၅.၂။ အၚ်္ဂဗကပ်ဗဗေၚ်ဒ္စါံသာ်

ယွံခမဳတအ ကုဥပးမဍိုက်ပေၚ်တဴ ကေုာံအၚ်္ဂဂမၠိုၚ်ဒ္စါံသာ်ဂှ် ဒးဗကပ်ဗဗေၚ်ရ၊ (၁) သ္ပလွဳပရာ တၞဟ်နဟွံကလိဂွံလာဘ် ကုခမဳဂမၠိုၚ်ရ၊ (၂) သ္ပလွဳပရာ တၞဟ်နဂွံဒှ်လလေၚ်ဖဵု ကုခမဳဂမၠိုၚ်ရ၊ (၃) သ္ပလွဳပရာ တၞဟ်နဟွံကလိဂွံဌာန်တန်တဴဒမၠိ ကုခမဳဂမၠိုၚ်ရ၊ (၄) တ္ၜေဟ်လက် ခမဳဂမၠိုၚ်ရ၊ ဘပဠရ၊ (၅) ပါ်ဗကး ခမဳဂမၠိုၚ်ရၚ်သကအ်ရ၊ (၆) ဟီုဂရိုဟ်ကျာ်ရ၊ (၇) ဟီုဂရိုဟ်ဓရ်ရ၊ (၈) ဟီုဂရိုဟ်သၚ်ရ။ ယွံခမဳတအ် ကုဥပးမဍိုက်ပေၚ်တဴ ကေုာံအၚ်္ဂဂမၠိုၚ် ဒ္စာံသာ်ဝွံ ကဵုအခေါၚ် တၞဟ်နဗကပ်ဗဗေၚ်ရ။

ယွံခမဳတအ် ရဴဝွံ ဒးဗကပ်ဗဗေၚ်ရ၊ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—

၂၆၆။ “ယွံတဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကောန်သၟိၚ်လိစ္ဆဝဳ ဝဍ္ဎ စောတ်စောဲ တဳလပိုဉ်ဒဗ္ဗ ကောန်သၟိၚ်မလ္လ နပွမသဳလလီုလာ် သီုဟွံမွဲကဵုဟိုတ်ရ၊ ကမ်မၞုံကဵု အခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် ဗကပ်ဗဗေၚ် ကုကောန်သၟိၚ်လိစ္ဆဝဳဝဍ္ဎရ၊ သ္ပပွမဟွံဆက်ဆောမ် ကေုာံသၚ်ရ၊ ဣဝွံ ပွမကဵုတီရောၚ်။

ယွံတဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကောန်သၟိၚ်လိစ္ဆဝဳဝဍ္ဎ စောတ်စောဲ တဳလပိုဉ်ဒဗ္ဗ ကောန်သၟိၚ်မလ္လ နပွမသဳလလီုလာ် သီုဟွံမွဲကဵုဟိုတ်ရ၊ သၚ် ဗကပ်ဗဗေၚ် ကုကောန်သၟိၚ်လိစ္ဆဝဳဝဍ္ဎရ၊ သ္ပပွဟွံဆက်ဆောမ် ကေုာံသၚ်ရ၊ ယြဴကုတဳလပိုဉ်မွဲ သ္ဍိုက်မၠိုက် ပွမဗကပ်ဗဗေၚ် ကုကောန်သၟိၚ်လိစ္ဆဝဳဝဍ္ဎရ၊ ပွမသ္ပပွမဟွံဆက်ဆောမ် ကေုာံသၚ်ရ၊ တဳလပိုဉ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။

သၚ် ဂပ်ဝ်ဗကပ်ဗဗေၚ် ကုကောန်သၟိၚ်လိစ္ဆဝဳဝဍ္ဎ သ္ပပွမဟွံဆက်ဆောမ် ကေုာံသၚ်တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။

ပ္ဍဲအခိၚ်ဂှ် တဳလပိုဉ်အာနန္ဒ ပ္ဍဲအခိၚ်နူဂယး သၠောံရုၚ်လတက်ပလေဝ်သ္ၚာတုဲ ဂိုၚ်ကေတ်ဗဗေၚ်သ္ၚာတုဲမ္ဂး က္ညပြာပ်စဴအာ သ္ၚိကောန်သၟိၚ်လိစ္ဆဝဳဝဍ္ဎတုဲ “ယွံကောန်တၠဝဍ္ဎ သၚ် ဗကပ်ဗဗေၚ် ကုတၠအဲရ၊ တၠအဲ ဒှ်ညးဟွံမွဲကဵုပွမဆက်ဆောမ် ကေုာံသၚ်ရ” ရဴဝွံ ဟီုသ္ဂးကဵု ကောန်သၟိၚ်လိစ္ဆဝဳဝဍ္ဎရ။ ပ္ဍဲအခိၚ်ဂှ် “သၚ် ဗကပ်ဗဗေၚ် ကဵုအဲရဂး၊ အဲ ဒှ်ညး ဟွံမွဲကဵုပွမဆက်ဆောမ် ကေုာံသၚ်ရဂး” ရဴဝွံ (ပၠုပ်စိုတ်တုဲ) ကောန်သၟိၚ်လိစ္ဆဝဳဝဍ္ဎ ပ္ဍဲဒၞာဲဂှ်ဟေၚ် ဒၚ်သၠၚ်ဝိုတ်စိပ်အာတုဲ လောတ်စှ်ေရ။

