၆.၁.၈။ ကဵုအခေါၚ် မပတမ်ပွမစဵုဒပ်

၃ဝ၃။ အာရှာမ်ဂှ် ဟွံမွဲကဵုအစဵုဗိုၚ်တုဲ ဗ္ၜေအ်ဂမၠိုၚ်ကီု ပြေၚ်ဂၠဴဂမၠိုၚ်ကီု ပလီုပလာ်ထောံတၞံဆုသၟတ်ဂမၠိုၚ် မဂပ်ဝ်တဵုလဝ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် တၞဟ်နစဵုဗိုၚ် ဒပ်ဂမၠိုၚ်ပိဂကူမတွံဂးဒပ်ဒုန် ဒပ်ဇၠထ္ၜိုၚ်ရရဴဝွံ (သ္ဂးရ)။ မုက်ထော်တြၚ် ဟွံမွဲဂှ်ရ တုပ်သၟဟ်ကိုပ်ကၠာဂှ်ဟေၚ် ဗ္ၜေအ်ဂမၠိုၚ်ကီု ပြေၚ်ဂၠဴဂမၠိုၚ်ကီု ပလီုပလာ်ထောံ တၞံဆုသၟတ်ဂမၠိုၚ် မဂပ်ဝ်တဵုလဝ်အိုတ်ရ။ ယွံခမဳတအ် ကဵုအခေါၚ်မုက်ထော်တြၚ်ကီု တြၚ်ဇၠကီု တြၚ်ဗစိပ်ကီု တိုၚ်တုရိုဏ်ကီုရ ရဴဝွံ (သ္ဂးရ)။ ပ္ဍဲမုက်ထော်တြၚ်ခၞိက်ချောဲ ဒတုံစှေ်ရ ။ ပ ။ ယွံခမဳတအ် ကဵုအခေါၚ် သွက်ဂွံသ္ပ ဂရိုက်တုဲ တၞဟ်နလံက်လေတ်အပ္ဍဲမ္ၚးကီု သာ်ဗုကီု သာ်လမ္စံက်ကီု ပွမသ္ပကလိတ်ကလောတ် နကဵုဆီတၟံကီု ပွမသ္ပကသဴပ္ကဴကီု ပွမသ္ပကသဴ လွာဇုက်ကီု ပွမထၟံက်လဝ်ၚေက်ကမၚ်ကရ်ကီု ပွမချူရုပ်ဒမၚ်သုၚ်ဍာ်ကီု (သရက်ပၞေတ်တဲမသုန်) ရဴဝွံ (သ္ဂးရ)။ အာရှာမ်ဂှ် ဒှ်လၟက်ရ ။ ပ ။ ယွံခမဳတအ် ကဵုအခေါၚ်တၞဟ်နဂြာတ်စုတ်တၟံ၊ ကြေဟ်ဝါန်ရ ရဴဝွံ (သ္ဂးရ)။ တၟံဝါန်ဂမၠိုၚ် ဟွံရုမ်ဂပ်အိုတ်ရ ။ ပ ။ ယွံခမဳတအ် ကဵုအခေါၚ် တၞဟ်နလးစုတ်တၟံလးရ ရဴဝွံ (သ္ဂးရ)။ ဍာ်ခၠိုၚ်ဍာ်မၚ်ဒၟံၚ်ရ ။ ပ ။ ယွံခမဳတအ် ကဵုအခေါၚ် ပၠံၚ်ပတိတ်ဍာ်ရ ရဴဝွံ (သ္ဂးရ)။

ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံသေနိယ တၠညးမဂဓရး မိက်ကဵုသိုၚ်ခၞံ ပြာသာဒ် မလံက်လေတ်အၚ်္ဂဒဵုတိကမၠေတ် တၞဟ်နဖဵုသၚ်ရ။ ပ္ဍဲအခိၚ်ဂှ် “တဳလမၞုံပိုဉ်ကျာ်တြဲဂှ် မုရဴစၟဳမွဲဂပ်ဝ်ကဵုအခေါၚ်ရော?၊ မုရဴစၟဳမွဲ မဟဂပ်ဝ်ကဵုအခေါၚ်ရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် စၟဳဂမၠိုၚ်မသုန်ဂကူမတွံဂး စၟဳဍိုတ်ကြောပ် စၟဳတၟံ စၟဳအၚ်္ဂဒဵု စၟဳချောဲ စၟဳသၠဆုရ ရဴဝွံ (သ္ဂးရ)။

❀❀❀ခဏ်ပဌမတုဲရ။❀❀❀