၆.၂.၁။ ဝတ္ထု အနာထပိဏ္ဍိကသေဌဳ
၃၀၄။ အနာထပိဏ္ဍိကသေဌဳ မဒှ်တြုံတၠသ္ၚိ ဒေံဗြဴသေဌဳရာဇဂြိုဟ် ပ္ဍဲအခိၚ်မအာဍုၚ်ရာဇဂြိုဟ် နကဵုကမၠောန်ကေၚ်ကာမွဲဂှ် သေဌဳရာဇဂြိုဟ် သွက်တ္ၚဲယး ဘိက်နိမန်လဝ်သၚ် မၞုံပဓာန်ကျာ်တြဲတုဲ “ယွံမၞးတအ် ဩဝ်ကၠေံစိုတ်လွဳအိုတ်ညိ၊ ကတဵုပြဟ်ပြဟ်တုဲ ဩဝ်ၜိုဟ်ယာဂုအိုတ်ညိ၊ ဩဝ်ဖျိန်ပုၚ်အိုတ်ညိ၊ ဩဝ်ကဵုဍိုက်ပေၚ်တဴ သွဂမၠိုၚ်အိုတ်ညိ၊ ဩဝ်ကဵုဍိုက်ပေၚ်တဴ ပွေက်ဂမၠိုၚ်အိုတ်ညိ” ရဴဝွံ သေဌဳရာဇဂြိုဟ်ဂှ် ဖအောဝ်စကာဍိက်ဂမၠိုၚ်ကီု သၟာကမၠောန်ဂမၠိုၚ်ကီုရ။ ပ္ဍဲအခိၚ်ဂှ်— “သေဌဳဝွံ ပ္ဍဲကိုပ်ကၠာတေံ အဲကၠုၚ်မ္ဂး ပါဲထောံကၠေံ ကမၠောန်ကေၚ်ကာဂမၠိုၚ်အိုတ်သီုတုဲ ဟီုဂလာန်မိပ်စိုတ်အိုဟ်တၟိုဟ် ကေုာံအဲမွဲစွံဟေၚ်ရ၊ အခိၚ်လၟုဟ် သေဌဳဂှ် သီုမၞုံသဘဴ မကလှ်လဖှ် ‘ယွံမၞးတအ် ဩဝ်ကၠေံစိုတ်လွဳအိုတ်ညိ၊ ကတဵုပြဟ်ပြဟ်တုဲ ဩဝ်ၜိုဟ်ယာဂုအိုတ်ညိ၊ ဩဝ်ဖျိန်ပုၚ်အိုတ်ညိ၊ ဩဝ်ကဵုဍိုက်ပေၚ်တဴ သွဂမၠိုၚ်အိုတ်ညိ၊ ဩဝ်ကဵုဍိုက်ပေၚ်တဴ ပွေက်ဂမၠိုၚ်အိုတ်ညိ” ရဴဝွံ ဖအောဝ်စကာဒၟံၚ်ဍိက်ဂမၠိုၚ်ကီု သၟာကမၠောန်ဂမၠိုၚ်ကီုရသွံ။
ပသာ်ရော? ကုသေဌဳဂှ် ပေဲါမ္ၚိုလ်ပွမဂိုၚ်ကေတ် ကောန်ဝုတ်လေဝ် ဒှ်တဴရဟာ၊ ဟွံသေၚ်မ္ဂး ပေဲါမ္ၚိုလ်ပွမကဵုကောန်ဝုတ်လေဝ် ဒှ်တဴဟာ၊ ဟွံသေၚ်မ္ဂး ပွမပူဇဴယဇ်ဇၞော်လေဝ် သှ်ပတူရဟာ၊ သွက်တ္ၚဲယးတေံ ဘိက်လဝ်သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး မွဲဟာန်ကေုာံဗိုလ်လဗးဟာ” ရဴဝွံ ကသပ်ဒှ် ကုအနာထပိဏ္ဍိကသေဌဳရ။ ကြဴနူဂှ် ဖအောဝ်စကာ ဍိက်ဂမၠိုၚ်ကီု သၟာကမၠောန်ကီုတုဲဒှ်မှ ပြာပ်ကၠုၚ်ဇရေၚ်အနာထပိဏ္ဍိကသေဌဳတုဲ သီုမဟီုဂလာန်မိပ်စိုတ်အိုဟ်တၟိုဟ် မွဲဟာန်ကေုာံအနာထပိဏ္ဍိကသေဌဳဂှ်— “ယွံသေဌဳ တၠအဲ ပ္ဍဲကိုပ်ကၠာတေံ အဲကၠုၚ်မ္ဂး ပါဲထောံကၠေံ ကမၠောန်ကေၚ်ကာဂမၠိုၚ်အိုတ်သီုတုဲ ဟီုဂလာန်မိပ်စိုတ်အိုဟ်တၟိုဟ် ကေုာံအဲမွဲစွံဟေၚ်ရ၊ အခိၚ်လၟုဟ် တၠအဲ သီုမၞုံသဘဴမကလှ်လဖှ် ‘ယွံမၞးတအ် ဩဝ်ကၠေံစိုတ်လွဳအိုတ်ညိ၊ ကတဵုပြဟ်ပြဟ်တုဲ ဩဝ်ၜိုဟ်ယာဂုအိုတ်ညိ၊ ဩဝ်ဖျိန်ပုၚ်အိုတ်ညိ၊ ဩဝ်ကဵုဍိုက်ပေၚ်တဴ သ္ပဂမၠိုၚ်အိုတ်ညိ၊ ဩဝ်ကဵုဍိုက်ပေၚ်တဴ ပွေက်ဂမၠိုၚ်အိုတ်ညိ” ရဴဝွံ ဖအောဝ်စကာဒၟံၚ်ဍိက်ဂမၠိုၚ်ကီု သၟာကမၠောန်ဂမၠိုၚ်ကီုရသွံ။ ကုသေဌဳဂှ် ပေဲါမ္ၚိုလ်ပွမဂိုၚ်ကေတ် ကောန်ဝုတ်လေဝ် ဒှ်တဴရဟာ၊ ဟွံသေၚ်မ္ဂး ပေဲါမ္ၚိုလ်ပွမကဵုကောန်ဝုတ်လေဝ် ဒှ်တဴဟာ၊ ဟွံသေၚ်မ္ဂး ပွမပူဇဴယဇ်ဇၞော်လေဝ် သှ်ပတူရဟာ၊ သွက်တ္ၚဲယးတေံ ဘိက်လဝ်သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး မွဲဟာန်ကေုာံဗိုလ်လဗးဟာ” ရဴဝွံ အနာထပိဏ္ဍိကသေဌဳဂှ် ဟီုသ္ဂးကဵု သေဌဳရာဇဂြိုဟ် မဂဇအ်ဒၟံၚ်ပ္ဍဲဒၞာဲမွဲဂှ်ရ။
