၆.၂.၆။ ကဵုအခေါၚ် ဒြပ်ခရှ်ဂမၠိုၚ်

၃၁၄။ ပ္ဍဲအခိၚ်ဂှ် မၞိဟ်ဂမၠိုၚ် ပ္ဍဲဘာရုၚ်ကဵုပိုဉ်အပ္ဍဲကွာန် လးလဝ်သၞာမသၠုၚ် သၞာမပြဲဂမၠိုၚ်အိုတ်ရ။ သၞာဂမၠိုၚ်တုန် ညးဍေံအိုတ်ရော?— ဇံၚ်မၞုံကဵုဇိုၚ်မဂၠိၚ် နူဗၞတ်ဗ္ၜတ်ဒ္စံါလပုဟ်တဲကျာ်၊ ပၞၚ်မၞုံကဵုရုပ်သတ်ဒမြိုဟ်ပ္ဍဲဇိုၚ် ခေါဇဴဇၞော် မၞုံကဵုတသော်မဂၠိၚ် လတူနူပန်လပုဟ်၊ သၞာတသော်သတ် မစိစောန်လဝ် ရုပ်သတ်ဒမြိုဟ်၊ သၞာတသော်သတ်သာ်ဗု၊ သၞာလး မဂပ်ဝ်ခၞံကၠောန်လဝ် နကဵုတသော်သတ် မၞုံကဵုဍောၚ်ပ္ကဴ မစောန်ပြံက်တဴ၊ သၞာလးမပြိုက်လဝ်ချဵု၊ သၞာလးတသော်သတ် မၞုံကဵုရုပ်တၟေၚ်တၟဟ်၊ သၞာလးတသော်သတ် မၞုံကဵုတသာဲၜါလပါ်၊ သၞာလးတသော်သတ် မၞုံကဵုတသာဲမွဲလပါ်၊ သၞာလး မတုတ်လဝ် နကဵုတောဝ်သုတ် မဇိၚ်ကၞတ်လဝ် နတောဝ်ထဝ်၊ သၞာလးပၠုပ်လဝ် တောဝ်သုတ် ပ္ဍဲအကြာတော်ထဝ်တုဲ မဂပ်ဝ်တုတ်လဝ်၊ သၞာလးတသော်သတ်မဇၞော် ဗြဴသၟာလှေ်စှ်တြဴ ဒတူတုဲ လှေ်ရုမ်ဂပ်၊ သၞာလးစးစိၚ်၊ သၞာလးစးချေံ၊ သၞာလးကွဳ၊ သၞာလးမဇိၚ်လဝ် နကဵုစၞာံဗြန် ၜါပိထပ် မသၟဟ်ကေုာံဗၞတ်ဇံၚ်၊ သၞာလးမပြဲ မကၠောန်လဝ် နကဵုစၞာံဒြာဲစၟဝ်၊ သၞာမၞုံကဵုဂၞဳက္ဍိုပ် ဂၞဳဇိုၚ်ၜါလပါ် မဒှ်မွဲဟာန်ကေုာံသၠဖ္ဍာန်ဗကေတ်တအ်ရောၚ်။

ခမဳဂမၠိုၚ် မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဟွံဂပ်ဝ်ဂမၠိုၚ်ဒှ်တုဲ ဟွံဂဇအ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ၊ ယွံခမဳတအ် ဇံၚ်ဂတဵု မၞုံကဵုဇိုၚ်မဂၠိၚ်ကီု ပလ္လၚ်ကီု သၞာပြိုက်ချဵုကီု ပါဲကၠေံပိဂကူဂမၠိုၚ်ဝွံတုဲ ကဵုအခေါၚ် သွက်ဂွံဂဇအ် သၞာလးမဒှ်ဂြပ်ခရှ်ဂမၠိုၚ်ရ၊ သွက်ဂွံတိက်ဂှ်တုန် ဟွံကဵုအခေါၚ်ရ ရဴဝွံ (သ္ဂးရ)။

ပ္ဍဲအခိၚ်ဂှ် မၞိဟ်ဂမၠိုၚ် ပ္ဍဲဘာရုၚ်ကဵုပိုဉ်အပ္ဍဲကွာန် လးလဝ်ဇံၚ်ကီု ဂတဵုကီု မကွိၚ်ဂြောပ်လဝ် ချဵုအိုတ်ရ၊ ခမဳဂမၠိုၚ် မၞုံကဵု ‘သံသယကုက္ကုစ္စ’ ပွမချပ်သၠေပ်ပၟာဟွံဂပ်ဝ်ဂမၠိုၚ်ဒှ်တုဲ ဟွံဂဇအ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံခမဳတအ် ကဵုအခေါၚ် သွက်ဂွံဂဇအ် ဇံၚ်ဂတဵု မဒှ်ဒြပ်ခရှ်ဂမၠိုၚ်ရ၊ သွက်ဂွံတိက်ဂှ်တုန် ဟွံကဵုအခေါၚ်ရ ရဴဝွံ (သ္ဂးရ)။