၆.၂.၂။ ပွမကဵုကမၠောန်ကေၚ်ကာတၟိ
၃၀၈။ ပ္ဍဲအခိၚ်ဂှ် တဳလပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်ရာဇဂြိုဟ် ဗၞတ်မမိပ်လဟိၚ်တုဲမ္ဂး အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ် ဍုၚ်ဝေသာလဳမ္ဂး စိုပ်ကၠုၚ်ဍုၚ်ဝေသာလဳတုဲ သ္ပဒတဴတန်ဒၟံၚ် ပ္ဍဲဘာပြာသာဒ်ဇၞော် မၞုံကဵုအထောဋ်သ္ၚိကၠတ် အပ္ဍဲဂြိုဟ်မဟာဝိုန် ဇရေၚ်ဍုၚ်ဝေသာလဳဂှ်ရ။ ပ္ဍဲအခိၚ်ဂှ် မၞိဟ်ဂမၠိုၚ် ကၠောန်သ္ပတဴကေၚ်ကာတၟိ ဗွဲမဒးရးအိုတ်ရ၊ ခမဳမသှ်ပတူ ကေၚ်ကာတၟိဂမၠိုၚ်လေဝ် ကၠောန်ၜိုတ်ဥပကာ နကဵုသ္ၚာ ပိဏ္ဍပါတ် ဘာ ဂဥုဲ မဒှ်ကြိယာဗာပၟၚ်ပၟဲ လမျီုမစှေ်စးကဵုယဲ ဗွဲမဒးရးအိုတ်ရ။
ပ္ဍဲအခိၚ်ဂှ် “မၞိဟ်ဂမၠိုၚ်ဝွံ ကၠောန်သ္ပတဴ ကေၚ်ကာတၟိ ဗွဲမဒးရးအိုတ်ရ၊ ကမၠောန်ပွဝွံ ကြက်ယုတ်သဝ် ဟွံသေၚ်ရ၊ အဲလေဝ် သ္ဂောံကၠောန်သ္ပတဴ ကေၚ်ကာတၟိမ္ဂး ခိုဟ်သန်ရ” ရဴဝွံ ကသပ်ဒှ်ကၠုၚ် ကုသၟာတၞိၚ်ဒိုက်ဂတ်မွဲတၠရ။ ပ္ဍဲအခိၚ်ဂှ် သၟာတၞိၚ်ဒိုက်ဂတ်ဂှ် အလဵုဇကု ချိုန်တိလၟက် စဳဍိုတ်ဂမၠိုၚ်တုဲ ကဵုဗ္ဒၚ်တိုန်ရ၊ ဗ္ဒၚ် သၟာတၞိၚ်ဒိုက်ဂတ် မဟွံဆိုက်ဗ္ဒက်ဒက်စဳလဝ်ဂှ် တ္ၚံက်ၜေဲတုဲ သရိုဟ်စှေ်ရ။ မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် သၟာတၞိၚ်ဒိုက်ဂတ်ဂှ် အလဵုဇကု ချိုန်တိလၟက် စဳဍိုတ်ဂမၠိုၚ်တုဲ ကဵုဗ္ဒၚ်တိုန်ရ၊ ဗ္ဒၚ် သၟာတၞိၚ်ဒိုက်ဂတ် မဟွံဆိုက်ဗ္ဒက် ဒက်စဳလဝ်ဂှ် တ္ၚံက်ၜေဲတုဲ သရိုဟ်စှေ်ရ။ ပ္ဍဲအခိၚ်ဂှ် သၟာတၞိၚ်ဒိုက်ဂတ်ဂှ် “ညးဂမၠိုၚ်မကဵုဒါန် သ္ၚာ ပိဏ္ဍပါတ် ဘာ ဂဥုဲ မဒှ်ကြိယာဗာပၟၚ်ပၟဲ လမျီုမစှေ်စးကဵုယဲ ကုခမဳကောန်သၟိၚ်သကျဝၚ်ဂမၠိုၚ်ဂှ် ခမဳဂမၠိုၚ်ဝွံ ဒၠောံဗတောန်အိုတ်ရ၊ ဝေတ်စၞောန်အိုတ်ရ၊ ကေၚ်ကာတၟိညးဂမၠိုၚ်ဂှ်ဟေၚ် စဳရေၚ်အိုတ်ရ၊ အဲတုန် ဒှ်ညးဒိုက်ဂတ်ရ၊ ညးမမိက်ကဵုမွဲမွဲလေဝ် ဟွံဒၠောံဗတောန် ဟွံဝေတ်စၞောန်အဲရ၊ ကေၚ်ကာတၟိလေဝ် ဟွံစဳရေၚ်ရ” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဂမၠိုၚ် ဂွံမိၚ်ကေတ် ဂလာန်သၟာတၞိၚ်ဒိုက်ဂတ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်ဂှ် အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး “ယွံခမဳတအ် ကဵုအခေါၚ် သွက်ဂွံကဵုကေၚ်ကာတၟိရ၊ ယွံခမဳတအ် ခမဳမရၚ်တၠုၚ်ကေၚ်ကာတၟိဂှ် မုရဴသာ်လဵု ဘာဂွံအာစိုပ်ဒတုဲ ဗွဲမပြဟ်ရော?” ရဴဝွံ ကြက်အာစိုပ် ပွမသ္ပဂဗုဓ်လွဳပရာရ။ ကြက်ဒးပဠေဝ်ပဠေတ် ဌာန်ကဝ်သကုတ် ဌာန်ထောၚ်ပြိုဟ်ရ။ ယွံခမဳတအ် ရဴဝွံဟေၚ် ဒးကဵုရ၊ ဗွဲကိုပ်ကၠာ သ္ဒးအာတ်ပါန် အခေါၚ်ခမဳရ၊ အာတ်ပါန်အခေါၚ်တုဲပ္ဍဲကြဴ ခမဳစဳကၠးဆိုက်ဗ္ဒက်တုဲ မၞုံကဵုအစောံ သတ္တိဂှ် သ္ဒးကဵုသၚ်တီရ။
၃၀၉။ “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် ကဵုကေၚ်ကာတၟိ ကုခမဳမၞုံယၟုဝွံ ဘာဒကာမၞုံယၟုဝွံရ၊ ဣဝွံတုန် ပွမကဵုတီရောၚ်။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ကဵုကေၚ်ကာတၟိ ကုခမဳမၞုံယၟုဝွံ ဘာဒကာမၞုံယၟုဝွံရ၊ ယြဴကုတဳလပိုဉ်မွဲ မၞုံကဵုပွမသ္ဍိုက် ပွမကဵုကေၚ်ကာတၟိ ကုခမဳ မၞုံယၟုဝွံ ဘာဒကာမၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်ကဵုကေၚ်ကာတၟိ ကုခမဳမၞုံယၟုဝွံ ဘာဒကာမၞုံယၟုဝွံတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။
