၆.၂.၃။ ကဵုအခေါၚ် မပတမ်ဒၞာဲကၠာတဲ

၃၁၀။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်ဝေသာလဳ ဗၞတ်မမိပ်လဟိၚ်တုဲမ္ဂး အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ် ဍုၚ်သာရဝှ်ရ။ ပ္ဍဲအခိၚ်ဂှ် ခမဳကွး ပဒတဴဇရေၚ်ဂမၠိုၚ် ခမဳဆဗ္ဗဂ္ဂဳဂမၠိုၚ်ဂှ် အာနူဂတ နူဂတ သၚ်မၞုံပဓာန်ဍေံကျာ်တြဲတုဲ “ဘာသၞာသတိက်ဝွံ ကြက်ဒှ် သွက်ဥပဇ္ၛာယ်ဂမၠိုၚ် ပိုဲတအ်ရ၊ ဘာသၞာသတိက်ဝွံ ကြက်ဒှ်သွက်အ္စာဂမၠိုၚ် ပိုဲတအ်ရ၊ ဘာသၞာသတိက်ဝွံ ကြက်ဒှ်သွက်ပိုဲတအ်ရ” ရဴဝွံ သီဂိုၚ်ကေတ် ဘာသၞာသတိက် သၞာဒၟံၚ်ဂမၠိုၚ်အိုတ်ရ။ ပ္ဍဲအခိၚ်ဂှ် တဳလပိုဉ်သာရိပိုတ် အာတဴ နူလက်ကရဴ နူလက်ကရဴ သၚ်မၞုံပဓာန်ဍေံကျာ်တြဲတုဲ ဟိုတ်မသီဂိုၚ်ကေတ် ဘာသၞာသတိက် သၞာဒၟံၚ်ဂမၠိုၚ်တုဲဒှ်ဂှ်ရ ဟွံကလိဂွံ ဘာသၞာသတိက် သၞာဒၟံၚ်ဂမၠိုၚ်တုဲ ဂဇအ်ဒၟံၚ်ပ္ဍဲသၟဝ်တမ်ဆုမွဲရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပ္ဍဲအခိၚ်ဖလာၚ်ဂယးဗတမ်ဂှ် ဒၠိုက်ကတဵုတုဲ ခအေမ်ရ။ တဳလပိုဉ်သာရိပိုတ်လေဝ် ခအေမ်ရ၊ ပ္ဍဲဌာန် ညးလဵုမွဲရော? ရဴဝွံ (သၟာန်ရ)။ ယွံကျာ်မၞုံပိုဉ် အဲဍိက်သာရိပိုတ်ရ ရဴဝွံ (ဂရၚ်ပတီရ)။ ယွံသာရိပိုတ် မုဟိုတ် တၠအဲ ပဒတဴဒၟံၚ် ပ္ဍဲဒၞာဲဝွံရော? ရဴဝွံ (သၟာန်ရ)။ ပ္ဍဲအခိၚ်ဂှ် တဳလပိုဉ်သာရိပိုတ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုဂကောံခမဳ ကောံဓရီုတုဲ ယွံခမဳတအ် ခမဳကွးပဒတဴ ဇရေၚ်ဂမၠိုၚ် ခမဳဆဗ္ဗဂ္ဂဳဂမၠိုၚ်ဂှ် အာနူဂတ နူဂတ သၚ်မၞုံပဓာန်ဍေံကျာ်တြဲတုဲ “ဘာသၞာသတိက်ဝွံ ကြက်ဒှ် သွက်ဥပဇ္ၛာယ်ဂမၠိုၚ် ပိုဲတအ်ရ၊ ဘာသၞာသတိက်ဝွံ ကြက်ဒှ်သွက်အ္စာဂမၠိုၚ် ပိုဲတအ်ရ၊ ဘာသၞာသတိက်ဝွံ ကြက်ဒှ်သွက်ပိုဲတအ်ရ” ရဴဝွံ သီဂိုၚ်ကေတ် ဘာသၞာသတိက် သၞာဒၟံၚ်ဂမၠိုၚ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက် ခမဳဂမၠိုၚ်ရ။

ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။

တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ ယွံခမဳတအ် တြုံမဒှ်လ္ၚုသၟး (နူမဂ်ဖိုလ်)ဂမၠိုၚ် အာနူဂတ နူဂတ သၚ်မၞုံပဓာန်ဍေံကျာ်တြဲတုဲ “ဘာသၞာသတိက်ဝွံ ကြက်ဒှ် သွက်ဥပဇ္ၛာယ်ဂမၠိုၚ် ပိုဲတအ်ရ၊ ဘာသၞာသတိက်ဝွံ ကြက်ဒှ်သွက်အ္စာဂမၠိုၚ် ပိုဲတအ်ရ၊ ဘာသၞာသတိက်ဝွံ ကြက်ဒှ်သွက်ပိုဲတအ်ရ” ရဴဝွံ မုဟိုတ် သီဂိုၚ်ကေတ် ဘာသၞာသတိက် သၞာဒၟံၚ်ဂမၠိုၚ်အိုတ်ရော?၊ ယွံခမဳတအ် (ပွခမဳဂမၠိုၚ်သ္ပဒးဝွံ) ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး—

“ယွံခမဳတအ် မုရဴညးမွဲ ထေက်ကဵု ဒၞာဲကၠာတုဲ (က္ဍိုပ်ကၠာတဲ) ဍာ်ကၠာတဲ ပိဏ္ဍပါတ်ကၠာတဲရော?” ရဴဝွံ သၟာန်ခမဳဂမၠိုၚ်ရ၊ ခမဳလ္ၚဵုဂှ် “ယွံကျာ်မၞုံပိုဉ် ညးမသ္ပခမဳ နူဂကူသၟိၚ်ဂှ် ထေက်ကဵု ဒၞာဲကၠာတုဲ ဍာ်ကၠာတဲ ပိဏ္ဍပါတ်ကၠာတဲဂမၠိုၚ်ရ” ရဴဝွံ ဂရၚ်ပတီအိုတ်ရ။

ခမဳဂမၠိုၚ်လ္ၚဵုဂှ် “ယွံကျာ်မၞုံပိုဉ် ညးမသ္ပခမဳ နူဂကူဗၞးဂှ် ထေက်ကဵု ဒၞာဲကၠာတုဲ ဍာ်ကၠာတဲ ပိဏ္ဍပါတ်ကၠာတဲဂမၠိုၚ်ရ” ရဴဝွံ ဂရၚ်ပတီအိုတ်ရ။

ခမဳဂမၠိုၚ်လ္ၚဵု “ယွံကျာ်မၞုံပိုဉ် ညးမသ္ပခမဳ နူဂကူသမ္ၚေဟ်ဂှ် ထေက်ကဵု ဒၞာဲကၠာတုဲ ဍာ်ကၠာတဲ ပိဏ္ဍပါတ်ကၠာတဲဂမၠိုၚ်ရ” ရဴဝွံ ဂရၚ်ပတီအိုတ်ရ။

ခမဳဂမၠိုၚ်လ္ၚဵုဂှ် “ယွံကျာ်မၞုံပိုဉ် ခမဳ မပကၚ်ရၚ်သုတ်ဂှ် ထေက်ကဵု ဒၞာဲကၠာတုဲ ဍာ်ကၠာတဲ ပိဏ္ဍပါတ်ကၠာတဲဂမၠိုၚ်ရ” ရဴဝွံ ဂရၚ်ပတီအိုတ်ရ။

ခမဳဂမၠိုၚ်လ္ၚဵုဂှ် “ယွံကျာ်မၞုံပိုဉ် ခမဳမပကၚ်ရၚ်ဝိနယ်ဂှ် ထေက်ကဵု ဒၞာဲကၠာတုဲ ဍာ်ကၠာတဲ ပိဏ္ဍပါတ်ကၠာတဲဂမၠိုၚ်ရ” ရဴဝွံ ဂရၚ်ပတီအိုတ်ရ။

ခမဳဂမၠိုၚ်လ္ၚဵုဂှ် “ယွံကျာ်မၞုံပိုဉ် ခမဳဓမ္မကထိုက်ဂှ် ထေက်ကဵု ဒၞာဲကၠာတုဲ ဍာ်ကၠာတဲ ပိဏ္ဍပါတ်ကၠာတဲဂမၠိုၚ်ရ” ရဴဝွံ ဂရၚ်ပတီအိုတ်ရ။

ခမဳဂမၠိုၚ်လ္ၚဵုဂှ် “ယွံကျာ်မၞုံပိုဉ် ခမဳကလိဂွံပဌမၛာန်ဂှ် ထေက်ကဵု ဒၞာဲကၠာတုဲ ဍာ်ကၠာတဲ ပိဏ္ဍပါတ်ကၠာတဲဂမၠိုၚ်ရ” ရဴဝွံ ဂရၚ်ပတီအိုတ်ရ။