ယွံသေဌဳ ကုအဲဂှ် ပေဲါမ္ၚိုလ်ပွမဂိုၚ်ကေတ်ကောန်ဝုတ်လေဝ် ကြက်ဒှ်တဴဟွံသေၚ်ရ၊ ပေဲါမ္ၚိုလ်ပွမကဵုကောန်ဝုတ်လေဝ် ကြက်ဒှ်တဴဟွံသေၚ်ရ၊ သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး မွဲဟာန်ကေုာံဗိုလ်လဗးလေဝ် သွက်တ္ၚဲယးတေံ ဟွံဘိက်လဝ်ရ၊ ဗွဲစၟတ်တုန် အဲသှ်ပတူဒၟံၚ် ယဇ်ဇၞော်ရ၊ ဘိက်နိမန်လဝ် သၚ်မၞုံပဓာန်ကျာ်တြဲ သွက်တ္ၚဲယးဟေၚ် ရဴဝွံ (သ္ဂးရ)။
ယွံသေဌဳ “ကျာ်” ရဴဝွံ တၠအဲ ဟီုသ္ဂးဟာ။
ယွံသေဌဳ “ကျာ်” ရဴဝွံ အဲဟီုသ္ဂးရ။
ယွံသေဌဳ “ကျာ်” ရဴဝွံ တၠအဲ ဟီုသ္ဂးဟာ။
ယွံသေဌဳ “ကျာ်” ရဴဝွံ အဲဟီုသ္ဂးရ။
ယွံသေဌဳ “ကျာ်” ရဴဝွံ တၠအဲ ဟီုသ္ဂးဟာ။
ယွံသေဌဳ “ကျာ်” ရဴဝွံ အဲဟီုသ္ဂးရ။
ယွံသေဌဳ ပ္ဍဲလောကဝွံ အယာံမာတ် ရမျာၚ်မတွံဂး “ကျာ်ကျာ်”ဂှ် ဇြိုၚ်ကဵုဂွံမိၚ်ကေတ်ရ။ ယွံသေဌဳ ပ္ဍဲအခိၚ်ဝွံ တၞဟ်နပြာပ်အာ သွက်ဂွံဗဵုလ္ၚောဝ် ကျာ်တြဲမတၠပိုဉ်တြဴပြကာ မထေက်ဒုၚ်ပူဇဴတေၟၚ်ဂှ် သၟဟ်ရထဏီဟာ ရဴဝွံ (သၟာန်ရ)။
ယွံသေဌဳ ပ္ဍဲအခိၚ်ဝွံ အခိၚ် တၞဟ်နပြာပ်အာ သွက်ဂွံဗဵုလ္ၚောဝ် ကျာ်တြဲမပတၠပိုဉ်တြဴပြကာ မထေက်ဒုၚ်ပူဇဴတၟေၚ်ဂှ် ဟွံသေၚ်ရ၊ တ္ၚဲယး ပ္ဍဲအခိၚ်မဗဗွဲဂှ် တၠအဲ ကြက်ဂွံပြာပ်အာ သွက်ဂွံဗဵုလ္ၚောဝ် ကျာ်တြဲမပတၠပိုဉ်တြဴပြကာ မထေက်ဒုၚ်ပူဇဴတၟေၚ်ဂှ်ရ ရဴဝွံ (သ္ဂးရ)။ ကြဴနူဂှ် အနာထပိဏ္ဍိကသေဌဳဂှ် အဲ ပ္ဍဲအခိၚ်မဗဗွဲဂှ် ကြက်ဂွံပြာပ်အာ သွက်ဂွံဗဵုလ္ၚောဝ် ကျာ်တြဲမပတၠပိုဉ်တြဴပြကာ မထေက်ဒုၚ်ပူဇဴတၟေၚ်ဂှ်ရ ရဴဝွံ တိက်စှေ်အာ နပွမဗှ်ဗၞုဟ် မအာစိုပ်ကျာ်ဂှ် တ္ၚဲတၟးရ သမ္တီထေၚ်ဂးတုဲ ပ္ဍဲဗတမ် ကတဵုဗၞတ်ပိဝါရ။
၃၀၅။ ပ္ဍဲအခိၚ်ဂှ် အနာထပိဏ္ဍိကသေဌဳ ပြာပ်အာဇရေၚ် တြၚ်သုသာန်မ္ဂး ဒေဝတဴဂမၠိုၚ် ပံက်ကဵုတြၚ်အိုတ်ရ၊ အခိၚ်ဂှ် အနာထပိဏ္ဍိကသေဌဳ အဃောတိတ်ကၠုၚ် နူဍုၚ်ဂှ် လျးတၟးကၠေံဗ္ဒန်အာတုဲ ဒမၠုဂၠုယျေပ် ဒှ်ပြာကဋ်ကၠုၚ်ရ၊ ပွမဖေက်ဂၟံက် ပွမချဳဒတဝ် ပွမသော်ဇကုနရဴ ဒှ်ပြာကဋ်ဂှ်ရ နူဌာန်ဂှ်ဟေၚ် သၟိက်မိက်ဂွံကလေၚ်ဂတစဴမွဲလှေ်ပၠန်ရ၊ ပ္ဍဲအခိင်ဂှ် ဒေဝတဴပၟၚ်သိဝက သီုဗ္ဒန်(ကလေံ)လဝ်ဇကုဂှ် သကဵုမိၚ်တိုန်ရမျာၚ်ရ—
“စိၚ်မွဲကိုဋ်ဂမၠိုၚ်ကီု ချေံမွဲကိုဋ်ဂမၠိုၚ်ကီု ကွဳစောတ်ဂမၠိုၚ်မွဲကိုဋ် မဗ္ဂန်လဝ်ချေံအဿတဵုကီု သၟတ်ဝုတ်ကညာဂမၠိုၚ်မွဲကိုဋ် မဝက်လဝ်သၞေက်မတ်မၞိက်ကီုဂှ် ဖအုံထောံစှ်တြဴဖအုံတုဲ ဗၞတ်မွဲဖအုံလေဝ် ဟွံထေက်ကဵုတန်ကဵု (ဖဵု) ဒက်တဴလဂါမ်ဇိုၚ် (ညးမအာဗဵုလ္ၚောဝ်ကျာ်) အိုတ်ရ။
