၠိုၚ်ဝွံ ကဵုခမဳသၚ်ဂမၠိုၚ် မၞုံကဵုလမိၚ်လညာတ်မဂၠိုၚ်ပဒတဴရ၊ နကဵုစိုတ်မလျုၚ်ဇြုၚ်သ္ဍိုက် ဒးကဵုဒါန် စၞစကီု စၞသုၚ်ကီု သ္ၚာသၞာသတိက် သၞာဒၟံၚ်ဂမၠိုၚ်ကီု မဗဗွဲကုခမဳမလ္ဂူတပ်ဂမၠိုၚ်ရ။
ခမဳဂမၠိုၚ်ဂှ် တွံကဵုဓရ် မလေပ်ပါဲကၠေံ ဒဒိုခ်အိုတ်သီုမာန် ကုဒကာဘာဂှ်အိုတ်ရ၊ ဒကာဘာဂှ် တီကေတ်ဓရ် ပ္ဍဲသာသနာဝွံတုဲ သီုဟွံမွဲကဵုဓရ်အာသဝဂှ် ဂွံၜိုဟ်သတိုတ်ရ” ရဴဝွံ (အနုမောဒနာရ)။ တဳလမၞုံပိုဉ်ကျာ်တြဲ သ္ပအနုမောဒနာကဵု အနာထပိဏ္ဍိကသေဌဳ နကဵုဂါထာဂမၠိုၚ်ဝွံတုဲ ပ္ဍဲကြဴ ဒၠိုက်ကတဵုနူဒၞာဲ က္ညပါဲစ္ဍးအာရ။