ပ္ဍဲအခိၚ်ဂှ် မိတ်သဟာဲပြောဲဇွာ ကလောကောန်မွဲမိဂမၠိုၚ် ကောန်သၟိၚ်လိစ္ဆဝဳဝဍ္ဎဂှ် “ယွံသကအ်ဝဍ္ဎ ဟွံဗဗွဲရ၊ လ္ပဒှ်စံၚ်တူညိ၊ လ္ပလရိုအ်ယာံညိ၊ ပိုဲညးဂမၠိုၚ် ကဵုတဳလမၞုံပိုဉ်ကျာ်တြဲကီု ခမဳသၚ်ကီု ကေဝ်ဇြုၚ်အိုတ်ရ ‘ပြေစိုတ်အိုတ်’ ရ” ရဴဝွံ ဟီုကဵုကောန်သၟိၚ်လိစ္ဆဝဳဝဍ္ဎအိုတ်ရ။

ပ္ဍဲအခိၚ်ဂှ် ကောန်သၟိၚ်လိစ္ဆဝဳဝဍ္ဎ မွဲဟာန်ကေုာံကောန်သမ္ဘာ မွဲဟာန်ကေုာံမိတ်သဟာဲပြောဲဇွာဂမၠိုၚ် မွဲဟာန်ကေုာံ ကလောကောန်မွဲမိဂမၠိုၚ် သီုမၞုံကဵုယာတ်မဍုက်ဍေက် (တၟိကယျာ) သီုမၞုံကဵုသော်က္ဍိုပ်မဍုက်ဍေက် (လံက်လေတ်ကၠေၚ်ဍေဝ်) ပြာပ်ကၠုၚ်ဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်ဖျေံက္ဍိုပ် ပ္ဍဲဒၠးဇိုၚ်တဳလမၞုံပိုဉ်ကျာ်တြဲဂမၠိုၚ်တုဲ—

“ယွံတဳလမၞုံပိုဉ် အတိုၚ်မဒိုဟ်ဓီု အတိုၚ်မဝိဝိၚ် အတိုၚ်မဟွံဍိုဟ်ကေက်စဳကၠး ဒုဟ်ဓလီုဍိုက်ဒး အဲဍိက်တုဲရ။ အဲဍိက် စောတ်စောဲဒး တဳလပိုဉ်ဒဗ္ဗ ကောန်သၟိၚ်မလ္လ နပွမသဳလလီုလာ် သီုဟွံမွဲကဵုဟိုတ်ရ။

ယွံတဳလမၞုံပိုဉ် ဒုဟ်အဲဍိက်ဂှ် ဗွဲအစောံဒုဟ် တၞဟ်နဂွံသ္ၚဳလလမ်မၚ်မွဲ ပ္ဍဲကာလကြဴ တဳလမၞုံပိုဉ်ကျာ်တြဲ သြဝ်အေၚ်ဒုၚ်ညိကျာ်” ရဴဝွံ (ဂရၚ်ပတီရ)။

ယွံဒကာဝဍ္ဎ တၠအဲ ဟိုတ်မစောတ်စောဲဒး တဳလပိုဉ်ဒဗ္ဗ ကောန်သၟိၚ်မလ္လ နပွမသဳလလီုလာ် သီုဟွံမွဲကဵုဟိုတ်ဂှ် အတိုၚ်မဒိုဟ်ဓီု အတိုၚ်မဝိဝိၚ် အတိုၚ်ဟွံဍိုဟ်ကေက်စဳကၠး ဗွဲစၟတ် ဒုဟ်ဓလီုဍိုက်ဒး တၠအဲ တုဲရ။

ယွံဒကာဝဍ္ဎ တၠအဲ ယြဴဟိုတ်မွဲ ညာတ်ကေတ်ဒုဟ် ဗွဲအစောံဒုဟ်တုဲ ဇအုဲဇဗကၠေံ ဗွဲမဗဗွဲကဵုဓရ်ရ၊ ဟိုတ်ဂှ်ရ ဒုဟ်တၠအဲဂှ် ပိုဲအေၚ်ဒုၚ်အိုတ်ရ။

ယွံဒကာဝဍ္ဎ ယြဴညးမွဲ ညာတ်ကေတ်ဒုဟ် ဗွဲအစောံဒုဟ်တုဲ ဇအုဲဇဗကၠေံ ဗွဲမဗဗွဲကဵုဓရ်ရ၊ ပ္ဍဲကာလကြဴလေဝ် သ္ၚဳလလမ်မၚ်မွဲရ၊ ပွမသ္ပရဴဝွံ (ညးဂှ်) ဒှ်ဟိုတ်မဇၞော်မောဝ် ပ္ဍဲဒၠောံဗတောန် ဝိနယ်ကျာ်ဟေၚ်ရ ရဴဝွံ (သ္ဂးရ)။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ်—

“ယွံခမဳတအ် ဒှ်သာ်ဂှ်မ္ဂး သြဝ်ဂတးလ္ၚာဗဗေၚ် ကုကောန်သၟိၚ်လိစ္ဆဝဳဝဍ္ဎညိ၊ သြဝ်သ္ပ ပွမဆက်ဆောမ် ကေုာံသၚ်ညိ” ရဴဝွံ သ္ဂးကဵုခမဳဂမၠိုၚ်ရ။