ယွံသေဌဳ ဩဝ်အာဂတညိ၊ ယွံသေဌဳ ဩဝ်အာဂတညိ၊ ပွမတိုန်အာဂတဂှ် ပြဲကုတၠအဲရ၊ ပွမဆုတ်လက်ကရဴဂှ် ဟွံပြဲရ” ရဴဝွံ (သကဵုမိၚ်ရမျာၚ်ရ)။
ပ္ဍဲအခိၚ်ဂှ် ဒမၠုကၠေံဗ္ဒန်အာ ကုအနာထပိဏ္ဍိကသေဌဳတုဲ လျးတၟးဒှ်ပြာကဋ်ရ၊ ပွမဖေက်ဂၟံက် ပွမချဳဒတဝ် ပွမသော်ဇကုနရဴ မကတဵုဒှ် (ကုညးဂှ်) တုဲလေဝ် လလမ်အာရ။ မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် လျးတၟးကၠေံဗ္ဒန်အာ ကုအနာထပိဏ္ဍိကသေဌဳတုဲ ဒမၠုဂၠုယျေပ် ဒှ်ပြာကဋ်ကၠုၚ်ရ၊ ပွမဖေက်ဂၟံက် ပွမချဳဒတဝ် ပွမသော်ဇကုနရဴ ဒှ်ပြာကဋ်ဂှ်ရ နူဌာန်ဂှ်ဟေၚ် သၟိက်မိက်ဂွံကလေၚ်ဂတးစဴမွဲလှေ်ပၠန်ရ၊ မရနုက်ကဵုပိဝါလေဝ် ဒေဝတဴပၟၚ်သိဝက သီုဗ္ဒန် (ကလေံ) လဝ်ဇကုဂှ် သကဵုမိၚ်တိုန်ရမျာၚ်ရ—
“စိၚ်မွဲကိုဋ်ဂမၠိုၚ်ကီု ချေံမွဲကိုဋ်ဂမၠိုၚ်ကီု ကွဳစောတ်ဂမၠိုၚ်မွဲကိုဋ် မဗ္ဂန်လဝ်ချေံအဿတဵုကီု သၟတ်ဝုတ်ကညာဂမၠိုၚ်မွဲကိုဋ် မဝက်လဝ်သၞေက်မတ်မၞိက်ကီုဂှ် ဖအုံထောံစှ်တြဴဖအုံတုဲ ဗၞတ်မွဲဖအုံလေဝ် ဟွံထေက်ကဵုတန်ကဵု (ဖဵု) ဒက်တဴလဂါမ်ဇိုၚ် (ညးမအာဗဵုလ္ၚောဝ်ကျာ်) အိုတ်ရ။
ယွံသေဌဳ ဩဝ်အာဂတညိ၊ ယွံသေဌဳ ဩဝ်အာဂတညိ၊ ပွမတိုန်အာဂတဂှ် ပြဲကုတၠအဲရ၊ ပွမဆုတ်လက်ကရဴဂှ် ဟွံပြဲရ” ရဴဝွံ (သကဵုမိၚ်ရမျာၚ်ရ)။
မရနုက်ကဵုပိဝါလေဝ် ဒမၠုကၠေံဗ္ဒန်အာ ကုအနာထပိဏ္ဍိကသေဌဳတုဲ လျးတၟးဒှ်ပြာကဋ်ရ၊ ပွမဖေက်ဂၟံက် ပွမချဳဒတဝ်ဇကု ပွမသော်ဇကုနရဴ မကတဵုဒှ် (ကုညးဂှ်) တုဲလေဝ် လလမ်အာရ။
ပ္ဍဲအခိၚ်ဂှ် အနာထပိဏ္ဍိကသေဌဳ ပြာပ်အာ ဂြိုပ်ကြက်ဂြၚ်ရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပ္ဍဲအခိၚ်ဖလာၚ်ယးဗတမ်ဂှ် ဒၠိုက်ကတဵုပြဟ်ပြဟ်တုဲ ကွာ်ဒၟံၚ်စၚ်္ကြမ် ပ္ဍဲအမှဲအကးရ။ တဳလမၞုံပိုဉ်ကျာ်တြဲ သ္ဂောံညာတ်ကေတ် အနာထပိဏ္ဍိကသေဌဳ မကၠုၚ်ဒၟံၚ် နူဇမ္ၚောဲဟေၚ်မ္ဂး စှေ်နူစၚ်္ကြတုဲ ဂဇအ်ဒၟံၚ်ဒၞာဲမလးပညပ်လဝ်တုဲမ္ဂး “ယွံသုဒတ္တ ဩဝ်ကၠုၚ်ညိ” ရဴဝွံ သ္ဂးကဵုအနာထပိဏ္ဍိကသေဌဳရ။ ပ္ဍဲအခိၚ်ဂှ် အနာထပိဏ္ဍိကသေဌဳဂှ် “တဳလမၞုံပိုဉ်ကျာ်တြဲ ကော်အဲ နကဵုယၟုဍောတ်ဍောတ်မ္ဂး သုဒတ္တရ” ရဴဝွံ မြဟ်မြဴတိုန် မၞုံကဵုစိုတ်တိုန်ဂှ်ဒှ်တုဲ ပြာပ်အာဇရေၚ် တဳလမၞုံပိုဉ်ကျာ်တြဲပ္ဍဲကြဴတုဲ မာဖျေံ ပ္ဍဲဇိုၚ်တဳလမၞုံပိုဉ်ကျာ်တြဴဂမၠိုၚ် နကဵုက္ဍိုပ်တုဲ “ ယွံကျာ်မၞုံပိုဉ် ပသာ်ရော? တဳလမၞုံပိုဉ်ကျာ်တြဲ သ္ဂောံတိက်ဗွဲတသိုခ်ဟာ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