ခမဳဂမၠိုၚ်လ္ၚဵုဂှ် “ယွံကျာ်မၞုံပိုဉ် ခမဳကလိဂွံဒုတိယၛာန်ဂှ် ထေက်ကဵု ဒၞာဲကၠာတုဲ ဍာ်ကၠာတဲ ပိဏ္ဍပါတ်ကၠာတဲဂမၠိုၚ်ရ” ရဴဝွံ ဂရၚ်ပတီအိုတ်ရ။

ခမဳဂမၠိုၚ်လ္ၚဵုဂှ် “ယွံကျာ်မၞုံပိုဉ် ခမဳကလိဂွံတတိယၛာန်ဂှ် ထေက်ကဵု ဒၞာဲကၠာတုဲ ဍာ်ကၠာတဲ ပိဏ္ဍပါတ်ကၠာတဲဂမၠိုၚ်ရ” ရဴဝွံ ဂရၚ်ပတီအိုတ်ရ။

ခမဳဂမၠိုၚ်လ္ၚဵုဂှ် “ယွံကျာ်မၞုံပိုဉ် ခမဳကလိဂွံစတုတ္ထၛာန်ဂှ် ထေက်ကဵု ဒၞာဲကၠာတုဲ ဍာ်ကၠာတဲ ပိဏ္ဍပါတ်ကၠာတဲဂမၠိုၚ်ရ” ရဴဝွံ ဂရၚ်ပတီအိုတ်ရ။

ခမဳဂမၠိုၚ်လ္ၚဵုဂှ် “ယွံကျာ်မၞုံပိုဉ် ခမဳသောတာပန်ဂှ် ထေက်ကဵု ဒၞာဲကၠာတုဲ ဍာ်ကၠာတဲ ပိဏ္ဍပါတ်ကၠာတဲဂမၠိုၚ်ရ” ရဴဝွံ ဂရၚ်ပတီအိုတ်ရ။

ခမဳဂမၠိုၚ်လ္ၚဵုဂှ် “ယွံကျာ်မၞုံပိုဉ် ခမဳသကဒါဂါမ်ဂှ် ။ ပ ။

ခမဳအနာဂါမ်ဂှ် ။ ပ ။

ယွံကျာ်မၞုံပိုဉ် ခမဳသောတာပန်ဂှ် ထေက်ကဵု ဒၞာဲကၠာတုဲ ဍာ်ကၠာတဲ ပိဏ္ဍပါတ်ကၠာတဲဂမၠိုၚ်ရ” ရဴဝွံ ဂရၚ်ပတီအိုတ်ရ။

ခမဳဂမၠိုၚ်လ္ၚဵုဂှ် “ယွံကျာ်မၞုံပိုဉ် ခမဳတၠအရှန် မကလိဂွံဝိဇ္ဇာပိပြကာဂှ် ထေက်ကဵု ဒၞာဲကၠာတုဲ ဍာ်ကၠာတဲ ပိဏ္ဍပါတ်ကၠာတဲဂမၠိုၚ်ရ” ရဴဝွံ ဂရၚ်ပတီအိုတ်ရ။

ခမဳဂမၠိုၚ်လ္ၚဵုဂှ် “ယွံကျာ်မၞုံပိုဉ် ခမဳတၠအရှန် မကလိဂွံအဘိဉာဏ်တြဴပြကာဂှ် ထေက်ကဵု ဒၞာဲကၠာတုဲ ဍာ်ကၠာတဲ ပိဏ္ဍပါတ်ကၠာတဲဂမၠိုၚ်ရ” ရဴဝွံ ဂရၚ်ပတီအိုတ်ရ။

၃၁၁။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ယွံခမဳတအ်ဂှ် ကေၚ်ဒှ်ကၠုၚ်ပ္ဍဲကိုပ်ကၠာတေံတုန် ပ္ဍဲဌာန်ဟိမဝန် တၞံဇြဲသုမ်ဇၞော် နွံရ။ နိဿယ်ဗ္ဒာဲကဵု တၞံဇြဲသုမ်ဇၞော်ဂှ်တုဲ မိတ်သဟာဲဂမၠိုၚ်ပိတၠ မတွံဂး သဝ်ရဝကာ်(အကာပ်), ကၞုဲ, စိၚ် ပဒတဴဒၟံၚ်အိုတ်ရ။

မိတ်သဟာဲဂမၠိုၚ်ဂှ် သီုဟွံရှေ်သှေ်ရဴဂဴ သီုဟွံဇအ်သဝ်အောပ်မာ သီုမၞုံကဵုသဘဴ ပွမဂယိုၚ်လမျီု ဟွံတုပ်သၟဟ် ရၚ်သကအ်ဂမၠိုၚ်ဂှ် ပဒတဴဒၟံၚ်အိုတ်ရ။ ယွံခမဳတအ် ကုမိတ်သဟာဲဂမၠိုၚ်—

