၆.၂.၅။ ပါဲကၠေံ ပွမဆေဝ်ဒဝ်သၞာ

၃၁၃။ ပ္ဍဲအခိၚ်ဂှ် မၞိဟ်ဂမၠိုၚ် ရန်တၟအ်ကဵုသၚ်တုဲ စဳရေၚ်တဴ ကၞာထးဂမၠိုၚ်အိုတ်ရ၊ စဳရေၚ်တဴ သၞာလးဂမၠိုၚ်အိုတ်ရ၊ စဳရေၚ်တဴ ဒၞာဲဂမၠိုၚ်အိုတ်ရ၊ ခမဳကွးပဒတဴဇရေၚ်ဂမၠိုၚ် ခမဳဆဗ္ဗဂ္ဂဳဂမၠိုၚ်ဂှ် “တဳလမၞုံပိုဉ်ကျာ်တြဲဂှ် ဒြပ်သၚ်ဟေၚ် ကဵုအခေါၚ် အတိုၚ်လၟေၚ်ညးဇၞော်ရ၊ ရန်တၟအ်တုဲမသ္ပဂှ် ဟွံကဵုအခေါၚ်ရ” ရဴဝွံ အာနူဂတ နူဂတ သၚ်မၞုံပဓာန်ဍေံကျာ်တြဲတုဲ “မပတမ် ကၞာထးဝွံ ကြက်ဒှ် သွက်ဥပဇ္ၛာယ်ဂမၠိုၚ် ပိုဲတအ်ရ၊ မပတမ်ကၞာထးဝွံ ကြက်ဒှ်သွက်အ္စာဂမၠိုၚ် ပိုဲတအ်ရ၊ မပတမ်ကၞာထးဝွံ ကြက်ဒှ်သွက်ပိုဲတအ်ရ” ရဴဝွံ ကၞာထးသၞာလးဒၞာဲဒၟံၚ်ဂမၠိုၚ်လေဝ် သီဂိုၚ်ကေတ်အိုတ်ရ။

ပ္ဍဲအခိၚ်ဂှ် တဳလပိုဉ်သာရိပိုတ် အာနူလက်ကရဴ နူလက်ကရဴ သၚ်မၞုံပဓာန်ဍေံကျာ်တြဲမ္ဂး ဟိုတ်မသီဂိုၚ်ကေတ် ကၞာထးသၞာလးဒၞာဲဒၟံၚ်ဂမၠိုၚ်တုဲဒှ်ဂှ်ရ ဟွံကလိဂွံဒၞာဲဒၟံၚ်တုဲ ဂဇအ်ဒၟံၚ် ပ္ဍဲသၟဝ်တမ်ဆုမွဲရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပ္ဍဲဖလာၚ်ဂယး ဗတမ်ဂှ် ဒၠိုက်ကတဵုတုဲ ခအေမ်ရ။ တဳလပိုဉ်သာရိပိုတ်လေဝ် ခအေမ်ရ၊ ပ္ဍဲဌာန်ညးလဵုမွဲရော? ရဴဝွံ (သၟာန်ရ)။ ယွံကျာ်မၞုံပိုဉ် အဲဍိက်သာရိပိုတ်ရ ရဴဝွံ (ဂရၚ်ပတီရ)။ ယွံသာရိပိုတ် မုဟိုတ် တၠအဲ ပဒတဴဒၟံၚ် ပ္ဍဲဒၞာဲဝွံရော? ရဴဝွံ (သၟာန်ရ)။ ပ္ဍဲအခိၚ်ဂှ် တဳလပိုဉ်သာရိပိုတ် ဂရၚ်ပတီ ဟိုတ်ပရူပရာဝွံ ကုတဳလပိုဉ်ကျာ်တြဲရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံတုဲ တဳလမၞုံပိုဉ်ကျာ်တြဲ ကဵုဂကောံခမဳ ကောံဓရီုတုဲ “ယွံခမဳတအ် ခမဳကွးပဒတဴဇရေၚ်ဂမၠိုၚ် ခမဳဆဗ္ဗဂ္ဂဳဂမၠိုၚ်ဂှ် “တဳလမၞုံပိုဉ်ကျာ်တြဲဂှ် ဒြပ်သၚ်ဟေၚ် ကဵုအခေါၚ် အတိုၚ်လၟေၚ်ညးဇၞော်ရ၊ ရန်တၟအ်တုဲမသ္ပဂှ် ဟွံကဵုအခေါၚ်ရ” ရဴဝွံ အာနူဂတ နူဂတ သၚ်မၞုံပဓာန်ဍေံကျာ်တြဲတုဲ “မပတမ် ကၞာထးဝွံ ကြက်ဒှ် သွက်ဥပဇ္ၛာယ်ဂမၠိုၚ် ပိုဲတအ်ရ၊ မပတမ်ကၞာထးဝွံ ကြက်ဒှ်သွက်အ္စာဂမၠိုၚ် ပိုဲတအ်ရ၊ မပတမ်ကၞာထးဝွံ ကြက်ဒှ်သွက်ပိုဲတအ်ရ” ရဴဝွံ သီဂိုၚ်ကေတ် ကၞာထးသၞာလးဒၞာဲဒၟံၚ်ဂမၠိုၚ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက် ခမဳဂမၠိုၚ်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ) ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး—

ယွံခမဳတအ် ရန်တၟအ်တုဲမသ္ပဂှ်လေဝ် ဟဂပ်ဝ်ဆေဝ်ဒဝ် အတိုၚ်လၟေၚ်ညးဇၞော်ရ၊ ကုခမဳမဆေဝ်ဒဝ်ဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။