“ဟွံလံက်လေတ် ပ္ဍဲကာမဂုဏ်ဂမၠိုၚ်တုဲ တၠအရှန် အာစိုပ်ပွမၜိုဟ်လလမ် မဟွံမွဲကဵု (ကိလေသ) ဥပဓိဂှ် လလမ်တုဲနူပွဳပွူဒှ်တုဲ အခါကာလအိုတ်သီု သ္ဂောံတိက်ဗွဲတသိုခ်ရ။
သကုတ်ဗပိုတ်ကၠေံ ပွမရာဒနာမိက်ဂမၠိုၚ်အိုတ်သီုတုဲ ပၠေၚ်ကၠေံ ပွမကတဴကတာန် ပ္ဍဲဂၠမ်စိုတ်တုဲ အာစိုပ်ပွမၜိုဟ်သတိုတ် နကဵုစိုတ်တုဲ ပူဂိုလ်တၠအရှန် မၜိုဟ်လလမ်ဂှ် သ္ဂောံတိက် ဗွဲတသိုခ်ရ” ရဴဝွံ (သ္ဂးရ)။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ တွံကဵုဂလာန်ဓရ် မဒှ်အတိုၚ်လၟေၚ် ကုအနာထပိဏ္ဍိကသေဌဳရ၊ ဂလာန်ဓရ်မဒှ်အတိုၚ်လၟေၚ်ဂှ်တုန် ညးဍေံဂှ်ရော? ဂလာန်မစပ်ကဵုဒါနကီု ဂလာန်မစပ်ကဵုသဳလကီု ဂလာန်မစပ်ကဵုဍုၚ်သွဝ်ကီု ဒုဟ်ကီု ပွမယုတ်သဝ်ကီု ပွမကၠိခ္ဍက် ကာမဂုဏ်ဂမၠိုၚ်ကီု ဖဵုပွမတိတ်ဗၠး (နူကာမဂုဏ်ဂမၠိုၚ်) ကီု ထ္ၜးကဵုရ။
တဳလမၞုံပိုဉ်ကျာ်တြဲ ပ္ဍဲအခိၚ်မတီကေတ် မၞုံကဵုစိုတ်မဒုၚ်စရၚ် မၞုံကဵုစိုတ်မဍိုန်ညောန် မၞုံကဵုစိုတ်မစာ်စ္ဍးနူ “နဳဝရဏ” ကၟာတ်လဒဵု မၞုံကဵုစိုတ်မြဟ်တိုန် မၞုံကဵုစိုတ်မလျုၚ်ဇြုၚ်သ္ဍိုက် ပ္ဍဲအနာထပိဏ္ဍိကသေဌဳဂှ် ထ္ၜးကဵု ‘ဒုက္ခသစ္စ’ ဒဒိုခ်ကီု ‘သမုဒယသစ္စ’ ဟိုတ်ဒဒိုခ်ကတဵုဒှ်ကီု ‘နိရောဓသစ္စ’ အရာဒဒိုခ်ပၠိုတ်ကီု ‘မဂ္ဂသစ္စ’ ဂၠံၚ်တရဴဒှ်ဟိုတ်အာစိုပ်အရာဒဒိုခ်ပၠိုတ်ကီု မဒှ်ဓရ်ဒေသနာ ‘သာမုက္ကံသိက’ မတီညာတ်ဓမံက်ပတိတ် အလဵုဇကုကျာ်ဂမၠိုၚ်ရ။ ယာတ်ဗုသအး မစာ်စ္ဍးနူကမၠိကၠိခ္ဍက်ဂှ် သၟဟ်ညံၚ်ရဴဒုၚ်ဂိုၚ်ကေတ်ဍာ်လွံက် ဗွဲမဒးရးကီု တုပ်တဴသာ်ဂှ်ရ ပ္ဍဲဒၞာဲဂှ်ဟေၚ် “ဓရ်အိုတ်သီု မၞုံသဘဴပွမကတဵုဒှ်ဂှ် မၞုံသဘဴပၠိုတ်ရ” ရဴဝွံ ‘သောတာပတ္တိမဂ်ဉာဏ်’ မတ်ဓရ် မဟွံမွဲကဵုမၠိုက် မစာ်စ္ဍးနူကၠိုက်လ္ၚေၚ်ကိလေသဂှ် ကတဵုဒှ် ကုအနာထပိဏ္ဍိကသေဌဳရ။
ပ္ဍဲအခိၚ်ဂှ် အနာထပိဏ္ဍိကသေဌဳ ညာတ်ကေတ်ဓရ်တုဲဂှ်ဒှ်တုဲ အာစိုပ်ဓရ်တုဲဂှ်ဒှ်တုဲ တီကေတ်ဓရ်တုဲဂှ်ဒှ်တုဲ တၞီလုပ်အာဓရ်တုဲဂှ်ဒှ်တုဲ ကလိလောန်အာ သၠေဟ်ပၟာတုဲဂှ်ဒှ်တုဲ စာ်စ္ဍးချပ်သၠေဟ်ပၟာ သာ်တေံဟာ, သာ်ဏအ်ဟာတုဲဂှ်ဒှ်တုဲ အာစိုပ်ဂံၚ်သကာ (သက်လှက်) ပ္ဍဲသာသနာကျာ်တြဲတုဲဂှ်ဒှ်တုဲ ဟွံမွဲကဵုညးလျုၚ်ပတှ်ေ မသအာၚ်နူကျာ်ဂှ်ဒှ်တုဲ—