ပၞောဝ်ကဵုပိုဲညးဂမၠိုၚ် ဂွံတီကေတ် ညးအာယုက်ဇၞော်အိုတ်မ္ဂး ခိုဟ်သန်ရ၊ ညးဂှ် ပိုဲညးဂမၠိုၚ် ရှေ်သှေ်ရဴဂဴအိုတ်ရ၊ သ္ပအဲပရဲအိုတ်ရ၊ သၞေံသၞဴအိုတ်ရ၊ ပ္ဍဲဒၠောံဗတောန် ညးဂှ်လေဝ် တန်တဴအိုတ်ရ” ရဴဝွံ ကသပ်ဒှ်ကၠုၚ်ရ။

ယွံခမဳတအ် ပ္ဍဲအခိၚ်ဂှ် သဝ်ရဝကာ် ကေုာံကၞုဲဂမၠိုၚ်ဂှ် “ယွံမိတ်သဟာဲ မုရဴဟိုတ်ပရူပရာ တြေံကၠာတဲမွဲ တၠအဲ သမ္တီဒးရော?” ရဴဝွံ သၟာန်စိၚ်အိုတ်ရ။

ယွံမိတ်သဟာဲတအ် ပ္ဍဲအခိၚ် ဃောအဲဍောတ်သွတ်တေံ တၞံဇြဲသုမ်ဝွံ စွံပ္ဍဲအကြာဒဳဂမၠိုၚ်တုဲ ဂါမ်လောန်အာရ၊ တၞုၚ်ကၟဝ်ဂှ် လုက်စုက်ဒးဗုၚ်အဲရ၊ ယွံမိတ်သဟာဲတအ် ဟိုတ်ပရူပရာ တြေံကၠာတဲဝွံ အဲသမ္တီဒးရ ရဴဝွံ သ္ဂးရ။

ယွံခမဳတအ် ပ္ဍဲအခိၚ်ဂှ် သဝ်ရဝကာ် ကေုာံစိၚ်ဂမၠိုၚ်ဂှ် “ယွံမိတ်သဟာဲ မုရဴဟိုတ်ဂရူပရာ တြေံကၠာတဲမွဲ တၠအဲ သမ္တီဒးရော?” ရဴဝွံ သၟာန်ကၞုဲအိုတ်ရ။

ယွံမိတ်သဟာဲတအ် ပ္ဍဲအခိၚ် ဃောအဲဍောတ်သွတ်တေံ ဂဇအ်ပ္ဍဲတိတုဲ ကိတ်ဍေက်စတၞုၚ်ကၟဝ်ဇြဲသုမ်ဝွံရ၊ ယွံမိတ်သဟာဲတအ် ဟိုတ်ပရူပရာတြေံကၠာတဲဝွံ အဲသမ္တီဒးရ ရဴဝွံ သ္ဂးရ။

ယွံခမဳတအ် ပ္ဍဲအခိၚ်ဂှ် ကၞုဲကေုာံစိၚ်ဂမၠိုၚ်ဂှ် “ယွံမိတ်သဟာဲ မုရဴဟိုတ်ပရူပရာတြေံကၠာတဲမွဲ တၠအဲ သမ္တီဒးရော?” သၟာန်သဝ်ရဝကာ်အိုတ်ရ။

ယွံမိတ်သဟာဲ ပ္ဍဲဌာန်မၞုံယၟုဝွံ တၞံဇြဲသုမ် ဇၞော် နွံရ၊ အဲ စနၚ်သတ်ဇြဲ နူဌာန်ဂှ်တုဲ ကၞေအ်စုတ် ပ္ဍဲဌာန်ဝွံရ၊ ဟိုတ်နူမဗဳဇသတ်ဂှ် တၞံဇြဲသုမ်ဝွံ ကတဵုဒှ်ကၠုၚ်ရ၊ ယွံမိတ်သဟာဲတအ် ဟိုတ်ဂှ်ရ အဲ အာယုက်ဇၞော်အိုတ်ရ ရဴဝွံ သ္ဂးရ။

ယွံခမဳတအ် ပ္ဍဲအခိၚ်ဂှ် ကၞုဲကေုာံစိၚ်ဂမၠိုၚ်ဂှ် “ယွံမိတ်သဟာဲ တၠအဲ ဒှ်ညးအာယုက်ဇၞော်လတူပိုဲညးဂမၠိုၚ်ရ၊ ပိုဲညးဂမၠိုၚ် ရှေ်သှေ်ရဴဂဴ တၠအဲအိုတ်ရ၊ ပအဲပရဲအိုတ်ရ၊ သၞေံသၞဴအိုတ်ရ၊ ပူဇဴအိုတ်ရ၊ ပိုဲညးဂမၠိုၚ် တန်တဴဒၠောံဗတောန် တၠအဲအိုတ်ရ” ရဴဝွံ သ္ဂးကဵု သဝ်ရဝကာ်အိုတ်ရ။

