၆.၂.၄။ မပတမ်ပူဂိုလ်ဟွံထေက်ကဵုလ္ၚောဝ်

၃၁၂။ ယွံခမဳတအ် ပူဂိုလ်ဟွံထေက်ကဵုလ္ၚောဝ်ဂမၠိုၚ် ဣဝွံစှ်တၠဂမၠိုၚ်ရ။ ညးမဒှ်ပယျၚ်ကိုပ်ကၠာဂှ် ဟဂပ်ဝ်လ္ၚောဝ် ညးဒှ်ပယျၚ်နူလက်ကရဴရ၊ ဟဂပ်ဝ်လ္ၚောဝ် ခရှ် သာမဏဳရ၊ ဟဂပ်ဝ်လ္ၚောဝ် ခမဳဇၞော်နာနာသံဝါသက အဓမ္မဝါဒဳရ၊ ဟဂပ်ဝ်လ္ၚောဝ် မာတုဂါမ်ရ၊ ဟဂပ်ဝ်လ္ၚောဝ် ခမၞုဲရ၊ ဟဂပ်ဝ်လ္ၚောဝ် ခမဳပဒတဴပြဝးရ၊ ဟဂပ်ဝ်လ္ၚောဝ် ခမဳမထေက်ကဵုတံၚ်ဓဇက်တမ်ရ၊ ဟဂပ်ဝ်လ္ၚောဝ် ခမဳမထေက်ကဵုတၞဟ်နကဵုမာနတ်ရ၊ ဟဂပ်ဝ်လ္ၚောဝ် ခမဳဃောဒ္ဂေတ်မာနတ်ရ၊ ဟဂပ်ဝ်လ္ၚောဝ် ခမဳထေက်ကဵုကော်ပၠုပ်အဗ္ဘာန်ရ။ ယွံခမဳတအ် ပူဂိုလ်ဟွံထေက်ကဵုလ္ၚောဝ်ဂမၠိုၚ်တုန် ဣဝွံစှ်တၠဂမၠိုၚ်ရ။

ယွံခမဳတအ် ပူဂိုလ်မထေက်ကဵုလ္ၚောဝ်ဂမၠိုၚ် ဣဝွံပိတၠဂမၠိုၚ်ရ။ ညးမဒှ်ပယျၚ်နူလက်ကရဴဂှ် ထေက်ကဵုလ္ၚောဝ် ညးဒှ်ပယျၚ်ကိုပ်ကၠာရ၊ ထေက်ကဵုလ္ၚောဝ် ခမဳဇၞော်နာနာသံဝါသကဓမ္မဝါဒဳရ၊ ယွံခမဳတအ် ပ္ဍဲလိုက်သွဝ် မဒှ်မွဲဟာန်ကေုာံဒေဝတဴ ဒေဝတဴမာရ် ဗြီုဂမၠိုၚ် ကေုာံလိုက်မၞိဟ် မဒှ်မွဲဟာန်ကေုာံသမဏ ဗြာဟ္မဏသၟိၚ်မဂၠိုၚ်မၞိဟ်မဂၠိုၚ်ဝွံ ထေက်ကဵုလ္ၚောဝ်ကျာ်တြဲမထေက်ဒုၚ်ပူဇဴတၟေၚ် မက္ညကၠုၚ်တုပ်သၟဟ် ကေုာံကျာ်တမၠာဂမၠိုၚ်ရ။ ယွံခမဳတအ် ပူဂိုလ်မထေက်ကဵုလ္ၚောဝ်ဂမၠိုၚ်တုန် ဣဝွံပိတၠဂမၠိုၚ်ရ။