“ယွံတဳလမၞုံပိုဉ် (ဓရ်ဂှ်) ထေက်ကဵုသ္ဍိုက်မၠိုက်လောန်ရ၊ ယွံတဳလမၞုံပိုဉ် (ဓရ်ဂှ်) ထေက်ကဵုသ္ဍိုက်မၠိုက်လောန်ရ၊ ဗွဲဥပၟာမ္ဂးတုန် ဝတ္ထုဗကပ်စွံလဝ်ဂှ် သၟဟ်ညံၚ်ရဴဂတးလ္ၚာကဵုကီု ဝတ္ထုဂြောပ်ဗ္ဒန်လဝ်ဂှ် သၟဟ်ညံၚ်ရဴပံက်ထ္ၜးကဵုကီု ကုညးမတ်ဂေတ်တၠိၚ်ဂၠံၚ်ဂှ် သၟဟ်ညံၚ်ရဴဟီုလဴကဵုဂၠံၚ်ဍာန်ဍာံစၟတ်ကီု “ညးမၞုံကဵုမတ်မညာတ်ဂမၠိုၚ်ဂှ် ကြက်ဂွံညာတ်ကေတ် ရုပ်သာ်ဂမၠိုၚ်အိုတ်ရ” ရဴဝွံ ပ္ဍဲတိုက်ဒမၠုဂှ် သၟဟ်ညံၚ်ရဴစံၚ်ဗဂဵုကဵု ပၟတ်ကၠေၚ်သ္ဍဴကီု တုပ်သၟဟ်သာ်ဂှ်ဟေၚ်ရ တဳလမၞုံပိုဉ်ဂှ် နကဵုဟိုတ်တၞဟ်တၞဟ် တွံထ္ၜးကဵုဓရ်ရ၊ ယွံတဳလမၞုံပိုဉ် အဲဍိက်ဂှ် ပြာပ်ခသ္ပစ္ၜုဲစ္ၜော် သကအ်ဗ္ဒကဵု တဳလမၞုံပိုဉ်ကျာ်တြဲရ၊ ဓရ်ဂှ်လေဝ် ပြာပ်ခသ္ပစ္ၜုဲစ္ၜော် သကအ်ဗ္ဒရ၊ သၚ်ဂှ်လေဝ် ပြာပ်ခစ္ၜုဲစ္ၜော် သကအ်ဗ္ဒရ၊ ယွံတဳလမၞုံပိုဉ် တဳလမၞုံပိုဉ်ဂှ် သ္ပတမ်နူတ္ၚဲဝွံတုဲ စဵုကဵုလအိတ်လမျီု အဲဍိက်ဂှ် ဥပးပြာပ်ခ သ္ပစ္ၜုဲစ္ၜော်သကအ်ဗ္ဒ ရဴဝွံ ဩဝ်ဂိုၚ်သမ္တီလဝ်ညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
ယွံတဳလမၞုံပိုဉ် သွက်တ္ၚဲယး တဳလမၞုံပိုဉ်ကျာ်တြဲ မွဲဟာန်ကေုာံခမဳသၚ် ဩဝ်ဒုၚ်တဲပိဏ္ဍပါတ် အဲဍိက်ညိကျာ် ရဴဝွံ (ဂရၚ်ပတီ)။ တဳလမၞုံပိုဉ်ကျာ်တြဲ နမဒၟံၚ်သ္ၚိတ်သ္ၚိတ်ဂှ် ဒုၚ်ကေတ်ရ။
ပ္ဍဲအခိၚ်ဂှ် အနာထပိဏ္ဍိကသေဌဳ တီကေတ် တဳလမၞုံပိုဉ်ကျာ်တြဲ ဒုၚ်တဲတုဲ ဒၠိုက်ကတဵုနူဒၞာဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ သ္ပရှေ်သှေ်ရဴဂဴတုဲမ္ဂး ပါဲစ္ဍးအာရ။ သေဌဳရာဇဂြိုဟ်ဂှ် “အနာထပိဏ္ဍိကသေဌဳဂှ် သွက်တ္ၚဲယးတေံ ဘိက်နိမန်လဝ် သၚ်မၞုံပဓါန်ဍေံကျာ်တြဲရဂး” ရဴဝွံ သ္ဂောံမိၚ်ကေတ်ရ။
၃၀၆။ ပ္ဍဲအခိၚ်ဂှ် သေဌဳရာဇဂြိုဟ်ဂှ်—
“ယွံသေဌဳ သွက်တ္ၚဲယးတေံ တၠအဲ ဘိက်နိမန်လဝ် သၚ်မၞုံပဓာန်ဍေံကျာ်တြဲရ၊ (ၜိုန်ဂှ်) တၠအဲတုန် ဒှ်ကၟုဲထဳရ၊ ယွံသေဌဳ ကဵုညးဘိုၚ်ကမၠောန်မွဲစွံ ကုတၠအဲရ၊ နကဵုဘိုၚ်ကမၠောန်မွဲစွံဂှ် တၠအဲ ကၠောန်ၜိုတ်ပိဏ္ဍပါတ် ကုသၚ်မၞုံပဓာန်ဍေံကျာ်တြဲမာန်ရ” ရဴဝွံ သ္ဂးရ။
ယွံသေဌဳ ဟွံမွဲပၟိက်ရ၊ ညးဘိုၚ်ကမၠောန် နွံကုအဲရ။ နကဵုညးဘိုၚ်ကမၠောန်မွဲစွံဂှ် အဲကၠောန်ၜိုတ်ပိဏ္ဍပါတ် ကုသၚ်မၞုံပဓာန်ဍေံကျာ်တြဲရ ရဴဝွံ သ္ဂးကဵုအနာထပိဏ္ဍိကသေဌဳရ။
သေဌဳနိဂီု ပဒတဴဍုၚ်ရာဇဂြိုဟ်ဂှ် “အနာထပိဏ္ဍိကသေဌဳဂှ် သွက်တ္ၚဲယးဂတတေံ ဘိက်နိမန်လဝ် သၚ်မၞုံပဓာန်ဍေံကျာ်တြဲရဂး” ရဴဝွံ သ္ဂောံမိၚ်ကေတ်ရ။ ပ္ဍဲအခိၚ်ဂှ် သေဌဳနိဂီု ပဒတဴ ဍုၚ်ရာဇဂြိုဟ်—
“ယွံသေဌဳ သွက်တ္ၚဲယးတေံ တၠအဲ ဘိက်နိမန်လဝ် သၚ်မၞုံပဓာန်ဍေံကျာ်တြဲရ၊ (ၜိုန်ရ) တၠအဲတုန် ဒှ်ကၟုဲထဳရ၊ ယွံသေဌဳ ကဵုညးဘိုၚ်ကမၠောန်မွဲစွံ ကုတၠအဲရ၊ နကဵုညးဘိုၚ်ကမၠောန်မွဲစွံဂှ် တၠအဲ ကၠောန်ၜိုတ်ပိဏ္ဍပါတ် ကုသၚ်မၞုံပဓာန်ဍေံကျာ်တြဲမာန်ရ” ရဴဝွံ သ္ဂးရ။