ယွံခမဳတအ် ပ္ဍဲအခိၚ်ဂှ် သဝ်ရဝကာ်ဂှ် ကဵုကၞုဲကေုာံစိၚ်ဂမၠိုၚ် တန်တဴပ္ဍဲသဳမသုန်ဂမၠိုၚ်ရ၊ အလဵုဇကုလေဝ် တန်တဴပ္ဍဲသဳမသုန်ဂမၠိုၚ်တုဲ ဒ္ဂေတ်ရ၊ ညးဂမၠိုၚ်ဂှ် သီုမၞုံကဵုပွမရှေ်သှေ်ရဴဂဴ ပွမဇအ်သဝ်အောပ်အာ မၞုံကဵုသဘဴပွမဂယိုၚ်လမျီုတုပ်သၟဟ် ရၚ်သကအ်ဂမၠိုၚ်ဂှ် ပဒတဴဒၟံၚ်အိုတ်တုဲ ခန္ဓဇကုလီုလာ်တုဲ ပ္ဍဲကြဴချိုတ်တုဲဂှ် ပြာပ်အာစိုပ်ဍုၚ်သွဝ် မဒှ်ဒၞာဲလအာဂတိခိုဟ်ဆာဲအိုတ်ရ။

ယွံခမဳတအ် ဒ္ဂေတ်မပြဲမၞုံယၟုမ္ဂး ဒ္ဂေတ်သဝ်ရဝကာ်ဂမၠိုၚ်မတွံဂး “ဍိုဟ်ကေက်ဆိုက်ဗ္ဒက်ပ္ဍဲဓရ်တုဲ မၞိဟ်မရှေ်သှေ်ရဴဂဴ ညးဇၞော်ဂမၠိုၚ်ဂှ် ပ္ဍဲဘဝမတ်လေဝ် ဂွံဒုၚ်ထိုၚ်သးအိုတ်ရ၊ ပ္ဍဲဘဝပရလိုက်လေဝ် မၞုံကဵုဂတိခိုဟ်ဆာဲအိုတ်ရ” ဝွံ ဒှ်တဴရ။

ယွံခမဳတအ် သတ်ဂမၠိုၚ်မဒှ်တိရစ္ဆာန်ဂှ်လေဝ် သီုမၞုံကဵုပွမရှေ်သှေ်ရဴဂဴ ပွမဇအ်သဝ်အောပ်မာ မၞုံကဵုသဘဴပွမဂယိုၚ်လမျီုတုပ်သၟဟ် ရၚ်သကအ်ဂှ် ပဒတဴဒၟံၚ်အိုတ်ဏီရ။

ယွံခမဳတအ် မၞးတအ်ညးဂမၠိုၚ် သီုမပခမဳ ပ္ဍဲဓမ္မဝိနယ မဂပ်ဝ်တွံလဝ်ဗွဲမဒးရး ရဴဝွံအိုတ်ဂှ် ပွမပဒတဴ သီုဟွံရှေ်သှေ်ရဴဂဴ သီုဟွံဇအ်သဝ်အောပ်မာ သီုမၞုံကဵုသဘဴပွမဂယိုၚ်လမျီု ဟွံတုပ်သၟဟ်ရၚ်သကအ်ဂှ် ဂေါဝ်ဆာဲညိဟာ။

ယွံခမဳတအ် (ပွခမဳဂမၠိုၚ် သ္ပဒးဝွံ) ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး—

“ယွံခမဳတအ် အတိုၚ်လၟေၚ်ညးဇၞော် ကဵုအခေါၚ် ပွမလ္ၚောဝ် ပွမဒစးဒုၚ်တၠုၚ်တရဴ ပွမပၚ်ခၠအ်သၟိက်တဲ ပွမသ္ပရှေ်သှေ်ရဴဂဴ ဒၞာဲကၠာတုဲ ဍာ်ကၠာတဲ ပိဏ္ဍပါတ်ကၠာတဲဂမၠိုၚ်ရ၊ ယွံခမဳတအ် ဒြပ်သၚ်ဂှ် ဟဂပ်ဝ်ဆေဝ်ဒဝ် အတိုၚ်လၟေၚ်ညးဇၞော်ရ၊ ကုခမဳမဆေဝ်ဒဝ်ဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။