ယွံသေဌဳ ဟွံမွဲပၟိက်ရ၊ ညးဘိုၚ်ကၠောန်ကမၠောန် နွံကုအဲရ။ နကဵုညးဘိုၚ်ကၠောန်ကမၠောန်မွဲစွံဂှ် အဲ ကၠောန်ၜိုတ်ပိဏ္ဍပါတ် ကုသၚ်မၞုံပဓာန်ဍေံကျာ်တြဲရ ရဴဝွံ သ္ဂးကဵုအနာထပိဏ္ဍိကသေဌဳရ။
သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးဂှ် “အနာထပိဏ္ဍိကသေဌဳဂှ် သွက်တ္ၚဲယးတေံ ဘိက်နိမန်လဝ် သၚ်မၞုံပဓာန်ဍေံကျာ်တြဲရဂး” ရဴဝွံ သ္ဂောံမိၚ်ကေတ်ရ။ ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးဂှ်—
“ယွံသေဌဳ သွက်တ္ၚဲယးတေံ တၠအဲ ဘိက်နိမန်လဝ် သၚ်မၞုံပဓာန်ဍေံကျာ်တြဲရ၊ (ၜိုန်ဂှ်) တၠအဲတုန် ဒှ်ကၟုဲထဳရ၊ ယွံသေဌဳ ကဵုညးဘိုၚ်ကမၠောန်မွဲစွံ ကုတၠအဲရ၊ နကဵုညးဘိုၚ်ကမၠောန်မွဲစွံဂှ် တၠအဲ ကၠောန်ၜိုတ်ပိဏ္ဍပါတ် ကုသၚ်မၞုံပဓာန်ဍေံကျာ်တြဲမာန်ရ” ရဴဝွံ သ္ဂးကဵုအနာထပိဏ္ဍိကသေဌဳရ။
ယွံသၟိၚ်ဇၞော် ဟွံမွဲပၟိက်ရ၊ ညးဘိုၚ်ကၠောန်ကမၠောန် နွံကုအဲရ။ နကဵုညးဘိုၚ်ကၠောန်ကမၠောန်မွဲစွံဂှ် အဲ ကၠောန်ၜိုတ်ပိဏ္ဍပါတ် ကုသၚ်မၞုံပဓာန်ဍေံကျာ်တြဲရ ရဴဝွံ သ္ဂးရ။
ပ္ဍဲအခိၚ်ဂှ် အနာထပိဏ္ဍိကသေဌဳဂှ် ဗတမ်ဂှ်လောန်ၜက်အာတုဲ ကဵုစဳရေၚ်စၞအာဟာရ ဘောဇိုန်မပြဲပြဲ ပ္ဍဲသ္ၚိသေဌဳရာဇဂြိုဟ်တုဲ ‘ယွံတဳလမၞုံပိုဉ် ဒးအခိၚ်ရ၊ ပဠေဝ်ပဠေတ်ပိဏ္ဍပါတ်တုဲရ’ ရဴဝွံ ကဵုဂရၚ်ပတီ ဒးအခိၚ်ကဵုပိုဉ် ကုတဳလမၞုံပိုဉ်ကျာ်တြဲရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပ္ဍဲအခိၚ်နူဂယး ဗိုက်ပဠေဝ်ပဠေတ်သ္ၚာတုဲ သီုမထ္ၜဂိုၚ်ရပ်ကေတ်ဗဗေၚ်သ္ၚာဂှ် က္ညပြာပ်စဴအာသ္ၚိ သေဌဳရာဇဂြိုဟ်တုဲမ္ဂး ဂဇအ်ဒၟံၚ်ပ္ဍဲသၞာမလးပညပ်လဝ်ဟေၚ် မွဲဟာန်ကေုာံခမဳသၚ်ရ။
ပ္ဍဲအခိၚ်ဂှ် အနာထပိဏ္ဍိကသေဌဳ နကဵုစၞအာဟာရ ဘောဇိုန်မပြဲပြဲ အလဵုဇကုကၠောန်ၜိုတ်ဥပကာ တြာပ်ဖာပ်ဗ္စ ခမဳသၚ်မၞုံပဓာန်ဍေံ တဳလမၞုံပိုဉ်ကျာ်တြဲ စဵုကဵုတရိုပ်ကဵုစိုတ် စဵုကဵုဒးဆေဝ်တာပဒေါအ်ကၠေံတုဲမ္ဂး တဳလမၞုံပိုဉ်ကျာ်တြဲ ကဵုပိုန်တုဲ ပ္ဍဲအခိၚ်ပါဲကၠေံတဲ နူဗဗေၚ်တုဲဂှ် ဂဇအ်ဒၟံၚ်ပ္ဍဲဒၞာဲမွဲတုဲ—
“ယွံတဳလမၞုံပိုဉ် တဳလမၞုံပိုဉ်ကျာ်တြဲ မွဲဟာန်ကေုာံသၚ် ဩဝ်ဒုၚ်တဲ ပွမပြာပ်လုပ်ဒဂိုန် ပ္ဍဲဍုၚ်သာရဝှ် အဲဍိက်ညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။ ယွံသေဌဳ ကျာ်တြဲဂမၠိုၚ် မိပ်လဟိၚ် ပ္ဍဲဌာန်သ္ၚိတ်ဇြအိုတ်ရ ရဴဝွံ (သ္ဂးရ)။ ယွံကျာ်မပတၠပိုဉ်တြဴပြကာ တီတုဲရ၊ ယွံကျာ်မက္ညကၠုၚ်ခိုဟ်ဆာဲ တီတုဲရ ရဴဝွံ (ဂရၚ်ပတီရ)။
ပ္ဍဲအခိၚ်ဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုအနာထပိဏ္ဍိကသေဌဳ တီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲဒှ်တုဲမ္ဂး ဒၠိုက်ကတဵုနူဒၞာဲတုဲ ပါဲစ္ဍးအာရ။
၃၀၇။ ပ္ဍဲအခိၚ်ဂှ် အနာထပိဏ္ဍိကသေဌဳ ဒှ်ညးမိတ်ပြဝါဂမၠိုၚ် ဒှ်ညးသကအ်ပွံၚ်ဂၠိုၚ် ဒှ်ညးဩဇအာဏာဇၞော်ရ၊ ဒှ်ညးကလၚ်ကေတ်ဂလာန်ညးဂၠိုၚ်ရ။
ပ္ဍဲအခိၚ်ဂှ် အနာထပိဏ္ဍိကသေဌဳ ကဵုစိုပ်ဒတုဲကၠေံ ကမၠောန်ကေၚ်ကာ ပ္ဍဲဍုၚ်ရာဇဂြိုဟ်တုဲ ပါဲစ္ဍးအာဍုၚ်သာရဝှ်ရ။ ကြဴနုဂှ် အနာထပိဏ္ဍိကသေဌဳဂှ် “ယွံနာဲတအ် မၞးတအ်ညးဂမၠိုၚ် ဩဝ်ကၠောန်ခၞံ အာရှာမ်ဂမၠိုၚ်အိုတ်ညိ၊ ဩဝ်ကဵုပတန် ဘာဂမၠိုၚ်အိုတ်ညိ၊ ဩဝ်ကဵုကတဵုဒှ် ဒါန်ဂမၠိုၚ်အိုတ်ညိ၊ ပ္ဍဲလောကဝွံ ကျာ်တြဲကတဵုဒှ်ရ၊ အဲ ဘိက်နိမန်နၚ် တဳလမၞုံပိုဉ်ကျာ်တြဲဂှ်ရ၊ ကြက်က္ညုၚ် နကဵုဂၠံၚ်တရဴဝွံရ” ရဴဝွံ ဖအောဝ်စကာ မၞိဟ်ဂမၠိုၚ် ပ္ဍဲအကြာဂၠံၚ်တရဴရ။
ပ္ဍဲအခိၚ်ဂှ် မၞိဟ်ဂမၠိုၚ် အနာထပိဏ္ဍိကသေဌဳ မဂပ်ဝ်ဖအောဝ်ဗတိုက်ဂှ်ဒှ်တုဲ ကဵုကၠောန်ခၞံအာရှာမ်ဂမၠိုၚ်အိုတ်ရ၊ ကဵုပတန် ဘာဂမၠိုၚ်အိုတ်ရ၊ ကဵုကတဵုဒှ် ဒါန်ဂမၠိုၚ်အိုတ်ရ။ ပ္ဍဲအခိၚ်ဂှ် အနာထပိဏ္ဍိကသေဌဳ အာစိုပ်ဍုၚ်သာရဝှ်တုဲ ဂေတ်ဗဵုသ္ၚေဝ်ရံၚ် ပ္ဍဲပွဳပွူဍုၚ်သာရဝှ်ရ။
“မုရဴ ပ္ဍဲဌာန်မွဲ ထေက်ကဵုတဳလမၞုံပိုဉ်ကျာ်တြဲ သ္ပဒတဴရော?၊ ဌာန်ဂှ် နူကွာန်လေဝ် ဟွံသ္ၚောဲလောန် ဟွံကြပ်လောန်ရ၊ ဒးဍိုက်ပေၚ်ကဵုဂၠံၚ်အာဂၠံၚ်ကၠုၚ်ရ၊ ကုညးမိက်ဂွံဗဵုလ္ၚောဝ်ကျာ် ညးမိက်ကလၚ်ပၚ်မှိၚ်ဓရ်ဂမၠိုၚ်လေဝ် သွက်ဂွံအာစိုပ်ဒးလောဲသွာရ၊ ပ္ဍဲအခိၚ်တ္ၚဲ ဟွံနှဴရဴတ္ၜန်တ္ၜောဲကေုာံမၞိဟ် ပ္ဍဲအခိၚ်သဝ်တ္ၚဲလေဝ် ဗရုရမျာၚ် ဒးအောန်သာရ၊ ဗရုရမျာၚ် က္ညာၚ်ကရေဲဍုၚ်ကွာန် ‘ဗရုရမျာၚ်ရုသံၚ် ထအဴကၠံၚ်’ လေဝ် ဟွံမွဲရ၊ ဟွံမွဲကဵုသၟူအမြာဲမၞိဟ် ‘စာ်စ္ဍးနူသၟူအမြာဲမၞိဟ်ဂမၠိုၚ်’ရ၊ ဌာန်ထေက်ကဵု သ္ပတဴကမၠောန်ပွပၞုက်ဓလုက်မၞိဟ်ဂမၠိုၚ် ဗဗွဲကဵုတၞဟ်နသတၚ်တန်တဴလေဝ်ဒှ်ရ” ရဴဝွံ ကသပ်ဒှ်ရ။
အနာထပိဏ္ဍိကသေဌဳ ညာတ်ဒး ဥဒျာန်ကောန်သၟိၚ်ဇေတ မဟွံသ္ၚောဲလောန် ဟွံကြပ်လောန်ကဵုကွာန် မဍိုက်ပေၚ်ကဵုဂၠံၚ်အာဂၠံၚ်ကၠုၚ် ကုညးမိက်ဂွံဗဵုလ္ၚောဝ်ကျာ် ညးမိက်ဂွံကလၚ်ပၚ်မှိၚ်ဓရ်ဂမၠိုၚ်လေဝ် မအာစိုပ်လောဲသွာ ပ္ဍဲအခိၚ်တ္ၚဲ ဟွံနှဴရဴတ္ၜန်တ္ၜောဲကေုာံမၞိဟ် ပ္ဍဲအခိၚ်သဝ်တ္ၚဲလေဝ် ဗရုရမျာၚ်မအောန်သာ မဟွံမွဲကဵုဗရုရမျာၚ်က္ညာၚ်ကရေဲဍုၚ်ကွာန် ‘ဗရုရမျာၚ်ရုသံၚ် ထအဴကၠံၚ်’ မဟွံမွဲကဵုသၟူအမြာဲမၞိဟ် ‘မစာ်စ္ဍးနူသၟူအမြာဲမၞိဟ်ဂမၠိုၚ်’ မထေက်ကဵုတၞဟ်နသ္ပတဴကမၠောန် ပွပၞုက်ဓလုက်မၞိဟ်ဂမၠိုၚ် မဗဗွဲကဵုတၞဟ်နသတၚ်တန်တဴတုဲ ပ္ဍဲကြဴပြာပ်အာဇရေၚ် ကောန်သၟိၚ်ဇေတတုဲ “ယွံကောန်နာဲ သွက်ဂွံကၠောန်ခၞံအာရှာမ် ဥဒျာန်တၠအဲဂှ် ဩဝ်ကဵုကုအဲညိ” ရဴဝွံ သ္ဂးကဵုကောန်သၟိၚ်ဇေတရ။ ယွံသေဌဳ နပွမလးတဴ စဵုကဵုဂတှေ်သြန် ရၚ်သကအ်စုက်ဒးဂှ် ထေက်ကဵုကဵုအာရှာမ်ရ ရဴဝွံ (သ္ဂးရ)။ ယွံကောန်နာဲ ဂိုၚ်ကေတ်အာရှာမ်တုဲဒှ်တုဲရ ရဴဝွံ (သ္ဂးရ)။ ယွံသေဌဳ ဟဂွံဂိုၚ်ကေတ်အာရှာမ်ဏီရ ရဴဝွံ (သ္ဂးရ)။ “ဂပ်ဝ်ဂိုၚ်ကေတ်ဟာ ဟဂပ်ဝ်ဂိုၚ်ကေတ်ဟာ” ရဴဝွံ သၟာန်အမာတ်ဇၞော် ညးသ္ဂုတ်သွာတ်ဓရ်ဂမၠိုၚ်အိုတ်ရ။ အမာတ်ဇၞော်ဂမၠိုၚ် “ယွံကောန်နာဲ တၠအဲ ဟိုတ်မသပိုတ်ၚုဟ်တုဲဒှ်ဂှ်ရ ဂပ်ဝ်ဂိုၚ်ကေတ်အာရှာမ်ရ” ရဴဝွံ သ္ဂးအိုတ်ရ။ ပ္ဍဲအခိၚ်ဂှ် အနာထပိဏ္ဍိကသေဌဳ ကဵုဇက်ပတိတ်နၚ်သြန် နကဵုကွဳဂမၠိုၚ်တုဲ သကဵုလးတဴ တိအာရှာမ် ကောန်သၟိၚ်ဇေတ နပွမလးစဵုကဵုစုက်ဒးဂတှ်ေသြန်ရၚ်သကအ်ရ၊ သြန်မဇက်ပတိတ်နၚ်မွဲအလန်ဂှ် ဟွံရုမ်ဂပ် ကုဌာန်ပွဳပွူမုက်ထော်တြၚ်ဗၞတ်ညိနာၚ်ရ။ ပ္ဍဲအခိၚ်ဂှ် အနာထပိဏ္ဍိကသေဌဳ “ယွံသကအ်တအ် ဩဝ်အာအိုတ်ညိ၊ ဩဝ်ရၚ်တၠုၚ်သြန်အိုတ်ညိ၊ ကြက်လးကၠေံ ဌာန်ဝွံရ” ရဴဝွံ သီုမဟီုသ္ဂး ဖအောဝ်ဗလးမၞိဟ်ဂမၠိုၚ်ရ။ ပ္ဍဲအခိၚ်ဂှ် “သေဌဳဝွံ သၠးပွးကၠေံ သြန်မဂၠိုၚ်ဂၠၚ်ဗၞတ်ဂှ်ရ၊ ကမၠောန်ဝွံ ကြက်ယုတ်သဝ်ဟွံသေၚ်ရ” ရဴဝွံ ကသပ်ဒှ်ကၠုၚ် ကုကောန်သၟိၚ်ဇေတရ။ ဟိုတ်ဂှ်ရ “ယွံသေဌဳ ဟွံမွဲပၟိက်ရ၊ လ္ပလးဌာန်ဂှ်ရ၊ ဌာန်ဂှ် ဩဝ်ကဵု ကုအဲညိ၊ ဒါန်ဂှ် ကြက်ဒှ်ဒါန်အဲရ” ရဴဝွံ သ္ဂးကဵုအနာထပိဏ္ဍိကသေဌဳရ။
ပ္ဍဲအခိၚ်ဂှ် အနာထပိဏ္ဍိကသေဌဳဂှ် “ကောန်သၟိၚ်ဇေတဝွံ ပြာကဋ်ရ၊ မၞိဟ်ပြာကဋ်ရ၊ ပ္ဍဲသာသနာဝွံ ပွမလျုၚ်ဇြုၚ်သ္ဍိုက် မၞိဟ်ပြာကဋ်ဂမၠိုၚ် ရဴဝွံ မၞုံကဵုဖဵုဂၠိုၚ်ရ” ရဴဝွံ ပၠုပ်စိုတ်တုဲ ဌာန်ဂှ် ကဵုထောံ ကုကောန်သၟိၚ်ဇေတရ။ ပ္ဍဲအခိၚ်ဂှ် ကောန်သၟိၚ်ဇေတ ဖန်ဗဒှ် မုက်ထော်တြၚ် ပ္ဍဲဌာန်ဂှ်ရ။ ကြဴနူဂှ် အနာထပိဏ္ဍိကသေဌဳ ကဵုသိုၚ်ခၞံ ဘာဂမၠိုၚ် ပ္ဍဲဥဒျာန်ကောန်သၟိၚ်ဇေတရ၊ ကဵုကၠောန်သ္ပ ပြဝိုဏ်ဂမၠိုၚ်ရ၊ ကဵုကၠောန်သ္ပ မုက်ထော်တြၚ်ဂမၠိုၚ်ရ၊ ကဵုကၠောန်သ္ပ ဇြပ်ကောံဓရီုဂမၠိုၚ်ရ၊ ကဵုကၠောန်သ္ပ သ္ၚိဇရုၚ်ပၟတ်ဂမၠိုၚ်ရ၊ ကဵုကၠောန်သ္ပ ကပ္ပိယကုဋဳဂမၠိုၚ်ရ၊ ကဵုကၠောန်သ္ပ သ္ၚိဍာ်ဂမၠိုၚ်ရ၊ ကဵုကၠောန်သ္ပ စၚ်္ကြမ်ဂမၠိုၚ်ရ၊ ကဵုကၠောန်သ္ပ ဇြပ်စၚ်္ကြမ်ဂမၠိုၚ်ရ၊ ကဵုကၠောန်သ္ပ ဍာ်ကမၠိုၚ်ဂမၠိုၚ်ရ၊ ကဵုကၠောန်သ္ပ ဇြပ်ဍာ်ကမၠိုၚ်ဂမၠိုၚ်ရ၊ ကဵုကၠောန်သ္ပ သ္ၚိဇရုၚ်ပလက်ဂမၠိုၚ်ရ၊ ကဵုကၠောန်သ္ပ ဇြပ်သ္ၚိဇရုၚ်ပလက်ဂမၠိုၚ်ရ၊ ကဵုကၠောန်သ္ပ ကၟာဍာ်ဂမၠိုၚ်ရ၊ ကဵုကၠောန်သ္ပကၞာထးဂမၠိုၚ်ရ။
